Te Paipera Tapu/Kenehi

[ 1 ]

KO TE

PUKAPUKA TUATAHI A MOHI

KO KENEHI.

---

UPOKO 1.

HE mea hanga na te Atua i te timatanga te rangi me te whenua.

² A kahore he ahua o te whenua, i te takoto kau; a he pouri a runga i te mata o te hohonu. Na, ka whakapaho te Wairua o te Atua i runga i te kare o nga wai.

³ ¶ A ka ki te Atua, Kia mārama: na ka mārama.

⁴ A ka kite te Atua i te māramatanga, e pai ana: a ka wehewehe te Atua i waenganui o te mārama o te pouri.

⁵ Na, ka huaina e te Atua te mārama he Awatea, a ko te pouri i huaina e ia he Po. A ko te ahiahi raua ko te ata te ra tuatahi.

⁶ ¶ Na, ka mea te Atua, Kia whai kikorangi a waenganui o nga wai, a kia wehea e taua mea a waenganui o nga wai.

⁷ Na, ka hangā e te Atua te kikorangi, a ka wehea e ia nga wai i raro iho o te kikorangi i nga wai o runga ake o te kikorangi: a ka oti.

⁸ Na, ka huaina te kikorangi e te Atua he Rangi. A ko te ahiahi raua ko te ata te ra tuarua.

⁹ ¶ Na, ka mea te Atua, Kia huihuia nga wai i raro i te rangi, kia kotahi te wahi, a kia puta ake te tuawhenua: a ka oti.

¹⁰ Na, ka huaina te tuawhenua e te Atua he Whenua; ko te huihuinga wai hoki i huaina e ia ko nga Moana: a ka kite mai te Atua, e pai ana.

¹¹ ¶ Na, ka mea te Atua, Kia pihi ake te taru hou i te whenua, te otaota whai purapura, me te rakau hua ki runga ki te whenua, e hua ana ona hua, he mea rite tonu ki a ia, kei roto nei i a ia ona purapura: a ka oti.

¹² Na, ka whakaputaina ake te taru hou e te whenua, te otaota hoki e hua ana ona hua, he mea rite tonu ki a ia, me te rakau whai hua, kei roto nei i a ia ona purapura, he mea rite tonu ki a ia: a ka kite mai te Atua, e pai ana.

¹³ A ko te ahiahi raua ko te ata te ra tuatoru.

¹⁴ ¶ Na, ka mea te Atua, Kia whai mea whakamārama te kiko o te rangi, hei wehe i te awatea i te po; a hei tohu ano aua mea, hei taima, hei ra, hei tau:

¹⁵ A hei whakamārama aua mea i te kiko o te rangi, hei whakamārama mo te whenua: a ka oti.

¹⁶ Na, ka hangā e te Atua nga whakamārama nui e rua; te whakamārama nui hei tohutohu mo te awatea, me te whakamārama tuaiti hei tohutohu mo te po: me nga whetu ano hoki.

¹⁷ A whakanohoia ana aua mea e te Atua ki te kiko o te rangi, hei whakamārama mo te whenua,

¹⁸ Hei tohutohu ano hoki i te awatea i te po, hei wehe hoki i te mārama i te pouri: a ka kite mai te Atua, e pai ana.

¹⁹ A ko te ahiahi raua ko te ata te ra tuawha.

²⁰ ¶ Na, ka mea te Atua, Kia ngahue ake i roto i nga wai te mea ora e ngoki ana, kia rere ano hoki te manu i runga i te whenua i te mata o te kiko o te rangi.

²¹ Na, ka hangā e te Atua nga tohora nui, me nga mea ora katoa, nga mea ngokingoki i ngahue ake nei i roto i nga wai, o ia ahua o ia ahua me nga manu whai parirau katoa, o ia ahua o ia ahua: a ka kite te Atua, e pai ana.

[ 2 ]²² Na, ka manaaki te Atua i a ratou, ka mea, Kia hua koutou, kia tini, kia kapi hoki nga wai o nga moana i a koutou, kia tini ano hoki nga manu ki runga ki te whenua.

²³ A ko te ahiahi raua ko te ata te ra tuarima.

²⁴ ¶ Na, ka mea te Atua, Kia whakaputaina ake e te whenua te mea ora o ia ahua o ia ahua, te kararehe, me te mea ngokingoki, me te kirehe o te whenua, o ia ahua o ia ahua: a ka oti.

²⁵ Na, ka hangā e te Atua te kirehe o te whenua o ia ahua o ia ahua, me te kararehe o ia ahua o ia ahua, me nga mea ngokingoki katoa o te whenua o ia ahua o ia ahua: a ka kite mai te Atua, e pai ana.

²⁶ ¶ Na, ka mea te Atua, Kia hanga tatou i te tangata kia rite ki a tatou, hei to tatou hoki te ahua: a kia waiho ratou hei rangatira mo nga ika o te moana, mo te manu hoki o te rangi, mo nga kararehe hoki, mo te whenua katoa hoki, mo nga mea ngokingoki katoa ano hoki e ngokingoki ana i runga i te whenua.

²⁷ Na, ka hangā e te Atua te tangata, he mea rite ki a ia, i hangā ia e ia kia rite ki te Atua; i hangā raua he tane he wahine.

²⁸ Na, ka manaakitia raua e te Atua, a ka mea te Atua ki a raua, Kia hua, kia tini, kia kapi hoki te whenua, i a korua, kia mate hoki ona tara i a korua: a hei rangatira ano korua mo te ika o te moana, mo te manu hoki o te rangi, mo nga mea ora katoa hoki e ngokingoki ana i runga i te whenua.

²⁹ ¶ Na, ka mea mai te Atua, Na, kua oti nei te hoatu e ahau ki a korua nga otaota katoa e whai purapura ana i runga i te mata o te whenua katoa, me te rakau katoa, he hua rakau tona e whai purapura ana; hei kai ena ma korua.

³⁰ Me nga otaota matomato katoa, hei kai ma nga kararehe katoa o te whenua, ma nga manu katoa hoki o te rangi, ma nga mea katoa hoki e ngokingoki ana i runga i te whenua kei roto nei i a ratou he wairua ora: a ka oti.

³¹ A, ka kite te Atua i nga mea katoa kua hangā, nei e ia, na, pai whakaharahara. A ko te ahiahi raua ko te ata te ra tuaono.

UPOKO 2.

NA, ka oti nga rangi me te whenua, me o reira mano katoa.

² A no te whitu o nga ra i oti ai i te Atua tana mahi i mahi ai; na, ka okioki ia i te ra whitu i ana mahi katoa i mahia e ia.

³ Na, ka whakapaingia e te Atua te ra whitu, a whakatapua ana e ia: mona i okioki i reira i ana mahi katoa i oti i te Atua te hanga.

⁴ ¶ Ko nga whakatupuranga enei o nga rangi, o te whenua i te hanganga ai, i te ra i hangā ai e Ihowa e te Atua te whenua me nga rangi.

⁵ O nga mea katoa ano hoki e tupu ana i te oneone i te mea kahore ano aua mea i te whenua, o nga otaota katoa ano hoki o te oneone i te mea kahore ano kia pihi noa: kahore nei hoki a Ihowa te Atua i mea noa kia ua ki runga ki te whenua, a kahore he tangata hei mahi i te oneone.

⁶ Engari i pupu ake he kohu i te whenua, a nana i whakamakuku te mata katoa o te oneone.

⁷ Na, ka whakaahuatia te tangata e Ihowa e te Atua, he puehu no te oneone, a whakahangia ana e ia ki roto ki ona pongaihu te manawa ora; a ka whakawairua ora te tangata.

⁸ ¶ Na, ka whakatokia e Ihowa e te Atua tetahi kari ki Erene ki te taha ki te rawhiti; a whakanohoia iho ki reira te tangata i hangā e ia.

⁹ A i whakatupuria ake ano e Ihowa e te Atua i roto i te oneone nga rakau katoa e ahuareka ana ki te titiro, e pai ana hoki hei kai, me te rakau ano o te ora i waenganui o te kari, raua ko te rakau o te matauranga ki te pai ki te kino.

¹⁰ A i rere mai ano he awa i Erene hei whakamakuku i te kari; a marara ake i reira e wha nga tino awa.

¹¹ Ko Pihona te ingoa o te tuatahi; tera hoki e taiawhio i te whenua katoa o Hawira, he koura hoki kei reira;

¹² A he pai te koura o taua whenua: kei reira te teriuma me te kohatu onika.

¹³ A te ingoa o te rua o nga awa ko Kihona: ko ia tera e taiawhio i te whenua katoa o Etiopia.

¹⁴ A te ingoa o te toru o nga awa ko Hirekere; tera hoki e rere whaka-te-rawhiti o Ahiria. A ko Uparati te wha o nga awa.

¹⁵ Na, ka tango a Ihowa te Atua i te tangata, a whakanohoia ana e ia ki te kari o Erene, hei ngaki, hei tiaki hoki i reira.

¹⁶ Na ka ako mai a Ihowa te Atua ki te tangata, ka mea, Kainga noatia nga hua o nga rakau katoa o te kari:

¹⁷ Ko te rakau ia o te matauranga ki [ 3 ]te pai ki te kino, kaua e kainga tetahi o ona hua; ta te mea hoki ko te ra e kai ai koe i tetahi o ona hua, ka mate koe, mate rawa.

¹⁸ ¶ Na, ka mea a Ihowa te Atua, E kore e pai kia noho te tangata ko ia anake; me hanga e ahau tetahi hoa pai mona.

¹⁹ Na, he mea whakaahua mai na Ihowa na te Atua i roto i te oneone nga kirehe katoa o te parae, me nga manu katoa o te rangi; a kawea mai ana e ia ki a Arama, kia kitea ai te ingoa e huaina e ia ki a ratou: a ko a Arama i hua ai ki nga mea ora katoa, hei ingoa ano era mo ratou.

²⁰ Na, ka huaina e Arama he ingoa mo nga kararehe katoa, mo nga manu hoki o te rangi, mo nga kirehe katoa hoki o te parae; ko Arama ia kahore i kitea tetahi hoa pai mona.

²¹ Na, ka mea a Ihowa te Atua kia au iho te moe o Arama, a moe ana ia: na, ka tango ia i tetahi o ona rara, a tutakina atu ana te kikokiko hei whakakapi mo reira;

²² Na, ka hanga a Ihowa te Atua i te rara i tangohia e ia i roto i a Arama hei wahine, a kawea mai ana e ia ki a Arama.

²³ A ka mea a Arama, Katahi ano ki tenei te wheua o roto o oku wheua, me te kikokiko o roto o oku kikokiko: me hua ia he Wahine, nona hoki i tangohia i roto i te Tangata.

²⁴ No konei, ka whakarerea e te tangata tona papa me tona whaea, a ka piri ki tana wahine: a hei kikokiko kotahi raua.

²⁵ A i te tu tahanga raua tokorua, te tangata me tana wahine, a kihai i whakama.

UPOKO 3.

NA, he mohio rawa te nakahi i nga kirehe katoa o te parae i hangā e Ihowa e te Atua. Na, ko tana meatanga mai ki te wahine, Koia, i mea mai ano te Atua, Kaua e kainga e korua nga hua o nga rakau katoa o te kari?

² A ka mea atu te wahine ki te nakahi, E kai ano maua i nga hua o nga rakau o te kari:

³ Ko nga hua ia o te rakau i waenganui o te kari, kua mea mai te Atua, kaua korua e kai i tetahi o ona hua, kaua ano hoki e pa atu ki reira, kei mate korua.

⁴ Na, ko te meatanga mai a te nakahi ki te wahine, E kore korua e mate rawa:

⁵ Erangi e mohio ana te Atua ko te ra e kai ai korua i tetahi o ona hua, katahi ka mārama o korua kanohi, a ka whakaatua korua, ka mohio ki te pai ki te kino.

⁶ A, te kitenga o te wahine e pai ana te rakau hei kai, he ahuareka hoki ki te titiro atu, he rakau ano hoki e minaminatia hei whakamohio, na ka tango ia i etahi o ona hua, a ka kai, ka hoatu hoki ki tona tahu; a kai ana ia.

⁷ Na, ka mārama o raua kanohi, a ka mohio raua e tu tahanga ana raua; na, ka tuia e raua etahi rau piki, a meatia ana hei rapaki mo raua.

⁸ A ka rongo raua i te reo o Ihowa o te Atua e haereere ana i te kari i te hauhautanga o te ra: a ka piri a Arama raua ko tana wahine i te aroaro o Ihowa o te Atua ki roto ki nga rakau o te kari.

⁹ Na, ka karanga mai a Ihowa te Atua ki a Arama, ka mea ki a ia, Kei hea koe?

¹⁰ A ka mea atu ia, I rongo ahau ki tou reo i te kari, a wehi ana ahau, noku i tu tahanga; na, piri ana ahau.

¹¹ Na, ka mea mai ia, Na wai i mea ki a koe e tu tahanga ana koe? Kua kainga ranei e koe etahi o nga hua o te rakau i kiia atu e ahau ki a koe, Kaua ona hua e kainga?

¹² Na, ka mea te tangata, Na te wahine i homai nei e koe hei hoa moku, nana i homai etahi o nga hua o te rakau ki a au, a kainga ana e ahau.

¹³ Na, ka mea mai a Ihowa te Atua ki te wahine, He aha tenei kua meatia nei e koe? A ka mea atu te wahine, Na te nakahi ahau i maminga, a kai ana ahau.

¹⁴ Na, ka mea a Ihowa te Atua ki te nakahi, Mo tenei mahi au, nui atu te kanga mou i o nga kararehe katoa, i o nga kirehe katoa o te parae; ko tou kopu hei haere mou, a ko te puehu hei kai mau i nga ra katoa e ora ai koe:

¹⁵ A ka whakatupuria e ahau he pakanga ma korua ko te wahine, ma tou uri ratou ko tona uri; ka maru tou mātenga i a ia, a ka maru i a koe tona rekereke.

¹⁶ Ka mea ia ki te wahine, Ka whakanuia rawatia e ahau tou mamae, me tou haputanga; ka mamae koe ina whanau tamariki; a ka hiahia koe ki tou tahu, ko ia ano hoki hei rangatira mou.

¹⁷ A, ka mea ia ki a Arama, Mo to rongonga ki te reo o to wahine, mo to kainga hoki i te hua o te rakau i kiia atu e ahau ki a koe, i meatia atu, Kaua e kainga etahi o ona hua: ka oti te oneone te kanga mo to mahi; kaka inga e [ 4 ]koe ona hua i roto i te mamae i nga ra katoa e ora ai koe;

¹⁸ He tataramoa ano hoki, he tumatakuru ana e whakatupu ake ai mau; a ka kai koe i te otaota o te parae;

¹⁹ Ma te werawera ano o tou mata e kai ai koe i te taro, a hoki noa koe ki te oneone; i tangohia mai nei hoki koe i reira: he puehu hoki koe, a ka hoki ano ki te puehu.

²⁰ ¶ A i huaina e Arama te ingoa o tana wahine ko Iwi; no te mea ko te whaea ia o nga mea ora katoa.

²¹ Na, ka hangā e Ihowa e te Atua etahi kakahu hiako mo Arama raua ko tana wahine, a whakakakahuria ana raua.

²² ¶ Na, ka mea a Ihowa te Atua, Nana, kua rite nei te tangata ki tetahi o tatou, te mohio ki te pai ki te kino: na, kei totoro atu tona ringa aianei, kei tango i etahi o nga hua o te rakau o te ora, kei kai, a ka ora tonu:

²³ Koia i tonoa atu ai ia e Ihowa e te Atua i te kari i Erene, hei ngaki i te oneone i tangohia mai nei ia i reira.

²⁴ Heoi, peia ana e ia te tangata; a whakanohoia ana ki te taha ki te rawhiti o te kari o Erene etahi kerupima, me tetahi hoari mura, he mea piupiu tonu ki tetahi taha ki tetahi taha, hei tiaki i te huarahi ki te rakau o te ora.

UPOKO 4.

NA ka mohio a Arama ki a Iwi ki tana wahine; a ka hapu ia, a ka whanau a Kaina; na, ka mea ia, Kua whakawhiwhia mai ahau e Ihowa ki tetahi tangata.

² Na, ka whanau ano tona teina a Apera. A he kai whangai hipi a Apera, ko Kaina ia he kai ngaki whenua.

³ A, i te mutunga o etahi rangi, na, ka kawea mai e Kaina etahi o nga hua o te whenua hei whakahere ki a Ihowa.

⁴ Me Apera hoki, i kawea mai ano e ia etahi o nga whanau matamua o tana kahui o o ratou ngako ano hoki. A ka aro mai a Ihowa ki a Apera me tana whakahere:

⁵ Kihai hoki i aro mai ki a Kaina me tana whakahere. A he nui rawa te riri a Kaina, a whakapoururu ana tona mata.

⁶ Na, ka mea mai a Ihowa ki a Kaina, Na te aha koe i riri ai? na te aha hoki i whakapoururu ai tou mata?

⁷ E kore ianei koe e kake ki te mahi koe i te pai? a ki te kahore koe e mahi i te pai, e takoto ana te hara i te kuwaha. Na, ka hiahia mai ia ki a koe, a ko koe hei rangatira mona.

⁸ Na, ka korero a Kaina ki a Apera ki tona teina: a i a raua i te parae, na, ka whakatika mai a Kaina ki a Apera ki tona teina, a patua iho.

⁹ ¶ Katahi ka mea mai a Ihowa ki a Kaina, Kei hea a Apera to teina? A ka mea atu ia, Kahore ahau e mohio: Ko ahau ianei te kai tiaki o toku teina?

¹⁰ Na, ka mea mai ia, He mahi aha tenei au? e tangi mai ana te reo o te toto o to teina ki a au i roto i te whenua.

¹¹ Na, ka kangā koe i runga i te whenua, i hamama nei tona waha hei rerenga atu mo te toto o tou teina i whakahekea nei e tou ringa;

¹² Ka ngakia e koe te oneone e kore e tukua mai tona kaha a muri ake nei ki a koe; ka waiho koe hei tangata haereere noa, hei manene i runga i te whenua.

¹³ Na, ka mea a Kaina ki a Ihowa, He nui toku kino, e kore e taea te muru.

¹⁴ Titiro hoki, ka peia nei ahau e koe inaianei i te mata o te whenua; a ka ngaro atu i tou kanohi; ka waiho ano hoki hei tangata haereere noa, hei manene i runga i te whenua; a tenei ake ki te tutaki tetahi tangata ki a au, na, ka patua ahau e ia.

¹⁵ Na, ka mea a Ihowa ki a ia, Na, ki te patu tetahi i a Kaina, e whitu nga utu e rapua i a ia. Na, ka homai e Ihowa he tohu ki a Kaina, kei patua ia e tetahi tangata ina tutaki ki a ia.

¹⁶ ¶ Na, ka haere atu a Kaina i te aroaro o Ihowa, a noho ana i te whenua o Noro, i te taha ki te rawhiti o Erene.

¹⁷ Na, ka mohio a Kaina ki tana wahine; a ka hapu ia, a ka whanau a Enoka: na, ka hanga ia i tetahi pa, a huaina iho te ingoa o te pa ko Enoka, ko te ingoa o tana tamaiti.

¹⁸ A whanau ake ta Enoka tama ko Irara: a whanau ake ta Irara ko Mehutaere: a whanau ake ta Mehutaere ko Metuhaere: a whanau ake ta Metuhaere ko Rameka.

¹⁹ Na, ka tangohia e Rameka etahi wahine tokorua mana: ko Araha te ingoa o tetahi, ko Tira hoki te ingoa o tetahi.

²⁰ Na, ka whanau ta Araha tamaiti ko Iapara: ko te matua ia o te hunga noho teneti, ratou ko nga tangata whangai kararehe.

²¹ A ko Iupara te ingoa o tona teina: ko ia te matua o nga mea rahurahu ki te hāpa ki te okana.

²² Me Tira ano hoki, whanau ake tana ko Tupara-kaina, he kai whakaako ia no [ 5 ]nga kai mahi i te parahi, i te rino: a ko Naama te tuahine o Tupara-kaina.

²³ Na, ka mea a Rameka ki ana wahine, ki a Araha raua ko Tira, Whakarongo mai ki toku reo; e nga wahine a Rameka, kia whai taringa mai ki taku kupu: kua patua hoki he tangata e ahau moku i motu, he taitamariki hoki mo toku mamae.

²⁴ Na, mo Kaina e whitu nga utu, ina, ka whitu tekau ma whitu mo Rameka.

²⁵ ¶ A i mohio ano a Arama ki tana wahine; a ka whanau tana tamaiti, a huaina iho tona ingoa ko Heta; i mea hoki ia, Ka rite mai nei i te Atua tetahi atu uri moku hei whakakapi mo Apera i patua nei e Kaina.

²⁶ Me Heta ano hoki, i whanau tana tamaiti; a huaina ana tona ingoa ko Enoha: no reira i timata ai te tangata te karanga atu ki te ingoa o Ihowa.

UPOKO 5.

KO te pukapuka tenei o nga whakatupuranga o Arama. I te ra i hangā ai te tangata e te Atua, i hangā ia e ia kia rite ki te Atua;

² I hangā raua he tane he wahine; a i manaakitia raua e ia, i huaina hoki to raua ingoa ko Arama, i te ra i hangā ai raua.

³ ¶ A ka kotahi rau ka toru tekau nga tau i ora ai a Arama, na ka whanau tana tamaiti, nona te ahua, rite tonu ki a ia; a huaina ana tona ingoa ko Heta:

⁴ A e waru rau tau nga ra o Arama i muri iho i te whanautanga o Heta: a ka whanau he tamariki he tamahine mana:

⁵ A e iwa rau e toru tekau tau nga ra katoa i ora ai a Arama: a ka mate.

⁶ A kotahi rau e rima nga tau i ora ai a Heta, a ka whanau tana tamaiti a Enoha:

⁷ A e waru rau e whitu nga tau i ora ai a Heta i muri iho i te whanautanga o tana tamaiti o Enoha, a ka whanau he tamariki he tamahine mana:

⁸ A e iwa rau kotahi tekau ma rua tau nga ra katoa o Heta: a ka mate.

⁹ ¶ A ka iwa tekau nga tau i ora ai a Enoha: na, ka whanau tana tamaiti a Kainana:

¹⁰ A e waru rau kotahi tekau ma rima nga tau i ora ai a Enoha i muri iho i te whanautanga o tana tamaiti o Kainana, a ka whanau he tamariki he tamahine mana:

¹¹ A e iwa rau ma rima tau nga ra katoa o Enoha: a ka mate.

¹² ¶ A ka whitu tekau nga tau i ora ai a Kainana, ka whanau tana tamaiti a Maharareere:

¹³ A e waru rau e wha tekau nga tau i ora ai a Kainana i muri iho i te whanautanga o tana tamaiti o Maharareere, a ka whanau he tamariki he tamahine mana:

¹⁴ A e iwa rau kotahi tekau tau nga ra katoa o Kainana: a ka mate.

¹⁵ ¶ A ka ono tekau ma rima nga tau i ora ai a Maharareere, na, ka whanau tana tamaiti a Iarere:

¹⁶ A e waru rau e toru tekau nga tau i ora ai a Maharareere i muri iho i te whanautanga o tana tamaiti o Iarere, a ka whanau he tamariki he tamahine mana:

¹⁷ A e waru rau e iwa tekau ma rima tau nga ra katoa o Maharareere: na, ka mate.

¹⁸ ¶ A kotahi rau e ono tekau ma rua nga tau i ora ai a Iarere, a ka whanau tana tamaiti a Enoka:

¹⁹ A e waru rau nga tau i ora ai a Iarere i muri iho i te whanautanga o tana tamaiti o Enoka, a ka whanau he tamariki he tamahine mana:

²⁰ A e iwa rau e ono tekau ma rua tau nga ra katoa o Iarere: na, ka mate.

²¹ ¶ A e ono tekau ma rima nga tau i ora ai a Enoka, na, ka whanau tana tamaiti a Metuhera:

²² A e toru rau nga tau i haereere tahi ai a Enoka i te Atua i muri iho i te whanautanga o tana tamaiti o Metuhera, a ka whanau he tamariki he tamahine mana:

²³ A e toru rau e ono tekau ma rima tau nga ra katoa o Enoka:

²⁴ A i haereere tahi ano a Enoka i te Atua: a kua kahore ia; na te Atua hoki ia i tango.

²⁵ A kotahi rau e waru tekau ma whitu nga tau i ora ai a Metuhera, a ka whanau tana tamaiti a Rameka:

²⁶ A e whitu rau e waru tekau ma rua nga tau i ora ai a Metuhera i muri iho i te whanautanga o tana tamaiti o Rameka, a ka whanau he tamariki he tamahine mana:

²⁷ A e iwa rau e ono tekau ma iwa tau nga ra katoa o Metuhera: na, ka mate.

²⁸ ¶ A kotahi rau e waru tekau ma rua nga tau i ora ai a Rameka, a ka whanau tana tamaiti.

²⁹ A huaina ana e ia tona ingoa ko Noa; i mea hoki ia, Ma tenei e ora ai o tatou ngakau i a tatou e mamahi nei, i o [ 6 ]tatou ringa hoki e ruha nei, i te oneone kua oti nei te kanga e Ihowa.

³⁰ A e rima rau e iwa tekau ma rima nga tau i ora ai a Rameka i muri iho i te whanautanga o tana tamaiti o Noa, a ka whanau he tamariki he tamahine mana:

³¹ A e whitu rau e whitu tekau ma whitu tau nga ra katoa o Rameka: a ka mate.

³² A ka rima rau nga tau o Noa: na, ka whanau nga tamariki a Noa, ko Hema, ko Hama, ko Iapeta.

UPOKO 6.

A KA timata te tangata te tini haere ki runga ki te mata o te whenua, a ka whanau a ratou tamahine.

² Na, te kitenga o nga tamariki a te Atua i nga tamahine a te tangata, e ataahua ana; ka tango i a ratou i pai ai o ratou katoa, hei wahine ma ratou.

³ Na, ka mea a Ihowa, E kore toku wairua e whakawa tonu i te tangata, he kikokiko nei hoki ia: na, kia kotahi rau kia rua tekau tau ona ra.

⁴ Na, he roroa nga tangata o te whenua i aua ra, i muri iho ano hoki, i te haerenga o nga tamariki a te Atua ki nga tamahine a te tangata, a ka whanau a ratou tamariki; ko ratou nga tangata marohirohi o mua, nga mea whai ingoa hoki.

⁵ ¶ A, te kitenga o te Atua kua nui te kino o te tangata i runga i te whenua, a he kino kau i nga ra katoa nga tokonga katoatanga ake o nga whakaaro a tona ngakau,

⁶ Na, ka puta ke te whakaaro a Ihowa i hangā ai e ia te tangata ki runga ki te whenua, a ka pouri a roto o tona ngakau.

