Biblia/Nove Testamento/Petro/1Petro 2

Prime epistola de Petro

Capitulo 2

¹Renuncia, igitur, a omne sorta de malitia, deception, simulation^[1], invidia e maledicentia, ²e appete, como infantes nate justo nunc, le lacte pur e spiritual^[2] del Parola, a que per illo vos va crescer in un experientia plen del salvation, ³si jam vos gustava le dulcor^[3] del Senior^[4].

Un lapide vivente, un populo electe

⁴Vos nunc accede a Christo, qui es le vivente lapide angular del templo de Deo. Ille esseva rejectate del homines, ma coram Deo ille es electe e preciose^[5]. ⁵Etiam vos es le lapides vivente que Deo emplea pro edificar su templo spiritual. Plus ancora, vos es su sancte sacerdotes^[6]: de facto, per le mediation de Jesus Christo, vos offere sacrificios spiritual que Deo accepta con placer. ⁶Il es propter isto que le Scriptura dice: “Ecce, io pone in Sion un lapide angular, electe e preciose: qui crede in ille non debera unquam vergoniar se^[7]”. ⁷Vos credentes vide su valor, ma pro illes qui non crede, “le lapide que le edificatores rejectava deveniva le lapide angular^[8]”, e ⁸“un lapide de offensa e un petra que les face impinger^[9]”. Illes impinge quia illes refusa creder^[10] al Parola: a isto illes esseva destinate! ⁹Vos, tamen, es un generation electe, un sacerdotio^[11] regal, un populo que Deo acquireva pro se ipse a que vos proclama le virtutes^[12] de ille que vocava vos ex le tenebras a in su lumine admirabile. ¹⁰Un vice vos non esseva un populo, ma nunc vos es le populo de Deo. Un vice nulle misericordia esseva vos accordate, ma nunc vos, de Deo, recipeva misericordia^[13].

¹¹Car amicos, io obsecra vos como estranieros e foresteros^[14] de abstiner vos del desiros carnal que milita contra vostre anima. ¹²Que vostre maniera de viver inter le paganos sia del toto appropriate^[15]. Assi, illes qui nunc calumnia e accusa vos de esser malfactores, considera vostre bon obras e glorificara Deo quando ille venira^[16].

Submission al autoritates

¹³Sia subjecte a omne institution^[17] pro amor del Senior, sia a un rege como le autoritate supreme ¹⁴o a governatores como su commissioneros^[18] pro punir malfactores e laudar illes qui face le bon. ¹⁵Proque Deo vole que, operante le bon, vos reduce al silentio le ignorantia del gente insensate. ¹⁶Sia libere, ma non emplea le libertate como un pretexto^[19] pro coperir le malitia, ma sicut servitores de Deo. ¹⁷Honora omnes, ama le fraternitate del credentes, time Deo, respecta le rege.

¹⁸Servos, submitte vos a vostre patrones con tote le respecto, non solmente a illes que es bon e rationabile, ma etiam a illos que es perverse^[20]. ¹⁹Il es un gratia si, propter motivationes de conscientia verso Deo e fidelitate a ille, on supporta patientemente un tractamento injuste. ²⁰In effecto, il ha nihil de gloriose in reciper un castigation corporal pro haber committite un falta ma, si vos suffre post haber facite le bon e lo supporta patientemente, isto es agradabile apud Deo. ²¹Quia isto es le vocation que vos recipeva, facer le bon, mesmo si illo causa patimentos, quia anque Christo pativa pro vos, relinquente un exemplo ut vos seque su vestigios. ²²“Ille nunquam commiteva un peccato ni jammais ille decipeva^[21] alicuno^[22]”. ²³Quando ille esseva maledicite, ille non respondeva con un altere malediction; quando ille esseva subjectate a patimentos, ille non menaciava retaliationes, ma ille commendava se ipse a Deo, le qual semper judica justemente. ²⁴Ille ipse portava nostre peccatos in su corpore super le patibulo, ut pro nos le peccato sia morte e nos vive como justos. Per le medio de su vulnere vos esseva resanate^[23]. ²⁵Vos esseva sicut oves errante^[24], ma nunc vos retornava al pastor e guardiano de vostre anima.

Notas

1. O “hypocrisia”.
2. “τὸ λογικὸν ἄδολον γάλα” un lacte non adulterate que es justo lo que le credente necessa (illo es “rationabile” pro crescer spiritualmente.
3. O “bonitate”, “benevolentia”.
4. Un citation de Psalmo 34:8.
5. Deo le seligeva a un grande honor.
6. O “un sancte communitate sacerdotal”.
7. O “non va unquam remaner confuse”, un citation de Isaia 28:16.
8. O “un petra de scandalo”. un citation de Psalmos 118:22 (cfr. Mattheo 21:42; Marco 12:10; Luca 20:17; Actos 4:11).
9. O “un petra de scandalo”.
10. O “obedir”.
11. O “communitate sacerdotal”.
12. Iste verso contine plure allusiones e citationes ab Exodo 19:5-6; 23:22 (LXX); Isaia 43:20-21 e Malachia 3:17.
13. Le citationes del verso 10 es ex Hosea 1:6,9; “:23.
14. O “exiliatos”.
15. O “correcte”.
16. O “quando ille apparera”, litt. “in le die del visitation”, le tempore in le qual Deo va intervenir directemente in le affaires human, o pro benedir (Luca 1:68,78; 7:16; 19:44), o pro judicar e condemnar (Isaia 10:3; Jeremia 6:15). Iste phrase poterea esser un citation de Isaia 10:3, le Die del Judicamento. Tamen hic le puncto non pare esser le judicamento, ma le benediction, durante que le ration pro le bon conducta del christianos es conquirer le non-christianos al fide (como in 3:1; e forsan 3:15; cfr. Mattheo 5:16).
17. O “omne creatura human”. Isto denota o toto lo que esseva create pro le humanitate (omne institution ordinate pro le creaturas human) o “omne creatura que es human”. Le contexto supporta le signification “omne institution”.
18. O “illes que ille manda”.
19. Litt. “velo”.
20. O “crudel”, “dur”.
21. O “on trovava jammais un deception in su ore”.
22. Un citation de Isaia 53:9.
23. Un citation de Isaia 53:5.
24. Un citation de Isaia 53:6.