Эрзянь Мастор/2009/18/Сёксень мизолкст

←Создатели официального сайта органов власти Мордовии вообще не различают, где эрзянский язык, а где мокшанский

Эрзянь Мастор, № 18 (314), 30 сентября 2009 редактор Нуянь Видяз, Кшуманцянь Пиргуж Сёксень мизолкст сёрмадызе Нуянь Видяз

"Наш голос"→

Статья на сайте газеты: № 314, 30.09.2009, Сексень мизолкст. Нуянь Видяз

 

Сёксень мизолкст.

Нуянь Видяз

 

Косо килейтне седе ашот?

 

*  *  *

Килейть, килейть, килейть...

Сэрейть сынь ды ёлганят. Вастневить одт, сыреть, рацянят.

Ашот, ашот, ашот...

Маряви, килеень те тюсось кемевиксстэ вансты перькан каштмолеманть ды эсь паро ежом.

Косо сынь, килейтне, седе ашот? Кона ёно седе лембе вановтост?

Эрямо пингем перть косо ансяк араселинь! Пачколинь омбо масторовгак. Нейнинь эрьва кодат. Ансяк...

Весемеде ашот, натой сэньшть мерить, весемеде сынь седеень кецявтыцят, мештьсэнь свал эрицят Чачома ёнкссом—таркатнесэ, косо прась кельпрястом васень валось, косо васенцеде ёвтыя «авай» валонть.

Тосо сынь ашот, ашот...

 

*  *  *

Вирявань сэдне

Эскельксэнь келесэ лейненть трокс ашо чирькекс мендявсь кедень эчкеэ килейне. «Ды те кое-кинень алкуксонь сэдне!» — токнозевсь седеем.

Сонзэ ланга, кемезевинь, лейненть томбалев ютни пелеве малава сонсь Вирявась. Ютни салава, пильге сур лангсо. Пели, иляст пувтаво удыця нармунтне, иляст чольдердезеве сиянь пилекстнэ, конатнень понгавтнинзе тарадтнэнь пева ковось.

Мезть тия сон якси, кодат тевть якавты?

А содан. Меремс видестэ, монень мень тев. Мекс монь кевкстемс? Кадык якси, кува тензэ эряви.

Сы пелеве, ды таго сон каштмолезь туи лейненть тона ёнов. Тевть...

Содавлитькак тон, Вирява, кода тень а сатны истямо сэдне...

 

*  *  *

Сёксень ёвкс

Веть, киньгак апак кевкстне, прась васенце кельме. Тикшетнень лопаст ланга валскень зорясь почодсь почт. Коштось — лексят лексевлить. Кашт. А чульть а чальть. Молицянть эскельксэнзэ, эрьва кашторксось марявить кие соды косто.

Чивалгома ланга, зярдо сырнекс кувтолдозевсь чипаенть меельце мизолксозо, виренть келес пиже-ожо вайгельсэ лайшезевсь-кувсезевсь Вирявась.

— Э-э-эй! — серьгединь тензэ чудикерькс ёнов молиця лейненть трокс: — Мезе теевсь мартот? Мекс, кувака черь, истя рангат?

— Сурсемевтеме кадовинь! — каятотсь тона ёндо, вирень седе чопода таркастонть. — Течинь кельмесь пултазь пултызе сурсемем. Ков ней мои апак судря?..

— Ужо, оймак, вирень прявт! Мезеяк лия мутано, — оймавтыя сонзэ.

— А-а-а! — лажнозевсть вайгельдень перькан чувтнэ. Сурсеме... Те таго мезень содамоёвкс?

А содылинь: кувака ашназа, прок лияназ, черензэ вирень азоравась кизна свал судрякшны-вадяшавтни папоротникень лопасо. Секскак те покш толга ёнов молиця тикшентень мерить вирявань сурсеме. Цякскадсь ней вана, прянзо а мейсэ судрямс.

Мейсэ, кода ней лездамс майсевицянтень?

Мелявксом монь ней вейке...

Лопа, мельганзо омбоце, колмоце...

Те аволь икелем сыреждиця килеесь ёмавтни мазычинзэ. Аволь пекшеськак.

Те шкась истя ноцори эрямо пингестэм читнень.

Чи, мельганзо омбоце, колмоце...

Сы тундось. Сон паласы, кутмордасы те ёлганя килеенть ды копачасы пачк невтиця пиже пацясо пекшенть. Оршневтьсынзе одирьвакс. Шкань ютазь сынь, виресь гайгезевить цёковонь оймеёжонь солавтыця гайтьсэ.

Монь ванна сыре коськаня чувтом зярдояк уш а пургонды.

Лопа — чи.

Лопа — омбоце.

Лопа — ... прядовсть.

Мелявксом монь ней вейке: эрьва лопась, зярс эзь пра, валдомтоволь перьканзо тарадтнэнь, вельмевтевель кенярксонь толнэть.

 

*  *  *

Ков?

Вирень китнева-янтнэва чудить-чольдердить сырнень чудикерькст. Истя чуди эзгаст тундонь-кизэнь перть таштазь мазычись.

Эрьва эскелькстэм пильгень алдо мени якстерть тюс нармунь-жойть. Мени ды туи ливтязь перькан чатьмониця чувтнэнь юткова. Те истя кортни мартон сонсь ожо сёлмо, нусманя ёжонь сратвниця сёксесь.

— Ков-ков, ков-ков — ливтнить пильгем алдо кортакшов нармунтне.

— Ков, видеяк? Ков истя тон? — кевкстни эйсэнь икельгам чольдердезь чудиця ожо ведесь.

Эскелькс, таго — «ков?«. Омбоце, таго...

— Кода ков? — менсь кельстэм, седеем эзь кирдевтъ, машнетезь. Ков весе, ков тынь, лопат, тов монгак. Эли, а содасынк, ков терди эйсэнк ды эйсэнь модась-масторось?

Ков-ков...

 

*  *  *

Сюкпря, шекшата!

Эзинь кенере панжомо сельмень, кие-бути: тук-тук-тук...

— Кие тосо? Кинь удомазо явась? Одс сутяминь.

Тук-тук-тук, тук-тук-тук...

Мезе теят, сави кадомс лембе тарканть.

Кепе-штапо ютынь вальманть пелев ды варштынь ушов. Тусто бояркуротнень юткова кивчкаесть пиже озязт. Лопатнень ланга ожолдсть чувтонь шукшт.

Чарькодинь.

Кува-бути вальматнеде верьга пельнесь варят, пештсь тутманзо шекшата.

— Теке лия шка эзь муе, — меринь марямга музгордезь ды одс чиреминь тарказом.

Явавтомс удоманть эзь саво.

Тук-тук-тук — таго каятотсь ушосто.

Стинь ды карминь оршнеме.

Мезть кежиявтнемс нармунненть лангс? Мезень чумозо? Шкастонзо тень тянкадсь. Кие удси истямо шкане? Вальмалга яки-паки прясто пильгс ожо-якстерьсэ оршазь аволь сыре ава — мон те шкас, визьксчама, тарка лангсо лужалян, рунго сэставтнян...

— Сюкпря, шекшата, стявтомат кис!