Se̿ng-géng/Mǎ-tuo̿i Hŭ-éng/13
- 1 Gōng ǔ cì góng Iǎ-Sú giǎng chio̤̿-di̿ chṳ̌ lâ̤ cō da̿u huǒi-bíng.
- 2 Iǔ cèng cāi nêng cṳ̀ da̿u gṳ̀ ǔ-di̿, Iǎ-Sú ciū iòng ṳ̌ing cō-diū; duōi-gá-nêng dú gṳè da̿u ngāing-di̿.
- 3 Iǎ-Sú ciū nà cèng cāi bǐ-piāng gâ̤ dī iáu gṳ̀-huōi-nêng gǒ̤ng, uā, Iǔ cì-ciă suǒi-cě̤ng gâ̤ nêng chṳ̌ ko̤̿ suǒi cě̤ng.
- 4 Dō̤-di̿ suǒi gâ̤ sî-hē iǔ lò̤ da̿u diō̤ bíng-ha̿ing gâ̤, ciā-ciě ṳě lâ̤ iè lâ̤i-lī-tiāu.
- 5 Iǎ iǔ lò̤ da̿u ciō̤-ngâng gâ̤ diá-di̿, ǔ-di̿ mǎu gǐ-duói nâi; éng-ṳē nâi cèng bò̤, iǒ̤ng cě̤ng dāi-diū ciū buǒi-ngâ.
- 6 Mì-tê chṳ̌ lâ̤ cì pū, éng-ṳē mǎu gṳ́ing, ciū kú-tiāu.
- 7 Iá iǔ lò̤ da̿u iǔ chi̿ gâ̤ ià-ṳê-chǎu dǐ-bíng, iǒ̤ng chǎu sáng kǐ lâ̤, nà ngâ máng-láng-diū.
- 8 Iǎ iǔ lò̤ da̿u ciáng nâi-di̿ gâ̤, giě-cǎ̤, iǔ cì-bǎ bò gâ̤, iǔ lṳ̀-sī bò gâ̤, iǔ sáng-sī bò gâ̤.
- 9 Iǔ nèng-ciě gâ̤, dú niōng tia̿ng-nī.
- 10 Hǎ-sáing lâ̤ mōng Iǎ-Sú uā, Nì éng-ṳē sū-dī iáu duōi-gá-nêng uā bǐ-piāng gâ̤ dī?
- 11 Iǎ-Sú a̿ing uā, Éng-ṳē tíng gǒ ko̤̿ng-diū gâ̤ dàu-lǐ nǎ nì dǎ̤-dí, ēng nǎ gṳ̀ dǎ̤-dí.
- 12 Éng-ṳē iǔ gâ̤ nêng, gu̿ ŏ̤ tíng gṳ̀, ciū iǔ cèng cāi; mǎu gâ̤ nêng, ciū-sī gṳ̀ iǔ gâ̤, iǎ ŏ̤ chiǒng-ko̤̿-tiāu.
- 13 Gu̿-chu̿ uòi iáu gṳ̀ uā bǐ-piāng gâ̤ dī, éng-ṳē gṳ̀ chū, ǐ chū ēng gi̿ng, tia̿ng-nī, ǐ tia̿ng-nī ēng gi̿ng, cǒng mài měng-bà̤.
- 14 Ì-so̿-ngā sáing uā-gua̿ gâ̤ dī, da̿u iǒ̤ng nêng séng-di̿ iǔ gi̿ng-hāu làu, gṳ̀ uā, Nì tia̿ng-nī ŏ̤ tia̿ng-nī dǎ̤-gi̿ng, cǒng mài měng-bà̤, chū ŏ̤ chū-dǎ̤-gi̿ng cǒng ēng hiǎu-dǎ̤.
- 15 Éng-ṳē iǒ̤ng bă-sia̿ng séng-di̿ cà̤-cō̤ng, nèng-ciě sông, mì-ciú chǐ-diū, sǎng-dǎ̤ mì-ciú chū-dǎ̤-gi̿ng, nèng-ciě tia̿ng-nī dǎ̤-gi̿ng, séng-di̿ měng-bà̤, gǎi-bi̿ng, uòi ciū í gṳ̀ hǎu.
- 16 Lâ̤-sī nì gâ̤ mì-ciú sī iǔ hǔ-ki̿, éng-ṳē chū-dǎ̤-gi̿ng; nì gâ̤ nèng-ciě sī iǔ hǔ-ki̿, éng-ṳē tia̿ng-nī dǎ̤-gi̿ng.