⁷ Na, ka mea a Ihowa, Ka whakangaromia atu e ahau i te mata o te whenua te tangata i hangā e ahau; te tangata, te kirehe, te mea ngoki, me nga manu o te rangi; kua puta ke hoki taku whakaaro i hangā ai ratou.

⁸ Ko Noa ia, i manakohia mai e Ihowa.

⁹ ¶ Ko nga whakatupuranga enei o Noa: he tangata tika a Noa, he whakaaro tapatahi i ona whakatupuranga, a i haereere tahi a Noa i te Atua.

¹⁰ A whanau ake nga tamariki a Noa, tokotoru, ko Hema, ko Hama, ko Iapeta.

¹¹ A ki ta Ihowa titiro kua he te whenua, kua ki hoki te whenua i te tutu.

¹² A ka titiro mai te Atua ki te whenua, na, kua he; i he hoki te ara o nga kikokiko katoa o runga o te whenua.

¹³ Na, ka mea te Atua ki a Noa, Kua tae mai te mutunga o nga kikokiko katoa ki toku aroaro; no te mea e ki ana te whenua i te tutu i a ratou; na, ka whakangaro tenei ahau i a ratou tahi ko te whenua.

¹⁴ ¶ Hangā tetahi aaka mau, ki te kopera he rakau; me hanga e koe etahi ruma ki roto i te aaka, ka pani ai i roto i waho ki te ware.

¹⁵ A kia penei to hanganga i taua mea: Kia toru rau whatianga te roa o te aaka, kia rima tekau whatianga tona whanui, kia toru tekau whatianga tona teitei.

¹⁶ Me hanga e koe he matapihi mo te aaka, kia kotahi ano hoki te whatianga e whakaotia ai e koe a runga; a me whakanoho te tatau o te aaka ki tona taha; me hanga e koe to raro papanga ruma, te tuarua, me te tuatoru.

¹⁷ Ko au hoki, tenei ahau te tuku atu nei i te waipuke ki runga ki te whenua, hei whakangaro i nga kikokiko katoa e whai manawa ora ana i raro i te rangi; a ka mate nga mea katoa i runga i te whenua.

¹⁸ Otiia ka whakamanā ano e ahau taku kawenata ki a koe; a me haere koe ki roto ki te aaka, koutou tahi ko au tama, ko to wahine, ko nga wahine ano hoki a o tama.

¹⁹ Me etahi ano hoki o nga mea ora katoa o nga kikokiko katoa, kia rua o ia ahua o ia ahua e kawea o koe ki roto ki te aaka, kia ora tahi ai me koe; hei te tane hei te uha.

²⁰ Etahi o nga manu o ia ahua o ia ahua, o nga kararehe ano hoki o ia ahua o ia ahua, o nga mea ngokingoki katoa o te whenua o ia ahua o ia ahua, kia takirua o te katoa e haere mai ki a koe, kia ora ai.

²¹ Tangohia mai ano hoki mau etahi o nga kai katoa e kainga ana, me amene mai hoki ki a koe; a hei kai tena mau, ma ratou hoki.

²² Na, ka meatia e Noa; rite tonu ki nga mea katoa i whakahaua mai e te Atua ki a ia tana i mea ai.

UPOKO 7.

NA, ka mea mai a Ihowa ki a Noa, Haere mai koutou ko tou whare katoa ki roto ki te aaka; kua kite hoki ahau i a koe e tika ana ki taku aroaro i tenei whakatupuranga.

[ 7 ]² Tangohia mai e koe etahi o nga kirehe pokekore, kia takiwhitu, te toa raua ko tana uha: me nga kararehe poke hoki, kia takirua, te toa raua ko tana uha.

³ Me nga manu ano hoki o te rangi, kia takiwhitu, te toa raua ko te uha; kia ora ai he uri ki runga ki te mata o te whenua katoa.

⁴ Ta te mea hoki kia whitu ake nga ra ka whakauaina e ahau te ua ki runga ki te whenua, a kia wha tekau nga ra, kia wha tekau nga po; a ka whakangaromia atu e ahau i runga i te mata o te whenua nga mea ora katoa i hangā e ahau.

⁵ A rite tonu ta Noa i mea ai ki nga mea katoa i whakahaua mai e Ihowa ki a ia.

⁶ A e ono rau nga tau o Noa i te putanga mai o te waipuke ki runga ki te whenua.

⁷ ¶ Na, ka haere a Noa ratou tahi ko ana tama ko tana wahine, me nga wahine a ana tama, ki roto ki te aaka, i te wehi i nga wai o te waipuke.

⁸ Me etahi o nga kirehe ma, o nga kirehe hoki kahore i ma, o nga manu hoki, o nga mea katoa ano hoki i ngokingoki i runga i te whenua;

⁹ I haere takirua ratou ki roto ki te aaka ki a Noa, te toa raua ko te uha, i pera tonu me ta te Atua i whakahau ai ki a Noa.

¹⁰ A ka whitu nga ra, na, ka puta mai nga wai o te waipuke ki runga ki te whenua.

¹¹ ¶ No te ono rau o nga tau o te oranga o Noa, no te rua o nga marama, no te tekau ma whitu o nga ra o te marama, no taua rangi ano i pakaru mai ai nga matapuna katoa o te rire nui, a ka whakatuwheratia nga matapihi o te rangi.

¹² A e wha tekau nga ra e wha tekau nga po i ua ai te ua ki runga ki te whenua.

¹³ No taua tino rangi ano i haere ai a Noa, ratou ko Hema, ko Hama, ko Iapeta, nga tama a Noa, ratou tahi ko te wahine a Noa, ko nga wahine tokotoru ano hoki a ana tama, ki roto ki te aaka;

¹⁴ Ratou ko nga kirehe mohoao katoa, o ia ahua o ia ahua, me nga kararehe katoa, o ia ahua o ia ahua, me nga mea ngoki katoa e ngokingoki nei i runga i te whenua, o ia ahua o ia ahua, me nga manu katoa, o ia ahua o ia ahua, me nga mea whai parirau katoa, o ia ahua o ia ahua.

¹⁵ Na, ka haere atu ki roto ki te aaka ki a Noa, tātakirua o nga kikokiko katoa, o nga mea whai wairua ora.

¹⁶ A i haere atu nga mea i haere ko te tane ko te wahine o nga kikokiko katoa, he pera tonu me ta te Atua i whakahau ai ki a ia: a tutakina atu ana ia e Ihowa ki roto.

¹⁷ A e wha tekau nga ra o te waipuke ki runga ki te whenua; a ka nui haere nga wai, a whakamanuria ake ana te aaka, a ka maiangi ake ki runga i te whenua.

¹⁸ Na, ka kaha nga wai, a ka tino nui haere ki runga ki te whenua; a ka tere te aaka i runga i te kare o nga wai.

¹⁹ Na, kua tino kaha rawa nga wai ki runga ki te whenua; a ka taupokina nga maunga teitei katoa i raro iho i te rangi, puta noa puta noa.

²⁰ Kotahi tekau ma rima nga whatianga i pari ake ai nga wai; a taupokina ana nga maunga.

²¹ Na, ka mate nga kikokiko katoa i korikori i runga i te whenua; te manu, te kararehe, te kirehe, nga mea ngoki katoa hoki i ngokingoki i runga i te whenua, me nga tangata katoa ano hoki:

²² I mate katoa nga mea kei roto nei i o ratou pongaihu te manawa ora, nga mea hoki i te tuawhenua.

²³ A ngaro iho nga mea ora katoa i runga i te mata o te whenua, te tangata, te kararehe, nga mea ngokingoki, me te manu o te rangi; i whakangaromia atu ratou i runga i te whenua: a toe ake ko Noa anake, me nga mea i a ia i roto i te aaka.

²⁴ A kotahi rau e rima tekau nga ra i huri ai nga wai ki runga ki te whenua.

UPOKO 8.

A KA mahara te Atua ki a Noa, ki nga mea ora katoa hoki, me nga kararehe katoa ano hoki i a ia i roto i te aaka: na, ka mea te Atua kia tika atu tetahi hau i runga i te whenua, a ka hoki iho nga wai.

² A ka tutakina atu nga matapuna o te rire, me nga matapihi o te rangi, whakamutua ano hoki te ua o te rangi;

³ Na, ka hoki haere nga wai i runga i te whenua: a i te mutunga o nga ra kotahi rau e rima tekau kua iti iho nga wai.

⁴ A i tau iho te aaka i te whitu o nga marama, i te tahi tekau ma whitu o nga ra o te marama, ki runga ki nga maunga o Ararata. [ 8 ]⁵ A i iti haere ano nga wai, a taea noatia te tekau o nga marama: no te tekau o nga marama, no te ra tuatahi o te marama, i kitea ai nga tihi o nga maunga.

⁶ ¶ A i te mutunga o nga ra e wha tekau, na, ka wahia e Noa te matapihi o te aaka i hangā e ia:

⁷ A, ka tukua atu e ia he raweni, a, tona rerenga atu, na ka kopiko atu ka kopiko mai, a maroke noa nga wai i runga i te whenua.

⁸ Na, ka tukua atu ano e ia he kukupa, kia kitea ai kua iti iho ranei nga wai i runga i te mata o te whenua;

⁹ A kihai i kitea e te kukupa tetahi taunga iho mo te takahanga o tona waewae, a ka hoki mai ki a ia ki roto ki te aaka: I runga hoki nga wai i te mata o te whenua katoa: na, ka totoro atu tona ringaringa, a hopukia ana, tangohia mai ana ki a ia ki roto ki te aaka.

¹⁰ Na, ka tatari ano ia, a e whitu atu nga ra; a ka tukua atu ano e ia te kukupa i roto i te aaka;

¹¹ A ka rere mai te kukupa ki a ia i te ahiahi; na, ko tetahi rau oriwa kei roto i tona waha, he mea korari mai; a ka mohio a Noa kua iti iho nga wai i runga i te whenua.

¹² A ka tatari ano ia, a e whitu atu nga ra; a tukua atu ana e ia te kukupa, a kihai tena i hoki mai ano ki a ia i muri iho.

¹³ ¶ A no te ono rau ma tahi o nga tau, no te marama tuatahi, no te tuatahi o te marama, i maroke atu ai nga wai i runga i te whenua: na, ka hurahia atu e Noa te hipoki o te aaka, a ka kite, na, kua maroke te mata o te whenua.

¹⁴ A no te rua o nga marama, no te rua tekau ma whitu o nga ra o te marama, i maroke ai te whenua.

¹⁵ ¶ Na, ka korero mai te Atua ki a Noa, ka mea,

¹⁶ Puta mai koe i roto i te aaka, koutou tahi ko to wahine, ko o tama, me nga wahine a o tama.

¹⁷ Kia puta tahi mai me koe nga mea ora katoa i a koe na, nga kikokiko katoa, nga manu, nga kararehe, me nga mea ngoki katoa e ngokingoki ana i runga i te whenua; a kia whakatuputupu ratou ki runga ki te whenua, kia hua, kia tini ki runga ki te whenua.

¹⁸ Na, ka puta mai a Noa, ratou tahi ko ana tamariki, ko tana wahine, me nga wahine a ana tamariki:

¹⁹ I puta mai i roto i te aaka nga kirehe katoa, nga mea ngokingoki katoa, nga manu katoa, me nga mea ngoki katoa i runga i te whenua o ia ahua o ia ahua.

²⁰ ¶ Na, ka hanga a Noa i tetahi aata ma Ihowa, a ka tango i etahi o nga kararehe ma katoa, o nga manu ma katoa hoki, a whakaekea tinanatia ana e ia ki runga ki te aata.

²¹ Na, ka hongi mai a Ihowa ki te kakara reka; a ka mea a Ihowa i roto i tona ngakau, E kore ahau e kanga ano i te oneone a muri ake nei mo nga mahi a te tangata; otiia he kino nga tokonga ake o te ngakau o te tangata, o tona taitamarikitanga ake ano; e kore ano hoki ahau e patu i nga mea ora katoa a muri ake nei, e penei me tenei meatanga aku.

²² E kore e whakamutua i nga ra katoa o te whenua te po rui me te po kokoti, te maeke me te mahana, te raumati me te hotoke, te ao me te po.

UPOKO 9.

NA, ka manaakitia a Noa ratou ko ana tamariki e te Atua, a ka mea ia ki a ratou, Kia hua, kia tini koutou, kia kapi ano hoki te whenua i a koutou.

² Kia wehi ano hoki i a koutou, kia matakana i a koutou nga kirehe katoa o te whenua, nga manu katoa o te rangi, nga mea katoa e korikori ana i runga i te whenua, me nga ika katoa hoki o te moana; kua hoatu ena mea ki to koutou ringa.

³ Hei kai ano ma koutou nga mea korikori katoa, nga mea ora; rite tonu ki to nga otaota matomato taku hoatutanga i nga mea katoa ki a koutou.

⁴ Otiia, kaua e kainga te kikokiko me tona oranga, ara, me ona toto.

⁵ Ka rapua hoki e ahau he utu mo o koutou toto e ora nei koutou; ka rapua e ahau he utu i nga kirehe katoa, i te tangata ano hoki; ka rapua e ahau he utu mo te matenga o te tangata i te teina o ia tangata o ia tangata.

⁶ E whakaheke tetahi i nga toto o te tangata, ma te tangata ano ona toto e whakaheke: no te mea no te Atua te ahua i hangā ai e ia te tangata.

⁷ Ko koutou hoki, kia hua, kia tini; kia nui to koutou uri ki runga ki te whenua, kia tini hoki ki reira.

⁸ ¶ A i korero mai ano te Atua ki a Noa, ratou tahi ko ana tamariki, i mea,

⁹ Ko au nei, nana, ka whakapumau ahau i taku kawenata ki a koutou ko to koutou uri i muri i a koutou;

¹⁰ Ki nga mea ora katoa hoki i a koutou, ki te manu, ki te kararehe, ki nga [ 9 ]kirehe katoa hoki o te whenua e noho ana i a koutou; ki nga mea katoa, i puta mai i roto i te aaka, a puta noa atu ki nga kirehe katoa o te whenua.

¹¹ Ka whakapumautia ano e ahau taku kawenata ki a koutou; e kore ano hoki e hatepea atu nga kikokiko katoa a muri ake nei e nga wai o te waipuke; e kore ano e puta mai he waipuke a muri ake nei hei whakangaro mo te whenua.

¹² A i mea ano te Atua, Ko te tohu tenei o te kawenata e whakatakotoria nei e ahau ki te takiwa oku o koutou ko nga wairua ora katoa i a koutou, a, tera whakatupuranga tera whakatupuranga:

¹³ Ka whakatakotoria e ahau taku kopere ki te kapua, a ka waiho hei tohu mo te kawenata i te takiwa oku o te whenua.

¹⁴ A tenei ake, i te wa e whakaputa mai ai ahau i te kapua ki runga ki te whenua, na, ka kitea te kopere i te kapua:

¹⁵ A ka mahara ahau ki taku kawenata i te takiwa oku o koutou ko nga mea ora katoa, ara, o nga kikokiko katoa; a e kore nga wai e puke a muri ake nei hei whakangaro i nga kikokiko katoa.

¹⁶ A ka piri te kopere ki te kapua; a ka titiro atu ahau ki taua mea, kia mahara ai ahau ki te kawenata e mau tonu ana i te takiwa o te Atua o nga wairua ora katoa, ara, o nga kikokiko katoa i runga i te whenua.

¹⁷ Na, ka mea te Atua ki a Noa, Ko te tohu tenei o te kawenata e whakapumautia nei e ahau ki te takiwa oku o nga kikokiko katoa i runga i te whenua.

¹⁸ A, nga tamariki a Noa, i puta mai nei i roto i te aaka, ko Hema, ko Hama, ko Iapeta: a ko Hama te matua o Kanaana.

¹⁹ Ko nga tamariki tokotoru enei a Noa: a na enei i kapi ai te whenua katoa.

²⁰ Na, ka timata a Noa te ngaki whenua, a whakatongia ana e ia he mara waina:

²¹ A ka inumia e ia te waina, a ka haurangi; na, ka takoto tahanga i roto i tona teneti.

²² A, te kitenga o Hama, o te matua o Kanaana, i tona matua e takoto tahanga ana, na, ka korerotia e ia ki ona tuakana tokorua i waho.

²³ Na, ka tango a Hema raua ko Iapeta i tetahi kakahu, a makā iho ana e raua ki runga ki o raua pokohiwi, na, ka haere tuara atu raua, a hipokina ana te wahi i takoto kau o to raua papa; me te ahu mai ano o raua kanohi ki muri, a kihai raua i kite i te wahi takoto kau o to raua papa.

²⁴ A ka maranga ake a Noa i tana waina, a ka mohio ki ta tana tamaiti o muri mea ai ki a ia;

²⁵ Na, ka mea ia, Ka kangā a Kanaana, ka waiho ia hei tino pononga ma ona tuakana.

²⁶ A i mea ano ia, Kia whakapaingia a Ihowa te Atua o Hema; a ka waiho a Kanaana hei pononga mana.

²⁷ Ka meinga a Iapeta e te Atua kia tohatoha noa atu, ka noho ano hoki ia ki nga teneti o Hema; a hei pononga a Kanaana mana.

²⁸ ¶ A e toru rau e rima tekau nga tau i ora ai a Noa i muri iho i te waipuke.

²⁹ A e iwa rau e rima tekau tau nga ra katoa o Noa: na, ka mate.

UPOKO 10.

Na ko nga whakatupuranga enei o nga tamariki a Noa, o Hema, o Hama, o Iapeta: i whanau hoki he tamariki ma ratou i muri iho i te waipuke.

² Nga tamariki a Iapeta; ko Komere, ko Makoka, ko Marai, ko Iawana, ko Tupara, ko Meheke, ko Tiraha.

³ A nga tamariki a Komere; ko Ahekenata, ko Ripata, ko Tokarama.

⁴ A nga tamariki a Iawana; ko Erihaha, ko Tarahihi, ko Kitimi, ko Totanimi.

⁵ Na enei nga motu e nohoia nei e nga tauiwi i wehe; puta noa i o ratou whenua, tera reo tera reo o ratou, tera toronga tera toronga o ratou, i o ratou iwi hoki.

⁶ ¶ Nga tamariki hoki a Hama; ko Kuhu, ko Mitiraima, ko Putu, ko Kanaana.

⁷ A nga tamariki a Kuhu; ko Tepa, ko Hawira, ko Hapata, ko Raama, ko Hapateka: a nga tamariki a Raama; ko Hepa, ko Rerana.

⁸ A whanau ake ta Kuhu ko Nimirota: i timata ia te whakatangata nui ki runga ki te whenua.

⁹ He maia ia i te aroaro o Ihowa ki te whai kirehe mohoao: no reira te kupu nei, He pera me Nimirota te maia i te aroaro o Ihowa ki te whai kirehe mohoao.

¹⁰ A i Papera te timatanga o tona ki ngitanga, i Ereke, i Akara, i Karane, i te whenua o Hinara,

¹¹ I haere atu a Ahura i taua [ 10 ]whenua, a hangā ana e ia a Ninewe, me te pa me Rehopoto, me Kara,

¹² Me Rehena hoki, i te takiwa o Ninewe o Kara: he pa nui ia.

¹³ A whanau ake a Mitiraima ko nga Rurimi, ko nga Anamime, ko nga Rehapimi, ko nga Napatuhimi,

¹⁴ Ko nga Pataruhimi, ko nga Kaheruhimi, (i puta mai hoki i a ratou nga Pirihitimi,) ko nga Kapatorimi.

¹⁵ ¶ A whanau ake ta Kanaana ko Hairona, ko tana matamua, raua ko Hete,

¹⁶ Me te Iepuhi, me te Amori, me te Kirikahi,

¹⁷ Me te Hiwi, me te Araki, me te Hini,

¹⁸ Me te Aarawari, me te Temari, me te Hamati: a muri iho ka marara noa atu nga hapu o nga Kanaani.

¹⁹ A i Hairona te rohe ki nga Kanaani, kei tou haerenga mai whaka-Kerara, ki Kaha; kei tou haerenga ki Horoma, ki Komora, ki Arema, ki Tepoimi, a tae noa ki Raha.

²⁰ Ko nga tamariki enei a Hama, tera toronga tera toronga o ratou, tera reo tera reo o ratou, me o ratou whenua, me o ratou iwi.

²¹ ¶ Me Hema ano hoki, te papa o nga tamariki katoa a Epere, te teina o Iapeta kaumatua, i whanau ano hoki ana tamariki.

²² Nga tamariki a Hema; ko Erama, ko Ahura, ko Arapahata, ko Ruru, ko Arame.

²³ A nga tamariki a Arame; ko Uhu, ko Huru, ko Ketera, ko Maha.

²⁴ A whanau ake ta Arapahata ko Haraha, a whanau ake ta Haraha ko Epere.

²⁵ A whanau ake a Epere, tokorua nga tamariki: te ingoa o tetahi ko Pereke; no te mea hoki no ona ra i wehea ai te whenua; a ko Ioketana te ingoa o tona teina.

²⁶ A whanau ake a Ioketana ko Aramotata, ko Herepe, ko Hataramaweta, ko Ieraha,

²⁷ Ko Hatorama, ko Utara, ko Tikera,

²⁸ Ko Opara, ko Apimaera, ko Hepa,

²⁹ Ko Opira, ko Hawira, ko Iopapa: he tamariki katoa enei na Ioketana.

³⁰ A kei Meha to ratou nohoanga, a tae noa koe ki Hepara; he maunga ia kei te taha ki te rawhiti.

³¹ Ko nga tamariki enei a Hema, tona hapu tona hapu, tona reo tona reo, o ratou kāinga, me o ratou iwi.

³² Ko nga toronga enei o nga tamariki a Noa, me a ratou whakatupuranga, me o ratou iwi: a i wehea mai i enei nga iwi o te whenua i muri iho i te waipuke.

UPOKO 11.

A KOTAHI ano te reo o te whenua katoa, rite tonu ano hoki nga korero.

² A i a ratou e haere mai ana i te taha ki te rawhiti, na, ka kite ratou i tetahi mania i te whenua o Hinara; a noho ana i reira.

³ Na, ka mea ratou ki tona hoa ki tona hoa, Tena, tatou ka hanga pereki, me ata tahu marire ano hoki. Na, ka meinga e ratou nga pereki hei kohatu, me te uku ano hoki hei moata ma ratou.

⁴ Na, ka mea ratou, Tena, tatou ka hanga i tetahi pa, me tetahi pourewa, a kia tutuki a runga ki te rangi; kia whai ingoa ai tatou, kei marara atu tatou ki te mata o te whenua katoa.

⁵ Na, ka heke iho a Ihowa kia kite i te pa, me te pourewa, i hangā nei e nga tamariki a te tangata.

⁶ A ka mea a Ihowa, Nana, kotahi ano te iwi nei, kotahi ano hoki to ratou reo; a ka timataia nei tenei mahi e ratou: a e kore ratou e taea te pehi, ki te whakaaro ratou kia mahia tetahi mea.

⁷ Tena, kia heke atu tatou, kia whakapoauau hoki i o ratou reo i reira, kei rongo ia tangata ia tangata ki te reo o tona hoa.

⁸ Na, whakamararatia atu ana ratou i reira e Ihowa ki runga ki te mata o te whenua katoa: a mahue ake i a ratou te hanga i te pa.

⁹ Na kona i huaina ai to reira ingoa ko Papera; no te mea i whakapoauautia e Ihowa i reira te reo o te whenua katoa: no reira ano hoki te whakamararatanga a Ihowa i a ratou ki te mata o te whenua katoa.

¹⁰ ¶ Ko nga whakatupuranga enei o Hema: ka kotahi rau nga tau o Hema, na, ka whanau a Arapahata i te rua o nga tau i muri iho i te waipuke:

¹¹ A e rima rau nga tau i ora ai a Hema i muri iho i te whanautanga o tana tamaiti o Arapahata, a ka whanau ana tamariki me ana tamahine.

¹² A ka toru tekau ma rima nga tau i ora ai a Arapahata, na, ka whanau a Haraha:

¹³ A e wha rau e toru nga tau i ora ai a Arapahata i muri iho i te whanautanga o tana tamaiti o Haraha, a ka whanau ana tamariki me ana tamahine.

¹⁴ A ka toru tekau nga tau i ora ai a Haraha, na, ka whanau a Epere:

¹⁵ A e wha rau e toru nga tau i ora ai a Haraha i muri iho i te whanautanga o tana tamaiti o Epere, a ka whanau ana tamariki me ana tamahine.

¹⁶ A ka toru tekau ma wha nga tau i ora ai a Epere, na, ka whanau a Pereke:

¹⁷ A e wha rau e toru tekau nga tau i ora ai a Epere i muri iho i te whanautanga o tana tamaiti o Pereke, a ka whanau ana tamariki me ana tamahine.

¹⁸ A ka toru tekau nga tau i ora ai a Pereke, na ka whanau a Reu:

¹⁹ A e rua rau e iwa nga tau i ora ai a Pereke i muri iho i te whanautanga o tana tamaiti o Reu, a ka whanau ana tamariki me ana tamahine.

²⁰ A ka toru tekau ma rua nga tau o Reu, na ka whanau a Heruka:

²¹ A e rua rau ma whitu nga tau i ora ai a Reu i muri iho i te whanautanga o tana tamaiti o Heruka, a ka whanau ana tamariki me ana tamahine.

²² A ka toru tekau nga tau o Heruka, na ka whanau tana tamaiti a Nahora:

²³ A e rua rau nga tau i ora ai a Heruka i muri iho i te whanautanga o tana tamaiti a Nahora, a ka whanau ana tamariki me ana tamahine.

²⁴ A e rua tekau ma iwa nga tau i ora ai a Nahora, a ka whanau tana tamaiti a Teraha:

²⁵ A kotahi rau kotahi tekau ma iwa nga tau i ora ai a Nahora i muri iho i te whanautanga o tana tamaiti a Teraha, a ka whanau ana tamariki me ana tamahine.

²⁶ A ka whitu tekau nga tau i ora ai a Teraha, na, ka whanau ana tamariki a Aperama, a Nahora, ratou ko Harana.

²⁷ Na, ko nga whakatupuranga enei o Teraha: whanau ake a Teraha ko Aperama, ko Nahora, ratou ko Harana; a whanau ake ta Harana ko Rota.

²⁸ A i mate a Harana i te oranga ano o tona papa o Teraha i te whenua i whanau ai ia, i Uru o nga Karari.

²⁹ Na, ka tango a Aperama raua ko Nahora i etahi wahine ma raua: te ingoa o te wahine a Aperama ko Harai, a te ingoa o te wahine a Nahora ko Mireka, ko te tamahine ia a Harana, a te papa o Mireka, ko ia ano hoki te papa o Iheka.

³⁰ A he pakoko ano a Harai; kahore ana tamariki.

