Se̿ng-géng/Mǎ-tuo̿i Hŭ-éng/22
Di̿ 22 Cióng
edit
- 1 Iǎ-Sú í nà bǐ-piāng gâ̤ dī iáu duōi-gá-nêng uā,
- 2 Tíng gǒ bǐ-piāng cì-ciă uǎng-di̿, ta̿i gṳ̀ gṳ̌ing bāing tǎu-chéng gâ̤ ciǔ.
- 3 Sǎ̤ nû-gě ko̤̿ hǎng ǔ chiáng lâ̤ gâ̤ nêng-kǎ lâ̤ iè ciǔ: gṳ̀ dú eng kǎing lâ̤.
- 4 Ǐ hǎng biē gâ̤ nû-gě ko̤̿, gáu-dō gṳ̀, uā, Nì ko̤̿ iáu ǔ chiǎng lâ̤ gâ̤ nêng-kǎ uā, Uòi gâ̤ ciǔ bāing làu: uòi gâ̤ niû, iáu bṳ̂ gâ̤ tê-sáng ti̿-tiāu, běng sū-mū sī dú bāing ǐ-nī: ciū niōng lâ̤ iè ciǔ.
- 5 Nêng-kǎ dú eng chǔing gṳ̀, gǒ̤ nêng ca̿ gǒ̤ nêng ko̤̿-tiāu, cì-ciă ko̤̿ cù-cī gâ̤ châing, cì-ciă ko̤̿ ca̿ sáing-i̿.
- 6 Ǔ biē gâ̤ nêng-kǎ nà-diū nû-gě, diě gṳ̀, dú huōi-sǐ-tiāu.
- 7 Uǎng-di̿ tia̿ng-nī-gi̿ng, ciū cèng hǒ-lǎl dǎng béng ko̤̿ miè-tiāu ǔ hé̤ng-séng, chiáu-tiāu gṳ̀ gâ̤ sêng.
- 8 Ciū iáu nû-gě uā, Tǎu-chéng gâ̤ ciǔ dú bāing ǐ-nī, lâ̤-sī chiǎng lâ̤ gâ̤ nêng-kǎ mài hō̤ uòi gâ̤ i̿.
- 9 Gu̿-chu̿ nì niōng ko̤̿ sáng chá lū kě gâ̤ sù-cài mǎu-lō̤ng pōng-diō̤ sū-mū nêng, dú chiǎng gṳ̀ lâ̤ iè ciǔ.
- 10 Nû-gě chṳ̌ ko̤̿ da̿u duōi diō̤ di̿ pōng-diō̤ gâ̤ nêng, mǎu-lō̤ng ciáng làingl dú iáu gṳ̀ lâ̤ iè ciǔ; ciǔ-dǒ̤ ciū dú cō mǔing-tiāu.
- 11 Uǎng-di̿ di̿ lâ̤ gi̿ng nêng-kǎ, chū-gi̿ng cì-ciă nêng ēng-nǎing cē̤ng iè tǎu-chéng ciǔ gâ̤ í-ciông"
- 12 Ciū iáu gṳ̀ uā, Bǎing-iǔ, nì gōng-ciōng-di̿ lâ̤ iǒ̤ng-di̿ ēng cē̤ng iè tǎu-chéng ciǔ gâ̤ í-ciông? Ǔ ciǎ nêng mǎu dī a̿ing.
- 13 Uǎng-di̿ ciū gáu-dō nû-gě, ua, Nà gṳ̀ gâ̤ káu siú kǒ̤ng-bǒ̤ng kǐ lâ̤ , diú gṳ̀ hā ngṳē-bíng ú-ō̤ng gâ̤ sù-cài ; da̿u ǔ-di̿ iǔ gàu-ngâ chiě-chǐ-di̿ tî-kǔ.
- 14 Éng-ṳē hǎng lâ̤ gâ̤ nêng cāi, tǐ chṳ̆ lâ̤ gâ̤ nêng siǎu.
- 15 Ǔ-cì-sî Huǎ-lī-so̿ nêng chṳ̌ ko̤̿ câi-câi sióng-liông, niōng gōng-ciōng gǎ̤-sǐ lōng Iǎ-Sú ŏ̤ uā chṳ̆ lâ̤ hǎu huōi gṳ̀ gâ̤ dī.
