Se̿ng-géng/Mǎ-tuo̿i Hŭ-éng/11
[ 28 ]
Di̿ 11 Cióng.
- Iǎ-Sú gáu-dō sí-nī-ciă hă-sáing làu, ciū giǎng ŭ-di̿ kǐ-séng ko̤̿ gŏ̤ sêng-dǐ gǒ̤ng-dàu, háu nêng.
- ¶ Ŭ-cì-sî Iŏ̤-hu̿ing da̿u lâu-di̿, tia̿ng-nī-gi̿ng Gí-Dŭ ca̿ gâ̤ dī,
- Ciū hǎng gṳ̀ gâ̤ hă-sáing ko̤̿ mōng Iǎ-Sú uā, Ŏ̤ lâ̤ gâ̤, sī nì à, gu̿ sī niōng uòi dǎing biē-nêng nī?
- Iǎ-Sú a̿ing uā, Nì mǒng ko̤̿ nà nì chū-gi̿ng, tia̿ng-nī-gi̿ng gâ̤ dī, dú iáu Iŏ̤-hu̿ing uā: [ 29 ]
- Ciū-sī hăi-ciě giâ-gíng ŏ̤ chū-gi̿ng, gio̤̿-káu giâ-gíng ŏ̤ giǎng diō̤, bāng-tuǒi giâ-gíng ŏ̤ lâi-lī, sông-nèng giâ-gíng ŏ̤ tia̿ng-nī, sǐ-tiāu gâ̤ nêng ciū hia̿u gṳ̀ sáng kǐ lâ̤, gê̤ng-mǎu gâ̤ nêng iǎ iǔ hǎu gâ̤ se̿ng-sĭ gǒ̤ng nă gṳ̀ tia̿ng-nī.
- Mǎu-lō̤ng sū nêng ēng uā uòi sī huōi gṳ̀ iǔ gua̿-ngāi gâ̤ dī, iŏ̤ng nêng ciū iǔ hŭ-ki̿.
- Iŏ̤-hu̿ing gâ̤ hă-sáing ko̤̿-tiāu làu, Iǎ-Sú ciū nà Iŏ̤-hu̿ing gâ̤ dī iáu ŭ cèng cāi nêng uā, gō̤-uā, Nì chîng-mâng ko̤̿ ko̿ng-iǎ o̿ chū sū-mū dī nī? sī o̿ chū hóng chṳé-dòng gâ̤ mô̤ng-sáng, ēng sī?
- Nì chṳ̆ ko̤̿ da̿u-dǎi o̿ chū sū-mū dī nī? sī o̿ chū cē̤ng ngǎ-sĭ í-ciông gâ̤ nêng, ēng sī? Cē̤ng ngǎ-sǐ í-ciông gâ̤ nêng sī da̿u uǎng-di̿ gé̤ng-dǐ.
- Nì ì-cài éng-ṳē sū dī chṳ̆ ko̤̿ nī? sī o̿ chū síng-dí, ēng sī? Uòi iáu nì uā, Gṳ̀ ì-cài sī síng-dí, ǐ piāng síng-dí ga̿ing duōi dă̤ cāi,
- Iŏ̤ng nêng ciū-sī se̿ng-géng gi̿-diū uā, Giâ-gíng uòi hǎng uòi sǎ̤-chṳ̿ gâ̤ nêng da̿u nì tê-chîng, kṳé nì gâ̤ diō̤.
- Uòi ì-cài iáu nì uā, Á-niông-nêng sǎi gâ̤, mǎu cì-ciă piāng sí sǎi-lǐ gâ̤ Iŏ̤-hu̿ing ga̿ing duōi, lâ̤-sī tíng gŏ-di̿ so̤̿ng ca̿ siǎu gâ̤ piāng Iŏ̤-hu̿ing ga̿ing duōi.
- Giǎng sí sǎi-lǐ gâ̤ Iŏ̤-hu̿ing-di̿ kǐ da̿u giâ-gíng, nêng cèng-lì cǒng niōng dă̤-diō̤ tíng gŏ, cèng-lì gâ̤ nêng ciū dă̤-dă̤-diō̤.
- Éng-ṳē ŭ duói síng-dí iáu lṳ̆-huă gâ̤ sṳ́, dú sáing nā ēng-nǎing lâ̤ gâ̤ dī, uā da̿u Iŏ̤-hu̿ing-di̿ gṳè-diū.
- Nì lâ̤ kǎing se̿ng uòi uā, iŏ̤ng nêng ciū-sī e̿ng-gái lâ̤ gâ̤ Ì-lī-ngā.
- Iǔ nèng-ciě ŏ̤ tia̿ng-nī gâ̤, ciū niōng tia̿ng-nī.
