Колхозонь эряф/1941/03/Хитрай келазсь и колай катось
| ХИТРАЙ КЕЛАЗСЬ И КОЛАЙ КАТОСЬ |
Эрясть-ащесть атят-бабат. Синь ульсь катосна. Тя катось пяк колаль: порендезень бабать лофца лангонзон, сиволензон, — порендезень сембонь, мезе пови.
— Бабаньке, — мярьгсь атясь, — тя зверь катоть мон тячикиге кандса вири, штоба сон оду афоль сав меки.
— Каяк шава кяскавс и кантк, — мярьгсь бабась.
Атясь каязе катоть шава кяскавс и тусь оцю вири. Кадозе сонь тоза и сонць сась куду.
Катось якась вирьге и кунцесь шеернят.
Хитрай келазсь няезе каготь, мольсь малазонза и корхтай:
— Шумбрат, аф содаф зверь! Да коста тон сать? Мон нинге тяфтама мазы зверьхть ёт шачень изень няенде!
— Мон сань Сибирьста! Сань сембе зверьхнень лангс азоркс! — отвечась катось.
— Д-а-а. Пара. А тон рьвяяфтфат?
— Рьвязе нинге аш!
— Сявомак рьвакс!
Катось ванць ширем сельмонят келазть лангс и мярьгсь:
— Кда молят, то сяфте.
— Молян, — согласиндась хитрай келазсь.
— Архт, азондомак сембе зверьхненди, штоба синь сальхть мондейне сюконяма. Кие аф сай, сянди кальдяв ули! Пачк сязьса!..
Келазсь тусь зверьхненди катоть колга азондома.
Моли яннява. Сай каршезонза косой нумолнясь.
— Лоткак, косой! — ювадсь келазсь нумолняти.
Нумолсь лоткась.
— Мезевок изеть маря?!
— Аш! — отвечась нумолнясь.
— Сембе зверьхнень лангс азор сась Сибирьста, лемоц Кот. Монь сявомань рьвакс и макссь тейне приказ, штоба кочкамс сембе зверьхнень сонь пильгозонза сюконяма. Кие аф сюконяй пильгозонза, Котсь сязьси сонь кафту. Мольхть, косой, оцю тумоть алу, да мархтот сяфть казне. Маряйть?
— Маряйне, — мярьгсь нумолнясь. Сонць пяк эводсь.
Келазсь тусь.
Нумолнясь пельсь молемда оцю тумоть алу, но аш месть тиендемс. Сон салась лофца сяканя и тусь тумоть алу. Тумоть ала кивок ашель. Нумолнясь путозе лофца сяканять тума юрть ваксс, а сонць кяшсь коське тишенятнень ёткс.
[ 78 ]Келазсь моли киге. Каршезонза сай офтсь.
— Лоткак, косолапай!
Офтсь лоткась.
— Мезевок изеть маря?!
— Аш! — отвечась офтсь.
— Сембе зверьхнень лангс азор сась Сибирьста, лемоц Кот. Монь сявомань рьвакс и макссь тейне приказ, штоба кочкамс сембе зверьхнень сонь пильгозонза сюконяма. Мольхть, косолапай, оцю тумоть алу, мархтот сяфть бука.
Келазсь тусь.
Офтсь арьси: «Кодама стамсь зверь?! Улема мондедон оцю! Букась мондейне аф сивови, а сон ёрасы сивомс».
Салась веленяста офтсь бука и кандозе оцю тумоть алу. Сонць куцсь тумоть пряс и учи катоть саманц.
Хитрай келазсь васьфтсь врьгазть.
— Лоткак, воронь сельме!
Врьгазсь лоткась.
— Мезевок изеть маря?!
— Аш! — отвечась врьгазсь.
— Сембе зверьхнень лангс азор сась Сибирьста, лемоц Кот. Монь сявомань рьвакс и макссь тейне приказ, штоба кочкамс сембе зверьхнень сонь пильгозонза сюконяма. Мольхть, воронь сельме, оцю тумоть алу и сяфть мархтот боран.
Келазсь тусь.
Врьгазсь тусь вели, салась боран и кандозе оцю тумоть алу. Путозе боранонц, а сонць кяшсь тумоть ваксста костярть алу.
Хитрай келазсь тмашиндазень сембе вирень зверьхнень. Сонць музе катоть и корхтай:
— Кельгома мирденяй, аде тумоть алу, тоса порембяль ули. Сембе зверьхне сайхть тонь пильгозт сюконяма.
— Туме! — мярьгсь катось.
Катоть мархта келазсь тусть оцю тумоть алу. Катось няезень тумоть алда поваф букатнень, бораттнень и комотсь синь лангозост.
— Мал! Мал! Мал! — пешкодозевсь катось. Сонць кармась палда порема.
Офтсь тумоть пряса арьси: «Сонць ёмланя, а мзяра пори! Мзяра кандоме порембяльда, сякокс ювачни: «Мал! Мал! Мал!».
Нумолнясь тишенятнень алда ёразе ваномс Котть, венептезе прянц, тишенятне шерьхкозевсть. Катось арьсесь, што синь алост шеер, и кодак комоти тоза! Нумолть киськордазе боконц. Косойсь афи мяляфтсы, кода тусь ардозь. Катось сонцьке пяк эводсь и комотсь костярть лангс. Костярть ала врьгазсь арьсесь: «Ну, пезе! Пондасамань!» Лиссь эводезь костярть алда и тусь ардозь коза няи сельмоц.
Катось эводсь и куцсь тумоть пряс. Тумоть пряса офтсь арьсесь: [ 79 ]«Ну, пезе! Порьсамань!» Нолдазень мадянзон и прась алу. Калафтозень казфонзонга.
Катось сяшкава эводсь, што афи мяляфтсы, кода ворьгодсь тоста. И ашезь сашенда оду вирть маласка.
А хитрай келазсь прась тумоть алу кунтф и сяшкава рахась, што рахаманцты гайнясь мянь пиче виресь.