Se̿ng-géng/Mǎ-tuo̿i Hŭ-éng/8
[ 20 ]
Di̿ 8 Cióng.
- Iǎ-Sú à súing làu, iǔ cèng cāi nêng gáing gṳ̀.
- Iǔ cì-ciă bāng-tuǒi gâ̤ nêng lâ̤ ba̿i gṳ̀, uā, Cṳ̌, nì lâ̤ kǎing, ciū iǔ-nǎing-ge̿ nà uòi lōng lâi-lī.
- Iǎ-sú sṳ́ing siǔ, mó̤ gṳ̀, uā, Uòi kǎing, nì niōng bi̿ng lâi-lī kǐ lâ̤. Gṳ̀ gâ̤ tuǒi dāi-diū ciū lâi-lī tiāu.
- Iǎ-sú iáu gṳ̀ uā, Nì niōng siǎu-séng, iŏ̤ng dī ēng gǒ̤ng iáu nêng uā; niōng ko̤̿ nă ci̿-sí chū nì gâ̤ séng-tǐ, hṳ̿ing Mǒ̤-sái gáu-dō nêng hṳ̿ing gâ̤ mî-dī ca̿ běng-gṳ̀ nă duōi-gá-nêng chū.
- ¶ Iǎ-sú nì Gá-bă-nǒng sêng-dǐ làu, iǔ cì-ciă bǎ-cǒng lâ̤ giǔ gṳ̀,
- Uā, Cṳ̌ à, uòi gâ̤ nû-gě bāng-hóng dǎu da̿u chio̤̿-di̿, cèng cī, kǔ-chǔ dă̤-hǎing.
- Iǎ-sú ciū uā, Uòi giâ ko̤̿ í gṳ̀.
- Bǎ-cǒng a̿ing gṳ̀ uā, Cṳ̌ à, nì da̿u uòi chio̤̿-di̿ uòi ēng gǒ̤ng dó̤ng, lâ̤ giǔ nì uā cì gṳ̿ dī, uòi gâ̤ nû-gě ciū ŏ̤ hǎu-tiāu.
- Éng-ṳē uòi iǎ sī hū nêng gǔing, miâng à gōng iǔ [ 21 ]béng-dáing hū uòi gǔing, uòi hǎng iŏ̤ng cì-ciă, Ko̤̿, gṳ̀ ciū ko̤̿, hǎng ŭ cì-ciă, Lâ̤, gṳ̀ ciū lâ̤; hǎng uòi gâ̤ nû-gě, Ca̿ iŏ̤ng-dī, gṳ̀ ciū ca̿.
- Iǎ-sú tia̿ng-nī iŏ̤ng dī, ciū cèng gǐ-ī, iáu gáing gṳ̀ gâ̤ nêng uā, Uòi ì-cài iáu nì uā, Iŏ̤ng-gă̤-sĭ chéng se̿ng, ciū-sī Ì-să̤-liĕ nêng dǐ-bíng, uòi iǎ ēng-nǎing gi̿ng-diō̤.
- Uòi ǐ iáu nì uā, Dóng-bíng, sái-bíng, hē-lǎi iǔ cèng cāi nêng lâ̤ iáu Ngā-bă-là-hǎng, Ì-să, Ngǎ-gŏ̤ câi-câi gōng dŏ̤ cō da̿u tíng gŏ-di̿,
- Da̿u ŏ̤ nà iŏ̤ng gŏ gâ̤ bă-sia̿ng, dāi ko̤̿ ngṳē-bíng ú-o̤̿ng gâ̤ sù-cài; da̿u ŭ-di̿ iǔ gàu-ngâ chiĕ-chǐ-di̿ tî-kǔ.
- Iǎ-Sú iáu bǎ-cǒng uā, Nì mǒng chiō̤ ko̤̿, cia̿u nì iŏ̤ng-gă̤-sĭ se̿ng làu, ciū ŏ̤ ta̿i nì ca̿-chěng. Gṳ̀ gâ̤ nû-gě ŭ-cì dēng ciū hǎu-tiāu;
- ¶ Iǎ-Sú da̿u Bǐ-dă̤ chio̤̿-di̿, chū-gi̿ng gṳ̀ diōng-mǔ, cŏ̤ chiáu dǎu-diū.
- Iǎ-Sú mó̤ gṳ̀ gâ̤ siǔ, chiáu to̿-tiāu; gṳ̀ ciū kǐ lâ̤ te̿-hē Iǎ-Sú.
- Da̿u o̤̿ng-bíng-ciě iǔ nêng iáu-diū cèng cāi nă gṳ̌ mî-diū gâ̤ nêng hā Iǎ-Sú-di̿ lâ̤; Iǎ-Sú lâ̤ uā cì gṳ̿ dī, dāi tiāu gṳ̌, gu̿ í hǎu lǒng-cǒng iǔ bāng gâ̤ nêng:
- Iŏ̤ng ciū-sī niōng gi̿ng-hāu síng-dí Ì-so̿-ngā tê-chîng uā-gua̿ gâ̤ dī, Gṳ̀ báu-lǎng uòi-huo̿i-nêng gâ̤ kǔ-chǔ, dàng-dó̤ng uòi-huo̿i-nêng gâ̤ bāng.
