jan mun en nasin waso
tan jan Itan, tan jan Lakuse, tan jan Tepo
jan Lakuse: ijo ale, soweli ale, jan ale, akesi ale, waso ale, ...mi sona ala e ijo ante o toki! ni li kalama sin. tenpo pi kalama sin... mi jan Lakuse. a, lon poka li jan tu. sina seme? jan tu o.
jan Tepo: a, open wawa a! mi jan Tepo. sina kute mute e mi lon tenpo mute.
j.Lakuse: ni li lon... sina uta pi kalama sin a.
jan Itan: toki! mi jan Itan. sina kute e mi kin.
j.Lakuse: wawa. a tenpo ni li sama tenpo pini... mi ale li sona ala e ijo toki. taso, mi lukin toki e ijo! mi sona ala e ni: seme li ken toki? jan pi toki pona li toki e ijo pi toki pona taso anu seme ni ale li... awen li wile sona... a. mi sona ala. ijo seme li toki?
j.Tepo: ijo. jan Itan o, sina sona e ijo anu seme?
j.Itan: a mi sona e ijo. taso sona li tan sina tu, a a. n, tenpo pini poka la mi open kama sona e luka pona. luka pona li sama toki pona. taso ona li kepeken luka, li kepeken ala uta, li kepeken ala kute.
j.Lakuse: li kepeken ala sitelen!
j.Itan: lon! ona li kepeken ala sitelen. a ni li pona mute tawa mi. pilin mi la sina tu li open kama sona lon tenpo pini a. taso mi open kama sona lon tenpo poka. ken la sina tu li sona wawa e luka pona.
j.Tepo: mi sona. taso pilin mi la mi sona wawa ala. tenpo la mi toki sama ni: "mi ken ala luka pona, mi-
j.Tepo en j.Lakuse: "luka ike taso" a a.
j.Lakuse: pilin la mi sona e luka pona. mi pana e sona pi luka pona tawa jan la mi o sona e luka pona anu seme? taso... mi sona ala a a a. ken li nasa.
j.Tepo: ni li lon ala. sina sona e ona! sina pana e ni sona sina tawa mi. ni li... sina sona.
j.Itan: lon, lon. pilin mi la sina tu li sona a tan ni: sina tu li pana e sona tawa mi lon tenpo pini poka. tan ni la mi sona, tan ni: jan li sona e ijo [la] ona o ken pana e sona ni. sina tu li ken ni. tan ni la sina tu...
j.Tepo: mi ken ala! mi sona taso li ken ala pana e sona. jan Lakuse taso li...
j.Lakuse: a.....
j.Tepo: ... e luka pona, li ken pana -- jan Olipija kin. taso ona li lon kulupu ala...
j.Itan: a sina tu li wawa lon nasin ni: a... mi awen ken ala kepeken nasin ni. taso, nasin pi luka pona li lon. ona la sina pana ala e luka suli. sina pana e luka lili taso.
j.Tepo: ... li sitelen e nimi jan anu seme...
j.Itan: lon, lon. sama nimi jan. sama nimi ma. lon. ona li sitelen lon, kepeken luka, anu seme... a, pilin mi la jan Tepo en jan Lakuse li ken wawa mute lon nasin ni. taso ona li pona mute tawa kama sona.
j.Lakuse: lon. ken la mi o toki lili e ijo pi luka pona anu seme, a a.
j.Itan: lon, a a.
j.Lakuse: ken la jan li sona ala e ni: mi toki e seme lon tenpo ni? a, luka pona li toki pali ante. ona li sama toki pona. ona li kepeken nimi sama toki pona. taso nimi pali li ante lili. nimi "li", nimi "en", nimi "e"... ni ale li ante lon luka pona. a nasin pi luka pona li sama ni: jan li toki lili e ijo. ni la mi ken toki sama ni: "a. NI... PONA." anu "MI. KILI NI. MOKU." sama ni... sina kepeken... sina kepeken luka sina sama ni la ni li nasin pona luka. a, ni li lon: nasin toki pi toki luka en toki pi toki uta pi toki sitelen li ante kin. a ni li tan ni: toki luka li tawa lukin. a lukin li kepeken nasin ante tawa sona. a, jan li kute e ijo la ona li ken kute e ijo wan taso. kalama li lon tenpo taso anu seme... jan li ken ala... a, tenpo li lon ala, la kalama li ken ala lon anu seme. taso, a... lukin la jan li ken lukin e ijo ante mute. nasin kute lukin li ante tan nasin kute KUTE. ni la toki kin li ante. ni la jan Olipija li pali e luka pona, sama ni: ona li ken sama toki pona, li ken nimi sama toki pona. taso ona li pona tawa lukin, tawa sona lukin.
j.Itan: n. ni li sona pona. tenpo pini la mi lukin ala e ijo sama ni: lon. kalama la sina kepeken tenpo. taso luka la sina kepeken ala tenpo... a. lon [la] sina kepeken tenpo. taso sina ken kepeken ni kin: ijo li lon. sina ken awen lukin e ijo.
j.Tepo: ijo li lon. ijo li ken lon poka ante...
j.Itan: lon, lon lon lon.
j.Tepo: ... lon kon. luka li lon kon, li awen ala li ken tawa.
j.Itan: lon.
j.Tepo: kalama la ni li ken ala. kalama li ijo wan taso lon tenpo wan.
j.Itan: nasa. n, ante la...
