Biblia/Nove Testamento/Corinthios/1Corinthios 16

1 Corinthios

16

Un collecta pro adjuvar le christianos del Judea

¹Concernente le collecta pro le sanctos, per favor seque le instructiones que io dava al ecclesias del Galatia. ²Le prime die del septimana, cata un de vos deberea poner a parte e sparniar un certe summa de moneta in proportion a quanto Deo le benediceva^[1], de sorta que un collecta non debera plus esser facite quando io veni. ³E quando io arrivara, io inviara les qui vos approbava^[2] con litteras de explication pro portar vostre dono^[3] a Jerusalem. ⁴E si il pare consiliabile que io vade alsi, illes venira con me.

Le projecto de Paulo de visitar Corintho

⁵Io venira a vos, tamen, quando io habera passate per le Macedonia - proque io transira per le Macedonia. ⁶Io remanera con vos, forsan le integre hiberno, de sorta que vos me adjuva in prosequer mi viage. ⁷De facto, io non desidera vider vos solmente de passage, proque io spera permaner con vos un tempore plus longe, si le Senior lo permitte. ⁸Ma io remanera a Epheso usque a Pentecoste, ⁹proque un porta de grande opportunitates se aperiva largemente pro me, ma il ha multe oppositores^[4].

¹⁰Ora, si Timotheo veni, certifica que ille habera nihil a timer inter vos, proque ille face le obra del Senior le mesme que io. ¹¹Non permitte que alicuno le tracta con minusprecio, ma face prosequer su cammino in pace, de sorta que ille veni a me, pois que io le expecta con le fratres.

¹²Concernente nostre fratre Apollo, io fortemente le incoragiava a visitar vos con le altere fratres, ma il non esseva simplemente su intention de venir nunc. Ille venira quando ille habera le opportunitate.

Exhortationes final e benediction

¹³Sia alerte, permane firme in le fide, demonstra corage^[5], sia forte. ¹⁴Toto lo que vos face sia facite con amor.

¹⁵Ora, fratres e sorores, vos sape in re le familia de Stephano qui, como prime a esser convertite^[6] in Achaia, illes se consecrava al servicio^[7] del sanctes. Io exhorta vos ¹⁶a submitter vos a tal personas e a quicunque adjuta in le obra e travalia^[8]. ¹⁷Io esseva felice al arrivata de Stephano, Fortunato, e Achaico, proque illes suppleva le communion que vos non poteva dar me. ¹⁸De facto, illes recreava mi spirito e le vostre. Tal personas merita appreciation^[9].

¹⁹Le ecclesias in le provincia de Asia manda vos salutes. Aquila e Prisca saluta vos multe affectuosemente in le Senior con le ecclesia que se incontra in lor casa. ²⁰Tote le fratres e sorores manda salutes. Saluta le unes le alteres con un sancte basio.

²¹Io, Paulo, scribe vos iste salutation con mi proprie mano.

²²Si alicuno non ama le Senior, que ille sia anathema. Maranatha^[10].

²³Le gratia del Senior Jesus sia con vos.

²⁴Mi amor sia con tote vos in Christo Jesus.

Notas

1. O “rendeva vos prospere”.
2. O “designava”.
3. O “contribution”.
4. O “adversarios”.
5. O “age virilmente”, “age sicut homines”.
6. O “primitia”.
7. O “ministerio”.
8. O “labora durmente”.
9. O “recognoscimento”.
10. Illo es: “Le Senior veni!”.