Biblia/Vetule Testamento/Job/Job 22

Job

22

Tertie responsa de Eliphaz a Job

¹Alora Eliphaz le temanita replicava assi: ²“Poterea un persona facer alco pro adjuvar Deo? Poterea mesmo un persona sage adjuvar Deo? ³Qual avantage poterea haber le Omnipotente si tu es juste? Esque ille haberea alcun ganio si tu esseva perfecte? ⁴Es il pro tu pietate que ille te accusa e veni con te in judicio? ⁵No, il es propter tu malitia! Tu iniquitates es infinite! ⁶Per exemplo, tu debe certo haber prestate moneta a tu amico e requirite su vestimento qua pignore. De facto tu le spoliava nude! ⁷Tu debe certo haber denegate aqua pro le assetate e nutrimento pro le famelic. ⁸Quanquam tu esseva un viro de poter qui possede terra, un homine honorate qui vive sur illo, ⁹tu debe certo haber dimittite viduas a manos vacue, e frustrate le sperantia de orphanos. ¹⁰Ecce le ration proque trappas te circumfere e tu es succutite per subite terror. ¹¹Ecce proque tu non vide altere que tenebras e undas de aqua te opprime. ¹²Deo es excelse in le Celo, nonne, plus alte que le stella le plus lontan. ¹³Tamen, tu replica: “Ecce le ration quia Deo non vide lo que io face! Como pote ille judicar trans un spisse obscuritate? ¹⁴Quia un spisse obscuritate es sicut un vortice circa ille e ille nos non pote vider. Ille es supra le cupola del celo e ambula per illo”. ¹⁵Esque tu vole persister ambular trans semitas vetule, calcate per gente inique? ¹⁶Illes esseva gente que esseva abuccate ante lor tempores, e fluvios subverteva le fundamentos de lor domos. ¹⁷Illes diceva a Deo: “Recede ab nos! Que pote facer le Omnipotente a nos?”. ¹⁸Lor pensamento esseva procul ab ille, nonobstante, Deo habeva reimplite lor domos de bon cosas.

¹⁹Le justos vide lor perdition e se allegra pro illo; dispreciante les, le innocentes ride. ²⁰Illes dicera: “Reguarda como nostre inimicos ha essite destruite! Le foco ha consumite lor ricchessa”. 2²¹Ergo, submitte te a Deo, e tu habera pace. Tunc toto vadera ben pro te. ²²Ascolta su instructiones, e thesaurisa los in tu corde. ²³Si tu retorna al Omnipotente, tu essera restablite. Si tu remove tu comportamento inique ab tu domo, ²⁴e jecta tu auro in le pulvere - tu auro de Ophir inter le lapides del torrentes, ²⁵tunc le Omnipotente ipse essera tu auro, e le argento le plus pur. ²⁶Tunc certo tu te allegrara in le Omnipotente, e tu levara tu facie verso Deo. ²⁷Tu le rogara, e ille te exhaudira, e tu complira le votos que tu le faceva. ²⁸Tunc, quecunque tu decidera super un question, illo essera pro te establite, e lumine brillara super tu vias. ²⁹Si alicuno habera enoios e tu dicera: “Adjuta les”, Deo les salvara. ³⁰Mesmo peccatores essera salvate a causa de tu intercession, quia tu manos essera pur”.