j.Lakuse: ante la seme... mi sona ala. mi... a. kama sona pi toki ante li nasa tawa mi. a jan Tepo [o]. sina kama sona e toki mute anu seme? sina lukin kama sona e toki mute.
j.Tepo: ala, ala. mi... n. mi sona pona ala e toki ante... toki pona en toki Inli li taso. toki Losupan la mi sona lili. toki Wijosa la mi sona lili lili. toki ante mute la mi sona lili lili lili lili...
j.Lakuse: taso, pilin mi la sina kama sona e toki pali taso, a a a. e toki ma ala, a a a! tan seme?
j.Tepo: ni li lon... ni li... a. mi sona ala.
j.Itan: ni li musi tan ni: tenpo mute la jan li wile kama sona e toki sin. tan li ni: ona li wile ken toki tawa jan mute a. taso sina la, kama sona li tawa musi taso anu seme? a a.
j.Tepo: a, a. mi sona. mi sona. a a a... toki pali la mi ken toki tawa jan mute a!
j.Itan: lon!
j.Tepo: toki pona la jan mute li lon li toki pona.
j.Itan: kin, kin.
j.Tepo: mi ken toki tawa jan ni. toki pali ante la... ma mute la mi ken toki tawa jan mute mute mute! taso, n... mi wile ala.
j.Lakuse en j.Itan: a, a a.
j.Itan: sina ken toki tawa jan, la ni li pona. ona li ken jan mute ala.
j.Tepo en j.Lakuse: ni li lon.
j.Itan: ken.
j.Tepo: a. toki Losupan la mi toki mute ala tawa jan. taso mi kute e kalama musi pi toki Losupan. mi kama sona tan ni. ni li... taso mi toki e ni lon kalama sin pini.
j.Lakuse: a. ni li ken wawa... mi sona ala. pilin mi la jan Tepo li wile ala toki tawa jan mute, a a a. ni la ona li kama sona e toki pali taso.
j.Tepo: a a a.
j.Itan: jan Lakuse o. sina sona e toki ante seme? anu toki pi mute seme?
j.Lakuse: a, mi... mi sona. toki pona en toki Inli en luka pona taso li lon mi a a. taso mi lukin kama sona e ijo ante. tenpo pini la sitelen tawa musi tan ma Nijon li pona suli a tawa mi, la mi lukin e ona lon tenpo ale. mi kepeken ala kalama pi toki Inli tawa ni. mi kepeken kalama pi toki Nijon li kama lukin e sitelen lon anpa. a, taso mi ni lon tenpo mute! taso kin la! mi lukin e sitelen ni la ni li pona tawa mi. mi pali e ijo ante kepeken luka. ken la mi pali e musi lili kepeken luka. mi kepeken lipu li tu e ona li tu e lipu li tu e lipu la ona li kama waso. a, mi ni lon tenpo mute.
j.Itan: a.
j.Lakuse: ...la mi ken ala lukin e luka mi-- e sitelen lon tenpo mute. ... e sitelen anpa lon tenpo mute. ni la mi kama kute e kalama pi toki Nijon.
j.Itan: a!
j.Lakuse: mi kama pona lili... mi kama sona lili lon kute mi. mi sona wawa ala e ona. taso mi ken lukin lili taso e toki anpa li ken sona e kon mute. sitelen tawa mute tan ma Nijon li sama li toki e ijo sama. a a. tenpo mute la wawa li lon.
j.Tepo: a a a!
j.Lakuse: olin li lon. anu... sina sona e nimi tawa ijo tu ni la sina sona ale... lon sitelen tawa ni.
j.Tepo: a a.
j.Lakuse: lon... mi ni lon tenpo. kin la mi lon ma Kanata. mi tan ma Kanata, la mi lon tomo sona li kama sona lili e toki Kanse. taso toki Kanse mi li ike. mi ken lukin e sitelen li ken sona lili e toki tan ni. taso jan li toki tawa mi kepeken kalama la mi ken ala. a a a.
j.Itan: a a. nasa. a. mi sona [e] toki Inli, [e] toki pona... mi sona e toki Epanja. mi kama sona e luka pona e toki Nijon. taso ni li ale.
j.Lakuse: a toki Epanja.
j.Itan: mute ala. toki Epanja li pona. mi lukin ala e sitelen tawa tan ma Nijon. taso jan li toki pona e ona la mi ken lukin (?)
j.Lakuse: a a a! jan o ante e toki anu seme?
j.Tepo: a a a!
j.Lakuse: a pilin mi la jan Mali li ni lon tenpo pini, li pana e sitelen anpa.
j.Tepo: lon! mi lukin lili e ni. ni li suli ala li sitelen wan taso ala. mi ken ala lukin mute. taso ni li pona. a sina mute li sona ala sona e sitelen tawa ni pi ilo Jutu: jan li... pilin mi la toki mama ona li toki Nijon. jan ni li pali e sitelen tawa pi toki pona sama jan Misali. ken...
j.Tepo: a mi ken sona...
j.Itan: lon lon. ken la mi o pana e linja tawa kulupu ni pi sitelen tawa lon kalama sin ni.
j.Lakuse: mi sona e ni: ni li lon tawa toki Epanja. taso mi sona ala e ni: ni li lon tawa toki Nijon kin.
j.Tepo: a mi sona ala e ni pi toki Epanja a.
