Pitla Storia bibia/N15

Gejù chieta la burasca sul mer

N di fova Gejù jit ora dlongia l lech de Genesaret. Iló s'ova abinà na fola de jënt ntëur ël ite. Gejù ie jit ite te na barca y se à sentà ju; ma la jënt ie stata dedora sun ëur dl lech mpo. Dala barca ora nseniova śën Gejù l popul.

Canche l fova sul danterëures, à dit Gejù a si sculeies: "Tulon la barca y jon via per l mer!"

Chisc tol la barca, ulache fova Gejù la ite, y pea via per l lech.

Nce d'autra barches furnova pea. Gejù stanch y stuf dala fadies dl di se à pendù ju y se à ndurmenzà.

Eco te n iede s'arleva na burasca sul lech y l'ondes dl mer sautova tan ite per barca, che la se mpleniva d'ega. Ma Gejù durmiva. I sculeies de Gejù ova pià ite n gran spavënt; ëi va debota da Gejù y l chërda y disc "Seniëur, judenes, nëus jon perdui!"

Gejù à dit ad ëi: "Percie ve temëisa, uemes de puecia fede?"

Te chëla iel levà su y à cumandà ai vënc y al mer, y l ie deventà na bunacia.

La jënt se fajova śën marueia y dijova: "Chi ie pa chësc, che nchina mei i vënc y l mer i fej al sënn?"