³¹ Na, ka tango a Teraha i a Aperama i tana tamaiti, raua ko Rota ko te tamaiti a Harana, ko te tamaiti a tana tama, ratou ko tana hunaonga ko Harai wahine a tana tamaiti a Aperama; whakatika tahi atu ana ratou i Uru o nga Karari, haere ana ki te whenua o Kanaana; na, ka tae mai ratou ki Harana, a noho ana i reira.

³² A e rua rau ma rima tau nga ra o Teraha: na, ka mate a Teraha ki Harana.

UPOKO 12.

Na kua ki noa ake a Ihowa ki a Aperama, Haere atu koe i tou whenua, i roto ano hoki i ou whanaunga, i te whare ano hoki o tou papa, ki te whenua e whakaaturia e ahau ki a koe:

² A ka meinga koe e ahau hei iwi nui, ka manaakitia ano koe e ahau, ka whakanuia ano hoki tou ingoa; a ka waiho koe hei manaakitanga:

³ A ka manaaki ahau i te hunga e manaaki ana i a koe, ka kanga hoki i te tangata e kanga ana i a koe: a mau ka manaakitia ai nga hapu katoa o te whenua.

⁴ Na, ka haere a Aperama, ka pera me ta Ihowa i korero ai ki a ia; a i haere tahi ano a Rota i a ia; a e whitu tekau ma rima nga tau o Aperama i tona hekenga mai i Harana.

⁵ Na, ka tango a Aperama i a Harai i tana wahine, raua ko Rota ko te tamaiti a tona teina, me o ratou rawa katoa i kohia e ratou, me nga mea ora katoa i whiwhi ai ratou ki Harana; a whakatika ana ratou, haere ana ki te whenua o Kanaana; na, ka tae ratou ki te whenua o Kanaana.

⁶ Na, ka tika atu a Aperama na waenganui o te whenua ki te wahi o Hekeme, ki te mania o More. A i taua whenua ano te Kanaani i taua wa.

⁷ Na, ka puta mai a Ihowa ki a Aperama, a ka mea mai, Ka hoatu e ahau tenei whenua ki tou uri. Na, ka hangā e ia tetahi aata ki reira ma Ihowa i puta mai nei ki a ia.

⁸ Na, ka neke atu ia i reira ki tetahi maunga ki te taha ki te rawhiti o Pete-ere, ka whakatu hoki i tana teneti; ko Pete-ere ki te taha ki te hauauru, ko Hai hoki ki te taha ki te rawhiti: a i hangā ano e ia tetahi aata ma Ihowa ki reira, a ka karanga atu ki te ingoa o Ihowa.

⁹ Na, ka turia atu e Aperama, me te neke haere whaka-te-tonga.

¹⁰ A he mate-kai to taua whenua: a ka haere a Aperama ki raro ki Ihipa, ki reira noho ai; na te nui hoki o te mate-kai o te whenua.

¹¹ A i a ia ka tata te tae ki Ihipa, na ka mea ia ki a Harai ki tana wahine, Nana, e mohio ana ahau he wahine ataahua koe ki te titiro atu:

¹² Na, akuanei, kei te kitenga o nga Ihipiana i a koe, ka mea ratou, Ko tana wahine tenei: a ka patu ratou i a au, ka whakaora hoki i a koe.

¹³ Me ki koe, ne? he tuahine koe noku: kia whiwhi ai ahau ki te pai i a koe; a mau ka ora ai toku wairua.

¹⁴ A, te taenga atu o Aperama ki Ihipa, na ka titiro nga Ihipiana ki te wahine, he ataahua rawa.

¹⁵ A i kite ano nga rangatira a Parao i a ia, a ka korero whakamoemiti mona ki a Parao: a ka kawea te wahine ki te whare o Parao.

¹⁶ Na, ka atawhai ia i a Aperama, he mea hoki mo te wahine: a ka riro mai i a ia he hipi, he kau, he kaihe toa, he pononga tane, he pononga wahine, he kaihe uha, he kamera.

¹⁷ Na, ka pakia e Ihowa a Parao ratou ko tona whare, he nui nga pakinga, mo Harai hoki mo te wahine a Aperama.

¹⁸ Na, ka karanga a Parao ki a Aperama, a ka mea, He aha tenei mahi au ki a au? na te aha koe tē korero mai ai ki a au ko to wahine ia?

¹⁹ Na te aha koe i mea ai, Ko taku tuahine ia? i tango ai ahau i a ia hei wahine maku: na, to wahine ra, tangohia, haere.

²⁰ Na, ka whakatupato a Parao i ana tangata kei aha atu ki a ia: a tukua atu ana ia e ratou, me tana wahine, me ana mea katoa.

UPOKO 13.

Na, ka haere mai a Aperama i Ihipa, ki te taha ki te tonga, raua ko tana wahine, me ana mea katoa, me Rota hoki.

² A he nui rawa nga kararehe, te hiriwa, me te koura a Aperama.

³ Na, ka turia mai e ia, a ka haere mai i te tonga a tae noa ki Pete-ere, ki te wahi i orokotu ai tona teneti, ki te takiwa o Pete-ere o Hai;

⁴ Ki te wahi i te aata, i hangā e ia ki reira i te timatanga: a ka karanga atu a Aperama i reira ki te ingoa o Ihowa.

⁵ A ko Rota hoki, i haere tahi nei i a Aperama, he hipi ano ana, he kau, he teneti.

⁶ A kihai i nui te whenua mo raua, hei nohoanga tahitanga mo raua: no te mea hoki he nui o raua rawa, tē ahei ai raua te noho tahi.

⁷ Na, ka tautohe ki a ratou nga kai tiaki kahui a Aperama me nga kai tiaki kahui a Rota: a i taua whenua ano te Kanaani me te Perihi i taua wa e noho ana.

⁸ Na ka mea mai a Aperama ki a Rota, Kaua ra taua e whakatete ki a taua, kaua hoki a taua hepara e whakatete ki a ratou; he teina he tuakana nei hoki taua.

⁹ Kahore ianei te whenua i tou aroaro? tena ra, kia wehea taua: ki te anga koe ki maui, na, ka ahu ahau ki matau, a ki te haere koe ki matau, na, ka ahu ahau ki maui.

¹⁰ Na, ka anga ake nga kanohi o Rota, a ka titiro atu ki te mania katoa o Horano, e makuku katoa ana, i te mea kahore ano kia whakangaromia noatia a Horoma raua ko Komora e Ihowa, he pera ano me te kari a Ihowa, me te whenua ano o Ihipa, i to haerenga mai ki Toara.

¹¹ Na, ka whiriwhiria e Rota te mania katoa o Horano mana; a ka haere atu a Rota whaka-te-rawhiti: a ka wehewehe raua i a raua.

¹² Ko Aperama i noho ki te whenua o Kanaana, ko Rota i noho ki nga pa o te mania, a whakaturia ana e ia tona teneti ki Horoma.

¹³ Na, he kino nga tangata o Horoma, he hunga hara rawa ki te aroaro o Ihowa.

¹⁴ A, ka mea mai a Ihowa ki a Aperama, i muri iho i ta Rota wehenga ketanga atu i a ia, Kia anga ake o kanohi, titiro atu hoki, i te wahi e tu na koe, ki te taha ki te nota, ki te tonga, ki te rawhiti, ki te weta:

¹⁵ Ta te mea hoki, ko taua whenua katoa e kite na koe, ka hoatu e ahau a reira ki a koe, ki tou uri hoki ake tonu atu.

¹⁶ A ka meinga ano e ahau ou uri kia rite ki te puehu o te whenua: a ki te ahei i tetahi tangata te tatau te puehu o te whenua, e taua ano hoki ou uri.

¹⁷ Whakatika, haereerea te whenua, tona roa, tona whanui; no te mea ka hoatu e ahau ki a koe.

¹⁸ Na, nekehia atu ana tona teneti e Aperama, a haere ana, noho ana ki nga mania i Mamere, ki era i Heperona, hangā ana e ia tetahi aata ma Ihowa ki reira.

UPOKO 14.

Na, i nga ra o Amarapera, kingi o Hinara, o Arioka kingi o Eratara, o Keroraoma kingi o Erama, o Tirara hoki kingi o nga iwi;

² Ka whawhai enei ki a Pera kingi o Horoma, ratou ko Pireta kingi o Komora, ko Hinapa kingi o Arema, ko Hemepera kingi o Tepoimi, ko te kingi hoki o Pera, ara, o Toara.

³ I huihuia katoatia enei ki te raorao i Hirimi, ara, ki te moana tote.

⁴ Kotahi tekau ma rua nga tau i mahi ai ratou ki a Keroraoma, a i te kotahi tekau ma toru o nga tau ka whakakeke ratou.

⁵ Na, i te tekau ma wha o nga tau ka haere atu a Keroraoma, ratou ko nga kingi i whakauru ki a ia, a patua iho e ratou nga Repaima i Ahateroto-Karanaima, ratou ko nga Tutimi i Hama, me nga Emime i Hawe-Kiriataima.

⁶ Me nga Hori i to ratou maunga i Heira, a tae noa ki Ereparana, ki te taha o te koraha.

⁷ Na, ka hoki mai ratou, a ka tae mai ki Enimihipata, ara, ki Karehe, a patua katoatia ana e ratou te whenua o nga Amareki, ratou ko nga Amori i noho ra i Hatetonatamara.

⁸ Na, ka puta atu te kingi o Horoma, ratou ko te kingi o Komora, ko te kingi o Arema, ko te kingi o Tepoimi, ko te kingi o Pera (ara, o Toara;) a ka turia e ratou he pakanga ki a ratou, ki te raorao i Hirimi;

⁹ Ki a Keroraoma kingi o Erama, ki a Tirara kingi o nga iwi, ki a Amarapera kingi o Hinara, ratou ko Arioka kingi o Eratara; tokowha enei kingi, tokorima hoki era.

¹⁰ A he poka uku kau te raorao i Hirimi; na, ka whati nga kingi o Horoma raua ko Komora, a ka hinga ki reira; a rere ana nga morehu ki te maunga.

¹¹ Na, ka tango ratou i nga taonga katoa o Horoma raua ko Komora, me a ratou kai katoa, a haere ana.

¹² A i tangohia ano hoki e ratou a Rota, te tamaiti a te teina o Aperama, me ona taonga, a haere ana; i Horoma hoki ia e noho ana.

¹³ Na, ka tae mai tetahi o nga morehu, a ka korero ki a Aperama Hiperu; i te noho hoki ia i nga mania o Mamere Amori, o te teina o Ehekora, he teina ano ia no Anera: a kotahi ano ta ratou whakaaro ko Aperama.

¹⁴ A, te rongonga o Aperama kua hereherea atu tona iramutu, na, takiritia mai ana e ia ana tangata mohio, nga mea i whanau ki tona whare, e toru rau ko tahi tekau ma waru, a whaia ana ratou ki Rana.

¹⁵ Na, ka wehea ratou ko ana tangata kia rua nga matua, hei whakaeke mo ratou i te po, a patua ana ratou e ia, whaia ana, a, tae noa ki Hopaha, ki te taha ki maui o Ramahiku.

¹⁶ A, ka whakahokia mai e ia nga taonga katoa, i whakahokia mai ano hoki tona iramutu a Rota, me ona taonga, me nga wahine ano hoki, me nga tangata.

¹⁷ Na, ka puta mai te kingi o Horoma ki te whakatau i a ia i tana hokinga mai i te patu i a Keroraoma, ratou ko ona hoa ko nga kingi, ki te raorao o Hawe, ara, ki te raorao o te kingi.

¹⁸ A i maua mai e Merekihereke e te kingi o Harama he taro, he waina: he tohunga ano hoki ia no te Atua o runga rawa.

¹⁹ Na, ka manaaki ia i a ia, a ka mea, Kia manaakitia a Aperama e te Atua o runga rawa, nona nei te rangi me te whenua:

²⁰ Kia manaakitia ano hoki te Atua o runga rawa, nana nei i tuku o hoa riri ki tou ringaringa. A ka homai e ia ki a ia nga whakatekau o nga mea katoa.

²¹ Na, ka mea mai te kingi o Horoma ki a au Aperama, Homai nga tangata ki a au, ko nga taonga ia tangohia mou.

²² Na, ka mea atu a Aperama ki te kingi o Horoma, Kua torona atu toku ringaringa ki a Ihowa ki te Atua o runga rawa, nona nei te rangi me te whenua,

²³ E kore e tangohia e ahau, ahakoa he miro, ahakoa he here no te hu, e kore ano hoki e tangohia e ahau tetahi o au mea; kei mea koe, Naku a Aperama i whai taonga ai:

²⁴ Kati ano i a nga tamariki i kai ai, me te wahi a nga tangata i haere tahi nei matou, a Anera, ratou ko Ehekora, ko Mamere; ma ratou ano e tango te wahi i a ratou.

UPOKO 15.

Muri iho i enei mea ka puta moemoea mai te kupu a Ihowa ki a Aperama, a ka mea, Kaua e wehi, e Aperama: ko ahau tou whakangungu rakau, me tou utu nui whakaharahara.

² Na, ka mea a Aperama, E te Ariki e Ihowa, ko te aha e homai e koe ki a au i ahau ka riro urikore nei, a kei tenei Erietera o Ramahiku nga tikanga o toku whare?

³ A i mea ano a Aperama, Titiro hoki, kahore nei i homai e koe he uri ki a au: a, akuanei, kei tetahi tamaiti o toku whare te mahuetanga iho o oku taonga.

⁴ Na, ka puta mai ano te kupu a Ihowa ki a ia, ka mea, E kore e mahue iho o taonga ma tenei; engari ka mahue iho ma tetahi e puta mai i roto i ou whekau.

⁵ Na, ka kawea ia e ia ki waho, a ka mea mai, Tena tirohia atu te rangi, taua hoki nga whetu, ki te taea ena e koe te tatau: a ka mea mai ia ki a ia, Ka penei tou uri.

⁶ A i whakapono atu ia ki a Ihowa, a ka whakairia mai ki a ia hei tika.

⁷ A i mea mai ano ia ki a ia, Ko ahau a Ihowa i kawe mai nei i a koe i Uru o nga Karari, kia hoatu ki a koe tenei whenua hei kāinga pumau.

⁸ Ano ra ko ia, E te Ariki, e Ihowa, ma te aha ka mohio ai ahau ka riro mai tenei i a au?

⁹ Na, ka mea mai ia ki a ia, Tikina atu tetahi kau maku, hei te tau-toru, me tetahi koati uha, hei te tau-toru, me tetahi hipi toa hei te tau-toru, me tetahi kukupa, me tetahi pi kukupa.

¹⁰ Na, tikina ana e ia aua mea katoa, a tapahia ana i waenganui, a whakatakotoria ana nga wahi kia rite mai ki a raua whakawahi: ko nga manu ia kihai i tapahia e ia.

¹¹ A ka rere iho nga manu ki nga tinana, ka aia atu ratou e Aperama.

¹² A i te rerenga o te ra, ka au te moe o Aperama; na, ko te ihiihi me te pouri kerekere e tau iho ana ki a ia.

¹³ A ka mea mai ia ki a Aperama, Kia tino mohio koe ka noho manene tou uri ki te tahi whenua ehara nei i a ratou, a ka mahi ki a ratou; a e wha rau nga tau e whakatupuria kinotia ai ratou;

¹⁴ A ka whakawakia ano hoki e ahau te iwi e whakamahia ai ratou: a muri iho ka puta mai ratou me nga taonga maha.

¹⁵ Ko koe ia ka haere marie atu ki ou mātua; ka pai to koroheketanga a tanumia noatia koe.

¹⁶ Kei te wha ia o nga whakatupuranga ka hoki mai ratou ki konei: no te mea kahore ano kia tutuki noa te hara o nga Amori.

¹⁷ A i te rerenga o te ra, no ka pouri, na, ko te oumu paowa, me te rama e ka ana, e tika ana i waenganui o aua porohanga.

¹⁸ I taua rangi ano ka whakaritea e Ihowa he kawenata ki a Aperama, a ka mea, Ka hoatu e ahau tenei whenua ki tou uri, o te awa o Ihipa mai ra ano, a, tae noa ki te awa nui, ki te awa ki Uparati:

¹⁹ Nga Keni, nga Keniti, nga Karamoni,

²⁰ Nga Hiti, nga Perihi, nga Repaima.

²¹ Nga Amori, nga Kanaani, nga Kirikahi, me nga Iepuhi.

UPOKO 16.

Na, kahore he tamaiti a Aperama raua ko tana wahine, ko Harai; a he pononga wahine ano tana, no Ihipa, tona ingoa ko Hakara.

² Na, ka mea mai a Harai ki a Aperama, Nana, kua tutakina nei ahau e Ihowa kei whanau tamariki: na, mau e haere ki roto ki taku pononga; mana pea ahau e tu ai. A ka whakarongo a Aperama ki te reo o Harai.

³ Na, ka tango a Harai wahine a Aperama i a Hakara, i te wahine o Ihipa, i tana pononga i te takanga o nga tau kotahi tekau o te nohoanga o Aperama i te whenua o Kanaana, a homai ana e ia ki a Aperama ki tana tane hei wahine mana.

⁴ Na, ka haere ia ki roto ki a Hakara, a ka hapu ia: a, tona kitenga kua hapu ia, na, ka iti tona rangatira wahine ki tana titiro iho.

⁵ Na, ka mea mai a Harai ki a Aperama, Hei runga i a koe toku tukinotanga pehi ai: I hoatu e ahau taku pononga wahine ki tou uma; a tona kitenga kua hapu ia, na, ka iti ahau ki tana titiro iho: ma Ihowa e whakariterite taku korero me tau hoki.

⁶ Katahi ka mea a Aperama ki a Harai, Ha, kei tou ringa ano to pononga; mau e mea ki a ia te mea e pai ana ki tau titiro iho. Na, ka whakatupu-kino a Harai i a ia, a rere ana ia i tona aroaro.

⁷ A ka tutaki te anahera o Ihowa ki a ia i tetahi puna wai i te koraha, i te puna i te huarahi ki Huru.

⁸ A ka mea mai, E Hakara, e te pononga a Harai, i haere mai koe i hea? a e anga ana koe ko hea? a ka mea atu ia, E rere atu ana ahau i a Harai i toku rangatira.

⁹ Na, ka mea atu te anahera o Ihowa ki a ia, Hoki atu ki tou rangatira, kia whakaririka hoki koe i raro i ona ringaringa.

¹⁰ A ka mea mai ano te anahera a Ihowa ki a ia, Ka whakanuia rawatia e ahau tou uri, a e kore e taea te tatau, i te tini hoki.

¹¹ A i mea mai ano te anahera a Ihowa ki a ia, Nana, e hapu ana koe, a ka whanau he tamaiti, a me hua e koe tona ingoa ko Ihimaera; mo Ihowa i whaka rongo ki to tangi hanga.

¹² A hei tangata noho koraha ia; ka ngangare tona ringa ki nga tangata katoa, a ka ngangare te ringa o te katoa ki a ia; a ka noho ia i te aroaro o ona teina katoa.

¹³ Na, ka karangatia e ia te ingoa o Ihowa i korero nei ki a ia, E kite mai ana koe e te Atua i a au: i mea hoki ia, I titiro atu ranei ahau i konei ki muri i toku kai titiro mai?

¹⁴ Koia i huaina ai taua puna ko Peere-rahai-roi; na, kei waenganui i Karehe i Perere.

¹⁵ Na, ka whanau ta Hakara tamaiti raua ko Aperama: a huaina ana e Aperama te ingoa o tana tamaiti, i whanau nei i a Hakara, ko Ihimaera.

¹⁶ A e waru tekau ma ono nga tau o Aperama, i te whanautanga o Ihimaera o te tamaiti a Hakara raua ko Aperama.

UPOKO 17.

A i te mea ka iwa tekau ma iwa nga tau o Aperama, na ka puta mai a Ihowa ki a Aperama, a ka mea ki a ia, Ko au te Atua kaha rawa; haereere koe i taku aroaro, kia tapatahi hoki te whakaaro.

² A ka waiho ano e ahau taku kawenata ki waenganui i a taua, a ka tino whakanui rawa ahau i a koe.

³ Na, ka kupapa te kanohi o Aperama ki raro: a ka korero mai te Atua ki a ia, ka mea,

⁴ Ko au tenei, na, kei a koe taku kawenata, a ka waiho koe hei matua mo nga iwi maha.

⁵ E kore ano hoki tou ingoa e karangatia a muri ake nei ko Aperama, engari ko Aperahama te ingoa mou; no te mea ka meinga koe e ahau hei matua mo nga iwi maha.

⁶ A ka meinga ano koe e ahau kia tino hua rawa, ka meinga ano hoki koe e ahau hei take mo nga iwi, a ka puta mai nga kingi i roto i a koe.

⁷ A ka whakapumautia e ahau taku kawenata ki te takiwa oku, o koutou hoki ko ou uri i muri i a koe, o tera whakatu-puranga o tera whakatupuranga o ratou, hei kawenata mau tonu, a hei Atua ahau mou, mo ou uri hoki i muri i a koe.

⁸ A ka hoatu ano e ahau ki a koe, ki ou uri hoki i muri i a koe, te whenua e noho manene na koe, te whenua katoa o Kanaana, hei kāinga pumau; a hei Atua ano ahau mo ratou.

⁹ A ka mea mai ano te Atua ki Aperahama, Ina, me whakarite e koe taku kawenata, e koutou ko tou uri i muri i a koe, e tera whakatupuranga e tera whakatupuranga o ratou.

¹⁰ Ko taku kawenata tenei hei whakaritenga ma koutou, i te takiwa oku o koutou ko ou uri i muri i a koe; Me kokoti o koutou tane katoa.

¹¹ Me kokoti hoki e koutou to koutou kiri matamata; a ka waiho hei tohu mo te kawenata i te takiwa oku o koutou.

¹² Me kokoti e koutou nga tamariki ina waru nga ra, nga tane katoa o tena whakatupuranga o tena whakatupuranga o koutou, nga mea i whanau i roto i te whare, i hokona ranei ki te moni i tetahi tangata ke, ehara nei i te uri nou.

¹³ Ina, me kokoti te tangata i whanau i roto i tou whare, i hokona ranei ki to moni, a ka mau taku kawenata ki o koutou kikokiko, hei kawenata mau tonu.

¹⁴ A te tane kihai i kotia, kihai nei i kotia tona kiri matamata, ka hautopea atu tena wairua i roto i tona iwi; kua whakataka e ia taku kawenata.

¹⁵ A i mea mai ano te Atua ki a Aperahama, Ko Harai ko to wahine, kaua e karangatia tona ingoa ko Harai, engari ko Hara hei ingoa mona.

¹⁶ A ka manaaki ahau i a ia, ka hoatu ano hoki i tetahi tamaiti ki a koe i roto i a ia: ina, ka manaaki ahau i a ia, a hei whaea ia mo nga iwi; ka puta mai nga kingi mo nga iwi i roto i a ia.

¹⁷ Na, ka kupapa te kanohi o Aperahama ki raro, a ka kata ia, ka mea hoki i roto i tona ngakau, Tera ranei e whanau tetahi tamaiti ma te tangata kua kotahi nei rau ona tau? a e whanau tamariki ranei a Hara, te wahine kua iwa tekau nei ona tau?

¹⁸ Na, ka mea ake a Aperahama ki te Atua, E, kia ora a Ihimaera ki tou aroaro.

¹⁹ Na, ka mea mai te Atua, Ina, ka whanau ta korua tamaiti ko Hara; a me hua e koe tona ingoa ko Ihaka: a ka whakapumau ano ahau i taku kawenata ki a ia, ki ona uri hoki i muri i a ia, hei kawenata mau tonu.

²⁰ A ko Ihimaera ra, kua whakarongo atu ahau ki a koe, Nana, kua oti ia te manaaki e ahau, a ka meinga ia e ahau kia hua, kia tino nui rawa hoki; ka whanau ana tamariki, kotahi tekau ma rua nga ariki, a ka meinga ia e ahau hei iwi nui.

²¹ A, ka whakapumautia ano e ahau taku kawenata ki a Ihaka, ka whanau nei i a korua ko Hara i te taima e rite ana ki tenei o te tau e haere ake nei.

²² Na, ka whakamutua tana korero ki a ia, a ka mawehe atu te Atua i a Aperahama ki runga.

²³ Katahi ka tango a Aperahama i a Ihimaera i tana tamaiti, ratou ko nga mea katoa i whanau i roto i tona whare, me nga mea katoa i hokona ki tana moni, nga tane katoa i roto i nga tangata o te whare o Aperahama; a kotia ana e ia to ratou kiri matamata i taua tino rangi ano, i pera ano me ta te Atua i korero mai ai ki a ia.

²⁴ A e iwa tekau ma iwa nga tau o Aperahama, i te kotinga o tona kiri matamata.

²⁵ A kotahi tekau ma toru nga tau o tana tamaiti o Ihimaera, i te kotinga o tona kiri matamata.

²⁶ No taua tino rangi ano i kotia ai a Aperahama, raua ko tana tamaiti ko Ihimaera.

²⁷ A i kotia ngatahitia ano hoki me ia nga tangata katoa o tona whare, nga mea i whanau i roto i te whare, i hokona ranei ki te moni i te tangata iwi ke.

UPOKO 18.

A ka puta mai ano a Ihowa ki a ia kinga mania o Mamere: a i te kuwaha o te teneti ia e noho ana i te mahanatanga o te ra.

² A te anganga ake o ona kanohi, ka kite ia, na, tokotoru nga tangata e tu ana i tona taha: a, tona kitenga atu, na, ka rere atu ia i te kuwaha o te teneti, ki te whakatau i a ratou, a ka piko iho ki te whenua,

³ A ka mea atu, E toku Ariki, ki te mea he pai toku ki tau titiro, kaua ra e kapea to pononga:

⁴ Kia tikina ra tetahi wai hei horoi mo o koutou waewae, kia okioki ano hoki koutou i raro i te rakau:

⁵ A me tiki e ahau tetahi wahi taro hei oranga mo o koutou ngakau; muri iho ka haere koutou: he mea hoki kua tae mai nei koutou ki ta koutou pononga. A ka mea mai ratou, Peratia, me tau i ki mai na.

⁶ Na, ka hohoro atu a Aperahama ki te teneti ki a Hara, a ka mea atu, Kia hohoro te pokepoke i tetahi paraoa pai, kia toru nga mehua, ka hanga i etahi keke.

⁷ Na, ka rere atu a Aperahama ki te kahui, a hopukia mai ana e ia tetahi kuao kau, he kiri ngawari, he mea pai, a hoatu ana ki tetahi taitamariki; a ka hohoro ia te taka i taua mea.

⁸ Na, ka tikina e ia he pata, he waiu, me te kuao i raweketia e ia, a whakatakotoria ana ki to ratou aroaro; me te tu ano ia i to ratou taha i raro i te rakau, a ka kai ratou.

⁹ Na, ka mea mai ratou ki a ia, Kei hea a Hara, to wahine? A ka mea ia, Ra, kei te teneti.