j.Lakuse: mute tan ma mute li ken kama sona e toki pona!
j.Itan: a pona!
j.Lakuse: ni li pona a.
j.Itan: pona a. mi- ni li... a a. mi wile a e nasin sama ni: (pilin mi la ona li lon ala) taso mi wile kama sona e toki ma ante kepeken toki pona taso.
j.Lakuse: a!
j.Itan: ni li ken la... ona li pona suli. taso... pilin mi la ni li wile e pali mute, tan ni: sina o toki e nasin mute pi toki ante ni. nn, kepeken toki pona taso. taso. ante la...
j.Tepo: nnn. ken la o pana e ante toki taso anu seme? jan Telakoman li toki sama ni, lon tenpo pini: "sina sona e nasin toki... sina sona e nasin toki taso, la sina sona ala e toki. sina o kama ken pilin e toki. sina ken ala sona e toki. ni la toki ante en toki pona li lon poka la sona mute li ken kama tan ni anu seme?
j.Itan: lon!
j.Tepo: taso mi sona pona ala e nasin sona toki. nasin seme la jan li ken kama sona toki? mi sona ala. mi pali e ni lon tenpo pini. ona li awen ala...
j.Lakuse: a a.
j.Itan: kin jan seme a li sona e toki?
j.Tepo: a a a.
j.Itan: jan ala li sona e toki. mi ale li pilin... li pilin.
j.Tepo: lonnn.
j.Itan: ni li lon.
j.Lakuse: mi nasa... kepeken nasin seme la mi kama sona e toki pona, la mi sona ala a a. taso ona li kama lon mi...
j.Tepo: kepeken tenpo.
j.Lakuse: n kepeken tenpo a. taso jan li wile kama sona e toki ante kepeken toki pona la ni li ken tawa luka pona anu seme? a a.
j.Itan: a mi pilin sama ni!
j.Tepo: lon! lon. mi wile kama sona e toki luka pi ma Mewika anu seme... lon tenpo kama, la mi open kepeken luka pona.
j.Lakuse: n. nasin ona li ken sama lili.
j.Tepo: n. ni li pona ala pona? mi pilin sama ni: sina sona e toki luka wan la sina ken kama sona e toki luka ante kepeken tenpo lili.
j.Lakuse: a... ken. a, nasin ona li awen ante lili. taso ni li suli: sina kama sona e nasin kute kepeken lukin. sina ken kama sona e ni kepeken luka pona... li ken ni tawa ona.
j.Itan: ni li ante a.
j.Lakuse: lon. jan li wile kama sona e luka pona, la sina ken kepeken toki pona taso tawa ni! ni li pona suli a.
j.Itan: lon. a. lon sina toki e ni. mi pilin sama. a, "ni". ni li seme... a a. a. lon. sina o ken kama kute kepeken lukin. n, ni li nasa. taso ona li nasa pona tawa mi. a, lon! mi kute e kalama toki... a a, ala. mi kute e toki kalama la mi toki insa kin e ni: ona li toki e seme? mi suli e toki ona lon nasin wan lon nasin ante... li alasa sona e ni: nasin seme la toki ona li lon? ni la... mi lukin... mi lukin la ni li ante. mi o alasa sona... mi o lukin insa, o kute insa ala. mi o lukin insa e ni: ona li pali e seme. a. ni li ante.
j.Tepo: n.
j.Lakuse: sina ni anu seme? jan Tepo o.
j.Itan: ni li nasa.
j.Tepo: o toki sin?
j.Lakuse: sina ni anu seme?
j.Tepo: n. a... mi ni kepeken toki ala. mi kute e toki kalama la mi... n pilin mi la ijo sama li lon insa lawa mi. mi ken ala sona pona pona e insa pi lawa mi. taso mi ken pilin sama ni: mi kute e nimi la ilo li ante e nimi tawa pilin... anu seme... ilo ni li ken pana e pilin ken mute anu seme. ni la ilo ante li lukin e ni: seme li ken suli? anu seme...
j.Itan: n.
j.Tepo: n. mi sona ala. jan ante la insa lawa li pali kepeken nasin ante.
j.Itan: lon.
j.Lakuse: tenpo la jan li ken ala toki insa.
j.Tepo: a pilin mi la mi lukin e... n?
j.Lakuse: tenpo la jan li ken ala toki insa.
j.Tepo: ni li ken a! n. pilin mi la... mi lukin e luka pona... mi lukin e toki luka la mi kute e nimi lon insa lawa mi.
j.Lakuse: lon. ni li lon tawa mi kin.
j.Itan: n.
j.Tepo: mi kute e kalama. a. ni li ken nasa lili anu seme?
j.Lakuse: mi sona ala...
j.Itan: a ante la sina sona ala sona e ni: jan la ona li ken ala lukin insa e ijo. ona li ken ala lukin insa. ni li nasa.
j.Tepo: mi sona e ken ni. mi ni ala.
j.Itan: jan pi mute lili lili a li sama ni. taso... sama ni: sina toki e "kili" la ona li sona e ni: kili li seme. taso ona li lukin ala e kili lon lawa ona, li ken ala lukin e kili.
j.Lakuse: lawa jan li pali kepeken nasin ante mute.
j.Itan: lon. a! a ken la ni li kama e ijo toki nanpa kama!
j.Tepo: a a a!
j.Itan: mi kama sona e ijo lon tomo sona. a! sona suli mi li nasin ilo li toki ilo, anu seme... toki pi ilo nanpa.
