Pitla Storia bibia/6

Cain maza Abele y vën castigà da Idie.

Adam y Dieva ova giata doi fions. L prim ova inuem Cain, l auter Abele. Cain fova paur y Abele paster. Abele fova bon y valënt, ma Cain stlet y rie.

N iede ova dui doi fat n sacrifize a Chël Bel Die. Cain ova dunfrì fruc dla tiera, Abele i plu biei aniei de si pastrëc. Cun plajëi cialova Chël Bel Die sun Abele y sun si sacrifize, ma sun Cain y sun si sacrifize ne cialovel nia. Per chësc se n ova Cain tan la nvidia y fova tan dessenà, che si mus tumova ite.

Chël Bel Die à dit a Cain: "Ciuldì ies dessenà y ciuldì ie pa ti mus tumà ite? Sce tu fejes dl bën, giaperes ti premia; ma sce te fejes dl mel, sarà prësc l castich dan ti porta! Vënc la pascion de fé picià y fé sté sot a té ti rie idea!"

Ma Cain ne scutova nia su a Chël Bel Die. N di àl dit a si fra: "Vie, jon ora deberieda sula campagna!" Canche i fova laora, ie Cain sautà ite a si fra Abele y l à mazà.

Po' à dit Chël Bel Die a Cain: "Ula ie pa ti fra Abele?" Y Cain a respundù: "Ie ne sé nia, ie. Sons ie fosc l paster de mi fra?"

Idie à dit a Cain: "Cie es mei fat? L sanch de ti fra chërda vendëta dala tiera nfina su da mé al ciel. Davia de chël sares maledì sula tiera! Y sce tu lëures nce la campagnes, ne te purterales degun fruc. Tu po' jires muciadif ncantëur sun chësc mond!"

Cain finalmënter se n ie jit demez da Chël Bel Die y zënza giapé pesc fovel muciadif da dut. "Idie paierà uniun segondo si opres."