Эрязденть арсезь (2010)/Эх, тети-тетяй!..
| ←Пазонь видьме | Эрязденть арсезь (2010) by , edited by Разгуляева Т. В. Эх, тети-тетяй!.. |
Мекс истя теекшнынь?→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 24—26 |
[24]
| Эх, тети-тетяй!.. |
... Кудосонок трокс аравтозь стуворонть экшсэ вете-кото а сыре а од цёрат. Икелест ярсамо ды симемапельть. Копордазденть кельтне онкстамост каизь. Кортыть вельть марямга, мерят перькаст аштицятне амарицят. Эрьвась эйстэст превей, ламонь содыця, виев — каня лиякс эрси рюмкадо мейле? — ды эрьвась бажи невтемс тень вакссонзо аштицянтень. Кунсолыцяськак аволь чаволатнеде, сонгак бажи превть максомо.
Каятотсь, айгинзе кортамотнень, вайгель:
| [25] | Скакал казак через долину, |
Моронть серьгедицязо — тетям. Ашти эйстэнь ялганзо ютксо кутьмере ёндо. Ашо панарсонзо, мазый, од, тензэ эзть топоде ниленьгементнеяк. Нурькинестэ наразь валдо тюс черензэ судрязь удалов. Моры, сонсь моронть лувсо мештензэ икеле ахоли кедьсэнзэ. Лиятнеяк «урнозевсть». Кудось пешкедсь цёрань, вирекс увныця вайгельтнеде. Морось снартни лисеме ушов, марявлизь весе, шабратнеяк. Вечксы сонзэ тетям. Лиясто латало чави пелюма, лакси, инзэди эли теи кодамояк лия шожда тев, сонсь, вайгелень кирдезь, мурны «скакал ойть».
* * *
Икеле, понкстомо чийнема шкастон, стувор экшсэ, лиясо косо, морсематне, кортамскак а мезть, лиятальть. Эрсесть чуросто. Ней мезе, ловт, эрьва чистэ морсемат-аштемат: чачома чи, вастомат-ильтемат, содавиксэкс теевемат, «шлямот»... Мамштак, Ваняй, иля ванкшно тей-тов! Икеле, ютазь пингень кодгеменце иетнень самс, чачома читнеде а содыльткак. Косто! Эрьва кудосонть вете-сисем, мик вейксэ-кемень ярсамс вешицят. Карминдерят эрьванть чачома чинзэ тешкстамо... Вай, седе ён а ледстнемскак! Понкстомо кадоват. Паро куш кирдемс мельсэ, конась зярдо чачсь, лемест а човорямс! Ней? Ней вете ломаньс — някине. Вете ломанть киштить перьканзо, савтыть тензэ кода маштыть. Секскак цюцькиезь-палсезь ламо кастозетнестэ иезэнзэ кавксть шлить-валныть чачома «денест».
... Тетяй-тетинем, тон умок-умок тоначисэ эриця. Марить вайгелем, ризксстэ пешксе валон! Мекс тон сестэ, пиже няка шкастон, эзик серьгеде минек велесэ весемеде морсевикс ды вечкевикс «Вай, исень саевть одирьвась» моронть? Сон ульнесь «минек велень»! Тарказонзо ледстнить кодамо-бути казакто ды Маньчжуриядо. Тети, ёвтык, содылить-арась: неть моротнесэ ойметь полавтсть ды прязот лия, ят превть эцесть? А содылить, а чарькодилить, кеман. Секскак чумокс тонь а лован. Цёрат вана, тондеть малав кавксть ламо эрицясь, тень чарькодизе. Чарькодизе ды янкси: мекс одксшкастонзо моронзо ульнесть рузонь. Содат-арась тон тосо, [26] тоначисэ, кодамо пешксе, уцянь яжиця-калавтыця канст сайсь эсензэ лангс эйстэть лисезь тарадось? Сави тензэ кандомс, ускомс сталмонть тонь кисэяк, весемень кисэяк, кить морасть мартот «скакалонть», кить морыть ней «Вольные краянть», «Ой, мо-роз, мороз...» ды ламодояк ламо рузонь лия моротнень.