دیوانی سالم/ق
1
edit| لازمی عەرزوحاڵمە کاغەزی زەڕ تەبەق تەبەق | شەرحی میحەن بە خوێنی دڵ سەبتی دەکەم وەرەق وەرەق |
| تیری نیگاهی دڵبەرم یەک یەکی نیشتە ناو جگەر | سینە لە ترسی پیلکی موتتەسیلەن شەبەق شەبەق |
| گەرچی شەکەر لە هەر مەزاق ساحیبی لەززەتە وەلی | شەهدی حەلاوەتی لەبت بردوویە لێی سەبەق سەبەق |
| زوڵفی سیاهی چین بە چین مائیلی دووشە خەم بە خەم | حەلقەیی ئەو لە گەردنم پێچشی دا وەهەق وەهەق |
| وەسڵ و سەفا و کەیف و زەوق هەفتەیێ بوو چ زوو گوزەشت | باز من و بێکەسیی و غەم کەوتینە لاوە دەق بە دەق |
| گەرچی زەمانی وەسڵی یار شەهد و شەکەر لە بووسە بوو | ئێستە بە تەبعی ڕۆژگار ژەهرە فیراقە دەق بە دەق |
| عیبرەتی نازەنین کوا شامڵی حاڵی سالمە | ناڵەیی ئەو بە سامعین گریە دەدا فیرەق فیرەق |
2
edit| وەکوو یەک دێتە بەرگوێی پیاوی ئەحمەق | نەفیری بولبول و ئاوازی لەق لەق |
| لە بازاڕی جیهان وەک یەک دەناسن | لە زەردیدا تەڵا و ڕەنگی مەفرەق |
| لە حەرفی ناکەسان با چەند ڕۆژێ | گران کەم گوێم بە پەنبە و سورب و زەیبەق |
| لەبی تەنگی دڵارامم دەبەخشێ | بە غونچەی نەوشکوفتە ڕەنگ و ڕەونەق |
| لەبەر نەقشی خەیاڵت کولبەیی من | سەراسەر نەقشە وەک قەسری خەوەرنەق |
| بە گەردش دێ لە جۆشی گریە ئەندام | بەسەر دەریایی ئەشکا میسلی زەورەق |
| مەقامم کەن بە زەجر ئەر داری مەنسوور | دەکێشێ خوێنی من نەقشی أنا الحق |
| لەبەر تیغی برۆت دڵ وا دەلەرزێ | لە ڕووی سەیفی عەلی کوففاری خەندەق |
| لە سەرخۆشی غەما بۆ فەوتی شادی | وەرە سالم بکەین با جامە ئەزرەق |
3
edit| لە چەرخی حوسنتا هاتن موتابق | شەو و ڕۆژ و هیلال و سوبحی سادق |
| لە خاکا لالە کەی دەڕوێ بەهاران | نەڕێژێ خوێنی دڵ گەر چاوی عاشق |
| لە من تا دوورە چیهرەی ئەرغەوانت | سروشکم دێتە دامەن وەک شەقایق |
| لە ڕووی ئایینەتا تا تووتییی دڵ | حەریفی خۆی نەبینێ نابێ ناتق |
| دڵم وەختێ لە عوهدەی چاوی تۆ دێ | بەسەر بازا ببێ عوسفوور فایق |
| دەترسم دڵبەری دڵسەخت سالم | لە خاتریا نەمابێ عەهدی سابق |