Biblia/Vetule Testamento/Job/Job 34

←Job 33

Le Biblia in Interlingua Job

Job 35→

Job

34

Secunde elocution de Elihu

¹Respondente a Job, Elihu faceva alsi iste secunde elocution: ²“Audi mi parolas, vos homines sapiente, e vos homines erudite, ascolta me. ³Le aure evaluta le parolas que illo audi justo como le bucca face un distinction^[1] inter alimentos. ⁴Vamos, ergo, discerner quid es juste; vamos apprender insimul quid es bon. ⁵Quia Job diceva: “Io ha ration^[2]: Deo me privava de mi derectos. ⁶Esque io deberea dicer mentitas contra mi derectos? Mi suffrentias es incurabile ben que io committeva nulle peccato”.

⁷Dice me: esque unquam il habeva un homine como Job, qui bibe irreverentia como aqua? ⁸Ille selige gente inique qua su companiones, ille se face accompaniar de homines impie. ⁹Ille mesmo diceva: ‘Il es frustranee essayar complacer Deo^[3]!’

¹⁰Ergo, audi me, vos homines qui ha intendimento: longe de Deo committer peccatos, longe del Omnipotente facer iniquitates! ¹¹Quia ille recompensa cata uno secundo su obras. Ille tracta nos como nos merita. ¹²Vero, Deo non face le mal! Le Omnipotente non subverte le justitia! ¹³Qui le committeva le Terra? Qui poneva le mundo integre sub su custodia? ¹⁴Si Deo retraheva su spirito, si ille nos privava de su sufflo vital, ¹⁵tote le vita cessarea subito e le esseres human retornarea esser pulvere.

¹⁶Ora ascolta quid io dice, si tu ha intellecto. ¹⁷Esque tu vermente pensa que qui odia le justitia poterea governar? E tu declararea culpabile le Deo del summe justitia? ¹⁸Quia ille dice a reges: ‘Vos es perverse!’ e a nobiles: ‘Vos es injuste!’. ¹⁹A ille non importa quanto magne sia un persona. Ille es absolutemente impartial, tanto con personas ric quanto con personas paupere. Tote illes es le obra de su manos. ²⁰Subito illes mori e in le medio del nocte illes transpassa; le potentes es removite sin ulle effortio. ²¹Deo perspice quomodo le homines vive; ille vide tote lo que illes face. ²²Pro ille il ha ni tenebras ni obscuritate profunde ubi malfactores poterea occultar se. ²³Nos non pote decider le tempore in le qual nos venira a Deo pro esser judicate. ²⁴Si ille vole, Deo poterea ruinar le potente sin inquirer si ille lo pote facer e establi alteres in su loco. ²⁵Ille sape lo que illes face e, durante le nocte ille pote subverter e destruer les. ²⁶Ille les percute quia illes es perverse, e lo face sub le reguardo de omnes, ²⁷quia illes recedeva ab Deo e non habeva ulle respecto pro su vias. ²⁸Le clamor del pauperes le induceva facer lo: ille audiva lor voces. ²⁹Si ille selige remaner quiete, qui poterea condemnar le? Quando ille cela su facie, nemo pote trovar le, tanto le individuos quanto le nationes. ³⁰E isto pro impedir a un homine impie de regnar ut ille non sia un insidia pro le populo.

³¹Esque Job, celle homine impie, diceva a Deo: ‘Io peccava, ma io non peccara plus?’, ³²o ‘Io non sape qual mal io ha facite - dice me. Si io faceva alcun iniquitate, io cessara subito de facer lo!’? ³³Esque Deo deberea render justitia a tu maniera, tu qui lo critica? Esque ille te dicera: ‘Tu selige, non io. Si tu sape melio, parla!’?

³⁴Vos, homines intelligente, dice me! Un qualcunque homine qui me audi certo dicera ³⁵que Job parla ignorantemente e que su parolas es sin intendimento. ³⁶Que Job sia examinate usque al fin propter le parolas inique que ille pronunciava, ³⁷quia a su peccatos ille addeva le rebellion. Ille monstra nulle respecto e multiplica su mal parolas contra Deo!”.

Notas

1. O “gusta”.
2. O “Io es innocente”.
3. O “Il ha nulle profito in delectar se in Deo”.