Se̿ng-géng/Mǎ-tuo̿i Hŭ-éng/25
- 1 Ǔ sî-hē tíng gǒ bǐ-piāng sí-ciǎ á-niông-gṳ̌ing-ciě, dé-dáing chṳ̌ ko̤̿ ciě séng-lô̤ng.
- 2 Iǒ̤ng á-niông-gṳ̌ing-ciě ngù-ciǎ sī háng gâ̤, nug̀-ciǎ sī chóng-měng gâ̤.
- 3 Háng gâ̤ dé dáing, ēng-nǎing lēng-ngṳē duo̿i iû.
- 4 Chóng-měng gâ̤ dé dáing, lēng-ngṳē duo̿i iû hā iû-dông-di̿.
- 5 Éng-ṳē séng-lô̤ng dàng-gǒ̤ lâ̤ dǎ̤ ṳ̿ing, á-niông-gṳ̌ing-ciě dú dū-mêng mì-chǐ ko̤̿-tiāu.
- 6 Bu̿ing mâng iǔ nêng hǎng kǐ lâ̤, uā, Séng-lô̤ng lâ̤ lò̤, nì chṳ̆ lâ̤ ciě gṳ̀.
- 7 Á-niông-gṳ̌ing-ciě dú kǐ lâ̤ pá dáing.
- 8 Háng gâ̤ iáu chóng-měng gâ̤ ua, Uòi gâ̤ dáing tǎu ú-tiāu; nì gâ̤ iû bṳ́ing ui mī-cie̿.
- 9 Chóng-měng gâ̤ a̿ing uā, Giáng-pa̿ nì iáu uòi câi-câi mǎu kāu-lāu dǎng: gu̿ hǎu nì cù-cī ko̤̿iu da̿ng ko̤̿ mǎi.
- 10 Ka̿ing-ka̿ing ko̤̿ mǎi gâ̤ sî-hē , séng-lô̤ng ciū lâ̤; ṳ̄-bī hǎu gâ̤ á-niông-gṳ̌ing-ciě iáu gṳ̀ câi di̿ ko̤̿iè tǎu-chéing gâ̤ ciǔ: mô̤ng ciū gṳ́ing-diū.
- 11 Hē-mṳě ǔ ngù-ciǎ á-niông-gṳ̌ing-ciě iǎ lâ̤ uā, Cṳ̌ à, Cṳ̌ à, ta̿i uòi kṳé ciā mô̤ng.
- 12 Cṳ̌ ciū a̿ing uā, Uòi ì-cài iáu nì uā, uòi ēng dǎ̤-dí nì.
- 13 Gu̿-chu̿ nì niōng chíng-chǎng, éng-ṳē ēng dǎ̤-dí ǔ ciǎ nì-ciě, ǔ ciǎ sî-sěng.
- 14 Ǔ nì-ciě su̿-siōng ciǎ nêng niōng ko̤̿ biē dī-huó̤ng, hǎng gṳ̀ gâ̤ nû-gě giǎng-ce̿ng nà gá-do̤̿ng gáu nǎ gṳ̀ lǐ.
- 15 Cì-ciă nà ngù-cháing ngê̤ng nǎ gṳ̀, cì ciă nà liòng-cháing ngê̤ng nǎ gṳ̀, cì-ciă nà cì-cháing ngê̤ng nǎ gṳ̀; dú sī cia̿u-diū gǒ̤ nêng gâ̤ bǒ̤ng-sū; cṳ̌-nêng ciū kǐ-séng ko̤̿.
- 16 Ǔ ciǎ dǎ̤ ngù-cháing ngê̤ng gâ̤, ciū dé ko̤̿, ca sáing-i̿, lēng-ngṳē te̿ng ngù-cháing.
- 17 Dǎ̤ liòng-cháing gâ̤, lēng-ngṳē iǎ te̿ng liòng-cháing.
- 18 Cǒng-lâ̤ ǔ ciǎ dǎ̤ cì-cháing gâ̤ ciū ko̤̿ gṳ̄-kṳé diá, nà cṳ̌-nêng gâ̤ ngê̤ng bṳ̿-diū.
- 19 Gua̿-tiāu cāi sî, cṳ̌-nêng ciu chio̤̿ lâ̤, iáu nû-gě so̤̿ng-dio̿ng.
- 20 Ǔ ciǎ dǎ̤ ngù-cháing gâ̤ lēng-ngṳē ǐ nà-diū ngù-cháing giǎng-ce̿ng lâ̤, uā, Cṳ̌ à, nì nà ngù-cháing gáu nǎ uòi ; uòi lēng-ngṳē ǐ te̿ng ngù-cháing.
