دیوانی حاجی قادری کۆیی/چوارینە

by حاجی قادری کۆیی

1

یا ڕەب بە قەدەر حەرفی سیووتی یەک یەک	ڕەحمەت لە موسەننیف و لە قاری بێ گەلەک
ئەمما عەجەم و ئەو کەسی چاپی دانا	بیباتە جەهەننەم بە عەزاب و بە کوتەک

2

ئەی ڕەفیقانی وەتەن زۆر غەزەلم ماوە لەوێ	لە کەنارێکەوە تەقدیرە وەکوو هەڵبکەوێ
وەک سەفینە بگەڕێ بیخەنە بەر بەحری قسەم	حەیفە وەک من لە غەریبی بمرێت و نەتەوێ

3

لە سەردەشتی میحنەت پەڕەی کردەوە	کەوانی بەڵا، لۆکەیی پەیکەرم
بەڵاڵووکە دەرمانی دەردم دەڵێن	بە پارە وەگیر ناکەوێ بیکڕم

4

ئەی عوتارید لە دەرت خادیمی سەججادە بە شان	وەی لە کۆیی فوسەحادا قەڵەمت سنجقەشان
حاجی قادر نییە بەیتێکی وەکوو ئێوە بڵێ	ئەسپی کۆن زەحمەتە دەرچێ لەگەڵ ئاهووڕەوشان

5

نەقدی عومرم بە غەزەل دا و دووکانم دانا	هیچ کەسێ نەیکڕی، ترسام لە ڕزین و لە خوران
بێ بەها دامە ئەم و ئەو وەکوو کوردێک کە ڕژا	ڕۆنی؛ ئەو وەقتە دەڵێ: کردمە خێری کوڕەکان

6

سەقەرێکە سەفەری ڕەهڕەوی بێ تووشە	خاسەتەن ئەم سەفەری بەد ئەسەری بێ تووشە
بەدرەقەی ڕێگە ئەگەر خدری نەبی بێ تووشە	کافییە کافییە کوا مەنزڵی من بێ تووشە؟

7

یا ڕەببی تو خەللاقی عظيم الشأنی	هەرچی کە بووە و دەبێ و دەیێ دەیزانی
من بێ خەبەرم لە ئەووەڵ و ئاخری خۆم	حاڵیم بکە لەم بەیتە چییە ئینسانی؟!

8

بەیتی نالی و بەیتی من گەر تێکەڵی یەکتر دەکەن	ئەحمەقی سوورەتپەرست و جاهیلی مەعنانەزان
حاجی لەکلەک لەک بە لەک فەرقی لەگەڵ تووتی هەیە	وەک هەزاری نەوبەهار و بولبولی فەسڵی خەزان

9

شەوکەتی جووتەی سمێڵت تاکە، مانەندی کەمە	تەرکەشی تیری تەژا و شیری دەستی ڕۆستەمە
ڕووی لە تەختی ڕوومەتت هێناوە بۆ شانت دەڵێی	ماری سەر شانی زوحاک و دوژمنی تەختی جەمە

10

سمتی دەلەرێتەوە دەڵێی دووگی مەڕە	گرد و سپی و لووسە وەکوو تووری تەڕە
ماڵێکە ئەگەر بدا بە نەقدی دڵ و جان	خۆشتی لە سەری بنێی، جەهەننەم بکڕە