- 17 Uòi ì-cài iáu nì uā, Gǔ-sî-hē iǔ cèng cāi síng-dí iáu ngī-nêng o̿ chū nì chū-gi̿ng gâ̤ dī, ǐ mǎu-dǎ̤ tia̿ng-nī-gi̿ng.
- 18 Gu̿-chu̿ suǒi cě̤ng gâ̤ bǐ-piāng nì niōng tia̿ng-nī.
- 19 Iǔ nêng tia̿ng-nī tíng gǒ gâ̤ dàu-lǐ, mài měng-bà̤, ǔ ciǎ ŏ̤ gṳ̌ ciū lâ̤, nà suǒi da̿u gṳ̀ séng-dǐ gâ̤ cě̤ng, chiǒng-ko̤̿-tiāu. Iǒ̤ng ciū-sī bǐ-piāng suǒi da̿u diō̤ bíng-ha̿ing gâ̤.
- 20 Suǒi da̿u ciō̤--ngâng gâ̤ diá-di̿, ciū-sī bǐ-piāng nêng tia̿ng-nī dàu-lǐ, ciū cèng ka̿u-uòi se̿ng dǎ̤-gua̿.
- 21 Lâ̤-sī gṳ̀ séng dǐ mǎu gṳ́ing, bǔ-gua̿ sǎ-sî-cie̿, cì da̿u éng-ṳē iǒ̤ng dàu-lǐ, pōng-diō̤ kǔ-nūing, nǎ nêng bǐ-là̤, gṳ̀ ciū uā sī huōi gṳ̀ iǔ gua̿-ngāi.
- 22 Suǒi da̿u iǔ chi̿ gâ̤ ià-ṳê-chǎu dǐ-bíng, ciū-sī bǐ-piāng nêng tia̿ng-nī dàu-lǐ, hē-mṳě iǔ si̿-gáing ga gua̿-lṳ̄, ngê̤ng-cîng pi̿ng nêng gâ̤ dī, máng-láng-diū iǒ̤ng dàu-lǐ, ciū mài giě-cǎ̤.
- 23 Suǒi da̿u ciáng nâi-di̿ gâ̤, ciū-sī bǐ-piāng nêng tia̿ng-nī dàu-lǐ, ǐ měng-bà̤, iǒ̤ng nêng ì-cài giě-cǎ̤ iǔ cì-bǎ bò gâ̤, iǔ lṳ̀-sī bò gâ̤, iǔ sáng-sī bò gâ̤.
- 24 Iǎ-Sú ǐ nà cì-ciă bǐ-piāng iáu duōi-gá-nêng uā, Tíng gǒ bǐ-piāng cì-ciă nêng suǒi hǎu gâ̤ cě̤ng da̿u châing-di̿.
- 25 Nêng mì-chǐ-diō̤ gâ̤ sî-hē, dō-tê lâ̤ nà pāi cě̤ng suǒi hā mà-ciě-di̿, ciū ko̤̿-tiāu.
- 26 Da̿u mà-ciě chṳ̌ sǎ, giě-cǎ̤ gâ̤ sî-hē, pāi iǎ hīng chṳ̆ lâ̤.
- 27 Châing-cṳ̌ gâ̤ nû-gě lâ̤ iáu gṳ̀ uā, Nì chîng-mâng sī suǒi hǎu gâ̤ cě̤ng da̿u châing-di̿, ēng sī? giâ-gíng gōng-ciōng iǔ iǒ̤ng pāi nī?
- 28 Châing-cṳ̌ uā, Iǒ̤ng sī do̿-tê ca̿ gâ̤ dī. Nû-gě ciū uā, Nì niōng uòi ko̤̿ bí-tiāu iǒ̤ng pāi, ēng niōng?
- 29 Châing-cṳ̌ uā, Ēng niōng, giáng-pa̿ bí-tiāu iǒ̤ng pāi, lîng mà-ciě iǎ ŏ̤ bí-tiāu.
- 30 Běng-ciě gṳ̀ liòng-iōng câi-câi duōi kǐ lâ̤; dǎing niōng cāi mà-ciě, da̿u ǔ sî-hē uòi ŏ̤ gáu-dō cāi mà-ciě gâ̤ nêng, uā, Sáing nà pāi bí chṳ̆ lâ̤, gǎi iǎng-bǎ chiáu-tiāu: cuo̿i-tê nà mà-ciě siú hā chó̤ng-di̿.
