Biblia/Nove Testamento/Marco/Marco 2

Marco

2

Le curation de un paralytico

¹Post alicun dies Jesus entrava itero a in Capharnao e le nova se diffundeva que ille esseva a casa. ²Multes conveniva ibi: ita il non habeva plus spatio, non mesmo ante le porta. Ille les annunciava le parola. ³Alicunes veniva e le portava un homine paralysate, transportate per quatro de illes. ⁴Illes, tamen, non poteva approximar se a Jesus pre le turba. Assi illes discoperiva le tecto super le loco ubi Jesus se trovava e, facite assi un apertura, abassava le lectiera sur le qual jaceva le paralytico. ⁵Ma quando Jesus videva lor fide, diceva al paralytico: “Filio, tu peccatos te es remittite!”.

⁶Il habeva sedente ibi alicun expertos del Lege^[1] que in lor corde cogitava: ⁷“Quare iste homine parla assi? Ille blasphema! Qui pote remitter peccatos nisi Deo solmente?”. ⁸Al instante, Jesus, que cognosceva in su spirito lo que illes cogitava inter se, diceva a illes: “Quid pensa vos isto in vostre corde? ⁹Quid es le plus facile, dicer al paralytico: ‘Tu peccatos te es remittite’ o dicer le: ‘Leva te, prende tu lectiera e ambula’? ¹⁰Ma a que vos va cognoscer que le Filio del homine ha in terra le potestate de remitter peccatos”, diceva al paralytico, ¹¹“Io te dice: Leva te, prende tu lectiera e retorna a tu casa!”. ¹²E le homine immediatemente se levava, prendeva su lectiera e sortiva coram omnes; ita omnes esseva stupite e glorificava Deo, dicente: “Nunquam nos videva un cosa assi!”.

Le vocation de Levi

¹³Jesus de novo sortiva apud le mar. Tote le turba veniva ad ille e ille les maestrava.

¹⁴Preteriente, ille videva Levi, filio de Alpheo, que esseva sedite al pedage^[2]. Jesus le diceva: “Seque me”, e ille se levava e comenciava sequer le. ¹⁵Plus tarde, Jesus e su discipulos esseva in le casa de Levi pro un repasto amical. A tabula con Jesus il habeva alsi multe pedageros e altere personas de mal reputation^[3], proque il esseva multes illes qui le sequeva. ¹⁶Quando le expertos del Lege^[1] e le Phariseos remarcava que Jesus mangiava insimul a pedageros e gente de mal reputation, illes diceva a su discipulos: “Proque ille mangia insimul a pedageros e gente de mal reputation?”. ¹⁷Jesus audiva isto e les diceva: “Illes qui es san non necessita un medico, ma le necessita illes qui es malade. Io non veniva vocar justos, ma peccatores”.

Discussion in re le jejuno

¹⁸Un die que le discipulos de Johannes e le phariseos jejunava, alcunes veniva ad Jesus e le diceva: “Quare le discipulos de Johannes e le discipulos del phariseos jejuna, ma tu discipulos non jejuna?”. ¹⁹E Jesus les diceva: “Poterea jejunar le convitatos a nuptias dum le sponso es con illes? Durante que le sponso es con illes, illes non pote jejunar. ²⁰Sed le tempore venira que le sponso essera subtrahite de illes, e tunc illes jejunara.

²¹Nemo sue un pecia de panno nove non tractate^[4] a un vestimento vetere, alteremente ille pecia se contraherea e divellerea le vestimento vetule e le fissura devenirea pejor. ²²E nemo mitterea vino nove in urceos vetere, alteremente le vino disrumperea le urceos, e sia le vino que le urceos esserea perdite; sed vino nove in urceos nove”.

Le spicas colligite de sabbato

²³In un die de sabbato Jesus ambulava per campos de grano e durante le cammino su discipulos comenciava colliger alicun spicas. ²⁴Assi le phariseos le diceva: “Reguarda! Proque illes face lo que le Lege non permitte facer in un die de sabbato?”. ²⁵Ille les respondeva: “Esque vos nunquam legeva lo que David habeva facite quando ille esseva in un situation de necessitate e ille e su companiones habeva fame? ²⁶Quomodo ille entrava in le domo de Deo quando Abiathar esseva le capite del sacerdotes e illes mangiava le pan consacrate - un acto que vade contra le Lege, proque solmente le sacerdotes pote nutrir se illo - e ille lo dava anque a su companiones?”, ²⁷Inde ille les diceva: “Le sabbato es facite pro le homines, e non le homines pro le sabbato. ²⁸Itaque le Filio del Homine es senior mesmo super le sabbato”.

Notas

1. O “scribas”.
2. O “banco del impostos”, “doana”, cfr. https://wikisource.org/wiki/Biblia/Glossario/b
3. Litt. “peccatores”.
4. O “rude”.