j.Tepo: nasin seme la sina ken lawa e ilo.
j.Itan: lon.
j.Tepo: nasin seme la sina awen anpa e ilo. nasin seme la ilo li kama la sina kama ala anpa? jan ale...
j.Itan: lon. a, tenpo ni pi kama sona la mi jo e kulu-- n nasin-- mi sona ala e nasin toki pona tawa ni. a, tomo sona la jan li kama sona e ijo, e ijo suli. a, ijo suli wan la ona li tawa tomo sama, lon tenpo mute li kama sona e ijo suli ni, e ijo lili mute pi ijo suli wan ni.
j.Tepo: n... ken la kulupu sona li ken nimi pona tawa ni. tenpo sona ale la sina kama sona lon poka pi jan sama. ni li kulupu sama. kulupu sona. tan jan sona sama.
[jan tu li toki]
j.Tepo: sina wile kama sona e sona mute mute. taso ni li kama kipisi mute.
j.Itan: lon! lon.
j.Tepo: sina ken kama sona e kipisi wan lon tenpo sike wan lon kulupu wan.
j.Itan: ken la "kipisi sona" anu ijo sama li pona. n, taso...
j.Tepo: "kipisi pi tomo sona"? mi sona ala.
j.Lakuse: wan sona.
j.Tepo: nasin ni li tan tomo sona. wan sona.
j.Itan: wan sona!
j.Tepo: sina kama sona e wan lon tenpo wan.
j.Lakuse: mute sona wan, a a a.
j.Tepo: a a a.
j.Itan: lon a a.
j.Tepo: taso o toki e ijo.
j.Itan: lon. a... mi wile toki e ni: tenpo ni pi kama sona la mi jo e kulupu sona tu wan. kulupu sona tu wan ni li sama mute, lon sona ala mi. mi kama lukin e ni. a ni li lon ala wile. ona li kama taso. ona li sama lon ni: kulupu sona wan la ona li alasa sona e ni: nasin seme la sijelo jan li pali? nasin seme la lawa jan li pali? nasin seme la kulupu jan li pali? ijo sama ni. ni la mi lukin mute e lawa jan, e nasin pi lawa jan. a, kulupu sona nanpa tu la mi kama sona e ni: nasin seme la ilo nanpa li ken kama sona, sama jan. ni li wawa, tan ni: mi kama sona e ijo tu sama ni: ona li toki e nasin... toki insa?
j.Lakuse: "nasin sona"?
j.Itan: nasin pi toki insa... ni li ken nasa.
j.Itan: lon! nasin sona. nasin pi kama sona.
j.Lakuse: nasin pali.
j.Tepo: n kama sona! nasin seme la ilo li kama sona sama lawa jan.
j.Itan: lon. a kulupu sona nanpa tu wan la mi kama sona e ijo sama ni: a, n. ken pi... a ni li wile e pali suli... ken pi mute... a ala ala!
en pi suli seme la ijo li kama. sina lukin e ijo. sina sona ala e ni: ijo ni li kama ala kama. sina wile sona e ni: ken pi suli seme la ijo ni li kama.
j.Lakuse: nasin ni la sina nanpa e ken.
j.Itan: lon! lon. mi o nanpa e ken. lon. ni li sama...
j.Tepo: ni li ken sama ni: sina jo e poki suli. sina pana e sike mute mute pi kule ante tawa poki. sina pini e lukin li kama jo e sike tan poki. ni li ken kule seme?
j.Itan: lon! ni li pona a... nasin toki pona a. a, taso lon. kulupu sona tu ni li sama lon nasin ante. ona nanpa wan en ona nanpa tu li sama lon ni: nasin pi lawa jan anu nasin pi kama sona. kulupu sona nanpa tu en kulupu sona tu wan li sama lon ni:
j.Lakuse: nanpa?
j.Itan: nanpa, a a anu seme.
ale: nanpa!
j.Itan: ken pi suli seme... a a, lon.
j.Tepo: n. ilo li pali sama lawa jan la ni li kepeken nanpa lon nasin sama anu seme?
j.Itan: ken! ken, a... lon. ilo li ken kama sona sama jan lon nasin ni: n, nanpa ante mute li kama lon wan. taso sina ante e nanpa ale ni sama ni: ken pi suli seme la ijo li ijo ni? a a ni li toki nasa a...
j.Tepo: lon a.
j.Itan: ken la mi pana e sona ala kepeken toki ni. taso, lon. ni li wile e pali lawa mute, a a.
j.Tepo en j.Lakuse: a.
j.Itan: lon.
j.Tepo: pali nanpa suli.
j.Itan: lon.
j.Tepo: n. sina wile ala wile toki sama ni: ilo li kama sona sama jan la nasin li sama ni: nanpa mute li kama tan ijo anu seme?
j.Itan: lon.
j.Tepo: ona li alasa e ni: nanpa seme li sama seme lon tenpo seme... seme li sama lon nanpa ni lon tenpo mute?
j.Itan: lon! ni li sama lili tawa sona pi nanpa ken. ken pi mute seme la nanpa tu ni li sama? ... li kama sama. tenpo ni li sama nanpa ni li kama sama la ken seme la nanpa ante li sama— mi sona ala. mi toki nasa anu seme?
j.Itan: lon. taso tan toki nasa ni [la] mi sona e ni: sina sona e ijo wan anu tu tan toki mi.
