Reynke de Vos/Beslut und Affrede Thom Leser

Beslut und Affrede Thom Leser

Besluthlick ys tho mercken, wo ock vorhen angetagen, dat dyth Bock van Reynken vornemlick darumme gemaket, dat men wyßheyt und vorstandt daruth leren, dat quade vormyden unde dat gude don schöle, Is derwegen vull leefflyker wordt unde köstlyker rede, wordorch de Poeta der vornufft de wyßheit und vorsychticheyt hefft wyllen vorbylden dorch gelicknisse und rede der Deerte und Vögel und dat umme dryerley orsake wyllen:

Thom Ersten, Dat de Poeta orsake hedde dat yenne uththospreken, so he ym gemöte bedacht, averst befaringe und forchte halven under syner persone nicht apenbar dorffte, Thom Andern Umme kortewyle tho gebruken, den Leser lustich und begerich tho maken, Dann so ein vorstendyger solcke Fabulen lest, erlanget he wyßheyt und scharpet syn vorstant daruth, Thom Drüdden, Dath de Jöget Fabulen und Exempel tho lerende genegeder und er leefflick tho hörende, Dartho dorch antöginge der Deerte natur und Figuren ock wol tho beholdende synt, Und wowol se solcke Fabulen nicht grüntlick vornemen mach, so ys ydt er doch, wen se in vornufft thonympt, vorderlick, und wert des yndechtich, wat se vorhen gelesen und dorch de Figuren ingenamen hefft, Und solckes mach er dann tho groter vornufft und tho erholdinge Eeren und gudes fruchtbarlick denen.

Ein vornufftiger kan ock in dessem Boke mennigerley gebruck der ytzigen Werlt beyde thom guden und quaden vynden, So he hyrinne mit upmerckinge des synnes flitich lest, Dartho vele ungelückes vorkamen und syn beste vorschaffen. Averst wol nicht bedencket, wat de Poeta hyrmit gemeint hebbe, de ys gelick eynem blinden, de eynen unbekanden wegh gheyt. Wente dyt Bock hefft twyerley vorstandt: De eyne ys apenbar, wo de Historia der Fabulen in syck ludet, De ander ys vorborgen, daryn ys de vorstandt und gebruck vorfatet, Und ys gelick eyner Nott; de ys nen nütte, se werde dan upgebraken und dath bynnenwendygeste vorborgen deel gesmekket.

Derwegen schal ein yder Leser flith vorwenden, dath he datsülvige, wat he lest, gründtlick vorstan möge. Dann ein vorstendich unde bedachtsam lesent bringet eynen Man tho noch beterem vorstande, Und ein vorstendyger schal stedes mit wyßheyt ummeghan. Dan de mennichfoldicheyt der kunst vorlüchtet des mynschen vorstandt gelick alse de Sonne des Vüres. Und inn den ende wyl ick, günstiger Leser, dath Böck Plutarchi van dem Gemeinen besten in Sassyscher sprake dy tho nütte uppet baldeste ock vorferdygen Und ytzundt dem Almechtigen (welckerem sy ewich loff, Eere und pryß) dy hyrmit bevalen hebben.

In der lavelyken Stadt Rozstock
by Ludowich Dyetz gedruckt:
Na der gebordt Christi, unses Heren,
Dusent Vyffhundert negenunddörtich
Am ersten dage Octobris.