Kande me videskis la unesma foyo la vorti : acensar e decensar, vice supreniri e malsupreniri, plue : sinistre vice maldekstre, me esis tre kontenta vidar la chanjo, e sen questionar ulu, me provis donar a me ipsa la motivo. Supozez ke vu advenas poke tarde ad un staciono, ibe restas ad vu nur kelka minuti por komprar la bileto ; trovesas multa personi avan la gicheti, vu ne esas certa pri la justa gicheto, vu questionas e tre rapide marchas en la direkto di la gicheto, sed vu eroras en la lasta momento e la viro qua indikis a vu la direkto nun klamas ad vu : « sinistre », vu sen longa reflekto turnas a la justa gicheto ; la vorto « maldekstre » esus vu forsan misduktinta e vu esus faliinta la treno.
Un velocipedisto en lando, en qua il ne konocas la kustumi, intencas cedar ye la dextra e la motoristo di la automobilo quik rememorigas il per la vorto « sinistre ». Me esas certa ke la vorto « maldekstre » posible postulus tro multa tempo por reflektar e por spontane agar. Vorti quale « dextre » e « sinistre » devas efektigar quale elektro.
Nun vera evento : Ante un monato me havis la malfortuno pozar un fingro inter la fosto e la rotaco-pordo, nun tre ofte uzata en restoreyi. Me klamis tre forte « dop » ; supozez nun ke me esus klaminta « malantau », posible la viro avan me esus kompreninta « antau » e me infalible esus perdinta mea fingro.
- ↑ Okazione Progreso, p. 493.