- Uòi nà sū dī bǐ-piāng iŏ̤ng cì-si̿ gâ̤ nêng nī? Bǐ-piāng gṳ̌ing-ciě cō hā gái-diō̤-di̿, hǎng gṳ̀ gâ̤ gṳ̌ing-ciě-huǎ,
- Uā, Uòi chṳé-siáu nă nì tia̿ng-nī, nì dú ēng diǎu-káu; uòi chio̿ng sái-uâng kṳ̆, nì ēng sióng-séng.
- Iŏ̤-hu̿ing lâ̤, ēng iè, ēng chṳĕ, nêng ciū uā, Gṳ̀ sī nă gṳ̌ mî-diū. [ 30 ]
- Nêng gâ̤ Gṳ̌ing lâ̤, iǎ iè, iǎ chṳĕ, nêng ǐ uā, Gṳ̀ sī táng-iè, su̿-ha̿u ciǔ gâ̤ nêng, sī siú-sṳe̿ iáu cò-nêng gâ̤ bǎing-iǔ-huǎ. Cǒng-lâ̤ ŭ í-diū chóng-měng gâ̤ lǐ ca̿ chṳ̆ lâ̤ gâ̤ dī, ŏ̤ biǎu-měng iŏ̤ng lǐ mǎu cho̤̿.
- ¶ Iǎ-Sú tê-chîng da̿u gǐ-ciă sêng ca̿-gua̿ gṳ̀ cì duōi bu̿ing cǒ-nǎing gâ̤ dī, éng-ṳē ŭ-di̿ gâ̤ nêng ēng gǎi-ŏ̤ cě̤ng-sīng, Iǎ-Sú iŏ̤ng-cì-sî ciū uā gṳ̀.
- Uā, Gó̤-là-sēng, nì iǔ huā da̿u! Bă-so̿-duōi, nì iǎ iǔ huā da̿u! éng-ṳē uòi da̿u nì liòng-ciă sêng-dǐ ca̿ gua̿ cǒ-nǎing gâ̤ dī, lâ̤-sī ca̿ da̿u Tó-lô̤ iáu Sái-dō̤ng, ŭ-di̿ gâ̤ nêng láu-cǎu ciū cē̤ng muôi-í, tê-di̿ é̤ng hó gǎi-ŏ̤ cě̤ng-sīng làu.
- Uòi iáu nì uā, Da̿u lò̤ sěng si̿-gáing nêng gâ̤ nì-ciě, Tó-lô̤ iáu Sái-dō̤ng siū gâ̤ hěng-huă, piāng nì siū gâ̤ hěng-huă gu̿ kiáng.
- Gá-bă-nǒng à, ŏ̤ nà nì gáu-séng da̿u tíng ciōng-di̿ à? nì ŏ̤ lò̤ da̿u éng-gáing-di̿: éng-ṳē da̿u nì sêng-dǐ ca̿-gua̿ cǒ-nǎing gâ̤ dī, lâ̤-sī ca̿ da̿u Sǔ-dó̤-mǎ, ǔ ciă sêng da̿u giâ-gíng gu̿ ŏ̤ dō̤-di̿.
- Uòi iáu nì uā, da̿u sěng si̿-gáing nêng gâ̤ nì-ciě, Sǔ-dó̤-mǎ siū gâ̤ hěng-huă piāng nì siū gâ̤ hěng-huă gu̿ kiáng.
- ¶ Iŏ̤ng-cì-sî, Iǎ-Sú uā, Dá à, tíng dī gâ̤ Cṳ̌, uòi cu̿ing-mǐ nì, éng-ṳē nì nà iŏ̤ng dàu-lǐ ko̤̿ng-diū ēng nă chóng-měng tóng-lǒng gâ̤ nêng dă̤-dí, da̿u hīng chṳ̆ lâ̤ háu gṳ̌ing-ciě dă̤-dí.
- Dá à, ì-cài niōng iŏ̤ng-gă̤-sĭ, éng-ṳē nì cèng de̤̿ng-i̿ iŏ̤ng-gă̤-sĭ.
- Lǒng-cǒng gâ̤ dī uòi Dá dú gáu nă uòi làu: ēng-sī Dá, mǎu nêng dă̤-dí Gṳ̌ing; ēng-sī Gṳ̌ing, iáu Gṳ̌ing gó̤ng-ngṳ̄ing háu dă̤-dí Dá gâ̤ nêng, iǎ mǎu nêng dă̤-dí Dá.
- Nì dǐ-bíng mǎu-lō̤ng sū nêng séng-kǔ, dàng dōng dáng gâ̤, dú niōng hā uòi-di̿ lâ̤, uòi ciū ŏ̤ nà běng-úing nă nì.
- Uòi séng-dǐ uǎ-ki̿ kéng-hṳ́, nì niōng guòi uòi gâ̤ ă, ò̤ uòi gâ̤ gă̤-sĭ, nì séng-dǐ ciū ŏ̤ dă̤-diō̤ běng-úing.
- Éng-ṳē uòi gâ̤ ă sī hǎu guòi gâ̤, uòi gâ̤ dáng sī kiáng gâ̤.