Biblia/Nove Testamento/Marco/Marco 1

Marco

1

Le ministerio de Johannes le Baptisator^[1]

¹Isto es le inception del Evangelio^[2] de Jesus Christo, le Filio de Deo. ²Conforme a lo que es scripte in le libro del propheta Isaia: “Ecce: ante tu arrivata io inviara mi messagero que te prepara le via^[3], ³un voce que clama in le deserto: ‘Prepara le via pro le Senior, rectifica su semitas^[4]’”.

⁴In le deserto, Johannes le baptisator comenciava predicar un baptismo de repententia pro le remission del peccatos^[5]. ⁵Multe personas del tote campania de Judea e de Jerusalem ipse accurreva a ille, e Johannes les baptisava in le fluvio Jordan post que illes le confessava lor peccatos. ⁶Johannes esseva vestite de un vestimento facite con pilos de camelo con un cinctura de corio circa su lumbos, e se nutriva de locustas e de melle salvage. ⁷Ille predicava^[6]: “Post me veni uno qui es plus forte de me, al qual io non es digne mesmo de inclinar me pro disnodar le corregia de su sandalias. ⁸Io baptisa vos in aqua, ma ille baptisara vos in le Spirito Sancte^[7]”.

Le baptismo e le tentation de Jesus

⁹Ora, il eveniva in ille dies que Jesus veniva ab Nazareth de Galilea, e ille mesme esseva baptisate in le fluvio Jordan per Johannes. ¹⁰E justo quando Jesus sortiva del aqua, ille videva que le celos se aperiva e le Spirito descendeva super ille como un columba. ¹¹E un voce se audiva del celo, que diceva: “Tu es mi car^[8] Filio; in te io me complace”.

¹²Immediatemente le Spirito le impelleva vader in le deserto, ¹³Ille remaneva in le deserto durante quaranta dies e supportava tentationes que Satan le infligeva. Ille viveva inter bestias salvage, e angelos le ministrava.

Predication in Galilea e vocation del discipulos

¹⁴Ora, post le imprisionamento de Johannes Jesus veniva in Galilea e proclamava le Evangelio de Deo. ¹⁵Ille diceva: “Le tempore es complite e le regno de Deo^[9] se approximava: repenti vos e crede al Evangelio”.

¹⁶Preteriente le Mar de Galilea, ille videva Simon e Andreas - le fratre de Simon - qui jectava un rete in le mar (proque illes esseva piscatores). ¹⁷Jesus les diceva: “Seque me, e io facera de vos piscatores de homines!” ¹⁸Assi illes relinqueva lor retes immediatemente e le comenciava sequer^[10] le. ¹⁹Quando illes vadeva un poco plus in ultra, Jesus videva Jacobo, filio de Zebedeo e Johannes, su fratre, que, in lor barca, sarciva lor retes. ²⁰Immediatemente Jesus les appellava e illes relinqueva lor patre Zebedeo in le barca con su mercenarios, e le sequeva.

Le autoritate de Jesus

²¹Assi illes entrava in le citate de Capharnao. In le die del Sabbato, Jesus vadeva a in le synagoga e inseniava. ²²Le gente ibi esseva meraviliate de su inseniamento^[11], proque ille les inseniava como uno qui vermente ha autoritate, e non como faceva le expertos del lege de Moses^[12].

²³Justo alora, in le synagoga, esseva presente un homine affligite per un spirito immunde, e ille homine comenciava exclamar: ²⁴“Lassa nos in pace, Jesus le Nazareno! Esque tu veniva hic pro destruer nos? Io sape qui tu es: le Sancto de Deo!”. ²⁵Ma Jesus le reprimendava dicente: “Silentio! Sorti de ille!”. ²⁶Assi, depost haber le jectate in convulsiones, le spirito immunde critava con alte voce e sortiva de ille homine. ²⁷Omnes esseva grandemente surprendite e se demandava le un le alteres: “Que es isto? Un doctrina nove inseniate con grande autoritate! Ille mesmo commanda al spiritos immunde e illes le obedi!” ²⁸Assi, le nova re Jesus se dispergeva rapidemente in tote le region circumstante le Galilea.

Un curation in le casa de Simon

²⁹Post haber sortite del synagoga, illes entrava in le casa de Simon e Andreas con Jacobo e Johannes. ³⁰Le matre-affin de Simon esseva febricitante a lecto. Assi, tosto illes parlava a Jesus de iste situation. ³¹Ille veniva e la faceva levar se, apprehendente la gentilmente per le mano. Alora le febre dispareva e illa comenciava servir les.

³²Quando il esseva vespere, depost le poner del Sol, le gente portava a Jesus tote le malades e qui esseva possedite per demones. ³³Le urbe integre habeva se congregate al porta. ³⁴Assi Jesus resanava multes qui esseva malade de varie maladias e ille expelleva multe demones. Ille, tamen, non permitteva al demones de parlar, proque illes le cognosceva.

Precar e predicar

³⁵Alora Jesus se levava mane quando ancora il esseva multo obscur, ille partiva e vadeva a in un loco deserte, e ibi ille passava tempore a precar. ³⁶Simon e su companiones cercava Jesus. ³⁷Quando illes le trovava, illes diceva: “Omnes te quere!”. ³⁸Illes replicava. “Vamos alibi, a in le vicos circumstante, a fin que io pote predicar ibi alsi, quia isto es le ration proque io veniva”. ³⁹Assi Jesus veniva e predicava in lor synagogas e expelleva demones.

Le mundification de un leproso

⁴⁰Ora, un leproso veniva a ille e se se prostrava, flectente le geniculos, e diceva a Jesus: “Si tu vole, tu pote mundificar me”. ⁴¹E Jesus, commovite, extendente su mano, le toccava e le diceva: “Io lo vole: que tu sia mundate!”. ⁴²E tosto le lepra dispareva e ille esseva mundate. ⁴³Immediatemente Jesus le mandava via con un forte admonition. ⁴⁴Jesus le diceva: “Vide de non dicer re isto a alicuno, ma va monstrar te a un sacerdote, e offere, pro tu mundification, lo que Moses prescribeva, a que illo sia de testimonio pro illes”. ⁴⁵Ma si tosto que ille homine se retirave, ille comenciava proclamar e divulgar lo que le habeva evenite, tanto que Jesus non poteva plus entrar publicamente in le citates, ma remaneva foras in locos deserte. De omne locos le gente accurreva a ille.

Notas

1. Johannes Baptista.
2. Literalmente “Evangelio” significa “bon nova”. In le tempores de Marco, tamen, “Evangelio” esseva jam accreditate como un termino technic referente se al predication in re Jesus Christo e le potentia de salvation accomplite per su medio pro totes illes qui crede in illo (Cfr. Romanos 1:16).
3. Citation de Exodo 23:20 e Malachia 3:1.
4. Citation de Isaia 40:3.
5. In participar a iste baptismo esseva un recognoscimento del besonio de esser pardonate per Deo cuje consequentia esseva un vita vivite nformitate al commandamentos de Deo.
6. O “proclamava”.
7. O "con aqua ... con le Spirito Sancte".
8. O “amate”.
9. Le regno de Deo es un referentia al activitate soveran de Deo in dominar su creation e accomplir su propositos.
10. Iste expression indica que illes deveniva discipulos de Jesus e faceva de ille lor magistro de vita.
11. O “doctrina”.
12. O “scribas”.