¹⁰ Na, ka mea mai ia, Kei te wa o to te tangata oranga e rite ai, ka hoki mai ahau ki a koe; a ka whai tamaiti to wahine a Hara. A i rongo ano a Hara i te tatau o te teneti, i muri i a ia.

¹¹ Na, kua koroheke rawa a Aperahama raua ko Hara, kua maha o raua ra; kua mutu a Hara te pera me etahi wahine.

¹² Na, ka kata a Hara i roto i a ia, ka mea, Ka ruruhitia nei ahau, a tera ranei ahau e whai koa, he koroheke nei ano hoki toku ariki?

¹³ Na, ka mea mai a Ihowa ki a Aperahama, Na te aha i kata ai a Hara, i mea ai, He pono, ka whanau tamariki ranei ahau, he ruruhi nei hoki ahau?

¹⁴ He pakeke rawa ranei tetahi mea ki a Ihowa? Kei te taima i whakaritea, kei te wa o to te tangata oranga e rite ai, ka hoki mai ahau ki a koe, a ka whai tamaiti a Hara.

¹⁵ Na, ka whakawareware atu a Hara, ka mea, Kihai ahau i kata; i wehi hoki ia. A ka mea mai ia, Kahore; i kata ano koe.

¹⁶ Na, ka whakatika atu nga tangata i reira, a ka titiro atu ki te ritenga mai o Horoma: a i haere ano a Aperahama i a ratou, ki te tuku i a ratou kia haere.

¹⁷ A, ka mea a Ihowa, Me huna ranei e ahau i a Aperahama taku e mea ai;

¹⁸ Ka meinga nei hoki a Aperahama hei iwi nui, hei iwi kaha, a mana ka manaakitia ai nga iwi katoa o te ao?

¹⁹ E mohio ana hoki ahau ki a ia, Ka whakahaua iho e ia ana tamariki, me tona whare, i muri iho i a ia, a ka whakaritea e ratou te ara o Ihowa, ka mahi hoki i te tika, i te whakarite whakawa; a ka kawea mai e Ihowa ki runga ki a Aperahama nga mea i korerotia e ia mona.

²⁰ Na, ka mea mai a Ihowa, He nui te karanga o Horoma raua ko Komora, he taimaha rawa hoki o raua kino;

²¹ Me haere tenei ahau kia kite e tino rite ana ranei ta raua mahi ki tona karanga kua tae ake nei ki a au; a ki te kahore, ka mohio ahau.

²² Na, ka tahuri atu nga tangata i reira, a ka haere whaka-Horoma: ko Aperahama ia i tu tonu i te aroaro o Ihowa.

²³ Na, ka whakatata atu a Aperahama, a ka mea, Ka whakangaromia ano hoki e koe te tangata tika raua ko te tangata kino?

²⁴ Akuanei pea e rima tekau nga tangata tika i roto i te pa: a ka whakangaromia ano ranei e koe, a e kore ranei koe e tohu i taua wahi mo nga tangata tika e rima tekau i roto?

²⁵ Kaua ra tenei e waiho hei tikanga mo tau mahi, te whakamate ngatahi i te tangata tika raua ko te tangata kino: penei ka rite te tangata tika ki te tangata kino; kaua ra koe e pera: e kore ranei e tika te mahi a te kai whakarite whakawa mo te whenua katoa?

²⁶ Na, ka mea mai a Ihowa, Ki te mea ka kitea e ahau i Horoma e rima tekau nga tangata tika i roto i te pa, na, ka tohungia e ahau tena wahi katoa, ka whakaaro hoki ki a ratou.

²⁷ Na, ka whakahokia mai e Aperahama ka mea, na, kua timata nei ahau te korero ki te Ariki; a he puehu nei ahau, he pungarehu:

²⁸ Tera pea e kore te tokorima o te rima tekau o nga tangata tika: ka kore te tokorima, e whakangaro ranei koe i te pa katoa? A ka mea mai ia, E kore e whakangaromia e ahau ki te mea ka kitea e ahau i reira nga tangata e wha tekau ma rima.

²⁹ Na, ka korero atu ano hoki ia ki a ia, ka mea, Tera pea e kitea e wha tekau kei reira. A ka mea mai ia, E whakaaro ahau ki te wha tekau, a e kore e meatia e ahau.

³⁰ Ano ra ko ia, Kaua ra e riri mai te Ariki, a ka korero ahau: Tera pea e kitea e toru tekau kei reira. A ka mea mai ia, E kore e meatia e ahau, ki te mea ka kitea e ahau e toru tekau kei reira.

³¹ A ka mea atu ia, Na, kua timata nei ahau te korero ki te Ariki: Tera pea e kitea e rua tekau kei reira. A ka mea mai ia, Ka whakaaro ahau ki nga tekau e rua, a e kore e whakangaromia e ahau.

³² Na, ka mea ia, Kaua e riri mai te Ariki ki te korero atu ahau, heoi ano ko tenei korerotanga: Tera pea e kitea kotahi tekau kei reira. A ka mea mai ia, Ka whakaaro ahau ki te tekau kotahi, a e kore e whakangaromia e ahau.

³³ Na, ka haere a Ihowa i te mutunga o tana korerotanga ki a Aperahama a hoki ana a Aperahama ki tona wahi.

UPOKO 19.

Na, ka haere mai nga anahera tokorua ki Horoma i te ahiahi; a i te kuwaha o Horoma a Rota e noho ana: a te kitenga o Rota, na ka whakatika ia ki te whakatau i a raua, a ka tuohu iho tona kanohi ki te whenua;

² A ka mea atu ia, Nana, peka mai, e oku Ariki, ki te whare o ta korua pononga, ne? ki konei moe ai, ki te horoi hoki i o korua waewae, a ka maranga wawe korua, ka haere hoki i to korua ara. A ka mea mai raua, Kahore; engari me moe maua ki te huanui.

³ Na, ka kaha tana tohe ki a raua; a peka atu ana raua ki a ia, haere ana ki tona whare; na, ka taka ia i tetahi kai ma raua, ka tunu hoki i etahi keke rewena-kore, a ka kai raua.

⁴ Kiano raua i takoto noa, na, ka karapotia te whare e nga tangata o te pa, e nga tangata o Horoma, e te koroheke, e te taitamariki, e nga tangata katoa o nga wahi katoa:

⁵ A ka karanga mai ratou ki a Rota, ka mea ki a ia, Kei hea aua tangata i haere mai nei ki a koe i te po nei? whakaputaina mai raua ki a matou, kia mohio ai matou ki a raua.

⁶ Na, ka puta atu a Rota ki a ratou ki te kuwaha, me tana tutaki ake ano i te tatau i muri i a ia,

⁷ A ka mea atu, Kaua ra e kino, e aku tuakana.

⁸ Nana, tokorua aku tamahine, kahore nei i mohio noa ki te tangata, me whakaputa atu ra raua e ahau ki a koutou, a ma koutou e mea ki a raua te mea e pai na ki to koutou titiro: kaua ia e meatia tetahi mea ki enei tangata; he mea hoki ka tae mai nei raua ki te taumarumarutanga iho o toku tuanui.

⁹ Ano ra ko ratou, Tu atu ra. A i mea ano ratou, I haere mai tenei koroke kotahi ki konei noho ai, a e whai ana ia kia mana e whakarite tikanga: engari tou mate akuanei i a matou ka nui ake i to raua. Na, ka aki rawa mai ratou ki te tangata ra, ki a Rota, a ka whakatata mai ki te wahi i te tatau.

¹⁰ Na, ka torona atu o raua ringaringa e aua tangata, a toia mai ana a Rota ki a raua ki roto ki te whare, a tutakina atu ana e raua te tatau.

¹¹ Na, ka patua e raua ki te matapotanga nga tangata i te kuwaha o te whare, te iti te rahi: a ngenge noa ratou i te rapunga i te tatau.

¹² Na, ka mea aua tangata ki a Rota, Kahore atu ranei ou tangata i konei? me he hunaonga, he tamariki ranei au, he tamahine ranei au, tetahi atu mea ranei au i roto i te pa, tangohia atu i tenei wahi:

¹³ Ka whakangaromia hoki tenei wahi e maua, no te mea kua nui to ratou karanga ki te aroaro o Ihowa; a kua tonoa mai ano maua e Ihowa ki te wha kangaro.

¹⁴ Na, ka haere atu a Rota, a ka korero ki ana hunaonga, i marenatia nei ki ana tamahine, a ka mea atu, Whakatika, haere atu i konei; ka whakangaromia hoki e Ihowa tenei pa. Otiia ki ta te whakaaro a ana hunaonga i rite ia ki tetahi tangata e hangareka ana.

¹⁵ A, i te huakanga ake o te ata ka whakahohoro nga anahera i a Rota, ka mea, Whakatika atu, tangohia to wahine, me enei tamahine tokorua au, kei hunā koe i roto i te kino o tenei pa.

¹⁶ A i a ia e whakaroa ana, na, ka hopukia atu tona ringaringa e aua tangata, me te ringaringa hoki o tana wahine, me nga ringaringa o ana tamahine tokorua; he tohu hoki na Ihowa i a ia: a kawea atu ana ia e raua ki waho, ka waiho i waho o te pa.

¹⁷ A ka oti ratou te kawe atu e raua ki waho, na, ka mea ia, Rere atu kia ora ai koe; kaua e titiro ki muri i a koe, kaua hoki e tu ki tetahi wahi o te mania; rere atu ki te maunga, kei ngaro koe.

¹⁸ Na, ka mea a Rota ki a raua, Kaua ra e pena, e toku Ariki.

¹⁹ Nana, kua manakohia nei to pononga e koe, a kua whakanuia ano e koe tou aroha i whakaputaina mai nei e koe ki a au, i a koe i whakaora nei i toku wairua; otiia e kore e taea e ahau te rere ki te maunga, kei mau ahau i tetahi kino, a ka mate ahau.

²⁰ Titiro hoki, e tata ana tenei pa hei rerenga atu, a he mea nohinohi ano hoki: Kia rere atu ahau ki reira, ne? (ehara ianei i te mea nohinohi?) a ka ora toku wairua.

²¹ Ano ra ko ia ki a ia, Na, kua whakaae atu ano hoki ahau ki tenei meatanga au, kia kaua e hunā e ahau tenei pa i korero mai nei koe.

²² Kia hohoro, rere atu ki reira; ta te mea hoki e kore e taea tetahi mea e ahau, kia tae atu ra ano koe ki reira. No reira i karangatia ai te ingoa o taua pa ko Toara.

²³ No te putanga ake o te ra ki runga ki te whenua i tae ai a Rota ki Toara.

²⁴ Na, ka uaina iho e Ihowa ki runga ki Horoma raua ko Komora, he whanariki, he ahi na Ihowa, no runga i te rangi;

²⁵ A hurihia iho e ia aua pa, me te mania katoa, me nga tangata katoa o nga pa, me nga mea e tupu ana i te whenua.

²⁶ A i titiro mai tana wahine i muri i a ia, a ka meinga hei pou tote.

²⁷ A ka maranga wawe a Aperahama i te ata ki te wahi i tu ai ia i te aroaro o Ihowa:

²⁸ A, tana tirohanga atu ki te ritenga mai o Horoma raua ko Komora, ki te whenua katoa hoki o te mania, a ka kite atu ia, na e kake ake ana te paowa o te whenua, me te mea he paowa oumu.

²⁹ A i te whakangaromanga a Atua i nga pa o te mania, na, ka mahara te Atua ki a Aperahama, a tonoa atu ana e ia a Rota i roto i te hurihanga, i tana hurihanga i nga pa i noho ai a Rota.

³⁰ Na, ka piki atu a Rota i Toara, a ka noho ki te maunga, ratou tahi ko ana tamahine tokorua; i wehi hoki, tē noho ai ia ki Toara: a ka noho i roto i tetahi ana, a ia me ana tamahine tokorua.

³¹ Na, ka mea te tuakana ki to muri iho, Kua koroheke to taua papa, a kahore he tangata o te whenua hei haere mai ki a taua, hei pera me to te whenua katoa tikanga:

³² Tena, kia whakainumia to taua papa ki te waina, a ka takoto taua ki a ia, kia tupu ai i a taua tetahi uri mo to taua papa.

³³ Na, ka whakainu raua i to raua papa ki te waina i taua po: a ka haere atu te tuakana, ka takoto hoki ki tona papa, kihai ano hoki tera i mohio ki tona takotoranga iho, ki tona whakatikanga ake.

³⁴ A i te aonga ake, ka mea te tuakana ki to muri iho, Nana, i takoto ahau inapo ki toku papa: kia whakainu taua i a ia ki te waina i tenei po ano hoki; a mau e haere atu, e takoto ki a ia kia tupu ai i a taua tetahi uri mo to taua papa.

³⁵ Na, ka whakainu ano hoki raua i to raua papa ki te waina i taua po: ka whakatika ake to muri iho, ka takoto hoki ki a ia: a kihai ia i mohio ki tona takotoranga iho, ki tona whakatikanga ake.

³⁶ Na, ka hapu nga tamahine tokorua a Rota i to raua papa.

³⁷ A ka whanau ta te tuakana, he tamaiti, a huaina ana e ia tona ingoa ko Moapi: ko ia te papa o nga Moapi, a tae noa ki tenei ra.

³⁸ Me to muri iho hoki, whanau ake tana, he tamaiti, a huaina iho e ia tona ingoa ko Penami: ko ia te papa o nga tamariki a Amona, a tae noa ki tenei ra.

UPOKO 20.

Na, ka turia atu e Aperahama i reira ki tetahi whenua i te tonga, a ka noho ki te takiwa o Karehe, o Huru, a i noho haere ano ia ki Kerara.

² Na, ka kiia a Hara tana wahine e Aperahama, Ko taku tuahine ia: a ka tono mai a Apimereke kingi o Kerara, a tangohia ana a Hara.

³ Na, ka haere moemoea mai te Atua ki a Apimereke i te po, a ka mea ki a ia, Nana, ka mate koe mo te wahine i tangohia nei e koe; he wahine tangata hoki ia.

⁴ Kahore ano ia a Apimereke kia tata noa ki a ia: a ka mea atu ia, E te Ariki, ka whakamate ano hoki ranei koe i te iwi tika?

⁵ Kahore ranei ia i mea mai ki a au, Ko taku tuahine ia? me te wahine hoki, i mea mai ano ia, Ko taku tungane ia: he tapatahi toku ngakau, he harakore hoki oku ringa i mea ai ahau i tenei mea.

⁶ A ka mea moemoea mai ano te Atua ki a ia, I mohio ano ahau he tapatahi tou ngakau i a koe i mea i tenei mea; a i pupuri ahau i a koe kei hara koe ki a au: na reira koe tē tukua ai e ahau kia pa atu ki a ia.

⁷ Na, whakahokia ra akuanei te wahine a tena tangata; no te mea hoki he poropiti ia, a mana e inoi mou, a ka ora koe: tena ko tenei ka kore e whakahokia e koe, kia mohio koe, ka tino mate koe, koutou ko nga mea katoa i a koe.

⁸ Na, ka maranga wawe a Apimereke i te ata, a ka karangatia ana tangata katoa, a korerotia atu ana enei mea katoa ki o ratou taringa: a nui atu te wehi o aua tangata.

⁹ Na, ka karanga atu a Apimereke ki a Aperahama, ka mea ki a ia, He mahi aha tenei au ki a matou? he aha hoki taku hara ki a koe, i takina mai ai e koe he hara nui ki a au, ki taku kingitanga ano hoki? ehara i te mea tika nga mea kua meinga nei e koe ki a au.

¹⁰ A i mea atu ano a Apimereke ki a Aperahama, i kite koe i te aha, i meatia ai tenei mea e koe?

¹¹ Na, ka mea mai a Aperahama, I mea hoki ahau, he pono, kahore te wehi o te Atua i tenei wahi; a ka patua ahau e ratou mo taku wahine.

¹² A he pono ano hoki ko taku tuahine ia; ko te tamahine hoki a toku papa, otiia ehara i te tamahine na toku whaea; a meinga ana ia hei wahine maku.

¹³ A i ta te Atua meatanga i a au kia kopikopiko mai i te whare o toku papa, na, ka mea atu ahau ki a ia, Ko tou aroha tenei e whakaputaina mai e koe ki a au; korerotia ahau i nga wahi katoa e tae ai taua, Ko taku tungane ia.

¹⁴ Na, ka tango a Apimereke i etahi hipi, me etahi kau, me etahi pononga tane, me etahi pononga wahine, a hoatu ana e ia ki a Aperahama, a i whakahokia mai ano e ia a Hara tana wahine ki a ia.

¹⁵ A ka mea mai ano a Apimereke, Nana, kei tou aroaro toku whenua: nohoia e koe te wahi e pai ana ki tau titiro.

¹⁶ A i mea mai ano ia ki a Hara, Nana, kotahi mano hiriwa ka hoatu nei e ahau ki tou tungane: nana, hei uhi ia mo ou kanohi ki nga tangata katoa i a koe, ki nga tangata ke katoa hoki: na, ka riria tona he.

¹⁷ Katahi ka inoi a Aperahama ki te Atua: a ka mea te Atua kia ora a Apimereke, ratou ko tana wahine, ko ana pononga wahine; a ka whanau tamariki ratou.

¹⁸ Kua tutakina hoki e Ihowa nga kopu katoa o te whare o Apimereke, mo Hara hoki mo te wahine a Aperahama.

UPOKO 21.

Na, ka tirohia mai a Hara e Ihowa, ka peratia me tana i korero ai, rite tonu ki tana kupu ta Ihowa i mea ai ki a Hara.

² Na, ka hapu a Hara, a ka whanau ta raua tamaiti ko Aperahama i tona koroheketanga, i te wa ano i whakaritea e te Atua ki a ia.

³ Na, huaina iho e Aperahama ko Ihaka hei ingoa mo tana tamaiti i whanau nei mana, i whanau nei ma raua ko Hara.

⁴ A ka waru ona ra, na, ka kotia e Aperahama a Ihaka tana tamaiti, ka peratia me ta te Atua i whakahau mai ai ki a ia.

⁵ A kotahi rau nga tau o Aperahama, i te whanautanga o tana tamaiti o Ihaka.

⁶ Na, ka mea a Hara, Kua meinga nei ahau e te Atua kia kata, a ka kata tahi matou ko nga tangata katoa e rongo mai ana.

⁷ A i mea ano ia, Ko wai o mua hei mea ki a Aperahama, tera e whakangote tamariki a Hara? kua whanau nei hoki ta maua tamaiti, i a ia kua koroheketia.

⁸ Na, ka tupu te tamaiti, a ka whakamutua tana kai u: a ka tukua e Aperahama tetahi hakari nui i te ra i whakamutua ai te ngote a Ihaka.

⁹ A, ka kitea e Hara te tamaiti a Hakara a te wahine o Ihipa, i whanau nei i a raua ko Aperahama, e kata ana.

¹⁰ Na ka mea atu ia ki a Aperahama, Peia atu tenei pononga me tana tamaiti: e kore hoki te tamaiti a tenei wahine pononga e tu tahi me taku tamaiti me Ihaka i nga whakarerenga iho.

¹¹ A he mea he rawa taua mea ki te titiro a Aperahama, ko tana tamaiti hoki ia.

¹² Na, ka mea mai te Atua ki a Aperahama, Kei kino tena ki to titiro, kaua e whakaaro ki te tamaiti, raua ko to pononga wahine; whakarongo atu ki tona reo i nga mea katoa i korero ai a Hara ki a koe; ta te mea kei a Ihaka te karangatanga mo to uri.

¹³ Na, te tamaiti ano hoki a te pononga wahine, ka meinga ia e ahau hei iwi, no te mea he uri ia nou.

¹⁴ Na, ka maranga wawe a Aperahama i te ata, a ka mau ki tetahi taro, me tetahi tahā wai, a hoatu ana e ia ki a Hakara, whakawahā ana ki tona pokohiwi, me te tamaiti hoki, a tonoa atu ana: na ka haere ia, a ka kopikopiko i te koraha o Peere-hepa.

¹⁵ A, te potonga o te wai i roto i te tahā, na, whakarerea iho e ia te tamaiti i raro i tetahi rakau iti.

¹⁶ Na, ka haere ia, a ka noho mai i tawhiti, me te aronui mai ano ki a ia, he pera te matara me te taunga pere: i mea hoki ia, Kei kite ahau i te matenga o te tamaiti. Na, ka noho ia me te aronui mai ano ki a ia, a ka puaki tona reo, ka tangi.

¹⁷ A i rongo mai te Atua ki te reo a te tamaiti; a ka karanga iho te anahera a te Atua ki a Hakara i runga i te rangi, a ka mea ki a ia, He aha kei a koe, e Hakara? kaua e wehi; kua rongo hoki te Atua ki te reo o te tamaiti i a ia e takoto ra.

¹⁸ Whakatika, hapainga ake te tamaiti, puritia hoki ki to ringa; no te mea ka meinga ia e ahau hei iwi nui.

¹⁹ Na ka whakatirohia e te Atua ona kanohi, a ka kitea e ia tetahi puna wai: na, ka haere atu ia, a ka whakakiia e ia te tahā ki te wai, a whakainumia ana te tamaiti.

²⁰ A i noho ano te Atua ki te tamaiti; a ka tupu ia, ka noho hoki ki te koraha, a ka nui tona mohio ki te kopere.

²¹ Na, ka noho ia ki te koraha o Parana: a ka tikina atu e tona whaea tetahi wahine mana i te whenua o Ihipa.

²² A, i taua wa ano ka korero mai a Apimereke, raua ko Pikorā ko te rangatira o tana ope, ki a Aperahama, ka mea, Kei a koe nei te Atua i nga mea katoa e mea ai koe:

²³ Na, tena, oatitia mai te Atua ki a au i konei e kore koe e teka ki a au, ki aku tamariki hoki, me oku uri: engari ka rite ki te aroha whakaputaina atu e ahau ki a koe to mahi ki a au, ki te whenua ano hoki i noho nei koe.

²⁴ Na, ka mea atu a Aperahama, Ka oati ahau.

²⁵ Na, ka whakawa a Aperahama i a Apimereke mo tetahi puna wai i tangohia e nga tangata o Apimereke.

²⁶ Na, ka mea mai a Apimereke, Kahore ahau e mohio na wai ranei tenei mahi: kihai ano hoki i korerotia mai e koe ki a au, heoi ano hoki aku rongonga ko tenei inaianei.

²⁷ Na, ka mau a Aperahama ki etahi hipi me etahi kau, a ka hoatu e ia ki a Apimereke; a ka whakarite kawenata raua.

²⁸ Na, ka wehea e Aperahama ki tahaki e whitu nga reme uha o nga hipi.

²⁹ A ka mea mai a Apimereke ki a Aperahama, Hei aha enei reme e whitu i wehea nei e koe ki tahaki?

³⁰ A ka mea atu ia, Me tango hoki e koe enei reme e whitu i toku ringa, kia ai enei mea hei whakaatu maku, naku i keri tenei poka.

³¹ No reira i huaina ai e ia taua wahi ko Peere-hepa; no raua hoki i oati ki reira.

³² Heoi whakaritea ana e raua te kawenata i Peere-hepa: a, ka whakatika a Apimereke, raua ko Pikora ko te rangatira o tana ope, a hoki ana ki te whenua o nga Pirihitini.

³³ Na, ka whakatokia e ia he ngahere ki Peere-hepa, a ka karanga i reira ki te ingoa o Ihowa o te Atua ora tonu.

³⁴ A he maha nga ra i noho ai a Aperahama ki te whenua o nga Pirihitini.

UPOKO 22.

A muri iho i enei mea ka whakamatau te Atua i a Aperahama, a ka mea ki a ia, E Aperahama: a ka mea atu ia, Tenei ahau.

² A ka mea mai ia, Na, kawea atu to tamaiti, to huatahi, tau e aroha nei, a Ihaka, a haere ki te whenua o Moria; ka whakaeke hoki i a ia ki reira hei tahunga tinana ki runga ki tetahi o nga maunga e korero ai ahau ki a koe.

³ Na, ka maranga wawe a Aperahama i te ata, a whakanohoia ana e ia tana kaihe, a kawea ana e ia etahi o ana taitamariki tokorua hei hoa mona, me Ihaka hoki me tana tamaiti, a tatangia ana e ia nga wahie mo te tahunga tinana, a whakatika ana, haere ana ki te wahi i korero ai te Atua ki a ia.

⁴ I te ra tuatoru ka maranga nga kanohi o Aperahama, a ka kite ia i taua wahi i tawhiti.

⁵ Na, ka mea a Aperahama ki ana taitamariki, E noho korua i konei ki te kaihe; a ka haere maua ko te tamaiti nei ki ko, ki te koropiko, ka hoki mai ai ki a korua.

⁶ Na, ka tango a Aperahama i te wahie mo te tahunga tinana, a whakawahā atu ana e ia ki a Ihaka ki tana tamaiti; a i mauria ano e ia he ahi i tona ringa, me tetahi maripi; a haere tahi ana raua.

⁷ Na, ka korero mai a Ihaka ki a Aperahama ki tona papa, a ka mea mai, E toku matua: a ka mea atu ia, Tenei ahau, e taku tamaiti. A ka mea mai ia, Nana, ko te ahi tenei me nga wahie: a kei hea te reme hei tahunga tinana?

⁸ A ka mea atu a Aperahama, Kei te Atua te whakaaro, e taku tamaiti, ki tetahi reme mana hei tahunga tinana: na, ka haere tahi raua.

⁹ A to raua taenga atu ki te wahi i korero ai te Atua ki a ia; na, ka hangā e Aperahama tetahi aata ki reira, a whakapapā ana e ia nga wahie, na, ka herea e ia a Ihaka tana tamaiti, a whakatakotoria iho ki runga ki te aata, ki runga ki nga wahie.

¹⁰ Na, ka torona atu tona ringa e Aperahama, a ka mau ki te maripi hei patu mo tana tamaiti.

¹¹ Na, ko te karangatanga mai a te anahera a Ihowa ki a ia i runga i te rangi, te meatanga mai, E Aperahama, e Aperahama: a ka mea atu ia, Tenei ahau.

¹² Na, ka mea mai ia, Kaua e totoro atu tou ringaringa ki te tamaiti, kaua ano hoki tetahi mea e meatia ki a ia: no te mea katahi ahau ka kite e wehi ana koe i te Atua, i a koe kihai nei i kaiponu mai i to tamaiti, i to huatahi ki a au.

¹³ A te marangatanga ake o nga kanohi o Aperahama, ka kite ia, na, tetahi hipi toa i muri i a ia, e mau ana ona haona i roto i te urupuia rakau: na, ka haere atu a Aperahama, a hopukia ana e ia te hipi, a whakaekea atu ana e ia hei tahunga tinana, hei whakaritenga mo tana tamaiti.

¹⁴ Na, ka huaina e Aperahama te ingoa o tena wahi ko Ihowa-tire: pera hoki me te korero inaianei, Kei te maunga o Ihowa te kitea ai.