- 21 Cṳ̌-nêng uā, Ca̿-dǎ̤ hǎu, nì iǒ̤ng ciáng ǐ dé̤ng-séng gâ̤ nû-gě: lǐ iǒ̤ng mī-cie̿ gâ̤ dī, dú iǔ dé̤ng-séng, giâ-gíng uòi ŏ̤ pa̿i nì lǐ cèng cāi gâ̤ dī: di̿ lâ̤ iáu gâ̤ cṳ̌-nêng câi-câi ka̿u-uòi.
- 22 Dǎ̤ liòng-cháing gâ̤ iǎ giǎng-ce̿ng lâ̤, uā, Cṳ̌ à, nì nà liòng-cháing háu nǎ uòi, uòi lēng-ngṳē ǐ te̿ng liòng-cháing.
- 23 Cṳ̌-nêng uā, Ca̿-dǎ̤ hǎu, nì iǒ̤ng ciáng ǐ dé̤ng-séng gâ̤ nû-gě: lǐ iǒ̤ng mī-cie̿ gâ̤ dī, dú iǔ dé̤ng-séng, giâ-gíng uòi ŏ̤ pa̿i nì lǐ cèng cāi gâ̤ dī: di̿ lâ̤ iáu gâ̤ cṳ̌-nêng câi-câi ka̿u-uòi.
- 24 Ǔ ciǎ dǎ̤ cì-cháing gâ̤, a giǎng-ce̿ng lâ̤, uā, Cṳ̌ à, uòi dǎ̤-dí nì sī děng suǒi-bǎ gâ̤ nêng , ēng-nǎing cē̤ng gâ̤ sù-cài, niōng iǔ dǎ̤ cāi, ēng-nǎing suǒi gâ̤ sù-cài, niōng iǔ dǎ̤ siú.
- 25 Gu̿-chu̿ uòi giáng, nà nì iǒ̤ng cì-cháing ngê̤ng bṳ̿ hā diá-di̿: giâ-gíng nì gâ̤ bǒ̤ng-cîng gu̿ dō̤-di̿.
- 26 Cṳ̌-nêng uā, Nì iǒ̤ng làing ǐ cèng dṳ̀ing ga nû-gě , éng-ṳē dǎ̤-dí uòi ēng-nǎing ce̤̿ng gâ̤ sù-cài, niōng iǔ dǎ̤ cāi, ēng-nǎing suǒi gâ̤ sù-cài niōng iǔ dǎ̤ siú:
- 27 Ciū e̿ng-gái nà uòi gâ̤ ngê̤ng bo̿ng hā cîng-da̿ng, da̿u uòi chio̤̿ lâ̤ gâ̤ sî-hē ŏ̤ dǎ̤-diō̤ bǒ̤ng, ǐ ŏ̤ dǎ̤-diō̤ lī.
- 28 Iǒ̤ng-gǎ̤-sǐ niōng nà gṳ̀ iǒ̤ng cì-cháing ngê̤ng chiǒng lâ̤, dé nǎ ǔ ciǎ iǔ sí-cháing ngê̤ng gâ̤ nêng.
- 29 Éng-ṳē iǔ gâ̤ nêng gu̿ ŏ̤ tíng gṳ̀, ciū iǔ cèng cāi: mǎu gâ̤ nêng ciū-sī gṳ̀ iǔ gâ̤ , iǎ ŏ̤ chiǒng ko̤̿-tiāu.
- 30 Nà ǔ ciǎ mǎu-ē̤ng gâ̤ nû-gě dāi ko̤̿ ngṳē-bíng ú-o̤̿ng gâ̤ sù-cài : da̿u ǔ-di̿ iǔ gàu-ngâ, chiě-chǐ-di̿ tî-kǔ.
- 31 Da̿u nêng gâ̤ Gṳ̌ing iǔ ě̤ng-iāu duói sǎ̤-chṳ̄ gâ̤ câi lâ̤ gâ̤ sî-hē , gṳ̀ ciū ŏ̤ cō da̿u ě̤ng-iāu gâ̤ ṳ̄-di̿.
- 32 Tíng-à gâ̤ bă-sia̿ng dú ŏ̤ cṳ̀ hā gṳ̀ mīng-chîng iāng-iông gâ̤ nêng nà mîng-iông giǎng súing-iông-di̿ bṳ́ing chṳ̆ lâ̤.
