Valikos binos gudik kelos finos gudiko
Äbinos kozid makabik, das düps balsetel pos namapenäd rigädik KOSMOPOLANA piseitom len söls Gibbs, Shallard e Ko. al pabükön, büköp fiama at pädistukom fa fil löliko, (balsul 1id 1890) e namapenäd neläbik päfiledom kobü valikos votik in bumot. Kanon datikön das du Fila-reg valüdik e lufidöl äpaudom bevüniko, telapükot boso äs at äzidom.
Fila-reg: "E kis binol, KOSMOPOLAN? No ekokömob büfo bosi äs oli."
"Kosmopolan": "Binob smanim gaseda miegik. Spelob födön blodef menada, yufölo menis valik kapälön okis balvoto. Dälolös obe pamotön e duinön vobi obik."
Fila-reg: "Liedö! If inolobla das äbinol is, no ilengonoböv löliko vutik, ab nu palonob defiledön valikosi kelos seistos in veg obik, jüs orivob mieti anik keli no okanob dutävön. Ab no dledolöd, polegetol denu e, pefomöl nobikumo, olengonol e oplöpol tefü sugiv olik."
Ma lesag at namapenäd telid evedom, kel pubom anu as nüm balid Kosmopolana. Oyufomös födön fekami blodefa bevü mens netas valik!
Se Kosmopolan 1891, Nüm: 1, Pad: 4.