- 16 Ciū hǎng cù-cī gâ̤ bă-sia̿ng iáu Hí-lṳ̌ cì bǒng-tê gâ̤ nêng ko̤̿ gi̿ng Iǎ-Sú, ua, Síng-Sáing, uòi dǎ̤-dí nì sī chěng-ì gâ̤ nêng , iǎ chěng-chěng ì-ì nà Ciōng-Di̿ gâ̤ dàu-lǐ háu nêng, ēng kǎing ngǎi nêng cěng, éng-ṳē nì ēng chū nêng gâ̤ ngṳē-māu.
- 17 Gu̿-chu̿ nì mōng iáu uòi uā, Iáu Gái-sǎ ṳ̌ing-liông, í nì siǒng, gǒ̤ng, ēng gǒ̤ng?
- 18 Iǎ-Sú dǎ̤-dí gṳ̀ làing gâ̤ séng-sṳ̌, ciū uā, Gǎ-hǎu gâ̤ nêng, nì ca̿-sū-dī chi̿ uòi?
- 19 Nà ṳ̌ing-liông gâ̤ cîng nǎ uòi chū. Gṳ̀ ciū dé cì-ciă cîng lâ̤ nǎ Iǎ-Sú.
- 20 Iǎ-Sú iáu gṳ̀ uā, Iǒ̤ng cîng gâ̤ nêng-nêng-ciě iáu gǒ-hāu sī sū nêng gâ̤?
- 21 Gṳ̀ a̿ing uā, Sī Gái-sǎ gâ̤. Iǎ-Sú ua, Iǒ̤ng-gǎ̤-sǐ Gái-sǎ gâ̤ mî-dī niōng gṳ̀ nǎ Gái-sǎ, Ciōng-Di̿ gâ̤ mî-dī iǎ niōng gṳ̀ nǎ Ciōng-Di̿.
- 22 Duōi-gá-nêng tia̿ng-nī-gi̿ng iǒ̤ng-di̿, cèng gǐ-ī, ciū giǎng Iǎ-Sú ǔ-di̿ chṳ̆ lâ̤ ko̤̿-tiāu.
- 23 Sǎ-dú-gái nêng uā mǎu hǔ-sáng gâ̤ dī; góng ǔ cì góng, gṳ̀ dǐ-bíng iǎ iǔ giē nêng lâ̤ gi̿ng Iǎ-Sú, uā,
- 24 Síng-sáing, Mǒ̤-sái uā-gua̿, Nêng lâ̤ sǐ-tiāu mǎu gṳ̌ing, gṳ̀ dí-ciě niōng tǎu gṳ̀ gâ̤ sē-mǎ , sǎi gṳ̌ing chěng gó̤-ciě gâ̤ gi̿.
- 25 Uòi ǔ-di̿ iǔ ciǎ nêng chǐ hiáng-dī: duōi gâ̤ tǎu sē-mǎ, sǐ-tiāu, mǎu gṳ̌ing, diōng-diū sē-mǎ nǎ gṳ̀ dí-ciě.
- 26 Di̿ nī gâ̤, di̿ sáng gâ̤-cì-dā̤ da̿u di̿ chǐ gâ̤, dú sī iǒ̤ng-gǎ̤-sǐ ca̿.
- 27 Hē-mṳě ǔ á-niông-nêng iǎ sǐ-tiāu.
- 28 Da̿u nêng hǔ-sáng gâ̤ sî-hē , ǔ á-niông-nêng da̿u iǒ̤ng chǐ hiáng-dī dǐ-bíng ŏ̤ ca̿ nī cì-ciă gâ̤ sē-mǎ ? éng-ṳē ǔ chǐ hiáng-dī dú tǎu-gua̿ gṳ̀.
- 29 Iǎ-Sú a̿ing uā, Nì siǒng cho̤̿ tiāu, éng-ṳē nì ēng měng-bà̤ se̿ng-géng iáu Ciōng-Di̿ gâ̤ duo̿i cǒ-nǎing.