- 33 Mîng-iông bo̿ng da̿u iū-bíng, dúing-iông bo̿ng da̿u cǒ̤-bíng.
- 34 Uǎng-di̿ ciū iáu iū-bíng nêng uā, Nì iǒ̤ng dǎ̤ uòi Dá biǒ̤ gâ̤ niōng lâ̤, ciě iǒ̤ng gǒ, ciū-sī giǎng kṳé-tíng bī-dī gâ̤ sî-hē tāi nì o̿-do̿-diū làu gâ̤:
- 35 Éng-ṳē tê-chîng uòi bǔ-gṳě, nì nà mî-dī nǎ uòi iè: chṳ̿-diǎu, nì nà mî-dī nǎ uòi chṳě: ca̿-kǎ, nì ciū ciě-duòi uòi.
- 36 Uòi mǎu í-ciông, nì nà uòi cē̤ng; uòi iǔ bāng, nì lâ̤ te̿-hē uòi: oi cō da̿u lâu-di̿, nì lâ̤ chū uòi.
- 37 Iǒ̤ng duói ngī-nêng ciū ŏ̤ a̿ing uā, Cṳ̌, uòi sū-mū sî-hē chū-gi̿ng nì bǔ-gṳě, nà mî-dī nǎ nì iè? chṳ̿-diǎu, nà mî-dī nǎ nì chṳě?
- 38 Sū-mū sî-hē chū-gi̿ng nǐ ca̿ kǎ, ciě-duòi nì? mǎu í-ciông, ciū nà nǎ nì cē̤ng?
- 39 Ǐ sū-mū sî-hē chū-gi̿ng nì mǎu-lō̤ng bāng, mǎu-lō̤ng cā da̿u lâu-di̿, lâ̤ chū nì?
- 40 Uǎng-di̿ ciū ŏ̤ a̿ing gṳ̀ uā, Uòi ì-cài iáu nì uā, Iǒ̤ng dī nì tê-chîng da̿u uòi cì-ciă děng siǎu hiáng-dī gâ̤ séng-di̿, ca̿-gua̿, ciū-sī ca̿ da̿u uòi séng-di̿.
- 41 Uǎng-di̿ ǐ iau cǒ̤-bíng gâ̤ nêng uā, Nì iǒ̤ng duói nêng sī e̿ng-gái ciu̿-mā gâ̤, ēng niōng hā uòi iǒ̤ng-di̿, niōng ko̤̿ ě̤ng-ṳ̌ing gâ̤ hǒ-di̿, ciū-sī ta̿i mǒ̤-gṳ̌ iáu gṳ̀ sǎ̤-chṳ̄ o̿-do̿-diū làu gâ̤:
- 42 Éng-ṳē tê-chîng uòi bǔ-gṳě nì ēng-nǎing nà mî-dī nǎ uòi iè: chṳ̿-diǎu, nì ēng-nǎing nà mî-dī nǎ uòi chṳě.
- 43 Uòi ca̿ kǎ, nì ēng-nǎing ciě-duòi uòi, uòi mǎu í-ciông, nì ēng-nǎing nà nǎ uòi cē̤ng: uòi mǎu-lō̤ng iǔ bāng, mǎu-lō̤ng cō da̿u lâu-di̿, nì ēng-nǎing lâ̤ te̿-hē uòi.
- 44 Iǒ̤ng duói nêng ŏ̤ a̿ing uā, Cṳ̌, uòi sū-mū sî-hē chū-gi̿ng nì bǔ-gṳě, chṳ̿-diǎu, ca̿ kǎ, mǎu í-ciông cē̤ng, iǔ bāng, cō da̿u lâu-di̿, ēng-nǎing lâ̤ te̿-hē nì?
- 45 Uǎng-di̿ ciū ŏ̤ a̿ing gṳ̀ uā, Uòi ì-cài iáu nì uā, Iǒ̤ng d1 nì tê-chîng ēng-nǎing da̿u uòi cì-ciă děng siǎu hiáng-dī gâ̤ séng-di̿ ca̿-gua̿, ciū-sī ēng-nǎing ca̿ da̿u uòi séng-di̿.
- 46 Iǒ̤ng duói nêng ŏ̤ ko̤̿siū ě̤ng-ṳ̌ing gâ̤ hěng-huǎ: ǔ ngī-nêng ŏ̤ dǎ̤-diō̤ ě̤ng-ṳ̌ing gâ̤ sáng-miāng.
← · Di̿ 24 Cióng · Di̿ 26 Cióng →
«Se̿ng-géng» gâ̤ mù-lṳ̀