¹⁵ Na, ka karanga mai ano te anahera a Ihowa ki a Aperahama i runga i te rangi,

¹⁶ Ka mea mai, Kua waiho tenei ahau e ahau ano hei oati, e ai ta Ihowa, mo to meatanga i tenei mea, mou ano hoki kihai nei i kaiponu mai i to tamaiti i to huatahi:

¹⁷ Na, ka manaakitia rawatia koe e ahau, a ka whakanuia rawatia e ahau ou uri kia pera me nga whetu o te rangi, me te onepu hoki i te tahatika o te moana; a ka riro mai i ou uri te kuwaha o ona hoa riri;

¹⁸ A ma tou uri ka manaakitia ai nga iwi katoa o te whenua; mou i whakarongo ki toku reo.

¹⁹ Na, ka hoki atu a Aperahama ki ana taitamariki, a whakatika ana ratou, haere tahi ana ki Peere-hepa; a ka noho a Aperahama ki Peere-hepa.

²⁰ A muri iho i enei mea, ka korerotia ki a Aperahama, ka meatia, Nana, kua whanau ano hoki etahi tamariki ma Mireka, raua ko Nahora ko to teina;

²¹ Ko Hutu ko tana matamua, raua ko Putu ko tona teina, me Kemuera hoki matua o Arame,

²² Ratou ko Kehere, ko Hato, ko Piretaia, ko Irirapa, ko Petuere.

²³ A whanau ake ta Petuere ko Ripeka: ko enei tokowaru te whanau a Mireka raua ko Nahora teina o Aperahama.

²⁴ A ko tana wahine iti, ko tona ingoa nei ko Reuma, i whanau ano hoki ana, ko Tepa, ratou ko Kahama, ko Tahaha, ko Maaka.

UPOKO 23.

A kotahi rau e rua tekau ma whitu nga tau i ora ai a Hara: ko nga tau enei i ora ai a Hara.

² Na, ka mate a Hara ki Kiriata-arapa; ara, ki Heperona, i te whenua o Kanaana: a ka haere mai a Aperahama ki te uhunga ki a Hara, ki te tangi hoki ki a ia.

³ A ka whakatika ake a Aperahama i mua mai i tana tupapaku, ka korero atu ki nga tamariki a Hete, ka mea atu,

⁴ He manene, he noho noa iho ahau i roto i a koutou: homai ki a au tetahi wahi hei tanumanga i roto i a koutou, kia tanumia ai e ahau taku tupapaku, kia ngaro atu i taku tirohanga.

⁵ Na, ka whakahokia mai e nga tamariki a Hete ki a Aperahama, a ka mea ki a ia,

⁶ Whakarongo mai ki a matou, e toku ariki: he rangatira nui koe i roto i a matou: whiriwhiria e koe tetahi o a matou urupa, ka tanu ai i to tupapaku; e kore e kaiponuhia tana urupa ki a koe e tetahi o matou hei tanumanga mo to tupapaku.

⁷ Na, ka whakatika ake a Aperahama, ka tuohu iho ki nga tangata whenua, ki nga tamariki a Hete.

⁸ A ka korero ki a ratou, ka mea, Ki te whai ngakau koutou kia tanumia e ahau taku tupapaku kia ngaro atu i taku tirohanga; whakarongo mai ki a au, korerotia ahau ki a Eperona tama a Tohara,

⁹ Kia homai e ia ki a au tana ana a Makapera, i te pito o tona wahi oneone; kia homai e ia ki a au mo nga moni e rite ana hei utu, kia puritia e ahau hei urupa i waenganui i a koutou.

¹⁰ A i roto ano i nga tamariki a Hete a Eperona e noho ana: na ka whakahokia mai e Eperona Hiti ki a Aperahama, me te whakarongo mai ano nga tamariki a Hete, nga tangata katoa hoki i tomo i te kuwaha o tana pa, a ka mea mai,

¹¹ Kahore, e toku ariki, whakarongo mai ki a au: me hoatu e ahau tena wahi ki a koe, me te ana i reira; ina, me hoatu e ahau ki a koe; ka hoatu nei ahau ki a koe i te tirohanga mai o nga tamariki a toku iwi: tanumia ra to tupapaku.

¹² Na, ka tuohu iho a Aperahama i te aroaro o nga tangata whenua.

¹³ A ka korero atu ki a Eperona, me te whakarongo mai nga tangata whenua, ka mea, Erangi ki te homai e koe, whakarongo mai ra ki a au: me hoatu e ahau he hiriwa ki a koe mo taua wahi; tangohia atu, a ka tanumia e ahau taku tupapaku ki reira.

¹⁴ Na, ko te whakahokinga mai a Eperona ki a Aperahama, ka mea ki a ia,

¹⁵ Whakarongo mai, e toku ariki, ki a au: E wha rau hekere hiriwa nga utu e rite mo taua wahi; hei aha tena ma taua? tanumia ra to tupapaku.

¹⁶ Na, ka whakarongo a Aperahama ki a Eperona; a paunatia atu ana e Aperahama ki a Eperona te hiriwa i korerotia e ia i te aroaro o nga tamariki a Hete, e wha rau nga hekere hiriwa, no nga moni e tangohia ana e nga kai hokohoko.

¹⁷ Na, whakapumautia ana te wahi oneone o Eperona, i Makapera, i te ritenga mai o Mamere, te oneone, me te ana i reira, me nga rakau katoa hoki i runga i te oneone, i roto i ona rohe katoa, a tawhio noa,

¹⁸ Hei kāinga mo Aperahama i te tirohanga a nga tamariki a Hete, i te aroaro o nga tangata katoa i tomo i te kuwaha o tona pa.

¹⁹ A muri iho ka tanumia e Aperahama a Hara tana wahine ki roto ki te ana i te wahi i Makapera i te ritenga mai o Mamere, ara, o Heperona i te whenua o Kanaana.

²⁰ Heoi whakapumautia ana e nga tamariki a Hete taua wahi, me te ana i reira, mo Aperahama kia puritia hei tanumanga.

UPOKO 24.

Na, kua koroheketia a Aperahama, kua maha haere ona ra: a he mea manaaki a Aperahama na Ihowa i nga meatanga katoatanga.

² Na, ka mea a Aperahama ki te kaumatua o ana pononga i roto i tona whare, ki te kai whakahaere o ana mea katoa, Tena, whakapakia mai tou ringa ki raro ki toku huha:

³ A me whakaoati koe e ahau ki a Ihowa, ki te Atua o te rangi ki te Atua hoki o te whenua, kia kaua e tangohia mai e koe he wahine ma taku tamaiti i roto i nga tamahine a nga Kanaani, a te iwi e noho nei ahau i roto i a ratou:

⁴ Engari me haere ki toku whenua, me oku whanaunga, ka tango mai ai i tetahi wahine ma taku tamaiti ma Ihaka.

⁵ Na, ka mea atu te pononga ki a ia, Tera pea e kore e pai te wahine ki te whai mai i muri i a au ki tenei whenua: me whakahoki atu ranei e ahau to tamaiti ki te whenua i haere mai nei koe i reira?

⁶ A ka mea a Aperahama ki a ia, Kia tino mohio koe, kei whakahokia atu e koe taku tamaiti ki reira.

⁷ Ko Ihowa, ko te Atua o te rangi, nana nei ahau i tango mai i roto i te whare o toku papa, i te whenua hoki i whanau ai ahau, nana nei hoki i korero mai ki a au, i oati mai koki ki a au, i mea, Ka hoatu e ahau tenei whenua ki ou uri; mana e tono tana anahera ki mua i a koe, a ka riro mai i a koe tetahi wahine ma taku tamaiti i reira.

⁸ A, ki te kahore te wahine e pai ki te whai mai i a koe, katahi koe ka watea i tenei oati aku: otiia kaua e whakahokia atu e koe taku tamaiti ki reira.

⁹ Na, ka whakapakia e te pononga tona ringa ki raro i te huha o Aperahama o tona ariki, a rite tonu ki tenei kupu tana oati ki a ia.

¹⁰ Na, ka tangohia e te pononga etahi kamera kotahi tekau i roto i nga kamera a tona ariki, a haere ana; i tona ringa hoki nga rawa katoa o tona ariki: a whakatika ana ia, haere ana ki Mehopotamia, ki te pa o Nahora.

¹¹ Na, ka mea ia i nga kamera kia tuturu nga turi ki te taha o te puna wai i waho o te pa i te ahiahi, i te wa e puta mai ai nga wahine ki te utu wai.

¹² A ka mea ake, E Ihowa, e te Atua o toku ariki o Aperahama, tena ra, kia whai wahi ahau akuanei, whakaputaina mai hoki he aroha ki toku ariki ki a Aperahama.

¹³ Tenei ahau te tu nei i te taha o te puna wai; a e haere mai ana nga tamahine a nga tangata o te pa ki te utu wai:

¹⁴ A ko te kotiro e mea ai ahau ki a ia, Tukua iho ra to oko kia inu ai ahau; a ka mea mai ia, Inumia, a me whakainu ano hoki e ahau o kamera: kia rite mai ia i a koe ma to pononga ma Ihaka; a ma reira ka mohio ai ahau e whakaputa aroha ana koe ki toku ariki.

¹⁵ Heoi, kiano i mutu noa tana korero, na, kua puta mai a Ripeka tamahine a Petuere, tama a Mireka, ko te wahine hoki tera a Nahora teina o Aperahama, me tana oko i runga i tona pokohiwi.

¹⁶ A he pai rawa te kotiro ki te titiro atu, he wahina, kahore ano tetahi tangata kia mohio ano ki a ia: na, ka heke iho ia ki te puna, ka whakaki hoki i tana oko, a ka haere ake.

¹⁷ Na, ka rere iho te pononga ki te whakatau i a ia, a ka mea atu, Tukua ahau kia inu, ne? i tetahi wahi o te wai o to oko.

¹⁸ A ka mea mai ia, Inumia, e toku ariki: na, ka hohoro ia te tuku iho i tana oko ki runga ki tona ringa, a whakainumia ana ia.

¹⁹ A ka mutu tana whakainu i a ia, na ka mea mai ia, Me utu ano hoki e ahau mo o kamera, kia poto ra ano ratou te whakainu.

²⁰ Na, ka hohoro ia te riringi atu i te wai o tana oko ki roto ki te kumete, a rere ana ano ki te puna, ki te utu, a utuhia mai ana e ia mo ana kamera katoa.

²¹ Ko taua tangata hoki, matatau tonu mai tana titiro ki a ia, kihai hoki i hamumu, kia mohio ai ia e whakatikaia ranei e Ihowa tana ara, kahore ranei.

²² A ka mutu te inu o nga kamera, na, ka tikina e taua tangata tetahi whakakai koura, he hawhe hekere tona taimaha, me nga poroporo e rua mo ona ringa, kotahi tekau nga hekere koura te taimaha;

²³ A ka mea mai, Na wai koe tamahine? tena, korerotia mai ki a au: kei te whare ranei o tou papa tetahi wahi hei moenga mo matou?

²⁴ Na, ka mea ia ki a ia, He tamahine ahau na Petuere na te tama a Mireka, i whanau nei i a raua ko Nahora.

²⁵ A i mea ano ia ki a ia, He nui a matou kakau witi, me a matou otaota hei kai, me tetahi wahi hoki hei moenga.

²⁶ Na, tuohu ana taua tangata, a koropiko ana ki a Ihowa.

²⁷ A ka mea, Kia whakapaingia a Ihowa te Atua a toku rangatira o Aperahama, kihai nei i whakahapa i toku rangatira ki tona aroha me tona pono: i a au ano i te ara ka aratakina mai ahau e Ihowa ki te whare o nga teina o toku rangatira.

²⁸ Na, ka oma atu te kotiro, a korerotia atu ana e ia enei mea ki te whare o tona whaea.

²⁹ A he tungane ano to Ripeka, tona ingoa ko Rapana; na, ka rere atu a Rapana ki taua tangata, ki waho ki te puna.

³⁰ A, i tona kitenga i te whakakai me nga poroporo i nga ringa o tona tuahine, a ka rongo ki nga kupu a Ripeka a tona tuahine, ki tana meatanga mai, I penei mai nga korero a taua tangata ki a au; na, ka haere mai ia ki taua tangata, a i te taha ano o nga kamera i te puna ia e tu ana.

³¹ A ka mea, Haere mai, e te manaakitanga a Ihowa; na te aha koe i tu ai i waho? kua oti hoki i a au te whare te whakapai, me tetahi wahi hoki mo nga kamera.

³² Na, ka haere atu taua tangata ki te whare: a wetekina ana e ia nga mea o nga kamera, i homai ano he kakau witi me tetahi otaota hei kai ma nga kamera, me tetahi wai hei horoi mo ona waewae, mo nga waewae hoki o ona hoa.

³³ Na, ka whakatakotoria he kai ki tona aroaro; a ka mea ia, E kore ahau e kai, kia korerotia ra ano e ahau taku korero. A ka mea mai tera, Korerotia.

³⁴ Na, ka mea atu ia, He pononga ahau na Aperahama.

³⁵ A kua manaakitia rawatia toku ariki e Ihowa; kua nui ia: a kua homai ano ki a ia he hipi, he kau, he hiriwa, he koura, he pononga tane, he pononga wahine, he kamera, he kaihe.

³⁶ A kua whanau ano hoki tetahi tamaiti ma toku ariki i a Hara, i te wahine a toku ariki, i a ia kua ruruhitia: a kua hoatu e ia ana mea katoa ki a ia.

³⁷ A i whakaoati ano toku ariki i a au, i mea mai, Kei tangohia mai e koe tetahi wahine ma taku tamaiti i roto i nga tamahine a nga Kanaani, e noho nei ahau i to ratou whenua:

³⁸ Engari me haere koe ki te whare o toku papa, ki oku whanaunga hoki, ka tango mai ai i tetahi wahine ma taku tamaiti.

³⁹ Na, ko taku meatanga atu ki toku ariki, E kore pea te wahine e aru mai i a au.

⁴⁰ A ka mea mai ia ki a au, Ma Ihowa, kei tona aroaro nei taku haereerenga, mana e tono tana anahera hei hoa, mana hoki e whakatika to ara; a ka tango mai koe i tetahi wahine ma taku tamaiti i roto i oku whanaunga, i roto hoki i te whare o toku papa:

⁴¹ Katahi koe ka watea i taku oati, ki te haere koe ki oku whanaunga; a ki te kahore e homai e ratou ki a koe, na, ka watea ano koe i taku oati.

⁴² A taku haerenga mai inaianei ki te poka, na, ka mea ahau, E Ihowa, e te Atua o toku ariki o Aperahama, ki te mea e whakatika ana koe i taku ara e haere nei ahau:

⁴³ Na, tenei ahau te tu nei i te taha o te poka wai; a te kotiro e puta mai ki te utu, a ka mea ahau ki a ia, Homai he wai moku i roto i to oko kia inu ahau;

⁴⁴ A ka mea mai ia ki a au, Inumia, a me utu ano e ahau mo o kamera: kia rite mai ano ia i a Ihowa hei wahine ma te tamaiti a toku ariki.

⁴⁵ Kiano i mutu noa taku korero i roto i toku ngakau, na, ko te putanga mai o Ripeka me tana oko i runga i ona pokohiwi: a ka heke atu ki te poka ki te utu: na, ka mea ahau ki a ia, Homai, kia inu ahau, ne?

⁴⁶ Na, ka hohoro ia, a tukua iho ana e ia tana oko i runga i a ia, a ka mea mai, Inumia, a me whakainu ano hoki e ahau o kamera: na, inu ana ahau, a i whakainumia ano hoki e ia nga kamera.

⁴⁷ Na, ka ui atu ahau ki a ia, ka mea atu, He tamahine koe na wai? A ka mea mai ia, He tamahine na Petuere, na te tama a Nahora, i whanau nei ma raua ko Mireka: na, ka kuhua e ahau te whakakai ki tona ihu, me nga poroporo ano hoki ki ona ringaringa.

⁴⁸ Na, ka tungou iho ahau, a ka koropiko atu ki a Ihowa, ka whakapai hoki i a Ihowa i te Atua o toku ariki o Aperahama, mona i arahi i a au i te huarahi tika ki te tiki mai i te tamahine a te teina o toku ariki ma tana tamaiti.

⁴⁹ Na, ki te mea e whai aroha ana koutou, e whai pono ana ki toku ariki, korerotia mai ki a au: a ki te kahore, korerotia mai ki a au; kia tahuri atu ai ahau ki matau ranei, ki maui ranei.

⁵⁰ Na, ka whakahokia mai e Rapana raua ko Petuere a ka mea, I puta mai tenei mea i a Ihowa: e kore e taea te pai, te kino ranei te korero atu e maua ki a koe.

⁵¹ Nana, kei tou aroaro a Ripeka, tangohia, haere, a kia meinga ia hei wahine ma te tamaiti a tou ariki, hei pera me ta Ihowa i korero ai.

⁵² A ka rongo te pononga a Aperahama i a raua korero, na koropiko ana ia ki te whenua, ki a Ihowa.

⁵³ A ka tangohia mai e te pononga he mea hiriwa, he mea koura, he kakahu, hoatu ana e ia ki a Ripeka: a i hoatu ano e ia etahi mea tino papai ki tona tungane raua ko tona whaea.

⁵⁴ Na, ka kai ratou, ka inu, ratou tahi ko ona hoa haere, a ka moe ratou; a ka ara ratou i te ata, na, ka mea atu ia Tukua ahau kia haere ki toku ariki.

⁵⁵ Na, ka mea mai tona tungane raua ko tona whaea, Kia noho te kotiro ki a matou i etahi ra, kia kotahi pea tekau; muri iho, ka haere.

⁵⁶ Na, ka mea ia ki a raua, Kaua ahau e whakawarea, he mea hoki kua whakatikaia nei taku ara e Ihowa; tukua atu ahau kia haere ki toku ariki.

⁵⁷ Na, ka mea mai raua, Me karanga te kotiro e maua, a ka ui atu ki tona mangai.

⁵⁸ Na, ka karanga raua i a Ripeka, a ka mea ki a ia, Ka haere ranei koe i tenei tangata? A ka mea ia, Ka haere ano.

⁵⁹ Na, tukua atu ana e ratou a Ripeka to ratou tuahine, ratou ko tona kai whakangote, ko te pononga hoki a Aperahama, me ana tangata.

⁶⁰ Na, ka manaaki ratou i a Ripeka, a ka mea ki a ia, Ko to matou tuahine koe, kia meinga koe hei whaea mo nga mano tini, a kia riro mai i ou uri te kuwaha o o ratou hoa riri.

⁶¹ Na, ka whakatika a Ripeka, ratou ko ana kotiro, a eke ana ratou ki runga ki nga kamera, aru ana i taua tangata: Na, ka tango taua pononga i a Ripeka, a haere ana.

⁶² Na, ka hoki mai a Ihaka i te haere ki te puna i Rahai-roi; i te wahi hoki ki te tonga ia e noho ana.

⁶³ A ka puta mai a Ihaka ki te parae ki te whakaaroaro, i te tuaahiahi: a, te marangatanga ake o ona kanohi, ka titiro mai ia, na ko nga kamera e haere atu ana.

⁶⁴ A, te marangatanga ake o nga kanohi o Ripeka, na, ka kite i a Ihaka, a ka marere ki raro i te kamera.

⁶⁵ I mea hoki ia ki te pononga, Ko wai tena tangata e haere mai ra i te parae ki te whakatau i a tatou? A ka mea mai te pononga, Ko toku ariki tena: na, ka mau ia ki tetahi arai-kanohi, a ka hipoki i a ia.

⁶⁶ Na, ka korerotia mai e te pononga ki a Ihaka nga mea katoa i mea ai ia.

⁶⁷ Na, ka kawea ia e Ihaka ki te teneti o tona whaea o Hara, a tangohia ana e ia a Ripeka, a ka waiho hei wahine mana; a aroha ana ia ki a ia: a ka whai whakamarietanga a Ihaka i muri iho i tona whaea.

UPOKO 25.

Na, ka tangohia ano e Aperahama tetahi wahine, tona ingoa ko Ketura.

² A whanau ake a raua tamariki ko Timirana, ko Iokohana, ko Merana, ko Miriana, ko Ihipaka, ratou ko Huaha.

³ A whanau ake a Iokohana ko Hepa, ko Rerana. A ko nga tamariki a Rerana, ko Ahurimi, ko Retuhimi, ko Reumime.

⁴ A ko nga tamariki a Miriana; ko Epa ko Epere, ko Hanoka, ko Apira, ko Ereraaha. He tamariki katoa enei na Ketura.

⁵ A i hoatu e Aperahama ana mea katoa ki a Ihaka.

⁶ Ko nga tamariki ia a nga wahine iti a Aperahama, i hoatu e Aperahama etahi taonga ki a ratou, a tonoa atu ana e ia i a ia ano e ora ana, whaka-te-rawhiti, ki te whenua i te rawhiti, i te taha o Ihaka o tana tamaiti.

⁷ A ko nga ra enei o nga tau o te oranga o Aperahama i ora ai ia, kotahi rau e whitu tekau ma rima nga tau.

⁸ Na, ka hemo a Aperahama, a ka mate, he pai hoki tona koroheketanga, he koroheke, kua ata tutuki ano hoki ona ra; a kohia atu ana ia ki tona iwi.

⁹ A ka tanumia ia e ana tamariki e Ihaka raua ko Ihimaera ki roto ki te ana o Makapera, ki te wahi o Eperona tama a Tohara Hiti, i te ritenga mai o Mamere;

¹⁰ Ki te wahi i hokona e Aperahama i nga tamariki a Hete: i tanumia ki reira a Aperahama, raua ko Hara ko tana wahine.

¹¹ A, muri iho i te matenga o Aperahama, na ka manaakitia e te Atua a Ihaka tana tamaiti; a ka noho a Ihaka ki te taha o te puna o Rahai-roi.

¹² Na, ko nga whakatupuranga enei o Ihimaera, o te tama a Aperahama, i whanau nei ma Aperahama i a Hakara, i te wahine o Ihipa, i te pononga wahine a Hara.

¹³ A ko nga ingoa enei o nga tamariki a Ihimaera, to tenei ingoa to tenei ingoa, ki te tikanga iho o o ratau whakatupuranga: ko ta Ihimaera matamua ko Nepaiota; muri iho ko Kerara, ko Arapeere, ko Mipihama,

¹⁴ Ko Mihima, ko Ruma, ko Maha,

¹⁵ Ko Hatara, ko Tema, ko Ieturu, ko Napihi, ko Kerema:

¹⁶ Ko nga tamariki enei a Ihimaera, ko o ratou ingoa enei i o ratou pa, i o ratou whare rangatira; kotahi tekau ma rua nga rangatira o o ratou iwi.

¹⁷ A ko nga tau enei o te oranga o Ihimaera, kotahi rau e toru tekau ma whitu nga tau: na ka hemo ia, a ka mate; a ka kohia atu ki tona iwi.

¹⁸ A i Hawira o ratou nohoanga, a tae noa ki Huru, i te ritenga mai o Ihipa, ina haere koe ki Ahiria: i riro mai he nohoanga mona ki te aroaro o ona teina katoa.

¹⁹ A, ko nga whakatupuranga enei o Ihaka tama a Aperahama: he whanau na Aperahama a Ihaka:

²⁰ A no te wha tekau o nga tau o Ihaka i tango ai ia i a Ripeka hei wahine mana, i te tamahine a Petuere Hiriani o Parana-arama, i te tuahine o Rapana Hiriani.

²¹ Na, ka inoi a Ihaka ki a Ihowa mo tana wahine, no te mea he pakoko ia: a ka whakaae mai a Ihowa ki a ia, a ka hapu a Ripeka tana wahine.

²² Na, ka takatakahi nga tamariki i a raua i roto i a ia; a ka mea ia, Ki te mea ko tenei, na te aha i penei ai ahau? Na, haere ana ia ki a Ihowa ki te ui.

²³ A ka mea mai a Ihowa ki a ia, E rua nga iwi kei roto i tou kopu, a e rua nga iwi e wehea mai i roto i ou whekau; a ka kaha tetahi iwi i tetahi iwi; a ka waiho te tuakana hei apa mo te teina.

²⁴ A ka rite ona ra e whanau ai ia, na, he mahanga kei roto i tona kopu.

²⁵ Na, ka puta mai te tuatahi, he mea whero, rite katoa ia ki te kakahu huruhuru; a huaina ana e ratou tona ingoa ko Ehau.

²⁶ A, muri iho ka puta mai tona teina, me te pupuri ano tona ringaringa i te rekereke o Ehau; a huaina iho tona ingoa ko Hakopa; a e ono tekau nga tau o Ihaka i to raua whanautanga.

²⁷ Na, ka kaumatua ake nga tamariki: a he tangata mohio ki te hopu kirehe mohoao a Ehau, he tangata noho koraha; ko Hakopa ia he tangata noho pai, he tangata noho teneti.

²⁸ A i aroha a Ihaka ki a Ehau, mona i hopu mai i te kai mana: ko Ripeka ia i aroha ki a Hakopa.

²⁹ Na, ka kohuatia he kai e Hakopa, a ka haere mai a Ehau i te koraha, a e hemo ana ia:

³⁰ Na, ka mea mai a Ehau ki a Hakopa, Maku tetahi kai i taua mea whero e whero ra, ne? e hemo ana hoki ahau: koia i huaina ai tona ingoa ko Eroma.

³¹ Na, ko te meatanga mai a Hakopa, Hokona mai ki a au akuanei tou matamuatanga.

³² Na, ka mea a Ehau, Ka tata nei ahau te mate: a, hei aha maku tenei matamuatanga?

³³ A ka mea atu a Hakopa, Oati mai ki a au aianei; na, ka oati ia ki a ia: a ka hokona atu e ia tona matamuatanga ki a Hakopa.

³⁴ Katahi ka hoatu e Hakopa he taro ki a Ehau me nga pi i kohuatia ra: na ka kai ia, ka inu, ka whakatika hoki, a ka haere: a whakahaweatia ana e Ehau tona matamuatanga.

UPOKO 26.

Na, ka mate-kai te whenua, hāunga te mate-kaitanga tuatahi i puta mai i nga ra o Aperahama. A ka haere atu a Ihaka ki a Apimereke ki te kingi o nga Pirihitini ki Kerara.

² Na, ka puta mai a Ihowa ki a ia, a ka mea mai, Kaua e haere ki raro ki Ihipa; e noho ki te whenua e korero ai ahau ki a koe:

³ E noho koe ki tenei whenua, a ka tata ahau ki a koe, ka manaaki hoki i a koe; ka hoatu nei hoki e ahau enei whenua katoa ki a koutou ko ou uri, ka whakapumautia te oati i oati ai ahau ki a Aperahama ki tou papa;

⁴ A ka whakanuia e ahau ou uri kia pera me nga whetu o te rangi, ka hoatu hoki e ahau enei whenua katoa ki ou uri; a ma tou uri ka manaakitia ai nga iwi katoa o te whenua;

⁵ Mo Aperahama hoki i whakarongo mai ki toku reo, i mahara hoki ki aku whakamaharatanga, ki aku whakahaunga, ki aku tikanga, me aku ture.

