Se̿ng-géng/Mǎ-tuo̿i Hŭ-éng/1
[ 5 ]
Di̿ 1 Cióng.
- Ngā-bă-là-hǎng gâ̤ hē-dō, Duōi-pĭ gâ̤ gṳ̌ing-só̤ng, Iǎ-Sú Gí-Dŭ gâ̤ cǔ-bù gi̿ da̿u à-bíng.
- ¶ Ngā-bă-là-hǎng sǎi Ì-să; Ì-să sǎi Ngǎ-gŏ̤; Ngǎ-gŏ̤ sǎi Iǔ-duōi iáu Iǔ-duōi gâ̤ hiáng-dī;
- Iǔ-duōi iáu Duōi-mǎ sī sǎi Huă-là̤-sū iáu Să-là; Huă-là̤-sū sǎi Ì-sū-lě̤ng; Ì-sū-lě̤ng sǎi Ngā-lǔing;
- Ngā-lǔing sǎi Ngā-mì-nà-duŏi; Ngā-mì-nà-duŏi sǎi Nà-sē̤ng; Nà-sē̤ng sǎi Să-mě̤ng;
- Să-mě̤ng tǎu Lâ-hō̤ sī, sǎi Bó̤-sū; Bó̤-sū tǎu Lū-dă̤ sī, sǎi Á-bă; Á-bă sǎi Iǎ-sái;
- Iǎ-sái sǎi Duōi-pĭ uâng; Duōi-pĭ uâng tǎu Ú-lī-ngā gâ̤ sē-mǎ sǎi Sǔ-lô̤-mô̤ng;
- Sǔ-lô̤-mô̤ng sǎi Lô̤-bó-o̤̿ng; Lô̤-bó-o̤̿ng sǎi Ngā-bǐ-ngā; Ngā-bǐ-ngā sǎi Ngā-să;
- Ngā-să sǎi Iŏ̤-suói-huă; Iŏ̤-suói-huă sǎi Iŏ̤-lǔing; Iŏ̤-lǔing sǎi Ú-sái-ngā;
- Ú-sái-ngā sǎi Iŏ̤-dàng; Iŏ̤-dàng sǎi Ngā-hŏ̤-sū; Ngā-hŏ̤-sū sǎi Hí-sái-gá;
- Hí-sái-gá sǎi Mǎ-nà-sái; Mǎ-nà-sái sǎi Ngā-mô̤ng; Ngā-mô̤ng sǎi Iŏ̤-sái-ngā;
- Iŏ̤-sái-ngā sǎi Iǎ-gó̤-nǐ-ngā iáu Iǎ-gó̤-nǐ-ngā gâ̤ hiáng-dī; ŭ-cì-sî bă-sia̿ng búing ko̤̿ Bǎ-bǐ-lě̤ng.
- ¶ Bă-sia̿ng búing da̿u Bǎ-bǐ-lě̤ng làu, Iǎ-gó̤-nǐ-ngā sǎi Să-là-tiĕ; Să-là-tiĕ sǎi Sǔ-lô̤-bǎ-bă; [ 6 ]
- Sǔ-lô̤-bǎ-bă sǎi Ngā-bǐ-ṳ̆; Ngā-bǐ-ṳ̆ sǎi Ì-lī-ngā-géng; Ì-lī-ngā-géng sǎi Ngā-sǔ;
- Ngā-sǔ sǎi Să-dŭ; Să-dŭ sǎi Ngā-géng; Ngā-géng sǎi Ì-lṳ̆;
- Ì-lṳ̆ sǎi Ì-lī-ngā-să; Ì-lī-ngā-să sǎi Mǎ-dàng; Mǎ-dàng sǎi Ngǎ-gŏ̤;
- Ngǎ-gŏ̤ sǎi Iŏ̤-să̤; Iŏ̤-să̤ ciū-sī Mǎ-lī-ngā gâ̤ sé̤ng-é̤ng, Mǎ-lī-ngā sǎi Iǎ-Sú hǎng ca̿ Gí-Dŭ.
- Cia̿u iŏ̤ng cǔ-bù so̤̿ng à lâ̤, giǎng Ngā-bă-là-hǎng da̿u Duōi-pĭ lǒng-cǒng sí-si̿ dō; giǎng Duōi-pĭ-di̿ so̤̿ng à lâ̤ da̿u búing ko̤̿ Bǎ-bǐ-lě̤ng iǎ sí-si̿ dō; giǎng búing ko̤̿ Bǎ-bǐ-lě̤ng-di̿ so̤̿ng à lâ̤ da̿u Gí-Dŭ iǎ sí-si̿ dō.
- ¶ Iǎ-Sú Gí-Dŭ chṳ̆-si̿ gâ̤ dī sī iŏ̤ng-gă̤-sĭ: Gṳ̀ gâ̤ nǎi Mǎ-lī-ngā iáu Iŏ̤-să̤ uā-chéng-iǎng làu, gu̿ ēng-nǎing tǎu ko̤̿, Mǎ-lī-ngā dă̤-diō̤ Se̿ng-Sěng, iǔ-séng kǐ lâ̤.
- Gṳ̀ sé̤ng-é̤ng Iŏ̤-să̤ sī ciă ngī-nêng, ēng kǎing dó̤ng-nêng-si̿-ce̤̿ng diĕ gṳ̀, siǒng niōng càng-càng-di̿ to̿-tiāu iŏ̤ng chéng.
- Ka̿ing-ka̿ing dō̤-di̿ siǒng iŏ̤ng dī gâ̤ sî-hē, Cṳ̌ sǎ̤-chṳ̿ gâ̤ lâ̤ tŏ̤ mōng iáu gṳ̀ uā, Duōi-pĭ gâ̤ gṳ̌ing-só̤ng Iŏ̤-să̤, nì ēng niōng giáng, cī-gǔing mǒng nà nì gâ̤ sē-mǎ Mǎ-lī-ngā tǎu lâ̤; gṳ̀ iǔ-séng sī éng-ṳē dă̤-diō̤ Se̿ng-Sěng.
- Gṳ̀ ŏ̤ sǎi cì-ciă gṳ̌ing; nì niōng ta̿i gṳ̀ chiǔ miâng hǎng Iǎ-Sú; éng-ṳē gṳ̀ ŏ̤ giù gṳ̀ gâ̤ bă-sia̿ng pī-tiāu cò-ŏ̤.
- Iŏ̤ng-gă̤-sĭ gâ̤ dī dú sī niōng gi̿ng-hāu Cṳ̌ tê-chîng tŏ̤ síng-dí uā-gua̿ gâ̤ dī,
- Gō̤-uā, Hē-lǎi iǔ cì-ciă cĭ-nṳ̌ ŏ̤ iǔ-séng, sǎi gṳ̌ing, nêng ŏ̤ hǎng gṳ̀ gâ̤ miâng ca̿ Ì-mǎ-nō-lī; Ì-mǎ-nō-lī gâ̤ i̿-su̿, ciū-sī Ciōng-Di̿ iáu uòi-huo̿i-nêng cì-dó.
- Iŏ̤-să̤ chíng-chǎng, kǐ lâ̤ ciū í-diū Cṳ̌ sǎ̤-chṳ̿ gâ̤ gáu-dō gṳ̀ gâ̤ dī, nà gṳ̀ gâ̤ sē-mǎ tǎu gua̿ mô̤ng;
- Lâ̤-sī ēng-nǎing iáu gṳ̀ chěng-chéng dǎing gṳ̀ sǎi gṳ̌ing; ciū hǎng gṳ̀ gâ̤ miâng ca̿ Iǎ-Sú.