Libro de Mormon - Ether - Capitulo 15
Milliones de Jareditas es occidite in battalia - Shiz e Coriantumr reuni tote le populo pro un combatto final - le Spirito del Senior cessa de luctar con illes - le nation jaredite es completemente destruite – resta sol Coriantumr.
Ether 15:1 E post que Coriantumr habeva curate su vulneres, comenciava a rememorar le parolas que Ether le habeva dicite.
Ether 15:2 ille videva que habeva ja essite occidite per le spada quasi duo milliones de su populo, e ille comenciava a attristar se in su corde; si, duo milliones de homines potente habeva essite occidite insimul a lor uxores e a lor infantes.
Ether 15:3 ille comenciava a repentir se del mal que ille habeva facite; ille comenciava a rememorar le parolas declarate per bucca de tote le prophetas, e ille videva que usque a alora illos se habeva complite in cata minime parte; e su anima se doleva e refusava de esser consolate.
Ether 15:4 E adveniva que ille scribeva un epistola a Shiz, petente le de sparniar su populo, e ille haberea cedite le regno pro salvar le vita del populo.
Ether 15:5 E adveniva que quando Shiz habeva recipite su epistola, ille scribeva un epistola a Coriantumr dicente que si Coriantumr se consignava a ille a fin que ille le poterea occider con su proprie spada, ille haberea sparniate le vita del populo.
Ether 15:6 E adveniva que le populo non se repentiva de su iniquitate; e le populo de Coriantumr esseva incitate al ira contra le populo de Shiz; e le populo de Shiz esseva incitate al ira contra le populo de Coriantumr; ergo le populo de Shiz dava battalia al populo de Coriantumr.
Ether 15:7 E quando Coriantumr videva que esseva sur puncto de cader, fugiva de nove ante le populo de Shiz.
Ether 15:8 E adveniva que ille arrivava al aquas de Ripliancum, cuje interpretation significa 'grande' o 'que excede toto'; ergo, quando illes arrivava a iste aquas, illes installava le tentas; e Shiz installava tamben su tentas vicin a illes; e le die sequente illes comenciava le combatto.
Ether 15:9 E adveniva que illes combatteva un battalia violentissime, durante le qual Coriantumr esseva vulnerate de nove e ille evanesceva per le perdita de sanguine.
Ether 15:10 E adveniva que le armeas de Coriantumr avantiava contra le armeas de Shiz, e les batteva, facente les fugir; e illes fugiva verso sud e illes installava le tentas in un loco que esseva appellate Ogath.
Ether 15:11 E adveniva que le armea de Coriantumr installava su tentas presso le collina de Ramah; e illo esseva le mesme collina ubi mi patre Mormon occultava pro le Senior le registros sacrate.
Ether 15:12 E adveniva que illes reuniva tote le populo de tote le facie del pais qui non habeva essite occidite, salvo Ether.
Ether 15:13 E adveniva que Ether videva tote le actiones del populo; e ille videva que le populo que esseva pro Coriantumr se reuniva con le armea de Coriantumr; e le populo que esseva pro Shiz se reuniva con le armea de Shiz.
Ether 15:14 Ergo, durante le spatio de quatro annos illes reuniva le populo pro poter recolliger tote illes qui esseva sur le facie del pais e pro poter reciper tote le reinfortiamento possibile.
Ether 15:15 E adveniva que quando illes se habeva tote reunite, cata un con le armea que voleva, con su uxor e su infantes - e illes esseva armate, sia le homines que le feminas e le infantes, con armas de guerra, e illes habeva cuirasses, e cascos e scutos e illes esseva vestite e preparate pro le guerra – illes marchava le unes contra le alteres pro combatter; e illes se batteva per tote le jornata, e necun prevaleva.
Ether 15:16 E adveniva que quando arrivava le nocte illes esseva fatigate, e illes se retirava in lor campamentos; e post que illes se habeva retirate in lor campamentos illes comenciava a lamentar se e a planger le perdita del mortos de lor populo; e assi grande esseva lor critos, lor lamentation e lor plancto, que illos lacerava le aer.
Ether 15:17 E adveniva que le die sequente illes vadeva de nove a combatter, e grande e terribile esseva celle jorno; nonobstante necun prevaleva, e quando veniva de nove le nocte illes lacerava le aer con lor critos, lor lamentation e lor gemitos, per le perdita del mortos de lor populo.
Ether 15:18 E adveniva que Coriantumr scribeva de nove un epistola a Shiz, petente le de non venir plus a combatter, ma de prender le regno e sparniar le vita del populo.
Ether 15:19 Ma le Spirito del Senior habeva cessate de luctar con illes e Satan habeva plen poter super le cordes del populo; perque illes esseva abandonate al duressa de lor cordes e al cecitate de lor mentes, pro lor destruction; ergo illes vadeva a combatter de nove.
Ether 15:20 E adveniva que illes combatteva tote le jornata, e quando arrivava le nocte illes dormiva supra lor spadas.
Ether 15:21 E le die sequente illes combatteva usque arrivava le nocte.
Ether 15:22 E quando arrivava le nocte illes esseva ebrie de cholera, mesmo como un homine es ebrie de vino; e illes dormiva de nove supra lor spadas.
Ether 15:23 E le die sequente illes combatteva de nove; e quando arrivava le nocte illes habeva tote cadite per spada, salvo cinquanta-duo del populo de Coriantumr e sexanta-novem del populo de Shiz.
Ether 15:24 E adveniva que illes dormiva supra lor spadas le nocte, e illes se batteva ancora le die sequente, e illes luctava con tote lor fortias per tote le jornata, con lor spadas e lor scutos.
Ether 15:25 E quando arrivava le nocte habeva trenta-duo del populo de Shiz e vinti-septe del populo de Coriantumr.
Ether 15:26 E adveniva que illes mangiava e dormiva, e se preparava a morir le die sequente. E illes esseva homines grande e potente, quanto al fortia physic.
Ether 15:27 E adveniva que illes combatteva per le spatio de tres horas, e illes evanesceva per le perdita de sanguine.
Ether 15:28 E adveniva que quando le homines de Coriantumr habeva recuperate fortia sufficiente pro poter camminar, illes comenciava a fugir pro salvar le vita; ma Shiz se altiava e anque su homines, e ille jurava in su ira que ille haberea occidite Coriantumr o ille haberea perite per spada.
Ether 15:29 Ergo ille les persequeva, e les attingeva le jorno sequente; e illes combatteva de nove con le spada. E adveniva que quando il habeva totos cadite per spada, salvo Shiz e Coriantumr, Shiz evanesceva per le perdita de sanguine.
Ether 15:30 E adveniva que Coriantumr, post haber se appoiate a su spada pro reposar se un poc, ille taliava le capite a Shiz.
Ether 15:31 E adveniva post que ille habeva taliate le capite de Shiz, Shiz se altiava ancora super su manos e recadeva; e post haber cercate de respirar, ille moriva.
Ether 15:32 E adveniva que Coriantumr cadeva a terra, e restava como si ille esseva morte.
Ether 15:33 E le Senior parlava a Ether e le diceva: Vade. E ille vadeva, e videva que le parolas del Senior se habeva tote complite; e ille terminava su historia (e io ha scribite minus que le centesime parte), e ille lo occultava in modo que le populo de Limhi lo trovava.
Ether 15:34 Ora, le ultime parolas scribite per Ether es le sequente: Si le Senior vole que io sia translatate, o que io face le voluntate del Senior in le carne, non importa, a pacto que io sia salvate in le regno de Deo. Amen.
Capitulos:
1 2 3 4 5 6 7 8 9 10 11 12 13 14 15
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni