Reynke de Vos/Dat Veerde Bok. Dat Elffte Capittel

Dat Veerde Bok. Dat Elffte Capittel

In dessem Capittel mercke twe stücke.

Thom Ersten. Uth dessem Capittel wert anfencklick gelert, dat Reynke sampt synem gantzen geslechte, dat ys alle hynderlistige valsche untruwe und lose Vosswentzer und Spytzhöde, allenthalven in der werlt und vornemlick by Have ym Regimente gemeine und averflödich vorhanden. Und solcke bößlistige Fynantzer werden vornemlick vorgetagen (wo ock hyr Reynke vam Köninge tho groten Eeren vorhaven), wyß, erfaren unde scharpsynnich geachtet, Welcker ock balde eynen nouwen radtslag (gelick Reynken), spytzfündyge anslege und tückische hynderlist erfynden unde andere (ya ock ere egen guden gesellen) darmit vorfordelen und hynderghan können.

Also ein varlick unde eventürlick dinck ys ydt umme dat Hoffgesynde, dat ydt syck undereinander ock under gudem thogesechten geloven voruntruwet. Eyner grötet den andern hofflick, spyset em gude worde und gyfft em de handt (inn ein teiken der fründtschop, leve und truwe) dartho, Synt also mit hande und munde, doch ane grundt des herten, mylde na lude des gemeinen sprickwordes: »By Have gyfft men vele hende und weynich herten etc.« 

Wowol nu by den Olden Düdeschen ein handtgelöffte groth geachtet gewesen, alse dat darmit truwe und gelove ys geholden worden, Wo dan Cornelius Tacitus densülven tho lave und Eeren beschrifft, dat by en de Eere und einfoldicheyt mehr gegulden hefft alse by den Römeren de geschreven Rechte, Averst dennoch ys ytzundes alle ere beste farwe, dat ys Eere und gelove, vorwandelt und ummekert, Ock alle ere ytzige geprenge ein lutter spegelfechtent und lose Vosswentzerye, dar nichtes hynder, geworden, Dat doch nicht weynich tho beklagen und ock wol bitter tho reden ys. Henßelyn spreckt:

»De syn wordt nicht hölt by macht,
Den dagh uthkeset vor de nacht,
Vor sünde unde schande syck nicht wacht,
Ein Here, de Segel unde Breve nicht acht,
Den Buwer nicht leth by syner Pacht,
Sunder baven plycht und recht uplacht,
Baven recht gebruket gewalt unde macht,
Vor wyßheyt uthkeset de Hasen-Jacht,
De sorge, möye und sware dracht,
Der wedewen unde weysen grote unmacht,
Ock dersülven weynent nicht betracht
Nicht flitich höret der armen klacht,
Syne Eere und Ehe mit truwen nicht wacht,
Syne nabere geringe und kleine acht,
Wat na mach kamen, nicht vorbedacht,
De güdicheyt Gades wo mennichfacht,
De en tho State und Eeren hefft gebracht,
Vorware und anders nemandes macht:
So dyt nicht alle wert wol betracht,
Hefft gelove, Eere und wolfart gude nacht.«

Tom Andern. So dan Reynke in der Försten und Heren Häve de angenemeste und mechtigeste ys, wo hyr wert gemeldet, also dat he alle radent, dont und latent, ydt schade effte bate, in syner macht hebbe, Wor wyl dann de Rechtferdicheyt, welckerer handthaver, beschütter unde vullenbringer de Försten und Heren ludt eres Amptes syn schölen, faren und blyven? Dan ym Richtende schal men nemande int angesychte sehen, sunder alle dinck schölen na der Rechtferdicheyt vullenbracht werden. Dartho so kan des gerechten Rechtferdicheyt nicht vordrücket noch des Barmhertigen Barmherticheyt vorswegen werden, wo heimlick de ock gescheen, Gelick alse so men Ambra in einen doeck vorbyndet; dennoch vorleth se eren guden roeck nicht van syck tho gevende. Henselyn spreckt:

«Rechtferdicheyt ys so groth eyne döget,
Dat Godt ane de nemande vorhöget.
Rechtferdicheyt moth eyn ytzlick vullenbringen
Beyde in groten und in kleinen dingen.
Doch lyck und recht, gebüth Godt de Here,
Van der Rechtferdicheyt dy nümmer kere.
Gyff Gade, dat du em schüldich byst,
Und allen mynschen, ane arge lyst.
Sündyget dyn even mynsche yegen dy,
Dat dennoch dat Recht gemetiget sy
Mit Barmherticheyt und leve voreint:
Dat ysset, dat hyr wert gemeint.
De in dem Rechte socht de högeste sake,
Dat ys nicht Rechtferdicheyt sunder wrake.
Wultu hebben ewichlick Gades hülde,
So mostu vorgeven solcke schülde,
Wolde Godt strenge rechtferdicheyt mit uns bruken,
So worde noch wol vele mehr de Helle vorsluken.
Wy bydden ym Pater noster, mercke even,
Dat uns Godt also wylle vorgeven
Unse schülde, gelick alse ock don wy.
Godt ys rechtferdich und barmhertich darby.
Mercke: wor nu strenge Recht wert betenget,
Dat schal stedes mit barmherticheyt syn vormenget.