Минь Кольканьке тячи киноса,
Сон оржаста кулхцонды, ваны
И рады, аф азомшка рады,
Кда сатоль картинась мянь вандыс.
Няйсы: якстерьхнень лангозост стенакс
Акша казакне кяжиста шаштыхть.
Колькать сединяц мяштьсонза кулось:
— Патяй, ванака!.. Али аф маштыхть
Нятнень крафтома? Синць афи пелихть!
Хоть ласькозне тульхть, пади, мянельхть.
Эх, маласот, маласот ёфси,
Синь шавсазь Щенязеньге тяни!.. —
Но татназевсь эрек „Максимкась“
И акшетнень шяй тишекс ляди,
Синь пяляз вирьгаз лаца ардыхть
И рядонь-ряд кулофста лядыхть.
Вов соколкс лийкстась сонць Чапаев,
Сонь кожфть эзга уенди буркац,
Налхки ёндолнякс эсь кяры шашкац, —
И пялясне эздонза курьгодсть
Пильгонь-прянь синдезь, шапамста рангозь.
Соколть лефксонза прнофнесть, сатнезь
И Чапаевокс оржаста кандснон
Лиембачк равжа модати матнезь.
Залсь лаказевсь, зярнязевсь атямкс.
Минь ёлманясь кядензон лапай:
— Щенязе... Чапаев Иваныч! —
Колькась комотни, фкя вастса тапай...
Равжа шаль кодась весь модать велькска.
Щеняц Колькать мор ушедсь — ваймяй,
Горязь горяй сонь тенороц, лии
Вярьге, вярьге и шобдати ваяй.
Акша зверьхне веть эзганза юргихть,
Пильгокинзон никсазь, соколть вешезь,
Срафтозь-калафтозь пизонц, крьвястезь,
Сувихть, урондыхть, инекуйкс вяшкихть.
Ох, маряйста сускозь Чапаевть...
[ 9 ]
Вов Петькась ужяльдезне вятьсы, —
Сон жольнефтсь Уралу и тюри
Кяжи ведть мархта фкя вии кядьса.
Шаржу берякста кивиень пиземсь
Ранав соколть лангс кяжиста валы...
Цёрокшть седиец эняльди, олькси,
Толса-ведьса Щенянц инкса палы.
Фатясь кядезон, валоц изь азов,
А сонць ёрай аердомс эздон,
Мярьгат, комоти вастстонза, ласьки
И Чапаев щенянцты сон лезды.
Вов маласа, маласа беряксь...
Од орёлхневок лиихть ни вармакс,
Йорайхть лездомс. Но аш ни Чапаев!..
Волнатне сонь вечнай онц калмазь.
И аварьгодсь, кольгозевсь цёрокшсь,
Нолдань прянят, валомне сась куду,
Васту мадсь. Вов атёкшне ни морайхть,
А сон нинге капля изь уда.
Кинос целай недяля якась,
Пялевенять самс коварясь вастса,
Щенянц колга канзедезь арьсесь
И салава куфкснесь крхкаста.
— „Азка, браткязе, мес мянь тняроксть
Тон ваныть Чапаев щеняцень?
Колька, азк, мес эрь ваномда меле
Эрясь нолдафста тонь ёню пряце?“ —
— Патяй, мон эрь шиня фалу учсень,
Пади, мезьге лия тоса ули...
Пади, лездыхть Чапаев щенязти,
И живойняста беряку уи.
|