j.Tepo: waa!
j.Lakuse: mi la toki sina li sama ni: ijo li pali lon tenpo mute la sina sona wile e ni: ilo li ken alasa e pini pona kepeken nanpa pi ken seme.
j.Itan: lon!
j.Tepo: n! ni li sama. nasa lili... pali nanpa ken en pali nanpa lawa li kama sama lili...
j.Itan: lon!
j.Tepo: n nasin ona li ken sama lon tenpo mute.
j.Itan: lon! a!
j.Tepo: lawa jan li pali mute kepeken ken anu seme? sina lukin e ijo la sina wile sona: "seme li ken suli tan ijo?"
j.Itan: lon a! lon lon lon... ijo ale... n. ijo li kama la lukin la lawa sina o alasa e ni: ken pi mute seme la... a a, n. o lukin e ni: sina lukin e soweli. taso lawa sina li sona ala e ni. lawa sina li alasa sona e ni: ken pi mute seme la ni lo soweli? a a, ken pi suli seme...
j.Lakuse: a! ken la ni li soweli ala!
ale: a a!
j.Itan: ken!
j.Tepo: lawa li wile sona mute a e ni: mi lukin e ijo la ijo ni li moli ala moli e mi?
j.Lakuse: a a a!
j.Tepo: ken pi mute seme? a a.
j.Itan: a a! jan Santa la ona li moli ala e mi. mi sona!
j.Tepo: a a a!
j.Itan: tan lukin ona lon... a toki nasa.
j.Tepo: sina kute e toki musi pi tenpo Santa lon kalama sin pini la sina sona e musi ni. sina kute ala la o tawa pini o kute.
j.Itan: a ken ante la ona li sona ala, tan ni: sina toki suli e ni tawa mi la mi sona. taso mi lukin taso e toki ni la pilin mi la mi sona ala e toki ale e musi ale.
j.Tepo: toki seme mi?
j.Itan: a, sama... "mi lukin e sinpin pi jan Santa la mi sona e ni: ona li wile ala moli e mi."
j.Tepo: a lon. a a a. toki ni li musi.
j.Itan: lon. ante la...
j.Tepo: ona li... a a a, [mi lukin e sinpin ona] ... li pana ala e pilin utala. pilin pona! ona li moli ala e mi!
j.Lakuse: ni li musi anu seme?
j.Itan: seme?
j.Lakuse: ni li musi anu seme? a, nasin...
j.Tepo: nasin toki musi...
j.Lakuse: a.
j.Tepo: a, jan li pilin pona la ona li toki e "pona" lon tenpo mute li toki ala e ni: "mi moli ala e sina"! a a a!
j.Itan: nasa. a mi toki suli e kama sona mi. taso mi wile sona e ni: sina tu li kama ala kama sona e ijo lon tomo sona?
j.Lakuse: a, kama sona sina li lon tomo sona suli anu seme?
j.Itan: lon. mi la ona li lon tomo sona suli. taso sina la seme?
j.Lakuse: sina sike nanpa seme?
j.Itan: a mi sike nanpa tu wan, tan tu tu.
j.Lakuse: mi sama. mi sike nanpa tu wan. a mi kama sona e ijo lipu. a, lipu pi toki Inli.
j.Itan: a, a! mi sona tan ni: mi kute e kalama sin sina.
j.Lakuse: a, mi pana e sona lipu.
j.Tepo: sina pana e sona lipu.
j.Lakuse: a, lon. tenpo ni la—
j.Tepo: seme li ijo suli pi kama sona sina?
j.Lakuse: ijo suli li tu wan... nanpa wan la mi kama sona e ijo pi tenpo pini. a, tenpo pini la... jan—
j.Tepo: seme pi tenpo pini?
j.Lakuse: tenpo pini la jan li alasa e sona, anu seme. ona li alasa sona e ijo li lukin sona e ijo ante mute. tenpo pini la jan li sona ike e nasin pali sijelo. ona li sona ala e ni: sijelo li pali e ijo kepeken nasin seme? kin la ona li sona ala e nasin ma, li sona ala e nasin ante mute. taso, tenpo mute la... anu, tenpo wan la, jan mute li kama wawa pilin, li open alasa sona mute, li kama wawa lon alasa sona... la ona li kama sona e ijo ante mute. taso, ijo mi pi kama sona li ni: meli li pali seme lon alasa sona ni? jan ale li kama sona e ijo ante mute lon tenpo ni anu seme... jan li ken toki... mi ken toki tawa sina kepeken ilo. a, mi ken... mi sona ala. mi ken misikeke tan jaki Kolona kepeken nasin wawa. ni ale li wawa anu seme? tenpo ni la jan li sona e ijo mute. taso tenpo pini la mi sona ala e ijo. tenpo mute la jan li pilin e ni: "a mije taso li pali e alasa sona." taso ni li lon ala. meli kin li alasa e sona, li meli sona.
j.Tepo: meli sona!
j.Lakuse: a, li pali e ijo suli! kin la ona li toki... ona li pali e lipu toki pona, kepeken sona, la mi lukin sona e ni. ni li ijo nanpa wan. ijo nanpa tu, a... la mi lon ma Kanata, anu seme... taso mi lon kipisi ma ni: Manitopa. ni li nimi ma, a a.
j.Tepo: ma Manitopa a.
j.Lakuse: lon.