⁶ Na, ka noho a Ihaka ki Kerara:

⁷ A ka ui mai nga tangata o taua wahi ki tana wahine; a ka mea ia, Ko taku tuahine ia: i wehi hoki ia, tē mea ia, Ko taku wahine; i mea hoki, kei patua ahau e nga tangata o tenei wahi mo Ripeka; he ataahua hoki ia ki te titiro atu.

⁸ A ka maha ona ra ki reira na ka titiro mai a Apimereke te kingi o nga Pirihitini i te matapihi, a ka kite mai, na, ko Ihaka e takaro ana ki a Ripeka ki tana wahine.

⁹ Na, ka karangatia atu a Ihaka e Apimereke, a ka mea ia, Koia ano, ko to wahine ano ia: a na te aha koe i mea ai, Ko taku tuahine ia? A ka mea a Ihaka ki a ia, i mea hoki ahau, Kei mate ahau mona.

¹⁰ Na, ka mea a Apimereke, He aha tenei mahi au ki a matou? wahi iti kua takoto tetahi o te iwi nei ki to wahine, a kua takina mai e koe he hara ki runga ki a matou.

¹¹ Na, ka korero iho a Apimereke ki tona iwi katoa, a ka mea, Ki te pa atu tetahi ki tenei tangata ki tona wahine ranei, ka mate.

¹² A i rui a Ihaka ki taua whenua, a maea mai i taua tau ano, kotahi rau; i manaakitia hoki ia e Ihowa:

¹³ Na, ka kake taua tangata, a ka tino nui haere, no ka nui noa ake ia:

¹⁴ A ka whai hipi, ka whai kau ano ia, he tini hoki nga pononga: a ka hae mai nga Pirihitini ki a ia.

¹⁵ A, nga poka katoa i keria e nga pononga a tona papa, i nga ra o Aperahama o tona papa, i tanumia ena e nga Pirihitini, i whakakiia hoki ki te oneone.

¹⁶ Na, ka mea mai a Apimereke ki a Ihaka, Haere atu i roto i a matou; he kaha rawa hoki koe i a matou.

¹⁷ Na, ka haere atu a Ihaka i reira, a whakaturia ana tona teneti ki te awaawa o Kerara, a noho ana i reira.

¹⁸ Na, ka keria ano e Ihaka nga poka wai i keria i nga ra o Aperahama o tona papa; i tanumia hoki e nga Pirihitini i muri iho i te matenga o Aperahama: a huaina ana e ia hei ingoa mo aua poka ko nga ingoa i huaina iho e tona papa.

¹⁹ Na, ka keri nga pononga a Ihaka ki te awaawa, a ka kitea e ratou i reira he puna manawa whenua.

²⁰ Na, ka tautohe mai nga hepara o Kerara ki nga hepara a Ihaka, a ka mea, Na matou tenei wai: a huaina ana e ia te ingoa o te poka ko Eheke; mo ratou hoki i whakatetetete ki a ia.

²¹ Na, ka keri ratou i tetahi atu poka, a ka tautohea ano tena e ratou: a huaina iho e ia tona ingoa ko Hitina.

²² Na, ka neke atu ia i reira, a ka keri i tetahi atu poka; a kihai tena i tautohea e ratou: na ka huaina e ia tona ingoa ko Rehopota; i mea hoki ia, Katahi nei hoki a Ihowa ka whakawatea i tetahi nohoanga mo tatou, a ka hua tatou, ki runga ki te whenua.

²³ Na, ka haere atu ia i reira ki runga ki Peere-hepa.

²⁴ A ka puta mai a Ihowa ki a ia i taua po ano, ka mea, Ko ahau te Atua o Aperahama o tou papa: kaua e wehi, kei a koe nei hoki ahau, a ka manaaki ahau i a koe, ka whakanui hoki i ou uri, he whakaaro hoki ki a Aperahama ki taku pononga.

²⁵ Na, ka hangā e ia he aata ki reira, a ka karanga atu ia ki te ingoa o Ihowa, ka whakatu hoki i tona teneti ki reira: a ka keria tetahi poka ki reira e nga pononga a Ihaka.

²⁶ Na, ka haere mai a Apimereke ki a ia i Kerara, ratou ko Ahutata ko tetahi o ona hoa, ko Pikora hoki ko te rangatira o tana ope.

²⁷ A ka mea a Ihaka ki a ratou, I haere mai koutou ki a au ki te aha, kua kino nei hoki koutou ki a au, kua pei hoki i a au i roto i a koutou?

²⁸ A ka mea mai ratou, i tino kite matou, kei a koe a Ihowa: koia matou i mea ai, Kia takoto he oati ki waenganui i a tatou, ki te takiwa o matou, ou, kia whakarite kawenata hoki matou ki a koe;

²⁹ Mou, kei kino to mahi ki a matou, kia penei ano me matou kihai nei i pa atu ki a koe, kihai ano hoki i aha ki a koe, heoi ano ko te pai anake, a i ata tuku mai ano hoki i a koe: he manaakitanga koe inaianei na Ihowa.

³⁰ Na, ka tukua e ia he hakari ma ratou, a ka kai ratou ka inu.

³¹ Na, ka maranga wawe ratou i te ata, a ka oati ratou ki tetahi ki tetahi: a tukua ana ratou e Ihaka kia haere, a hoki marie atu ana ratou i a ia.

³² A, i taua rangi ano ka haere mai nga pononga a Ihaka, a ka korerotia e ratou ki a ia te poka i keria e ratou, a ka mea mai ratou ki a ia, Kua kitea he wai e matou.

³³ A huaina iho e ia taua poka ko Hepaha: no reira te ingoa o tena pa o Peere-hepa, a mohoa noa nei.

³⁴ A, ka wha tekau nga tau o Ehau, na, ka tango ia i a Iuriti tamahine a Peeri Hiti, hei wahine mana, raua ko Pahemata tamahine a Erona Hiti:

³⁵ A ka pouri te ngakau o Ihaka raua ko Ripeka i a raua.

UPOKO 27.

A i te mea kua koroheketia a Ihaka, a kua atarua ona kanohi, i kore ai ia e kite, na, ka karangatia e ia a Ehau tana tamaiti kaumatua, ka mea ki a ia, E taku tamaiti, a ka mea mai ia ki a ia, Tenei ahau.

² Na, ka mea ia, Nana, ka koroheketia nei ahau, a e kore e mohio ki te ra e mate ai ahau:

³ Na, tena, mauria atu o mea, to papa pere me to kopere, a haere ki te koraha, ki te hopu kai maku;

⁴ Ka takā ai i tetahi kai reka maku: hei taku i pai ai, a ka mau mai ki a au hei kai maku; kia manaaki ai toku wairua i a koe i te mea kahore ano ahau kia mate noa.

⁵ A i rongo ano a Ripeka i te kupu a Ihaka ki a Ehau ki tana tamaiti. Na, ko te haerenga o Ehau ki te koraha ki te hopu kai, hei maunga mai mana.

⁶ Na, ka korero atu a Ripeka ki a Hakopa ki tana tamaiti, ka mea, Nana, kua rongo ahau i tou papa e korero ana ki a Ehau ki tou tuakana, e mea ana,

⁷ Mauria mai maku tetahi kai, ka taka hoki i tetahi kai reka maku, hei kai maku, kia manaaki ai ahau i a koe i te aroaro o Ihowa keiwha mate ahau.

⁸ Na, tena, whakarongo mai ki toku reo, e taku tamaiti, kia rite ki taku e whakahau atu nei ki a koe.

⁹ Haere ra ki te kahui, tikina atu hoki i reira etahi kuao koati maku, kia rua, hei nga mea pai, a maku ena mea e taka hei kai reka ma tou papa, hei pera me tana e pai ai:

¹⁰ A me kawe atu e koe ki tou papa, hei kai mana, kia manaaki ai ia i a koe keiwha mate ia.

¹¹ Na, ka mea mai a Hakopa ki a Ripeka ki tona whaea, Na, he tangata huruhuru a Ehau toku tuakana, ko au ia he tangata maenene:

¹² Tera pea toku papa e whawha mai ki a au, a ka rite ahau ki te tangata tinihanga ki tana whakaaro mai: a he kanga te mea e riro mai i a au, kahore hoki he manaakitanga.

¹³ Na, ko te meatanga mai a tona whaea ki a ia, Hei runga i a au tou kanga, e taku tamaiti: kia whakarongo mai ia koe ki toku reo, a haere, tikina aua mea ki a au.

¹⁴ Na, haere ana ia ki te tiki, a kawea mai ana ki tona whaea: a ka takā e tona whaea he kai reka, he pera hoki me to tona papa i pai ai.

¹⁵ Na, ka tikina e Ripeka nga kakahu papai o Ehau o tana tamaiti kaumatua, i a ia hoki ena mea i roto i te whare; a whakakakahuria atu ana e ia ki a Hakopa ki tana tamaiti o muri:

¹⁶ A i whakapiritia ano e ia nga hiako o nga kuao koati ki ona ringaringa, ki te wahi maenene hoki o tona kaki:

¹⁷ Na, ka hoatu e ia te kai reka me te taro, i hangā e ia, ki te ringaringa o Hakopa o tana tamaiti.

¹⁸ Na, ka haere ia ki tona papa, ka mea atu, E toku matua: a ka mea mai ia, Tenei ahau; ko wai koe, e taku tamaiti?

¹⁹ Na, ka mea atu a Hakopa ki tona papa, Ko Ehau ahau, ko to matamua; kua oti i a au tau i ki mai ai ki a au: maranga ra, noho ake ki te kai i te kai i hopukia mai nei e ahau, kia manaaki ai tou wairua i a au.

²⁰ Na, ko te meatanga mai a Ihaka ki tana tamaiti, Na te aha i hohoro ai koe te kite, e taku tamaiti? A ka mea atu ia, Na Ihowa hoki na tou Atua i mea kia tupono mai ki toku aroaro.

²¹ A ka mea mai a Ihaka ki a Hakopa, Neke mai nei, kia whawha atu ai ahau ki a koe, e taku tamaiti, ko Ehau ranei koe, ko taku tamaiti pu, kahore ranei.

²² Na, ka neke atu a Hakopa ki a Ihaka ki tona papa, a ka whawha mai ia ki a ia, a ka mea, Ko te reo, no Hakopa te reo, ko nga ringaringa ia, no Ehau nga ringaringa.

²³ A kihai ia i mohio ki a ia, no te mea he huruhuru ona ringaringa, i rite ki nga ringaringa o Ehau o tona tuakana: na, ka manaaki ia i a ia.

²⁴ A ka mea, Ko taku tamaiti pu ranei koe ko Ehau? A ka mea atu ia, Ko au ra tenei.

²⁵ Na, ka mea mai ia, Kawea mai ki a au, kia kai ai ahau i te kai i hopukia mai e taku tamaiti, kia manaaki ai toku wairua i a koe. Na, kawea atu ana e ia ki a ia, a kai ana ia: a i kawea ano e ia he waina ki a ia, a inu ana ia.

²⁶ Katahi ka mea mai a Ihaka tona papa ki a ia, Neke mai nei ki te kihi i a au, e taku tamaiti.

²⁷ Na, ka neke atu ia, a ka kihi ia i a ia: a ka hongi ia i te haunga o ona kakahu, a ka manaaki i a ia, ka mea, Titiro hoki, rite tahi te haunga o taku tamaiti ki te haunga o te parae i manaakitia e Ihowa:

²⁸ A kia homai ano e te Atua ki a koe te tomairangi o te rangi, me te momonatanga o te whenua, kia nui ano hoki te witi me te waina:

²⁹ Kia mahi nga iwi ki a koe, kia piko iho hoki nga tauiwi ki a koe: kia waiho koe hei rangatira mo o teina, a kia piko iho ki a koe nga tamariki a tou whaea: kia kangā te tangata e kanga ana i a koe, a kia manaakitia te tangata e manaaki ana i a koe.

³⁰ A te mutunga o te manaakitanga a Ihaka i a Hakopa, a, puta kau atu a Hakopa i te aroaro o Ihaka o tona papa, na, ka tae mai a Ehau tona tuakana i tana hopu kirehe mohoao.

³¹ Kua oti ano hoki i a ia tetahi kai reka te taka, a kawea mai ana ki tona papa, na ka mea mai ia ki tona papa, Kia ara ake toku papa, ki te kai i te mea i hopukia mai e tana tamaiti, kia manaaki ai tou wairua i a au.

³² Na, ka mea mai a Ihaka tona papa ki a ia, Ko wai koe? A ka mea atu ia, Ko to tamaiti ahau, ko Ehau, ko to matamua.

³³ Na, tino wiri rawa ana a Ihaka, a ka mea, Ha, ko wai ra tenei i hopukia nei he kai e ia, a kawea mai ana ki a au, a kainga katoatia ana e ahau i te mea kahore ano koe i tae mai, a manaakitia ana ia e ahau? ae ra, ka manaakitia ano ia.

³⁴ A, te rongonga o Ehau i nga kupu a tona papa, na, ka tangi ia, he nui, he tiwerawera te tangi, a ka mea ki tona papa, Manaakitia ahau, ae ra, ahau ano hoki, e toku papa.

³⁵ A ka mea mai ia, I haere tinihanga mai tou teina, a riro ana tou manaakitanga i a ia.

³⁶ Na, ka mea ia, Ehara ianei a Hakopa i te ingoa e tika ana kia karangatia ki a ia? ka rua nei hoki ana mamingatanga i a au: ko taku matamuatanga kua riro i a ia; a, inaianei nei kua riro taku manaakitanga i a ia. A ka mea ano ia, Kahore ranei i mahue atu ki a koe tetahi manaakitanga moku?

³⁷ Na, ka whakahokia mai e Ihaka, a ka mea ki a Ehau, Na, kua waiho nei ia e ahau hei rangatira mou, kua hoatu ano hoki ona tuakana katoa ki a ia hei apa; a kua whakaukia ake ia e ahau ki te witi ki te waina: a ko te aha hoki taku e mea ai ki a koe, e taku tamaiti?

³⁸ Na, ka mea a Ehau ki tona papa, Kotahi ano ianei tau manaakitanga, e toku papa? manaakitia ahau, ae ra, ahau ano hoki, e toku papa. Na, nui atu te reo o Ehau ki te tangi.

³⁹ Na, ka whakahokia mai e Ihaka e tona papa, a ka mea ki a ia, Na, no te momonatanga o te whenua te nohoanga mou, no te tomairangi hoki o te rangi i runga;

⁴⁰ A ma to hoari e ora ai koe, a me mahi koe ki tou teina; a tenei ake, kei to kakenga hei rangatira, na, ka wahia atu e koe tana ioka i tou kaki.

⁴¹ Na, ka mauahara atu a Ehau ki a Hakopa mo te manaakitanga i manaakitia ai ia e tona papa: a ka mea a Ehau i roto i tona ngakau, E tata ana nga ra e uhungatia ai toku papa; ko reira ahau patu ai i toku teina i a Hakopa.

⁴² Na, ka korerotia mai ki a Ripeka nga kupu a Ehau a tana tamaiti kaumatua: a ka tono tangata atu ia, ki te karanga i a Hakopa i tana tamaiti o muri, ka mea ki a ia, Tenei a Ehau tou tuakana te whakamarie nei i a ia, te mea nei ki a koe kia patua e ia.

⁴³ Na, whakarongo mai aianei, e taku tamaiti, ki toku reo; whakatika, rere atu ki a Rapana ki toku tungane ki Harana;

⁴⁴ A hei a ia koe noho ai mo etahi rangi, kia tahuri atu ra ano te aritarita a tou tuakana;

⁴⁵ Kia tahuri atu ra ano i a koe te riri a tou tuakana, kia wareware ano hoki i a ia tau i mea ai ki a ia: katahi ahau ka tono tangata atu ki te tiki i a koe i reira: kia tangohia atu korua i a au i te rangi kotahi hei aha?

⁴⁶ Na, ka mea mai a Ripeka ki a Ihaka, E hoha ana ahau ki te ora i nga tamahine a Hete: ki te tango a Hakopa i tetahi wahine mana i roto i nga tamahine a Hete, i tetahi e penei ana me enei tamahine o te whenua nei, hei aha ake maku te ora?

UPOKO 28.

Na, ka karangatia a Hakopa e Ihaka, a ka manaaki ia i a ia, ka ako hoki i a ia, a ka mea ki a ia, Kaua e tikina tetahi wahine mau i roto i nga tamahine o Kanaana.

² Whakatika, haere ki Parana-arama, ki te whare o Petuere o te papa o tou whaea; ka tango ai i tetahi wahine mau i reira, i roto i nga tamahine a Rapana a te tungane o tou whaea.

³ A ma te Atua kaha rawa koe e manaaki, mana hoki koe e mea kia hua, kia nui, a kia meinga ano koe hei huihuinga iwi;

⁴ A kia homai ano e ia ki a koe te manaakitanga o Aperahama, ki a koutou tahi ano ko ou uri; a kia riro mai i a koe te whenua e noho manene nei koe, i homai nei hoki e te Atua ki a Aperahama.

⁵ Na, tonoa atu ana a Hakopa e Ihaka: a haere ana ia ki Parana-arama ki a Rapana, ki te tama a Petuere Hiriani, ki te tungane o Ripeka whaea o Hakopa raua ko Ehau.

⁶ A ka kite a Ehau kua manaaki a Ihaka i a Hakopa, kua tono hoki i a ia ki Parana-arama ki te tiki i tetahi wahine mana i reira; a kua ako ano i a ia i tana manaakitanga ai i a ia, kua mea, Kei tikina he wahine mau i roto i nga tamahine o Kanaana;

⁷ A kua rongo ano a Hakopa ki tona papa raua ko tona whaea, kua riro hoki ki Parana-arama;

⁸ A te kitenga o Ehau e kino ana nga tamahine o Kanaana ki te titiro a Ihaka a tona papa;

⁹ Na, ka haere a Ehau ki a Ihimaera, a tangohia mai ana e ia ki roto ki ana wahine a Maharata hei wahine mana, te tamahine a Ihimaera tama a Aperahama, te tuahine o Nepaiota.

¹⁰ Na, ka turia atu e Hakopa i Peere-hepa, a haere ana ki Harana.

¹¹ A ka pono atu ia ki tetahi wahi, na moe ana i reira, no te mea kua rere te ra; na, ka tikina atu e ia tetahi o nga kohatu o taua wahi, a waiho ana e ia hei urunga mona, a ka takoto iho i taua wahi, ka moe.

¹² Na, moe iho ia, a ko tetahi arawhata e tu ana i runga i te whenua, ko tona pito hoki kua tutuki atu ki te rangi: a ko nga anahera a te Atua e piki atu ana, e heke iho ana i runga i taua mea.

¹³ A ko Ihowa e tu ana i runga i taua mea, e mea mai ana, Ko Ihowa ahau ko te Atua o Aperahama o tou papa, ko te Atua hoki o Ihaka: ko te whenua e takoto na koe ka hoatu e ahau ki a koe, ki ou uri ano hoki.

¹⁴ A ka rite ou uri ki te puehu o te oneone, a ka tohatoha atu koe ki te taha ki te weta, ki te rawhiti, ki te nota hoki, me te tonga: a mau, ma to uri hoki, e manaakitia ai nga hapu katoa o te whenua.

¹⁵ A, kei a koe tenei ahau, a ka tiaki ahau i a koe i nga wahi katoa e haere ai koe, ka whakahoki mai ano ahau i a koe ki tenei whenua; e kore hoki ahau e whakarere i a koe, kia oti ra ano taku i ki atu ai ki a koe.

¹⁶ Na, ka oho ake a Hakopa i tana moe, a ka mea, He pono kei tenei wahi a Ihowa; a kihai ahau i mohio.

¹⁷ Na, ka wehi ia, ka mea, Ano te wehi o tenei wahi! ehara tenei i te mea ke atu i te whare o te Atua, ko te kuwaha ano tenei ki te rangi.

¹⁸ Na, ka ara wawe a Hakopa i te ata, a ka mau ki te kohatu i waiho hei urunga mona, a whakaturia ana e ia hei pou, a ringitia iho e ia he hinu ki runga.

¹⁹ A huaina iho e ia te ingoa o taua wahi ko Pete-ere: ko Rutu ia te ingoa o taua pa i mua.

²⁰ Na, ka puaki ta Hakopa kupu taurangi, a ka mea ia, Ki te mea ka tata mai ki a au te Atua, a ka tiakina ahau e ia i tenei ara e haere nei ahau, a ka homai e ia ki a au he taro hei kai, me tetahi kakahu hei kakahu,

²¹ A ka hoki mai ahau i runga i te rangimarie ki te whare o toku papa; na ka waiho a Ihowa hei Atua moku:

²² A ka waiho hei whare mo te Atua tenei kohatu i whakaturia nei e ahau hei pou: ka hoatu ano hoki e ahau ki a koe nga whakatekau o nga mea katoa e homai e koe ki a au.

UPOKO 29.

Na, ka turia atu e Hakopa, a ka haere ki te whenua o nga tangata o te rawhiti.

² A tana tirohanga atu, na ko tetahi poka i te parae, a kei reira ano hoki etahi kahui hipi e toru e takoto ana; i whakainumia hoki e ratou nga kahui ki te wai o taua poka: me tetahi kohatu nui hoki i te waha o te poka.

³ A i huihuia ki reira nga kahui katoa: a i whakatakā atu e ratou te kohatu i te waha o te poka, kia whakainumia ai nga hipi, na, ka whakahokia ano e ratou te kohatu ki te waha o te poka ki tona wahi ano.

⁴ Na, ka mea a Hakopa ki a ratou, E aku tuakana, no hea koutou? a ka mea mai ratou, No Harana matou.

⁵ Na, ka mea ia ki a ratou, E mohio ana ianei koutou ki a Rapana tama a Nahora? A ka mea mai ratou, E mohio ana ano matou.

⁶ A ka mea ia ki a ratou, E ora ana ranei ia? A ka mea mai ratou, E ora ana ano: a ko Rahera tenei ko tana tamahine, te haere mai nei me nga hipi.

⁷ Na, ka mea atu ia, Nana, e nui ana ano te ra, ehara tenei i te wa hei huihuinga mai mo nga kararehe: whakainumia nga hipi, haere hoki ki te whangai.

⁸ Na, ka mea mai ratou, E kore e taea e matou, kia huihuia mai ra ano nga kahui katoa, kia whakatakā hoki e ratou te kohatu i te waha o te poka; katahi ka whakainu matou i nga hipi.

⁹ I a ia ano e korero ana ki a ratou, na, ka puta mai a Rahera me nga hipi a tona papa: ko ia hoki te kai whangai.

¹⁰ A te kitenga o Hakopa i a Rahera tamahine a Rapana tungane o tona whaea, me nga hipi hoki a Rapana tungane o tona whaea, na, ka haere atu a Hakopa, a whakatakā atu ana e ia te kohatu i te waha o te poka, whakainumia ana e ia nga hipi a Rapana tungane o tona whaea.

¹¹ Na, ka kihi a Hakopa i a Rahera, a nui atu tona reo ki te tangi.

¹² Na, ka korerotia mai e Hakopa ki a Rahera ko ia te teina o tona papa, he tamaiti hoki na Ripeka: a ka rere atu ia ki te korero ki tona papa.

¹³ A te rongonga o Rapana i te rongo o Hakopa o te tamaiti a tona tuahine, na, ka rere ia ki te whakatau i a ia, a ka awhi i a ia, ka kihi hoki i a ia, kawea ana ia e ia ki tona whare. A ka korerotia mai e ia enei mea katoa ki a Rapana,

¹⁴ Na, ka mea mai a Rapana ki a ia, He pono ko toku wheua me toku kikokiko koe. A kotahi te marama i noho ai ia ki a ia.

¹⁵ Na, ka mea mai a Rapana ki a Hakopa, No te mea ko taku teina koe, me mahi noa ano koe ki a au? korerotia mai ki a au, me aha he utu mou?

¹⁶ Na, tokorua nga tamahine a Rapana: te ingoa o te tuakana ko Rea, te ingoa hoki o te teina ko Rahera.

¹⁷ A he papahewa nga kanohi o Rea; he mea ahuareka ia a Rahera, he ataahua hoki ki te titiro atu.

¹⁸ A i aroha a Hakopa ki a Rahera; a ka mea ia, Kia whitu nga tau e mahi ahau ki a koe mo Rahera mo to tamahine o muri.

¹⁹ Na, ka mea mai a Rapana, Engari te hoatu e ahau ki a koe, kei hoatu ki te tangata ke: e noho ki a au.

²⁰ Na, e whitu nga tau i mahi ai a Hakopa mo Rahera; a he rangi torutoru noa ake te rite o aua tau ki tana whakaaro iho, i tona aroha hoki ki a ia.

²¹ Na, ka mea atu a Hakopa ki a Rapana, Homai taku wahine, kua rite nei hoki oku ra, a ka haere ahau ki roto ki a ia.

²² Na, ka huihuia mai e Rapana nga tangata katoa o taua wahi, a tukua ana e ia he hakari.

²³ A i te ahiahi, na, ka mau ia ki a Rea ki tana tamahine, a kawea atu ana ia ki a ia; a ka haere ia ki roto ki a ia.

²⁴ A i hoatu e Rapana a Tiripa tana pononga wahine hei pononga ma Rea ma tana tamahine.

²⁵ A i te ata, na, ko Rea ia: a ka mea ia ki a Rapana, He aha tenei mahi au ki a au? ehara ianei a Rahera i taku i mahi ai ahau ki a koe? a na te aha koe i tinihanga ai ki a au?

²⁶ Na, ko te meatanga mai a Rapana, Ehara tenei i te tikanga o to matou whenua kia hoatu te teina ki mua o te tuakana.

²⁷ Whakatutukitia te wiki mo tenei, ka hoatu ano hoki ia e matou ki a koe mo te mahi e mahi ai koe ki a au i etahi atu tau e whitu.

²⁸ A pera ana a Hakopa, a whakatutukitia ana e ia te wiki mo tenei: a ka homai e ia a Rahera tona tamahine ki a ia hei wahine mana.

²⁹ A i homai ano e Rapana a Piriha tona pononga wahine ki a Rahera ki tana tamahine, hei pononga mana.

³⁰ Na, ka haere ano hoki ia ki roto ki a Rahera, a nui atu tona aroha ki a Rahera i tona ki a Rea; a e whitu atu nga tau i mahi ai ia ki a ia.

³¹ A te kitenga o Ihowa e kinongia ana a Rea, na, ka whakatuwheratia e ia tona kopu: he pakoko ia a Rahera.

³² Na, ka hapu a Rea, a ka whanau he tamaiti, a huaina ana e ia tona ingoa ko Reupena: i mea hoki ia, Mo Ihowa hoki i titiro mai ki taku tangihanga; ta te mea hoki akuanei taku tahu aroha ai ki a au.

