А коста авань мороса аля пейдихть, азонцазь што „тейнза карь аф кодави, тев аф ладяви“ а стама алясь ульцява якай „авань (или стирень) шинень никссеме“.
Мокшокс эрзянь, татаронь и рузонь пейдемась и эрзякс мокшонь, татаронь и рузонь пейдемась морсевихть кувака-вайгель мороса. Синь колгаст азондоматьке кацаськ лия статьяс, кувака вайгель моротнень колга кортамати.
Мокшерзянь велеванга явондасть гармоният, сяс морсихть частушкат гармониянь-вайгяльалу. Улихть синь рузонь валса, эряхть и мокшонь и эрзянь валсонга.
Активнай од ломатьтне почти сембе комсомолсот, вов синь и эсь эрямаснон колга сиде морот морсихть. Улихть частушкат пионертнень колганга, и од эряфонь тефнень ланга. Монь кядь маласон-ащи материалста няйви, што частушкатне аф осалста и смексефть. Но сембе синь аш коза телькфнемс статьяса, книгас синь васцна.
Нюди-вайгяль алу мокшонь частушкатнень келга кортамс „Валда Ян“ ж. 2 це №-са, лятфтасаськ, кода эрзятне кизонят серихть.
„Саратовский этнографический сборник“ книгать 220-223 стр. сьормадфт, кода Синенькай-велеса (Саратовскай губ. Петровскай уезца) морсесазь не сиде-моронятнень. Мерьгихть тоса теест „лиянат“ и „вайханат“. Синь валйожосна някт кода и мокшонь моронява, анцяк „лиянань“ морамста морйотксь.
„Ой, лия, лиана аканяй! |
Мокшэрзя-йоткса лама визькс-морода морсихть и почти сембонь сиде-моронь вайгяльса. Синь-колгаст кортамска аф лад, да аф и эряви се, стадовок ламоц синь содасазь.
Тянь марта и шумордасаськ сиде моронь колга кортамать.
И. Черапкин.