- ¶ Iǎ-Sú chū-gi̿ng cèng cāi nêng ṳ̌-lṳ̌-diū gṳ̀, ciū gáu-dō hă-sáing dǎ da̿u ŭ-bíng ngāing-di̿ ko̤̿.
- Iǔ cì-ciă nāng-sṳ́ nêng lâ̤ iáu Iǎ-Sú uā, Síng-Sáing, nì mǎu-lō̤ng ko̤̿ nī-di̿ ko̤̿, uòi dú kǎing gáing nì.
- Iǎ-Sú uā, Ǔ-lǐ iǔ dōng, ciā-ciě iǔ chě, cǒng-lâ̤ nêng gâ̤ Gṳ̌ing mǎu ka̿u-tê gâ̤ sù-cài.
- Ǐ iǔ cì-ciă hă-sáing iáu Iǎ-Sú uā, Cṳ̌ à, cě̤ng uòi sáing chiō̤ ko̤̿ cō̤ng uòi gâ̤ dá.
- Iǎ-Sú uā, Nì lâ̤ gáing uòi, běng-cie̿ sǐ-nêng co̤̿ng gṳ̀ cù-cī gâ̤ sǐ-nêng.
- ¶ Iǎ-Sú iòng ṳ̌ing làu, hă-sáing ciū gáing-diū gṳ̀ ko̤̿. [ 22 ]
- Huǒi-di̿ sáng-bŭ-lěng-děng kǐ cèng duōi gâ̤ hóng; huǒi-lō̤ng nà ṳ̌ing ciá-diū, Iǎ-Sú dō̤-di̿ mì-chĭ.
- Hă-sáing lâ̤ hǎng gṳ̀ chíng-chǎng, uā, Cṳ̌ à, hia̿u uòi, uòi tǎu ě̤ng-sǐ.
- Iǎ-Sú uā, Nì iŏ̤ng mài chéng se̿ng gâ̤ nêng, ca̿-sū-dī gō̤ giáng nī? Ciū kǐ lâ̤, hǎng-diū hóng iáu huǒi, dāi-diū ciū sṳ̆-bī-lī càng-tiāu.
- Duōi-gá-nêng siǒng iŏ̤ng dī cèng gǐ-ī, gō̤-uā, Gṳ̀ sī sū-mū gă̤-sĭ gâ̤ nêng, hóng, iáu huǒi, dú tia̿ng-nī gṳ̀.
- Iǎ-Sú da̿u ŭ-bíng ngāing làu, ciū-sī Gă̤-gă̤-sá dī-huó̤ng, pōng-diō̤ liòng-ciă nă gṳ̌ mî-diū gâ̤ nêng, giǎng dě̤ng-di̿ chṳ̆ lâ̤, cèng hé̤ng, mǎu nêng gǒ̤ng giǎng ŭ diō̤-di̿ gua̿.
- Nă gṳ̌ mî-diū gâ̤ nêng hǎng kǐ lâ̤, gō̤-ua; Ciōng-Di̿ gâ̤ Gṳ̌ing, Iǎ-Sú, uòi iáu nì sū-mū gúing-niǎ? sî-hē gu̿ ēng-nǎing da̿u, nì sáing lâ̤ hǎng uòi siū kǔ?
- Dàu-dàu-di̿, iǔ cì-bó̤ng kṳ̌ dō̤-di̿ iè.
- Gṳ̌ giǔ Iǎ-Sú uā, Nì lâ̤ dāi-tiāu uòi, ciū cě̤ng uòi nì ŭ cì-bó̤ng kṳ̌-di̿ ko̤̿.
- Iǎ-Sú uā, Ko̤̿, Gṳ̌ ciū giǎng ŭ liōng nêng séng-di̿ chṳ̆ lâ̤, nì ŭ cì-bó̤ng kṳ̌-di̿ ko̤̿. Ŭ cì-bó̤ng kṳ̌ sáng-bŭ-lěng-děng biáu à súing-lè̤ng, diǎu hā huǒi-di̿, ě̤ng-sǐ-tiāu.
- Sī kṳ̌ gâ̤ nêng cě nì sêng ko̤̿, nà iŏ̤ng duói dī, iáu ŭ nă gṳ̌ mî-diū gâ̤ nêng ka̿ing pōng-diō̤ gâ̤ dī, dú gǒ̤ng nă nêng tia̿ng-nī.
- Tóng sêng-dǐ gâ̤ nêng, dú sáing chṳ̆ lâ̤ pōng Iǎ-Sú; chū-gi̿ng gṳ̀, ciū giǔ gṳ̀ ko̤̿, ēng niōng hā iŏ̤ng dī-huó̤ng-di̿ gṳè-diū.