³³ Na, ka hapu ano hoki ia, a ka whanau he tamaiti; a ka mea ia, I rongo hoki a Ihowa e kinongia ana ahau, koia i homai ai hoki e ia tenei ki a au: huaina ana e ia tona ingoa ko Himeona.

³⁴ Na, ka hapu ano hoki ia, a ka whanau he tamaiti; a ka mea ia, Katahi ano taku tahu ka piri mai ki a au, no te mea hoki ka tokotoru a maua tamariki ka whanau; no reira i huaina ai e ia tona ingoa ko Riwai.

³⁵ Na, ka hapu ano hoki ia, a ka whanau he tamaiti; a ka mea ia, Katahi au ka whakamoemiti atu ki a Ihowa: koia i huaina ai e ia tona ingoa ko Hura; a ka mutu ona whanautanga.

UPOKO 30.

A te kitenga o Rahera kahore ano i whanau tetahi tamaiti ma raua ko Hakopa, na, ka hae a Rahera ki tona tuakana; a ka mea ki a Hakopa, Kia whai tamariki ahau, na, ki te kahore, ka mate ahau.

² Na, ka mura ake te riri a Hakopa ki a Rahera: a ka mea ia, Ko te Atua ranei ahau e kaiponu atu nei i te hua mo tou kopu?

³ A ka mea tera, Na, taku pononga wahine a Piriha, haere ki roto ki a ia; a kia whanau ia ki runga ki oku turi, a mana ka tu ai ahau.

⁴ Na, ka homai e ia a Piriha tana pononga wahine ki a ia hei wahine: a ka haere atu a Hakopa ki roto ki a ia.

⁵ Na, ka hapu a Piriha, a ka whanau ta raua tamaiti ko Hakopa.

⁶ Na, ka mea a Rahera, Kua whakarite te Atua i taku whakawakanga, kua rongo ano hoki ki toku reo, a homai ana e ia tetahi tamaiti ki a au: no reira i huaina ai e ia tona ingoa ko Rana.

⁷ Na, ka hapu ano hoki a Piriha te pononga wahine a Rahera, a ka whanau te rua o a raua tamariki ko Hakopa.

⁸ Na, ka mea a Rahera, Nui whakaharahara nga nonoketanga i nonoke ai maua ko toku tuakana, a taea ana ia e ahau: na, huaina iho e ia tona ingoa ko Napatari.

⁹ A te kitenga o Rea ka mutu ia te whanau, na, ka tango ia i a Tiripa i tana pononga wahine, a hoatu ana e ia ki a Hakopa hei wahine.

¹⁰ Na, ka whanau te tamaiti a Hakopa raua ko Tiripa pononga a Rea.

¹¹ A ka mea a Rea, He ope te haere mai nei: na, huaina ana e ia tona ingoa ko Kara.

¹² Na, ka whanau te rua o nga tamariki a Hakopa raua ko Tiripa pononga a Rea.

¹³ A ka mea a Rea, E hari ana ahau, ka kiia nei hoki ahau e nga tamahine he mea hari: a huaina ana e ia tona ingoa ko Ahera.

¹⁴ Na, ka haere a Reupena i nga ra o te kotinga witi, a ka kitea e ia etahi manitareki i te koraha, a kawea mai ana e ia ki a Rea ki tona whaea. A ka mea atu a Rahera ki a Rea, Tena koa maku etahi o nga manitareki a to tamaiti.

¹⁵ Na, ko te meatanga mai a tera ki a ia, He mea nohinohi ianei to tangohanga i taku tahu? a, me tango ano koe i nga manitareki a taku tamaiti? A ka mea atu a Rahera, Na, me takoto ia ki a koe i tenei po hei utu mo nga manitareki a to tamaiti.

¹⁶ A, i te haerenga mai o Hakopa i te mara i te ahiahi, na ka puta atu a Rea ki te whakatau i a ia, a ka mea atu, Me haere mai koe ki a au; kua oti hoki koe te hoko e au ki nga manitareki a taku tamaiti. Na, ka takoto ia ki a ia i taua po.

¹⁷ A i whakarongo mai te Atua ki a Rea, a ka hapu ia, a ka whanau te tokorima o a raua tamariki ko Hakopa.

¹⁸ Na, ka mea a Rea, Kua homai e te Atua taku utu moku i hoatu i taku pononga ki taku tahu: a huaina ana e ia tona ingoa ko Ihakara.

¹⁹ Na, ka hapu ano a Rea, a ka whanau te tokoono o a raua tamariki ko Hakopa.

²⁰ Na, ka mea a Rea, He pai te hakari i homai nei e te Atua ki a au; katahi taku tahu ka noho ki a au, mo te whanautanga o a maua tamariki tokoono: huaina ana e ia tona ingoa ko Hepuruna.

²¹ A muri iho ka whanau he kotiro, a huaina ana e ia tona ingoa ko Rina.

²² A i mahara mai te Atua ki a Rahera, a i whakarongo mai te Atua ki a ia, a whakatuwheratia ana e ia tona kopu.

²³ Na, ka hapu ia, a ka whanau he tamaiti; a ka mea ia, Kua whakamutua e te Atua toku tawainga:

²⁴ Na, huaina ana e ia tona ingoa ko Hohepa; a ka mea, Ka tapiritia mai e Ihowa, tetahi atu tamaiti maku.

²⁵ A ka whanau a Hohepa i a Rahera, na, ka mea a Hakopa ki a Rapana, Tukua atu ahau, a ka haere ahau ki toku wahi, me toku whenua.

²⁶ Homai aku wahine me aku tamariki i mahi ai ahau ki a koe, a ka haere ahau: e mohio ana hoki koe ki taku mahi i mahi ai ahau ki a koe.

²⁷ Na, ka mea a Rapana ki a ia, Ki te mea e manakohia mai ana ahau e koe, e noho: kua kite noa ake nei hoki ahau he whakaaro ki a koe i manaakitia ai ahau e Ihowa.

²⁸ A i mea ano ia, Whakaritea mai ki a au te utu mou, a ka hoatu e ahau.

²⁹ A ka mea mai ia ki a ia, E mohio ana koe ki taku mahinga ki a koe, ki o kararehe hoki i a au, to ratou peheatanga.

³⁰ I mua hoki i a au he iti au mea, na kua nui noa atu tenei; no taku taenga mai nei hoki i manaakitia ai koe e Ihowa: a, ahea ranei tenei ahau mea ai i tetahi mea mo taku whare hoki?

³¹ A ka mea tera, Ko te aha taku e hoatu ai ki a koe? A ka mea a Hakopa, Kaua e homai tetahi mea ki a au: ki te meatia mai e koe tenei mea aku, ka whangai ano ahau, ka tiaki i o hipi.

³² Ka tika ahau na waenganui i to kahui akuanei, a ka wehea atu i roto nga mea whai tongitongi katoa, nga mea purepure, me nga koati: i roto i nga hipi, me nga purepure, me nga mea whai tongitongi i roto i nga pakaka koati: a ko era hei utu moku.

³³ Penei ka whakatikaia ahau e taku tika apopo ake nei, ina tae atu ki tou aroaro ki te utu moku: ko nga mea i roto i nga koati kahore nei he tongitongi, kahore he purepure, me nga mea kahore e pakaka i roto i nga hipi, he mea tahae tena naku.

³⁴ Na, ka mea a Rapana, Ae, e mea ana ahau kia penei ano me tau i ki mai na.

³⁵ Na, ka wehea atu e ia i taua rangi ano nga koati toa nga mea whakahekeheke, me nga mea purepure, me nga koati uha e whai tongitongi ana, me nga mea purepure, nga mea i ma tetahi wahi, me nga mea pakaka o nga hipi, a hoatu ana ki te ringaringa o ana tamariki.

³⁶ Na, ka whakatakiwatia e ia he takiwa ki a ia ki a Hakopa, kia toru nga ra e haerea ai: a ka whangai a Hakopa i nga hipi a Rapana i mahue iho.

³⁷ Katahi ka tikina e Hakopa etahi rakau mana, he papirara mata, he hatera, he hetenati: a tihorea ana e ia etahi tihorenga ma i aua mea, a ka meinga kia ata kitea te wahi ma o nga rakau.

³⁸ A i whakaturia e ia aua rakau i tihorea ra ki roto ki nga hake, ki roto ki nga kumete wai, i nga haerenga mai o nga hipi ki te inu, ki te ritenga mai o nga hipi, kia whakahaputia ai ratou ina haere mai ki te inu.

³⁹ A i whakahaputia nga kahui ki nga rakau, a he whakahekeheke, he mea tongitongi, he purepure, nga kuao i whanau.

⁴⁰ Na, ka wehea atu nga reme e Hakopa, a whakaangahia mai ana e ia nga kanohi o nga kahui ki nga mea whakahekeheke, ki nga mea pakaka katoa i roto i te kahui a Rapana; i wehea ano hoki e ia ana kahui ki a ratou anake, kihai hoki i tukua ki roto ki te kahui a Rapana.

⁴¹ A ka whakahaputia nga mea kaha, na, ka whakaturia e Hakopa nga rakau ki te tirohanga mai a nga kahui, ki roto ki nga hake, kia whakahaputia ai ratou ki nga rakau.

⁴² A ki te mea he kahakore te hipi, kihai i whakaturia e ia: na, i a Rapana nga mea kahakore, a i a Hakopa nga mea kaha.

⁴³ Na, ka tino nui haere rawa taua tangata, a ka whai hipi ano ia, tona tini, me nga pononga wahine, me nga pononga tane, me nga kamera, me nga kaihe.

UPOKO 31.

A i rongo ia i nga kupu a nga tamariki a Rapana, e ki ana, Kua riro i a Hakopa nga mea katoa a to tatou papa; na nga mea hoki a to tatou papa i whiwhi ai ia ki tenei kororia katoa.

² Na, ka titiro atu a Hakopa ki te mate o Rapana, a kihai i pera mai ki a ia me to era rangi ake.

³ A ka mea mai a Ihowa ki a Hakopa, Hoki atu ki te whenua o ou mātua, ki ou whanaunga hoki; a ka tata ahau ki a koe.

⁴ Na, ka tono tangata atu a Hakopa hei karanga i a Rahera raua ko Rea ki tana kahui ki te parae.

⁵ Na, ka mea atu ia ki a raua, Kua kite ahau i te mate o to korua papa, kahore e pera mai ki a au me to era rangi ake; otiia i tata mai ki a au te Atua o toku papa.

⁶ E mohio ana ano korua i poto katoa atu toku kaha ki taku mahi ki to korua papa.

⁷ Ko to korua papa ia i tinihanga ki a au, a ka tekau ana whakaputanga ketanga i oku utu; otiia kihai ia i tukua e te Atua kia tukino i a au.

⁸ I tana meatanga, Hei nga mea whai tongitongi te utu mou; na, he mea tongitongi katoa nga whanau o nga kahui: a i tana meatanga, Hei nga mea whakahekeheke he utu mou, na, he whakahekeheke katoa nga whanau o nga kahui.

⁹ Na Ihowa hoki i tango nga hipi a to korua papa a homai ana ki a au.

¹⁰ A i te wa i whakahaputia ai nga hipi, na, ka maranga ake oku kanohi, a ka kite moemoea ahau, a ko nga toa i ekengia ai nga kahui, he whakahekeheke, he mea whai tongitongi, he mea kotingotingo.

¹¹ A i korero moemoea mai ano te anahera a te Atua ki a au, E Hakopa: a ka mea atu ahau, Tenei ahau.

¹² Na, ka mea mai ia, Tena, kia maranga o kanohi, tirohia atu hoki nga toa katoa e ekeeke ana i nga kahui, he mea whakahekeheke, he mea whai tongitongi, he mea kotingotingo hoki: kua kite nei hoki ahau i nga mea katoa i mea nei a Rapana ki a koe.

¹³ Ko ahau te Atua o Pete-ere o te wahi i whakawahi na koe i te pou, i puaki ai hoki to kupu taurangi ki a au: tena, whakatika, haere atu i tenei whenua, a hoki atu ki te whenua i whanau ai koe.

¹⁴ Na, ka whakahokia mai e Rahera raua ko Rea, a ka mea ki a ia, Tera atu ano ianei tetahi wahi, tetahi taonga tupu ranei mo maua i roto i te whare o to maua papa?

¹⁵ Kahore ianei maua e kiia e ia he wahine ke noa atu? kua hokona nei hoki maua e ia, a kua pau rawa ano hoki i a ia a maua moni.

¹⁶ Mo tatou nei hoki, mo a tatou tamariki nga taonga katoa i tangohia nei e te Atua i to maua papa: na, tena, meatia e koe nga mea katoa i kiia mai e te Atua ki a koe.

¹⁷ Na, ka whakatika a Hakopa, a whakaekea ana e ia ana tamariki me ana wahine ki runga ki nga kamera;

¹⁸ A ka whakina atu ana e ia ana kararehe katoa, me ona taonga katoa i whiwhi ai ia, nga kararehe i whiwhi ai ia, i riro mai hoki i a ia i Parana-arama, a haere ana ki a Ihaka ki tona papa ki te whenua o Kanaana.

¹⁹ Ko Rapana hoki, kua riro ia ki te kokoti i ana hipi: na, ka tahaetia e Rahera nga whakapakoko o tona papa.

²⁰ Na, tahuti mai ana a Hakopa i a Rapana Hiriani, a kihai i whakaaturia e ia tona omanga ki a ia.

²¹ Na, ka oma ia, me ana mea katoa; a ka whakatika, ka whiti i te awa, i ahu hoki tona mata ki Maunga Kireara.

²² A i te toru o nga ra ka korerotia ki a Rapana kua oma a Hakopa.

²³ Na, ka tango ia i ona teina hei hoa mona, a ka whai i a ia, e whitu nga ra ki te ara; a mau rawa mai ia i Maunga Kireara.

²⁴ Na, ka puta moemoea mai te Atua ki a Rapana Hiriani i te po, a ka mea ki a ia, Kia tupato koe kei korero koe ki a Hakopa, ahakoa pai, ahakoa kino.

²⁵ Na, ka mau a Hakopa i a Rapana. A i whakaturia e Hakopa tona teneti ki te maunga: me Rapana hoki, i whakaturia o ratou ko ona teina ki Maunga Kireara.

²⁶ Na, ka mea a Rapana ki a Hakopa, He mahi aha tau, i tahuti mai nei koe i a au, i kahaki mai nei hoki i aku tamahine, ano he pārau na te hoari?

²⁷ Na te aha i hunā ai e koe to omanga, i tahuti mai ai hoki koe i a au; a kihai i korero mai ki a au, kia tukua mai ai koe e ahau i runga i te hari, i nga waiata, me te timipera, me te haapa?

²⁸ Kihai ano hoki ahau i tukua e koe kia kihi i aku tamariki me aku tamahine? he mahi poauau ano tenei mahi au.

²⁹ Kei toku ringa ano he kaha hei whakatupu-kino i a koutou: otiia kua korero mai te Atua o to koutou papa ki a au inapo, kua mea mai, Kia tupato koe kei korero atu koe, ahakoa pai, ahakoa kino, ki a Hakopa.

³⁰ Na, i a koe i haere nei, no te mea i tino pirangi koe ki te whare o tou papa, na te aha ra koe i tahae ai i oku atua?

³¹ Na, ka whakahokia mai e Hakopa, a ka mea ki a Rapana, No te mea hoki i wehi ahau: i mea hoki ahau, Kei tangohia e koe o tamahine i a au.

³² Ko te tangata e kitea e koe o atua ki a ia, kaua ia e whakaorangia: tirohia iho e koe i te aroaro o o taua teina ko ehea mea au kei a au, ka tango atu ai mau. Kihai hoki a Hakopa i mohio kua tahaetia mai aua mea e Rahera.

³³ Na, ka haere atu a Rapana ki te teneti o Hakopa, ki te teneti ano hoki o Rea, ki te teneti ano hoki o nga pononga wahine tokorua; a kihai i kitea. Na, ka haere atu ia i te teneti o Rea, a ka haere ki te teneti o Rahera.

³⁴ Heoi kua tikina nga whakapakoko e Rahera, kua whaongia ki roto ki te nohoanga kamera, a nohoia iho e ia. Na, poto katoa te teneti te whawha e Rapana, a kihai i kitea.

³⁵ Na, ka mea ia ki tona papa, Kei riri mai toku ariki moku e kore e ahei te whakatika ake ki tou aroaro; no te mea ko to te wahine mate tenei kei a au. Na, ka rapu ia, a kihai i kitea nga whakapakoko.

³⁶ Na, ka riri a Hakopa, a ka ngangare ki a Rapana: a ka oho mai a Hakopa, ka mea ki a Rapana, He aha toku hara, he aha toku he, i takare ai koe ki te whai mai i a au?

³⁷ Kua whawhakia nei e koe aku mea katoa, he aha te mea i kitea e koe o nga mea katoa o tou whare? homai ki konei ki te aroaro o oku teina, o ou teina, a ma ratou e whakariterite ta taua whakawakanga.

³⁸ Ka rua tekau enei tau oku ki a koe; kihai i whanau whakatahe o hipi, me o koati, kihai ano hoki i kainga e ahau nga hipi toa o to kahui.

³⁹ Kihai i kawea mai e ahau ki a koe te mea i haea e nga kirehe mohoao; naku ano tena i whakautu; i rapu utu ano koe mo tena i toku ringa, mo te mea i tahaetia i te ao, mo te mea i tahaetia i te po.

⁴⁰ Ko taku hanga tena; i pau ahau i te awatea i te mate-wai, a i te po i te huka; a turere ana te moe i oku kanohi.

⁴¹ Ka rua tekau enei tau oku ki tou whare; kotahi tekau ma wha nga tau i mahi ai ahau ki a koe mo o tamahine tokorua, e ono tau hoki mo o hipi: a ka tekau o whakaputanga ketanga i nga utu moku.

⁴² Me i kahore i tata mai ki a au te Atua o toku papa, te Atua o Aperahama, ta Ihaka hoki e wehi nei, ina kua tonoa kautia mai ahau e koe. I kite mai te Atua i toku tukinotanga, i te mamahi hoki a oku ringa, i riria ai koe e ia inapo.

⁴³ Na, ko te whakahokinga mai a Rapana, te meatanga mai hoki ki a Hakopa, He tamahine naku enei tamahine, a he tamariki naku enei tamariki, a he kahui ano hoki naku enei kahui, a ko nga mea katoa e kite nei koe, naku: a he aha taku e mea ai akuanei ki enei tamahine aku, ki a raua tamariki ranei i whanau nei i a raua?

⁴⁴ Na, tena, haere mai, kia whakarite kawenata taua; a ka waiho hei kai whakaatu ki a taua.

⁴⁵ Na, ka tikina tetahi kohatu e Hakopa, a whakaarahia ake e ia hei pou.

⁴⁶ A ka mea ano a Hakopa ki ona teina, Kohia mai etahi kohatu; na, ka tikina atu e ratou etahi kohatu, a ka hangā he puranga: a kai ana ratou ki reira ki runga ki te puranga.

⁴⁷ A huaina iho taua mea e Rapana ko Iekarahaharuta: na Hakopa ia i hua ko Kareere.

⁴⁸ Na, ka mea a Rapana, Hei kai whakaatu tenei puranga i tenei ra ki a taua. No reira i huaina ai tona ingoa ko Kareere;

⁴⁹ Ko Mihipa hoki; i mea hoki ia, Ma Ihowa e titiro mai ki a taua, ina matara atu taua i a taua.

⁵⁰ Ki te tukino koe i aku tamahine, ki te tango ranei i etahi wahine ke atu i aku tamahine, kahore he tangata i a taua; kia mahara, hei kai titiro te Atua ki a au ki a koe.

⁵¹ A i mea mai ano a Rapana ki a Hakopa, Nana, tenei puranga, kia kite mai hoki koe i tenei pou i waiho iho nei e ahau i waenganui i a taua;

⁵² Hei kai whakaatu tenei puranga hei kai whakaatu ano hoki tenei pou, moku kei haere ki tua atu o tenei puranga ki a koe, mou hoki kei haere ake ki a au ki tua o tenei puranga, o tenei pou hoki, mo te kino.

⁵³ Ma te Atua o Aperahama, ma te Atua hoki o Nahora, ma te Atua o to raua papa, e whakarite ta taua whakawa. Na, ka oatitia e Hakopa te wehi o tona papa o Ihaka.

⁵⁴ Na, patua ana he patunga tapu e Hakopa ki runga ki te maunga, a karangatia ana e ia ona teina ki te kai taro: na, ka kai taro ratou, a ka moe ki te maunga.

⁵⁵ A ka maranga wawe a Rapana i te ata, ka kihi i ana tamariki me ana tamahine, ka manaaki hoki i a ratou: na, haere ana a Rapana, hoki ana ki tona wahi.

UPOKO 32.

Na, ka haere a Hakopa i tana huarahi, a ka tutaki mai ki a a ia nga anahera a te Atua.

² A ka mea a Hakopa i tona kitenga i a ratou, Ko te ope tenei a te Atua: na, huaina iho e ia te ingoa o tena wahi ko Mahanaima.

³ Na, ka tono tangata atu a Hakopa ki mua i a ia ki a Ehau ki tona tuakana, ki te whenua o Heira, ki te whenua o Eroma.

⁴ A ka ako ia ki a ratou, ka mea, Kia penei ta koutou kupu ki taku ariki ki Ehau; e penei ana te kupu a to pononga a Hakopa, I a Rapana ahau e noho ana i a au i roa atu nei, a mohoa noa nei:

⁵ A he kau ano aku, he kaihe, he hipi, he pononga tane, he pononga wahine, a kua tono tangata nei ahau ki te korero ki taku ariki, kia manakohia mai ai ahau e koe.

⁶ Na, ka hoki mai nga karere ki a Hakopa, a ka mea, i tae atu matou ki tou tuakana ki a Ehau, a tenei ano hoki ia te haere mai nei ki te whakatau i a koe, ratou tahi ko nga tangata e wha rau.

⁷ Na, wehi noa iho a Hakopa, a manukanuka ana; na, ka wehea e ia ona tangata, me nga hipi, me nga kau, me nga kamera, kia rua nga ropu;

⁸ I mea hoki ia, Ki te tae mai a Ehau ki te ropu tuatahi, a ka patua e ia, na, ka mawhiti, te ropu i mahue.

⁹ Na, ka mea a Hakopa, E te Atua o toku papa o Aperahama, e te Atua o toku papa o Ihaka, e Ihowa, nau nei te kupu ki a au, Hoki atu ki tou whenua, ki ou whanaunga hoki, a ka pai taku mahi ki a koe:

¹⁰ He iti rawa ahau he nui au arohatanga katoa, me te pono katoa hoki i whakaputaina mai e koe ki to pononga; i whiti hoki ahau me taku tokotoko i tenei Horano; a ka rua nei aku ropu.

¹¹ Tena ra, whakaorangia ahau i te ringaringa o taku tuakana, i te ringaringa o Ehau: e wehi ana hoki ahau i a ia, kei haere mai ia ki te patu i a au, i te whaea ratou ko nga tamariki.

¹² I mea mai nei hoki koe, Ina, ka pai taku mahi ki a koe, a ka meinga ano e ahau ou uri kia rite ki te onepu o te moana e kore nei e taea te tatau i te tini.

¹³ A i moe ia ki reira i taua po; a ka tangohia mai ano e ia he hakari mo Ehau, mo tona tuakana i roto i nga mea i pono mai ki tona ringa;

¹⁴ E rua rau nga koati uha, e rua tekau hoki nga koati toa, e rua rau nga hipi uha, a e rua tekau nga hipi toa,

¹⁵ E toru tekau nga kamera whai waiu, me a ratou kuao, e wha tekau nga kau, kotahi tekau hoki nga puru, e rua tekau nga kaihe uha, me nga kuao hoki kotahi tekau.

¹⁶ A ka homai e ia ki nga ringaringa o ana pononga, tenei kahui tenei kahui, motumotu rawa; a ka mea mai ia ki ana pononga, Haere atu i mua i a au kia whai takiwa ano hoki tetahi kahui tetahi kahui.

¹⁷ A i ako ia i te tuatahi, i mea, E tutaki a Ehau taku tuakana ki a koe, a e ui ki a koe, e mea, Na wai koe? a e haere ana koe ki hea? na wai ano hoki enei i tou aroaro?

¹⁸ Katahi koe ka mea atu, Na to pononga na Hakopa; i homai e ia hei hakari ma toku ariki ma Ehau: a tenei ano hoki ia kei muri i a matou.

¹⁹ He pera hoki tana ako ki te tuarua, ki te tuatoru hoki, ki nga tangata katoa ano hoki i haere i muri i nga kahui, i mea ia, Ko te tikanga tenei mo nga kupu e korero ai koutou ki a Ehau, ina tutaki ki a ia.

²⁰ A me ki atu ano hoki e koutou, Tenei ano hoki to pononga a Hakopa kei muri i a matou. I mea hoki ia, Me whakamarie ia e ahau ki te hakari e haere ana i mua i a au, a, muri iho ka kite ahau i tona kanohi; tera pea ia e manako mai ki a au.

²¹ Na, ka haere atu te hakari i mua i ia: a i moe ano ia i taua po i te puni.

²² A i whakatika ia i taua po, i tango hoki i ana wahine tokorua, me ana pononga wahine tokorua, me ana tamariki tekau ma tahi, a ka whiti atu i te whitinga i Iapoko.

²³ A i tango ia i a ratou, i mea hoki kia whiti atu i te awa, a i mea ano ia kia whiti atu nga mea i a ia.

²⁴ A i mahue iho a Hakopa ko ia anake; a nonoke ana raua ko tetahi tangata, a takiri noa te ata.

²⁵ A te kitenga o tera kihai ia i taea e ia, na, ka pa atu ia ki te ateatenga o tona huha; a ka takoki te ateatenga o te huha o Hakopa i a raua e nonoke ana.

²⁶ A ka mea mai ia, Tukua ahau, kua takiri hoki te ata. A ka mea atu ia, E kore koe e tukua atu e ahau, kia manaakitia ra ano ahau e koe.

²⁷ A ka mea mai ia ki a ia, Ko wai tou ingoa? a ka mea atu ia, Ko Hakopa.

²⁸ A ka mea mai ia, Heoi ano kianga ko Hakopa tou ingoa, engari ko Iharaira: no te mea kua pera to tohe ki te Atua ki te tangata me ta te rangatira, a i a koe ano te mutunga.

²⁹ Na, ka ui atu a Hakopa, a ka mea atu, Tena koa, korerotia mai tou ingoa. Ano ra ko ia, Na te aha toku ingoa i uia ai e koe? a ka manaaki ia i a ia i reira.

³⁰ Na huaina ana e Hakopa te ingoa o tena wahi ko Peniere: moku i titiro atu ki te Atua he kanohi he kanohi, a kei te ora nei au.

