Biblia/Vetule Testamento/Job/Job 21

Job

21

Septime oration de Job: responsa a Zophar

¹Alora Job respondeva: ²“Audi attentivemente mi parolas; que le sequente mi parolas sia le consolation que vos me offere. ³Tolera un poco lo que io va dicer e postea vos potera continuar derider me si vos vole. ⁴Mi disputation non es contra homines. Io ha bon rationes de devenir impatiente. ⁵Attende me e sia stupefacte; pone vostre mano super vostre bucca. ⁶Quia quando io pensa re isto, io mesme es terrificate e tote mi corpore incipe fremer.

⁷Quare, ergo, le impios prospera^[1], invetera e mesmo augmenta lor poter? ⁸Illes vive e vide lor filios crescer e establir se, e illes gaude de lor granfilios. ⁹Lor domos es secur e sin timor, e Deo non les puni. ¹⁰Lor tauros prolifica sin faller e lor vaccas parturi vitellos e nunquam aborta. ¹¹Illes permitte a lor filios de currer e saltar sicut agnos; lor infantes dansa gaudiosemente. ¹²Illes canta con le accompaniamento de tamburinos e harpas, e gaude al sono del flautas. ¹³Illes passa lor vita in le prosperitate e descende in le tumba in pace. ¹⁴Tamen, illes dice a Deo: “Recede ab nos! Nos non vole cognoscer tu vias. ¹⁵Qui es le Omnipotente, ut nos le servi? Qual profito nos ganiarea in precar le? ¹⁶Illes reputa que lor prosperitate es solmente le producto de lor valentia, ma io non vole haber a que facer con ille sorta de pensar^[2]! ¹⁷Quanto sovente le lampada del impios se extingue? Quanto sovente disgratias les superveni? Quanto sovente Deo, in su furor, les apportiona dolores? ¹⁸Quanto sovente illes es sicut palea ante le facie del vento, e sicut vannatura dispergite per trombas de aere? ¹⁹Vos poterea dicer: “Deo serva le punition de un homine pro su filios!”. Io dice, tamen, que ille deberea punir le homine qui pecca, ut ille solmente sia humiliate! ²⁰Que su proprie oculos vide su destruction; que ille bibe le furor del Omnipotente. ²¹Quia a illes non importa plus lo que eveni a lor familias postquam illes mori.

²²Ma qui poterea inseniar a Deo un lection, durante que ille judica mesmo le plus potente? ²³Un persona mori robuste e san, completemente secur e prospere, ²⁴su corpore es ben nutrite, vigorose e in bon sanitate^[3]. ²⁵E un altere homine mori in amar paupertate^[4] sin unquam haber gustate alco de bon in su vita. ²⁶insimul illes jace in le pulvere e ambes es mangiate per le mesme vermes^[5].

²⁷Certo io cognosce quid vos pensa; io cognosce le planos que vos cabala contra me. ²⁸Vos me contara re gente ric e impie, cuje domos ha evanescite propter lor peccatos. ²⁹Esque vos ha unquam interrogate le passantes? Illes vos dicera le veritate. ³⁰Gente mal es sparniate e les es permittite de escappar in le die del furor de Deo. ³¹Nemo les critica apertemente o les repaga pro lo que illes ha facite. ³²E quando illes es portate al sepulcros e guardias de honor vigila a lor tumbas, ³³un grande procession funerari va al cemeterio. Multes les monstra lor respecto durante que le corpore es inhumate, e le terra les da un dulce reposo. ³⁴Ergo, quomodo poterea vos consolar me con vostre parolas futile? De vostre responsa nihil remane nisi deception.

Notas

1. Litt. “vive”.
2. O “le consilio del impie sia longe ab me”.
3. O “le medulla de su osso es humide”.
4. O “in amaritude de anima”.
5. O “le vermes les coperi ambes”.