j.Itan: a.
j.Lakuse: mi wile kama sona e lipu lon ma Manitopa. a, lipu seme li lon? a, tenpo pini la lipu seme li lon? jan sitelen li seme? jan musi li seme? ni ale li ijo nanpa tu. a ijo nanpa tu wan la... a, lanpan li lon. a tenpo pini la jan mute li lon ma Elopa, a a a, anu seme... li kama pilin e ni: mi wile lanpan, a a!
j.Itan en j.Tepo: a!
j.Tepo: mi wile e ale!
j.Lakuse: ni la ona li toki lanpan. mi kama lanpan e ma ale.
j.Itan: e ma ale!
j.Lakuse: taso ma Kanata la, a tenpo pini la jan li lon, anu seme... jan li lon li pali li kulupu li nasin li pona, li kulupu ante mute, li nasin ante mute. taso jan tan ma Elopa li kama li pana e jaki mute li pana e ike mute, li weka e ma tan jan, la ni li ike suli! kin la lon ma Kanata la...
j.Itan: ike a...
j.Lakuse: a, jan Elopa en jan ma li... n... ni li nasin pona ala. tenpo mute la jan Elopa li lukin anpa, li lukin weka e ma li lukin weka e nasin, tan jan ma, anu seme. a tenpo la ona li weka tan jan ma ale, e jan lili ona! ona li weka e jan lili ale li pana e ona lon tomo sona, la jan lili o lon tomo sona lon tenpo sike ale, la ona li ken ala kama sona e toki ona, li ken ala kama sona e nasin. ona o kama sona e toki Inli, o sona e ni: a "nasin sina pi nasin ma li ike! sina o ni ala! o kama sona ala e toki— "o weka e mama sina". ni li ike a!
j.Itan: a... nasin ike a.
j.Tepo: lon!
j.Itan: n... kepeken ni la ona li alasa weka e nasin ma pi tenpo pini anu seme... lon. ona li alasa weka e nasin lon tenpo... lon! sina wile ante e kulupu jan la sina o open lon jan lili ona...
j.Lakuse: lon! ni li wile kama e ni: jan lili ma li kama jan lili Elopa! a, lon. ona li ike kin.
j.Itan: ike a.
j.Lakuse: kin la tenpo sike pini la jan pi alasa ma li lukin e ma. ona li lukin e ma... tenpo pini la tomo sona li lon. tomo sona ike li lon, la ona li kama lukin e ni la ona li lukin e anpa ma, li kama e sona ni: sijelo moli mute pi jan lili ma li lon ni. sijelo mute. sijelo mute a. ni li lon tomo sona mute, la jan li mute li kama sona e ni: "a, wa! jan lili mute li moli, li lon anpa ma. taso jan ala li toki e ijo!" ni li kama e ike suli kin lon ma Kanata. wawa li lon anu seme... taso lon. jan ma la kulupu Kanata en jan ma li awen... li awen-- mi sona ala.
utala? ken la utala li nimi pona tan ni. kin la ona li lukin pona e utala. taso ike mute li lon tenpo pini anu seme. ike mute a... la ni li kepeken wawa mute. taso ijo pi kama sona mi la mi lukin e ni: jan ma li sitelen e lipu seme. kin la jan Elopa li sitelen e lipu pi jan ma kepeken nasin seme? ona li toki e seme lon lipu ni? ni li ijo toki... mi la ni li ijo suli a tawa kama sona tan ni: awen la jan ma li pona ala lon kulupu, li pona ala tawa kulupu, li lukin ken... li lukin jo e telo e ma. taso ma Kanata [la] ni li ken ala, a a. a, lon. ona li ike.
j.Tepo: ike a!
j.Lakuse: taso ni li kama sona mi.
j.Tepo: jan li lon li lon ma lon tenpo pini, la ma ante li kama weka e ma ni...
j.Lakuse: ni li lanpan.
j.Tepo: ike suli.
j.Itan: mi tan ma Juwese la tenpo mute la mi lukin taso e lanpan ma pi ma Juwese. taso mi weka sona e ni: ma Mewika ante [kin], anu seme, li jo e ike ni.
j.Lakuse en j.Tepo: ma ale anu seme!
j.Lakuse: ma Oselija kin la ni li lon...
j.Itan: lon lon lon!
j.Tepo: sina la ike ni li lon ala...
j.Itan: lon mi sona e ni. taso mi lukin ala e ni lon tenpo mute.
j.Lakuse: ale la lanpan li lon.
j.Itan: nasa. nasin ike ma. lon. jan li wile e mani li wile e ma... li wile utala.
j.Lakuse: jan li wile e mani la ona li wile e ma, tan ni: ona li ken weka tan ma e kasi e telo e ko e kiwen li ken pana e ni...
j.Itan: n! a a. nasin ike pi nasin ike!
j.Lakuse: lon!
j.Tepo: anpa ma li mani a? mi wile...
j.Lakuse: a a sina wile e mani kin anu seme...
j.Tepo: nasin pi jan ike.
j.Itan: ni la, mi ken moli e ma! mi ken moli e ma li ken kama jo e mani tan ona.
j.Tepo: ma mute li lon! mi moli e ma lili...
j.Lakuse en j.Itan: a a.
j.Tepo: la mi ken jo e mani mute tan ni. mi ken moli e ma ante...
j.Lakuse en j.Tepo: aaa!
