Biblia/Nove Testamento/Hebreos/Hebreos 3

Epistola al Hebreos

Capitulo 3

Jesus e Moses

¹Ergo, sancte confratres, qui participa al vocation celeste, considera Jesus, le apostolo e le summe sacerdote que nos professa^[1]. ²Ille es fidel a qui le appunctava, id es Deo, sicut lo esseva Moses in le domo de Deo^[2]. ³Jesus, totevia, meritava un gloria plus grande que Moses, justo como le edificator de un domo merita un honor plus grande que le domo ipse. ⁴Nam omne domo es edificate per alicuno, ma qui edifica omne cosa es Deo.

⁵Ora, Moses esseva fidel in tote le domo de Deo^[3] qua un servitor. Su opera esseva un illustration del cosas que haberea essite revelate plus tarde^[4]. ⁶Christo, tamen, es fidel qua un filio super le domo de Deo. Nos pertine al domo de Deo, si vero nos imbracia firmemente nostre fiducia e le sperantia del qual nos gloria nos.

Audir le Parola de Deo con fide

⁷Ergo, sicut dice le Spirito Sancte^[5]: “Hodie, si vos audi su voce, ⁸non indura vostre corde como vos faceva quando vos rebellava vos a me durante le dies del tentation in le deserto. ⁹Ibi vostre ancestres me tentava ponente me al proba, mesmo si illes habeva vidite tote lo que io habeva facite pro illes per quaranta annos. ¹⁰Assi io esseva in cholera con illes, e io ha dicite: Lor cordes semper erra; illes refusava facer lo que io les habeva dicite^[6]. ¹¹Propter illo io jurava in mi cholera: Illes non entrara in mi loco de reposo”.

¹²Presta dunque attention, fratres, que nemo inter vos ha un corde mal e incredule que derelinque le Deo vivente. ¹³Ma exhorta le unes le alteres cata singule die, durante que il es ancora “hodie”, ut vos non sia decipite per le peccato e indurate contra Deo. ¹⁴Quia si nos remane fidel usque al fin, confidente in Deo tanto firmemente quanto in le momento quando nos credeva pro le prime vice, nos va participar del substantias de Christo^[7]. ¹⁵Como il es scribite: “Hodie, si vos audi su voce, non indura vostre cordes como faceva Israel quando illes rebellava se a Deo”. ¹⁶Quia, qui esseva illes qui audiva e se rebellava? Nonne il esseva illes qui sortiva del Egypto sub le direction de Moses? ¹⁷E contra qui esseva Deo provocate per quaranta annos? Nonne esseva illes qui peccava, cuje cadaveres jace in le deserto? ¹⁸E a qui Deo parlava quando ille jurava que illes non haberea entrate in su reposo? ¹⁹Assi nos vide quia illes non poteva entrar in su reposo propter lor incredulitate.

Notas

1. O “de nostre confession”. Gr. ὁμολογία (homolologìa), confession o profession de fide.
2. O “al qual esseva confidite su integre domo”.
3. Citation de Numeros 12:7.
4. O “pro testificar del cosas que haberea essite dicite plus tarde”.
5. Psalmo 95:7-8.
6. Lit. “illes non ha cognoscite mi vias”.
7. Tote lo que pertine a Christo.