- 30 Da̿u nêng hǔ-sáng gâ̤ sî-hē dú mǎu ǔ chiǔ-chéng hó̤ng-ha̿ gâ̤ dī, nêng ŏ̤ su̿-siōng Ciōng-Di̿ sǎ̤-chṳ̄ gâ̤ da̿u tíng ciōng ǐ-búing.
- 31 Uā ǔ ciǎ sǐ-nêng hǔ-sáng gâ̤ dī, nì gu̿ ēng-nǎing nāng-gua̿ Ciōng-Di̿ háu nì gâ̤ dī, gō̤-uā,
- 32 Uòi sī Ngā-bǎ-là-hǎng Ngā-bǎ-là-hǎng gâ̤ Ciōng-Di̿, Ì-sǎ gâ̤ Ciōng-Di̿, sī sáng-nêng gâ̤ Ciōng-Di̿.
- 33 Cèng cāi nêng tia̿ng-nī-gi̿ng iǒ̤ng-di̿, ciū siǒng Iǎ-Sú háu gâ̤ dī cèng gǐ-guo̿i.
- 34 Huǎ-lī-so̿ nêng tia̿ng-nī-gi̿ng Iǎ-Sú lōng Sǎ-dú-gái nêng mǎu dī a̿ing, ciū cṳ̀ cì-dó.
- 35 Dǐ-bíng iǔ cì-ciă háu lṳ̄-huǎ gâ̤ síng-sáing chi Iǎ-Sú, uā.
- 36 Síng-Sáing, lṳ̄-huǎ dǐ-bíng gáu-dō nêng gâ̤ dī, nì cì-iōng s děng iàu-gěng gâ̤? 37 Iǎ-Sú a̿ing uā, Nì niōng cèng-séng, cèng-sia̿ng, cèng-i̿, o̿ Cṳ̌ nì gâ̤ Ciōng-Di̿.
- 38 Gáu-dō nêng gâ̤ dī iǒ̤ng ciū-sī tê cì-iōng děng iàu-gěng gâ̤.
- 39 Di̿ nī-iōng iǎ sī iǒ̤ng-gǎ̤-sǐ, ciū-sī, Niōng o̿ biē-nêng su̿-siōng o̿ cù-cī ǐ-búing.
- 40 Iǒ̤ng liòng-iōng gáu-dō nêng gâ̤ dī sī lṳ̄-huǎ iáu síng-dí sṳ́-di̿ gâ̤ duōi cǒng-gó̤ng.
- 41 Huǎ-lī-so̿ nêng gu̿ dō̤-di̿ cṳ̀ cì-dó gâ̤ sî-hē , Iǎ-Sú ciū mōng gṳ̀ uā,
- 42 Uā Gí-Dǔ gâ̤ dī, nì siǒng sī gōng-ciōng-iōng? Gṳ̀ sī sū nêng gâ̤ gṳ̌ing-só̤ng? Gṳ̀ a̿ing uā, Sī Duōi-pǐ gâ̤ gṳ̌ing-só̤ng.
- 43 Iǎ-Sú uā, Iǒ̤ng-gǎ̤-sǐ Duōi-pǐ dǎ̤-diō̤ Se̿ng-Sěng gōng-ciōng-di̿ ǐ hǎng Gí-Dǔ ca̿ Cṳ̌, gō̤-uā,
- 44 Cṳ̌ iáu uòi gâ̤ Cṳ̌ uā,CŌ da̿u uòi iū-bíng, dǎing oi nà nì gâ̤ do̿-tê bo̿ng da̿u nì káu à nǎ nì dā-diū.
- 45 Lâ̤-sī Duōi-pǐ hǎng Gí-Dǔ ca̿ Cṳ̌, Gí-Dǔ gōng-ciōng sī Duōi-pǐ gâ̤ gṳ̌ing-só̤ng nī?
- 46 Mǎu cì-ciă nêng ŏ̤ a̿ing gṳ̀ cì gṳ̿; giǎng ǔ cì góng à ko̤̿ mǎu nêng gǒ̤ng cuo̿i mōng gṳ̀ gâ̤ dī.