- 31 Ǐ nà cì-ciă bǐ-piāng iáu duōi-gá-nêng uā, Tíng gǒ su̿-siōng cì-ciă guo̿i-cha̤̿ cě̤ng, nêng dé ko̤̿ cá̤ hā hṳ̂ing-di̿.
- 32 Iǒ̤ng cě̤ng piāng biē cě̤ng sī děng siǎu gâ̤: da̿u duōi kǐ lâ̤, ciū piāng gǒ̤ iōng gâ̤ cha̤̿ ga̿ing duōi, gō̤ chiū ǐ-búing, bu̿ing-tíng gâ̤ ciā-ciě ṳě lâ̤, bō̤ dau kiá-di̿.
- 33 Iǎ-Sú ǐ iáu duōi-gá-nêng gǒ̤ng cì-ciă bǐ-piāng gâ̤ dī, uā, Tíng gǒ su̿-siōng mīng-hó bṳ̌, á-niông-nêng dé lâ̤ ga̿ hā sáng dě mīng-hó-di̿, dǎing mīng-hó tóng huǎi ca̿ bṳ̌ kǐ lâ̤.
- 34 Iǒ̤ng dú sī Iǎ-Sú nà bǐ-piāng iáu duōi-gá-nêng uā gâ̤ dī; lâ̤-ēng sī bǐ-piāng, ciū ēng iáu gṳ̀ uā.
- 35 Iǒ̤ng ciū-sī niōng gi̿ng-hāu síng-dí uā-gua̿ gâ̤ dī, gō̤ uā, Uòi ŏ̤ kṳé chṳ̄ uā bǐ-piāng gâ̤ dī; giǎng kṳé tíng bī dī à lâ̤ ko̤̿ng-diū gâ̤ dī , dú ŏ̤ uā chṳ̆ lâ̤.
- 36 Iŏ̤ng-cì-sî Iǎ-Sú piě-tiāu ǔ cèng cāi nêng, nì chiō̤-di̿ ko̤̿, hǎ-sáing giǎng-ce̿ng lâ̤, uā, Châing pāi gâ̤ bǐ-piāng gǎi-tiǎ nǎ uòi tia̿ng-nī.
- 37 Iǎ-Sú iáu gṳ̀ uā, Ǔ ciǎ suǒi hǎu cě̤ng gâ̤, ciū-sī bǐ-piāng nêng gâ̤ Gṳ̌ing; châing sī bǐ-piāng si̿-gáing;
- 38 Hǎu cě̤ng sī bǐ-piāng tíng gǒ gâ̤ gṳ̌ing-só̤ng; pāi sī bǐ-piāng ǔ ciǎ ŏ̤ gṳ̌ gâ̤ gṳ̌ing-só̤ng;
- 39 Suǒi iǒ̤ng pāi gâ̤ do̿-tê sī bǐ-piāng mǒ̤-gṳ̌: cāi mà-ciě gâ̤ sî-hē sī bǐ-piāng si̿-gáing gâ̤ sṳē-mṳě; mà-ciě gâ̤ nêng sī bǐ-piāng Cṳ̌ sǎ̤-chṳ̄ gâ̤.
- 40 Pāi nǎ nêng chéng cì-dó, nà ko̤̿ chiáu-tiāu; iǒ̤ng si̿-gáing gâ̤ sṳē-mṳě iǎ ŏ̤ iǒ̤ng-gǎ̤-sǐ.
- 41 Nêng gâ̤ Gṳ̌ing ŏ̤ hǎng gṳ̀ sǎ̤-chṳ̄-gâ̤ nà ǔ duói huōi nêng iǔ gua̿-ngāi gâ̤ dī, iáu ca̿-ŏ̤ gâ̤ nêng, giǎng gṳ̀ gǒ-di̿ tǐ chṳ̆ lâ̤.
- 42 Diú hāhó-iâu-di̿: da̿u ǔ-di̿ iǔ gàu-ngâ chiě-chǐ di̿ tî-kǔ.
- 43 Ǔ sî-hē ngī-nêng da̿u gṳ̀ Dá gâ̤ gǒ-di̿ iǔ guáng cia̿u chṳ̆ lâ̤, su̿-siōng mì-tê ǐ-búing. Iǔ nèng-ciě gâ̤, dú niōng tia̿ng-nī.