j.Itan: "taso o awen— ken la sina weka e ale tan ma sike ni!" [kepeken kalama uta ante] "a taso mi ken tawa ma sike ante!"
j.Tepo: a a a!
j.Itan: "mi ken tawa mun ante. mun ante li lon." ala!!
j.Lakuse: a a. mi kama lon ma.
j.Tepo: mun ante la kon li lon ala... sina wile ala tawa mun ante.
j.Lakuse: lon. seli li kama... lete li kama...
j.Tepo: ilo tawa li ike suli li ken moli mute.
j.Itan: ilo pi tawa sewi li tawa sewi.
j.Tepo: lon.
j.Itan: n. taso sina ken tawa mun la sina wile ala wile ni?
j.Tepo: n...
j.Itan: mun ante.
j.Tepo: mi wile ala. ilo ni li moli... ilo pi tawa mun li ken moli mute... moli e jan lon tenpo mute. ni li musi ala! n. ken la mi wile tawa sewi. mi wile lukin e ma sama waso anu seme...
j.Lakuse: sina wile kama waso anu seme?
j.Itan: a, a a.
j.Tepo: mi wile kama waso.
j.Lakuse: a! waso Tepo, a a.
j.Tepo: a a a!
j.Itan: "mi wile waso."
j.Tepo: ni o nimi sin mi.
j.Itan: mi wile lukin e "waso Tepo" lon ma pona pi toki pona lon kama lili a.
j.Tepo: taso, n. nanpa wan la mi o kama sona lawa e ilo waso.
j.Lakuse: ala. ilo li lon ala.
j.Tepo: mi ni la mi ken waso Tepo. a! a a. taso mi jo ala e ilo la mi lon sewi...
j.Lakuse: ni ala. o kepeken wawa pi lawa sina. ale li ken kama pona.
j.Tepo en j.Lakuse: a a!
j.Tepo: a! n...
j.Itan: a! ante la— ken la mi ken ante e wile sona musi mi.
j.Tepo: wawa pi lawa mi li pona insa lawa mi, li pona ala lon sewi...
j.Lakuse: lon. wawa pi lawa sina li kama weka tan lawa sina, la ona li kama kon li kama kon loje! li kama pana musi! a a li kalama suli li kalama musi, tan kute sina...
j.Tepo: seme? a a!
j.Lakuse: sina open e uta sina la, a... mi sona ala. linja pi kule ale li kama... a a tan uta la sina kama sewi!
j.Tepo: a a! seme!?
j.Lakuse: sina waso. ni li pona, a a.
j.Itan: sina pana...
j.Tepo: nasa mute.
j.Itan: wa... sitelen nasa mute li lon lawa mi lon tenpo lon.
j.Tepo: a a, mi kin!
j.Itan: n, nasa a.
j.Lakuse: sina sona e ni: sina wile kama waso la ni taso li nasin.
j.Tepo en j.Itan: a a.
j.Lakuse: wawa lawa mute.
j.Itan: ni taso li nasin.
j.Lakuse: lon.
j.Itan: sina o kepeken nasin ni. a, jan Lakuse o sina ken— a! a open la mi wile toki e ni: mi wile ante e wile sona musi mi, tawa ni: sina sona e ni: "sina moli ala" la sina ken tawa mun la sina wile ala wile?
j.Lakuse: a...
j.Itan: sina sona e ni: sinna moli ala. jan Tepo o—
j.Tepo: ilo li pona la "mi wile ala wile"? taso ilo li kepeken tenpo suli anu seme?
j.Itan: n, ken... taso mi ken tawa mun sike lili pi mun jan anu seme... ni li suli ala. tawa suli ala.
j.Tepo: n! lon. ni li tenpo suno tu wan anu seme...
j.Lakuse: taso kon li ante anu seme. kon lon ma ni en kon lon mun li ante. kin la kon ma...
j.Tepo: ni li lon: kon ala li lon mun.
j.Lakuse: lon.
j.Itan: lon! kon ala.
j.Tepo: kon ala li lon lon poka...
j.Lakuse: lon. ni li ike tawa sijelo anu seme? mi wile ala ike e sijelo mi la ken la mi wile ala...
j.Tepo: a a. lon.
j.Itan: a a a!
j.Tepo: taso mi lon mun lili la mi kepeken noka mi taso la mi ken tawa sewi mute!
ale: (nasa kute) jan Tepo li ken waso!
j.Itan: waso! nasin ante tawa ken waso li lon! pona!
j.Tepo: a a!
j.Lakuse: pona a a.
j.Tepo: n, mi wile ken waso kepeken... waso li ken tawa lon sewi tan ni: ona li lili... ona li wile ala pana e wawa mute tawa ni: sijelo. ona li tawa.
j.Itan: lon.
j.Tepo: taso, n. mi lon mun ante la tawa waso li ken kama ken. taso ni li wile: kon o mute mute. ma ni la kon li suli ala. kon li mute mute ala. waso li ken tawa e kon mute kepeken luka ona. waso li tawa e kon kepeken luka ona la kon ni li suli sama waso la waso li ken tawa sewi. taso mi tawa e kon la kon ni li lili tawa mi. taso mun ante la kon li mute lon ale la mi tawa e luka la ni li tawa e kon mute, li ken tawa sewi e mi. a a!
j.Lakuse: ni la luka sina li kama waso.
j.Itan: lon...