- 44 Tíng gǒ ǐ su̿-siōng bǎu-bo̿ ko̤̿ng hā châing-di̿; nêng pōng-diō̤, ciū coá-dǎ̤ mà̤-mà̤-di̿: éng-ṳē cèng ka̿u-uòi iǒ̤ng bǎu-bo̿, ciū ko̤̿ nà gṳ̀ lǒng-cǒng iǔ gâ̤ mî-dī, dú māi-tiāu, mǎi iǒ̤ng châing.
- 45 Tíng gǒ ǐ su̿-siōng ca̿-kǎ gâ̤ nêng, lā1u děng hǎu gâ̤ céng-cṳ́:
- 46 Pōng-diō̤ cì-ciă děng dì-cîng gâ̤ cṳ́, ciū ko̤̿ nà gṳ̀ lǒng-cǒng iǔ gâ̤ mî-dī, dú māi-tiāu, mǎi iǒ̤ng cṳ́.
- 47 Tíng gǒ ǐ su̿-siōng mòng suǒi ha huǒi-di̿, mòng-diū gǒ̤ iōng gâ̤ ngṳ̂.
- 48 Iǒ̤ng mòng dó̤ng-mǔing làu, nêng ciū tuói iòng ngāing, cō-diū, nà ngṳ̂ tǐ chṳ̆ lâ̤, hǎu gâ̤ ciū dó̤ng hā gá-sí-di̿, làing gâ̤ ciū diú-tiāu.
- 49 si̿-gáing gâ̤ sṳē-mṳě iǎ ŏ̤ iǒ̤ng-gǎ̤-sǐ: Cṳ̌ sǎ̤-chṳ̄-gâ̤ ŏ̤ lâ̤ giǎng ngī-nêng dǐ-bíng, nà làing nêng tǐ chṳ̆ lâ̤,
- 50 Diú hā hǒ-iâu-di̿: da̿ṳ̌-di̿ iǔ gâ̤4u-ngâ chiě-chǐ-di̿ tî-kǔ.
- 51 Iǎ-Sú mōng hǎ-sáing uā, Iǒ̤ng duói d1 nì dú ŏ̤ měng-bà̤, mà? hǎ-sáing uā, Měng-bà̤ lò̤.
- 52 Iǎ-Sú iáu gṳ̀ uā, iǒ̤ng-gǎ̤-sǐ mǎu-lō̤ng sū-mū nāng-sṳ́ nêng tǐ chṳ̆ lâ̤ ca̿ tíng gǒ gâ̤ hǎ-sáing, ciū su̿-siōng cì-ciă gá-cṳ̌, giǎng gṳ̀ ku̿-bǒng-di̿ nà séng giū gâ̤ mǐ-dī dé chṳ̆ lâ̤.
- 53 Iǎ-Sú iǒ̤ng duói bǐ-piāng uā làu, ciū giǎng ǔ sù-cài ko̤̿-tiāo.
- 54 Lâ̤ cù-cī gâ̤ dī-huó̤ng da̿u lǐ-ba̿i-dǒ̤ng-di̿ háu nêng, duo̿i-gá-nêng dú cèng gǐ-guo̿i, gō̤-uā, Iǒ̤ng nêng gōng-ciōng iǔ iǒ̤ng gâ̤ chóng-měng, iáu iǒ̤ng có-nǎing gâ̤ dī?
- 55 Gṳ̀ cia̿ng-sī cǒ̤-tê gâ̤ gṳ̌ing, gṳ̀ nǎi miâng hǎng Mǎ-lī-ngā, gṳ̀ hiáng-dī ciū-sī Ngǎ-gǒ̤, Iǒ̤-sái, Sái-mô̤ng, Uǔ-duōi.
- 56 Gṳ̀ cī-müē dú sī iáu uòi-huo̿i-nêng gōng hióng-lǐ! Iǒ̤ng nêng gōng-ciōng iǔ iǒ̤ng duói gâ̤ dī nī?
- 57 Duōi-gá-nêng ciū uā Iǎ-Sú sī huōi gṳ̀ iǔ gṳ̀a̿-ngāi gâ̤. Iǎ-Sú iáu gṳ̀ uā, Síng-dí lâ̤ ēng-sī da̿u bǒ̤ng dī-huó̤ng, cù-cī chio̤̿ , dú ŏ̤ nǎ nêng ge̿ng-dōng.
- 58 Iǎ-Sú éng-ṳē nêng ēng se̿ng, da̿u ǔ-di̿ ēng-nǎing ca̿ gǐ-duōi cǒ-nǎing gâ̤ dī.
← · Di̿ 12 Cióng · Di̿ 14 Cióng →
«Se̿ng-géng» gâ̤ mù-lṳ̀