j.Tepo: taso ike la mun sama li... ike la kon li mute sama ni la kon ni li lukin lili e mi li moli e mi tan ni.
j.Itan: a a! lon...
j.Tepo: kin la kon li ken seli mute... mi ken moli tan seli... a...
j.Itan: taso pona la mi kama sona e ni: nasin mute li lon, tawa ni: sina ken waso.
j.Itan en j.Tepo: a a a.
j.Lakuse: kin la jan mun ante li ken kama, li ken moli e sina. a a. lon... ona li kepeken ilo moli. ilo moli li pana e suno laso... a a.
j.Itan: suno wawa! lon! a a.
j.Tepo: taso ni li ken lon. mi wile ala tawa mun ante. jan mun li ken tawa mun mi li ken moli e mi lon mun mi...
j.Lakuse en j.Itan: a a a!
j.Tepo: mi tawa mun ante la ni li ante ala.
j.Itan: lon. sina wile ala lili e pali ona.
j.Lakuse en j.Tepo: a a a.
j.Itan: ona li wile moli e sina la sina o lili ala e pali ni, a a a. o awen lon ma sina.
j.Tepo: mi wile toki tawa jan mun. mi wile ala moli— mi wile ala utala.
j.Tepo: [ken la] ona li wile sona e toki pona!
j.Lakuse: a jan mun li sona ala sona e toki pona?
j.Lakuse: ni li wile sona suli!!
j.Itan: lon, a a.
j.Tepo: a a.
j.Itan: ken la ona li kute lon tenpo lon. mi sona ala.
j.Tepo: jan mun o! toki!
j.Itan en j.Lakuse: a a!
j.Tepo: o moli ala e mi! sina pona.
j.Itan: "o moli ala e mi." a a. nasa. a! mi sona e nasin ante tawa ni: sina ken waso. a, jan li pali e musi ni: ona li tawa lon tomo waso li weka e ona, tawa mun ni, lon sewi a, li tawa anpa. a, ona li moli ala, tan ni: ona li jo e len suli.
j.Lakuse en j.Tepo: a...
j.Itan: sina sona ala sona e musi ni?
j.Lakuse en j.Tepo: mi sona.
j.Tepo: mi sona. tomo li tawa sewi. mi weka tan tomo la mi tawa anpa. taso ni li kepeken tenpo mute la mi ken pilin sama ni: "mi waso!" ...lon tenpo lili.
j.Itan: lon!
j.Tepo: mi moli ala. lon. len li ken e ni: mi moli ala.
j.Itan: sina ken musi ni la sina wile ala wile?
j.Tepo: mi ken wile! a a. ni li ken musi anu seme? ken la mi wile lon tenpo wan.
j.Itan: jan Lause o. sina wile ala wile ni?
j.Lakuse: mi wile ala. tenpo pini la jan olin mi li lon kulupu utala, la ona li ni. ona li sama ni. ona li lon tomo waso li weka tan ona. pali ona li sama ni: jan li weka tan tomo waso la ona o kepeken len anu seme... taso len ni o pona, o pali pona, la jan olin mi li pali e ni: len li pona a li pakala ala. taso kin la ona ale li weka tan tomo, lon tenpo mute.
j.Itan: (ilo li pakala lili e tenpo) a! pona!
j.Lakuse: lon.
j.Itan: a, musi! ni li musi ala musi tawa ona?
j.Lakuse: tenpo nanpa wan li nasa lili. jan li mu suli tawa ona la ona li weka. ona li kepeken luka ona li weka e ona tan tomo waso.
j.Itan: a a. nasa ale!
j.Lakuse: a a a!
j.Itan: "o weka a! o weka tan tomo!"
j.Lakuse: a a a! lon.
j.Lakuse: a, taso. lon. mani li pona la ona li pona. kin la ona li ken tomo sona kepeken mani ala lon tenpo ni, la ni li pona tawa ona.
j.Itan: a! pona. pona. pona a. kulupu utala li pana e mani tawa ni: ona li ken tawa tomo sona, anu seme.
j.Lakuse: lon.
j.Itan: pona. pona. lon. a! ante la tenpo moku mi li kama lon tenpo lili! sina tu la seme?
j.Tepo: a seme...
j.Itan: mi moku lon tenpo kama lili la, ken la mi o pini lon tenpo poka.
j.Lakuse: ni li ken pini anu seme.
j.Tepo: a ni li ken tenpo pona. mi ken awen taso. tenpo li suli lon tenpo ni.
j.Itan: a kin mi wile pini lon tenpo lon, tan ni: mi o sitelen e toki ale.
ale: a, a a!
j.Itan: ala... mi wile e suli.
j.Tepo: lon. mi wile ala...
j.Tepo: mi wile ala e tenpo suli tawa... mi ala ike pali tan ni a.
j.Itan: ala, ala. ni li musi tawa mi. ona li ken pali suli. taso, ona li ken musi.
j.Tepo: pona pona.
j.Itan: taso, lon! mi jan Itan.
j.Tepo: mi jan Tepo.
j.Lakuse: a, mi ken jan Lakuse. ken la mi jan Lakuse ala! ken la mi jan mun!
ale: a, wa!
j.Lakuse en j.Itan: o awen pona!
j.Tepo: mi jan mun ala! a a, o awen pona.
|
This work is licensed under the Creative Commons Attribution-ShareAlike 4.0 International (CC BY-SA 4.0) license.
|