³¹ A i tara mai te ra ki a ia i a ia ka whiti i Penuere, a kei te totitoti tona huha.

³² Koia nga tamariki a Iharaira tē kai ai i te uaua i memenge, i tera hoki i te ateatenga o te huha, a tae noa iho ki tenei ra: no te mea hoki i pa atu ia ki te ateatenga o te huha o Hakopa, ki te uaua i memenge.

UPOKO 33.

A te marangatanga ake o nga kanohi o Hakopa, na, ka titiro atu ia, a ko Ehau e haere mai ana, ratou ko nga tangata e wha rau. Na, ka wehea e ia nga tamariki ki a Rea, ratou ko Rahera, ko nga pononga wahine tokorua.

² A i makā e ia nga pononga wahine me a raua tamariki ki mua, a ko Rea ratou ko ana tamariki ki muri iho, a, i muri rawa ko Rahera raua ko Hohepa.

³ Na, ka haere atu ia ki mua i a ratou, a e whitu ona pikonga iho ki te whenua, a tae noa ia ki tona tuakana.

⁴ Na, ka rere mai a Ehau ki te whakatau i a ia, a ka awhi i a ia, ka hinga iho hoki ki runga ki tona kaki, a ka kihi i a ia: na, ka tangi raua.

⁵ Na, ka maranga ake ona kanohi, a ka kite ia i nga wahine, ratou ko nga tamariki; a ka mea mai, Ko wai enei i a koe nei? a ka mea atu ia, Ko nga tamariki, ara, ko nga ohaohatanga mai a te Atua ki to pononga.

⁶ Na, ka whakatata mai nga pononga wahine, raua me a raua tamariki, a ka piko iho.

⁷ Na, ka whakatata mai ano a Rea, ratou ko ana tamariki, a ka piko iho: a muri iho ka whakatata mai a Hohepa raua ko Rahera, a ka piko iho raua.

⁸ A ka mea mai ia, Hei aha mau tenei ropu katoa i tutaki nei ki a au? Ano ra ko ia, Kia manakohia mai ai ahau e toku ariki.

⁹ A ka mea mai a Ehau, E nui ana, ha, taku, e taku teina; mau ano tau.

¹⁰ Ano ra ko Hakopa, Kaua ra; me he mea kua manakohia mai ahau e koe, na, me tango e koe te hakari a toku ringa: ka kite atu nei hoki ahau i tou kanohi, me te mea e titiro atu ana ahau ki te kanohi o te Atua, a ka pai mai ano koe ki a au.

¹¹ Tangohia ra taku manaakitanga i kawea atu na ki a koe; kua atawhai mai nei hoki te Atua ki a au, a e hua ana aku mea. Na, ka tohe ia ki a ia, a ka tangohia e ia.

¹² Na, ka mea ia, Hapainga, tatou ka haere, a me haere ahau i mua i a koe.

¹³ A ka mea atu ia ki a ia, E mohio ana toku ariki he kahakore nga tamariki, a kei a au ano hoki nga kahui me nga kau e hapu ana: a kia kotahi ano rangi e akiakina ana ratou, na, ka mate katoa nga kahui.

¹⁴ Me haere toku ariki i mua i tana pononga: a ka rite taku ata arataki atu ki te haere o nga mea nei i taku aroaro, ki te haere hoki o nga tamariki; kia tae ra ano ahau ki taku ariki ki Heira.

¹⁵ Na, ka mea mai a Ehau, Me waiho e ahau etahi o aku tangata ki a koe, ne? A ka mea atu ia, Hei aha? kia manakohia mai ahau e toku ariki.

¹⁶ Na, ka hoki a Ehau i taua rangi ano, a ka haere ki Heira.

¹⁷ A ka turia atu e Hakopa ki Hukota, a ka hangā e ia tetahi whare mona, i hangā ano hoki e ia etahi tihokahoka mo ana kararehe: no reira i huaina ai te ingoa o taua wahi ko Hukota.

¹⁸ A ka tae mai a Hakopa ki Hareme ki tetahi pa o Hekeme, ki te whenua o Kanaana, i tana haerenga mai i Parana-arama; a ka noho ki te ritenga atu o te pa.

¹⁹ Na, ka hokona e ia ki nga moni kotahi rau te wahi whenua i tu ai tona teneti, i te ringaringa o nga tamariki a Hamora, a te papa o Hekeme.

²⁰ A ka whakaturia e ia tetahi aata ki reira, a huaina iho e ia ko Ere-erohe-Iharaira.

UPOKO 34.

Na, ka haere atu a Rina tamahine a Rea, i whanau nei i a raua ko Hakopa, kia kite i nga tamahine o te whenua.

² A, te kitenga i a ia o Hekeme tama a Hamora Hiwi, rangatira o taua whenua, na, ka hopukia e ia, a ka takoto ia ki a ia, ka whakaiti hoki i a ia.

³ Na, ka piri tona wairua ki a Rina tamahine a Hakopa, a ka aroha ia ki taua kotiro, a ka whakamarie i te ngakau o te kotiro.

⁴ Na, ka korero a Hekeme ki a Hamora ki tona papa, ka mea, Tikina taua kotiro hei wahine maku.

⁵ A i rongo a Hakopa kua pokea a Rina tana tamahine e ia: a i te parae ana tamariki i ana kararehe: a ka whakarongo puku a Hakopa, kia tae mai ra ano ratou.

⁶ Na, ka haere atu a Hamora te papa o Hekeme ki a Hakopa ki te korero ki a ia.

⁷ Na, ka haere mai nga tamariki a Hakopa i te parae, i to ratou rongonga ai; a ka matangerengere aua tangata, ka tino riri hoki, mo tana mahi wairangi i roto i a Iharaira, i a ia i takoto ra ki te tamahine a Hakopa; he mahi hoki kihai i tika.

⁸ Na, ka korero mai a Hamora ki a ratou, ka mea, Ko Hekeme ko taku tamaiti, piri tonu tona wairua ki ta koutou tamahine: homai ia ki a ia, ne? hei wahine.

⁹ A kia marenatia tatou ki a tatou, ko a koutou tamahine me homai ki a matou, a me tango ano hoki a matou tamahine ma koutou.

¹⁰ A me noho koutou ki a matou: ka takoto atu te whenua i to koutou aroaro, mo ta koutou noho, mo ta koutou hokohoko ki konei, kia whai rawa ai hoki koutou ki konei.

¹¹ A i mea mai ano a Hekeme ki tona papa, ratou ko ona tungane, Kia manakohia mai ahau e koutou, a ko ta koutou e ki mai ai ki a au me hoatu e ahau.

¹² Kia nui noa atu te tapakuha me te hakari e meatia mai e koutou ki a au, a me hoatu e ahau ta koutou e ki mai ai ki a au: otira homai te kotiro hei wahine maku.

¹³ Na, ka whakahoki tinihanga mai nga tamariki a Hakopa ki a Hekeme, raua ko Hamora ko tona papa, i mea hoki ratou, mo Rina mo to ratou tuahine i whakapokea e ia;

¹⁴ A ka mea ratou ki a raua, E kore tenei mea e taea e matou te mea, te hoatu i to matou tuahine ki te tangata kahore i kotia; he whakahenga hoki tena mo matou.

¹⁵ Tenei ia te mea e whakaae ai matou ki a koutou: Ki te peneitia koutou me matou, ki te kotia o koutou tane katoa;

¹⁶ Katahi ka hoatu e matou a matou tamahine ki a koutou, a ka tangohia mai ano a koutou tamahine ma matou, a ka noho matou ki roto ki a koutou, a ka whaka-iwi-kotahi tatou.

¹⁷ A ki te kahore koutou e rongo ki ta matou, kia kotia koutou; na, ka tango matou i to matou tamahine, ka haere.

¹⁸ A i pai a ratou kupu ki te whakaaro iho a Hamora, ki te whakaaro ano hoki a Hekeme tama a Hamora.

¹⁹ A kihai i whakaroa taua tamaiti ki te mea i taua mea, he mate nui hoki nona ki te tamahine a Hakopa: a he nui atu ano ia i nga tangata katoa o te whare o tona papa.

²⁰ Na, ka haere mai a Hamora raua ko Hekeme ko tana tama ki te kuwaha o to raua pa, a ka korero ki nga tangata o to raua pa, ka mea,

²¹ He hunga ata noho ki a tatou tenei; na, kia noho ratou ki tenei whenua, kia hokohoko ki konei; a ko te whenua nei, e nui ana mo ratou; kia tangohia mai a ratou tamahine hei wahine ma tatou, a kia hoatu a tatou tamahine ki a ratou.

²² Kotahi ano ia te mea e whakaae mai ai aua tangata ki a tatou kia noho ki a tatou, kia waiho hei iwi kotahi, ki te kotia o tatou tane katoa, ki te peratia me ratou kua kotia nei.

²³ Ko a ratou kararehe, me o ratou taonga, me a ratou kirehe katoa, e kore ianei ena e riro mai i a tatou? erangi me whakaae atu tatou ki a ratou, a ka noho ratou ki a tatou.

²⁴ A i whakarongo mai ki a Hamora raua ko Hekeme ko tana tama nga tangata katoa i haere atu i te kuwaha o tona pa; a i kotia katoatia nga tane, nga tangata katoa i haere atu i te kuwaha o tona pa.

²⁵ A i te toru o nga ra, i a ratou e mamae ana, na, ka tango nga tamariki tokorua a Hakopa, a Himeona raua ko Riwai, nga tungane o Rina, i tana hoari i tana hoari, a haere maia mai ana ki te pa, a patua iho e raua nga tane katoa.

²⁶ A i patua ano hoki e raua a Hamora raua ko Hekeme ko tana tama ki te mata o te hoari, a tangohia mai ana e raua a Rina i roto i te whare o Hekeme, a haere ana.

²⁷ Na, ka haere mai nga tamariki a Hakopa ki te hunga i patua, a pahuatia ana e ratou te pa, mo to ratou tuahine i whakapokea e ratou.

²⁸ I tangohia e ratou a ratou hipi, me a ratou kau, me a ratou kaihe, me nga mea hoki i te pa, me nga mea hoki i te mara,

²⁹ Me o ratou taonga katoa, a whakaraua ana a ratou tamariki katoa, me a ratou wahine, a i pahuatia ano hoki nga mea katoa i roto i te whare.

³⁰ Na, ka mea mai a Hakopa ki a Himeona raua ko Riwai, Ka raru au i a korua, a ka meinga kia piro i roto i nga tangata whenua, i roto i nga Kanaani ratou ko nga Perihi: a ka huihui mai ratou ki a au, ki te hunga tokotorutoru, a ka patua ahau; a ka ngaro ahau, ahau me toku whare.

³¹ A ka mea atu raua, Kia peratia koia e ia to matou tuahine me te wahine puremu?

UPOKO 35.

Na, ka mea mai te Atua ki a Hakopa, Whakatika, haere ki runga ki Pete-ere, ki reira noho ai; ka hanga koki ki reira i tetahi aata ma te Atua i puta mai nei ki a koe, i to rerenga mai i te aroaro o Ehau o to tuakana.

² Katahi ka mea atu a Hakopa ki tona whare, ki ona tangata katoa hoki, Whakarerea atu nga atua ke i roto i a koutou, kia ma koki, a kakahuria etahi kakahu ke mo koutou:

³ Whakatika, tatou ka haere ki runga ki Pete-ere; a ka hangā e ahau ki reira tetahi aata ma te Atua i whakarongo mai nei ki a au i te ra i pouri ai ahau, i tata ano hoki ki a au i te huarahi i haere ai ahau.

⁴ Na, ka homai e ratou ki a Hakopa a ratou atua ke katoa, me nga whakakai i o ratou taringa; a ka huna e Hakopa aua mea ki raro iho i te oki i Hekeme.

⁵ Na, ka turia atu e ratou: a i runga te wehi o te Atua i nga pa i tetahi taha i tetahi taha o ratou, a kihai ratou i whai i nga tamariki a Hakopa.

⁶ Na, ka tae mai a Hakopa ki Rutu, ki tera hoki i te whenua o Kanaana, ara, ki Pete-ere, a ia me tona nuinga katoa.

⁷ A ka hangā e ia he aata ki reira, a huaina iho e ia taua wahi ko Ere-pete-ere: no te mea hoki i puta mai te Atua ki a ia ki reira, i tona rerenga i te aroaro o tona tuakana.

⁸ Na, ka mate a Tepora te kai whakangote o Ripeka, a ka tanumia ki raro i Pete-ere, ki raro i te oki; a ka huaina to reira ingoa ko Aroni-pakuta.

⁹ A, i puta mai ano te Atua ki a Hakopa, i tona haerenga mai i Parana-arama, i manaaki hoki i a ia.

¹⁰ A ka mea mai te Atua ki a ia, Ko Hakopa tou ingoa: e kore tou ingoa e karangatia ko Hakopa a muri ake nei, engari ko Iharaira hei ingoa mou. Na, huaina ana e ia tona ingoa ko Iharaira.

¹¹ A i mea mai ano te Atua ki a ia, Ko ahau te Atua kaha rawa: kia hua koe, kia nui; kia puta mai he iwi, he huinga iwi ano hoki i roto i a koe, kia puta mai ano hoki nga kingi i roto i tou hope;

¹² A ko te whenua i hoatu e ahau ki a Aperahama raua ko Ihaka, ka hoatu ano tena e ahau ki a koe, ka hoatu ano hoki e ahau tena whenua ki ou uri i muri i a koe.

¹³ Na, ka mawehe atu te Atua i a ia ki runga, i te wahi i korero ai ia ki a ia.

¹⁴ Na, ka whakaturia ake e Hakopa he pou ki te wahi i korero ai ia ki a ia, he pou kohatu: a ka ringitia e ia he ringihanga ki runga, i ringitia ano hoki e ia he hinu ki runga.

¹⁵ A huaina iho e Hakopa te ingoa o te wahi i korero ai te Atua ki a ia, ko Pete-ere.

¹⁶ Na, ka hapainga mai e ratou i Pete-ere; a ka whano ka tae ratou ki Eparata, na, ka whakawhanau a Rahera, a ka whakauaua tona whanautanga.

¹⁷ A i te mea ka whakauaua tona whanautanga, na ka mea te kai whakawhanau ki a ia, Kaua e wehi; ta te mea he tamaiti ano hoki tenei au.

¹⁸ A i te mea ka haere tona wairua, (i mate hoki ia,) na, ka huaina e ia tona ingoa ko Penoni: na tona papa ia i hua ko Peniamine.

¹⁹ Na, ka mate a Rahera, a ka tanumia ki te ara ki Eparata, ara, ki Pete-rehema.

²⁰ A ka whakaturia e Hakopa he pou ki runga ki tona rua: ko te pou ia o te rua o Rahera, a, tae noa ki tenei ra.

²¹ Na, ka turia atu e Iharaira, a ka whakaturia e ia tona teneti ki tua atu i te pourewa i Erara.

²² A i a Iharaira e noho ana i taua whenua, na, ka haere a Reupena, a ka takoto ki a Piriha ki te wahine iti a tona papa; a ka rongo a Iharaira. Na, kotahi tekau ma rua nga tamariki a Hakopa:

²³ Nga tamariki a Rea; ko Reupena, ko te matamua a Hakopa, ko Himeona, ko Rewi, ko Hura, ko Ihakara, ko Hepuruna:

²⁴ Nga tamariki a Rahera; ko Hohepa raua ko Peniamine:

²⁵ Nga tamariki a Piriha pononga wahine a Rahera; ko Rana raua ko Napatari:

²⁶ Nga tamariki a Tiripa pononga wahine a Rea; ko Kara raua ko Ahera: ko nga tamariki enei a Hakopa, i whanau nei mana ki Parana-arama.

²⁷ Na, kua tae mai a Hakopa ki a Ihaka ki tona papa, ki Mamere, ki te pa o Arapa, ara, ki Heperona, ki te wahi hoki i noho ai a Aperahama raua ko Ihaka.

²⁸ A kotahi rau e waru tekau tau nga ra o Ihaka.

²⁹ Na, ka hemo a Ihaka, a ka mate, a ka kohia atu ki tona iwi, he koroheke, kua maha hoki ona ra: a na ana tamariki na Ehau raua ko Hakopa ia i tanu.

UPOKO 36.

A ko nga whakatupuranga enei o Ehau, ara, o Eroma.

² I tangohia mai ana wahine e Ehau i roto i nga tamahine o Kanaana; a Araha tamahine a Erona Hiti, ratou ko Ahoripama tamahine a Anaha tamahine Tipeona Hiwi;

³ Ko te tamahine a Ihimaera, ko Pahemata tuahine o Nepaiota.

⁴ A whanau ake ta Araha raua ko Ehau ko Eripata; a whanau ake ta Pahemata ko Reuere;

⁵ A whanau ake a Ahoripama, ko Ieuhu, ko Iaarama, ko Koraha: ko nga tama enei a Ehau i whanau nei mana ki te whenua o Kanaana.

⁶ Na, ka tangohia e Ehau ana wahine, me ana tamariki, me ana tamahine, me nga tangata katoa o tona whare, me ana kararehe, me ana kirehe katoa, me ona taonga katoa i whiwhi ai ia ki te whenua o Kanaana, a haere ana ki tetahi whenua i te aroaro o Hakopa o tona teina.

⁷ He nui hoki no o raua taonga, tē ahei ai raua te noho tahi; kihai hoki te whenua, i noho manene nei raua, i nui hei nohoanga mo raua, i a raua kararehe hoki.

⁸ Na, ka noho a Ehau ki Maunga Heira; ko Eroma a Ehau.

⁹ A ko nga whakatupuranga enei a Ehau papa o nga Eromi i Maunga Heira:

¹⁰ Ko nga ingoa enei o nga tamariki a Ehau; ko Eripata tama a Araha wahine a Ehau, ko Reuere tama a Pahemata a te wahine a Ehau.

¹¹ A ko nga tamariki a Eripata, ko Temana, ko Omara, ko Tepo, ko Katama, ko Kenaha.

¹² A he wahine iti a Timina na Eripata tama a Ehau; a whanau ake ta raua ko Eripata, ko Amareke: ko nga tamariki enei a Araha wahine a Ehau.

¹³ A ko nga tamariki enei a Reuere; ko Nahata, ko Heraha, ko Hamaha, ko Miha; ko nga tamariki enei a Pahemata wahine a Ehau.

¹⁴ A ko nga tamariki enei a Ahoripama tamahine a Anaha tamahine a Tipeona, a te wahine a Ehau: a whanau ake a raua ko Ehau ko Ieuhu, ko Iaarama, ko Koraha.

¹⁵ Ko enei o nga tamariki a Ehau i waiho hei ariki: ko nga tamariki a Eripata a te matamua a Ehau; ko ariki Temana, ko ariki Omara, ko ariki Tepo, ko ariki Kenaha,

¹⁶ Ko ariki Koraha, ko ariki Katama, ko ariki Amareke: na Eripata enei ariki i te whenua o Eroma; ko nga tamariki enei a Araha.

¹⁷ A ko nga tamariki enei a Reuere tamaiti a Ehau; ko ariki Nahata, ko ariki Heraha, ko ariki Hamaha, ko ariki Miha: na Reuere enei ariki i te whenua o Eroma; ko nga tamariki enei a Pahemata wahine a Ehau.

¹⁸ A ko nga tamariki enei a Ahoripama wahine a Ehau; ko ariki Ieuhu, ko ariki Iaarama, ko ariki Koraha: na Ahoripama enei ariki na te tamahine a Anaha na te wahine a Ehau.

¹⁹ Ko nga tamariki enei a Ehau, ara, a Eroma, a ko enei ano o ratou ariki.

²⁰ Ko nga tamariki enei a Heira Hori, ko nga tangata whenua hoki; ko Rotana, ko Hopara, ko Tipeona, ko Anaha,

²¹ Ko Rihona, ko Etere, ko Rihana: ko nga ariki enei o nga Hori, ko nga tamariki hoki a Heira i te whenua o Eroma.

²² A ko nga tamariki a Rotana, ko Hori ko Hemama; a ko Timina te tuahine o Rotana.

²³ A ko nga tamariki enei a Hopara; ko Arawana, ko Manahata, ko Epara, ko Hepo, ko Onama.

²⁴ A ko nga tamariki enei a Tipeona; ko Aiaha raua ko Anaha: na tenei Anaha i kite nga muera i te koraha, i a ia e whangai ana i nga kaihe a Tipeona a tona papa.

²⁵ A ko nga tamariki enei a Anaha; ko Rihona, ko Ahoripama ko te tamahine a Anaha.

²⁶ A ko nga tamariki enei a Rihona; ko Hemerana, ko Ehepana, ko Itirana, ko Kerana.

²⁷ Ko nga tamariki enei a Etere; ko Pirihana, ko Taawana, ko Akana.

²⁸ Ko nga tamariki enei a Rihana; ko Uhu, raua ko Arana.

²⁹ No nga Hori enei ariki; ko ariki Rotana, ko ariki Hopara, ko ariki Tipeona, ko ariki Anaha,

³⁰ Ko ariki Rihona, ko ariki Etere, ko ariki Rihana: no nga Hori enei ariki, no roto i o ratou ariki i te whenua o Heira.

³¹ A ko nga kingi enei i kingi i te whenua o Eroma, i te mea kahore he kingi o nga tamariki o Iharaira.

³² A he kingi no Eroma a Pera te tama a Peoro: a ko Rinihapa te ingoa o tona pa.

³³ Na, ka mate a Pera, a ko Iopapa tama a Heraha o Potera te kingi i muri i a ia.

³⁴ Na, ka mate a Iopapa, a ko Huhama o te whenua o Temani te kingi i muri i a ia.

³⁵ Na, ka mate a Huhama, a ko Harara tama a Perara, a te tangata nana nei i patu a Miriana ki te parae o Moapa, te kingi i muri i a ia: a ko Awiti te ingoa o tona pa.

³⁶ Na, ka mate a Harara, a ko Hamara o Mahareka te kingi i muri i a ia.

³⁷ Na, ka mate a Hamara, a ko Haora o Rehopoto i te taha o te awa te kingi i muri i a ia.

³⁸ Na, ka mate a Haora, a ko Paara-hanana te tama a Akaporo te kingi i muri i a ia.

³⁹ Na, ka mate a Paara-hanana tama a Akaporo, a ko Harara te kingi i muri i a ia: a ko Pau te ingoa o tona pa; ko Mehetapere hoki te ingoa o tana wahine, he tamahine ia na Matarere tamahine o Metahapa.

⁴⁰ Na, ko nga ingoa enei o nga ariki, ara, o nga whanau a Ehau, o tona hapu o tona hapu, o tona kāinga o tona kāinga, tona ingoa tona ingoa; ko ariki Timina, ko ariki Arawa, ko ariki Ietete,

⁴¹ Ko ariki Ahoripama, ko ariki Eraha, ko ariki Pinona,

⁴² Ko ariki Kenaha, ko ariki Temana, ko ariki Mipitara,

⁴³ Ko ariki Makatiere, ko ariki Irama: no Eroma enei ariki, me o ratou nohoanga i te whenua i nohoia e ratou: ko Ehau ia ko te papa o nga Eromi.

UPOKO 37.

A i noho a Hakopa i te whenua i noho manene ai tona papa, i te whenua o Kanaana.

² Ko nga whakatupuranga enei o Hakopa. Kotahi tekau ma whitu nga tau o Hohepa, a i te whangai hipi ia ratou ko ona tuakana; a i nga tamariki a Piriha taua tamaiti, i nga tamariki hoki a Tiripa, a nga wahine a tona papa: a ka kawea mai e Hohepa te korero kino mo ratou ki to ratou papa.

³ A i arohaina nuitia a Hohepa e Iharaira i ana tamariki katoa, no te mea ko te tamaiti ia o tona koroheketanga: a ka hangā e ia tetahi koti purepure mona.

⁴ A te kitenga o ona tuakana e arohaina nuitia ana ia e to ratou papa i ona tuakana katoa, na ka kino ratou ki a ia, kihai ano hoki i ahei te ata korero ki a ia.

⁵ Na, ka moe a Hohepa i tetahi moe, a ka korerotia mai e ia ki ona tuakana; a ka nui haere ano hoki to ratou kino ki a ia.

⁶ A ka mea mai ia ki a ratou, Tena, whakarongo mai ki tenei moe i moe nei ahau:

⁷ Nana, i te paihere tatou i a tatou paihere i waenga mara, na, ka whakatika ake taku paihere, a ka tu; te tino karapotinga mai o a koutou paihere, kei te piko iho ki taku paihere.

⁸ Na, ka mea atu ona tuakana ki a ia, Koia ranei? ko koe hei kingi mo matou? hei rangatira ano ranei koe mo matou? Na, ka nui haere ano to ratou kino ki a ia mo ana moe, me ana kupu.

⁹ A i moe ano ia i tetahi atu moe, a ka korerotia mai e ia ki ona tuakana, ka mea mai ia, Nana, tenei ano hoki tetahi moe i moe ai ahau; na, ko te ra me te marama, me nga whetu kotahi tekau ma tahi, e piko mai ana ki a au.

¹⁰ A ka korerotia e ia ki tona papa, ratou ko ona tuakana: na, ka whakatupehupehu mai tona papa ki a ia, a ka mea atu ki a ia, He aha tenei moe i moe nei koe? Tera ranei matou, ko tou whaea, ko o tuakana, e haere atu ki te piko ki a koe ki te whenua?

¹¹ Na, ka hae ona tuakana ki a ia; ko tona papa ia i mahara ki te kupu.

¹² Na, ka haere ona tuakana ki Hekeme ki te whangai i nga hipi a to ratou papa.

¹³ A ka mea mai a Iharaira ki a Hohepa, Kahore ianei o tuakana i te whangai hipi i Hekeme? haere mai, a me tono atu koe e ahau ki a ratou. A ka mea atu ia, Tenei ahau.

¹⁴ Na, ka mea mai ia ki a ia, Tikina, tirohia kei te ora ranei o tuakana, kei te ora ano ranei nga hipi; ka whakahoki mai ai i te korero ki a au. Na, ka tonoa atu ia e ia i te raorao o Heperona, a ka haere ia ki Hekeme.

¹⁵ A, ka tutaki tetahi tangata ki a ia, a e pohehe ana ia i te parae, a ka ui taua tangata ki a ia, ka mea, He aha tau e rapu?

¹⁶ Na, ka mea atu ia, E rapu ana ahau i aku tuakana: tena koa, whakaaturia mai ki a au, kei hea ratou e whangai ana.

¹⁷ A ka mea mai taua tangata, Kua riro atu ratou i konei; i rongo hoki ahau i a ratou e ki ana, Kia haere tatou ki Rotana. Na, ka haere a Hohepa ki te whai i ona tuakana, a ka kitea ratou e ia ki Rotana.

¹⁸ A to ratou kitenga i a ia i tawhiti, i te mea kahore ano ia i tata noa ki a ratou, na, ka whakatakoto whakaaro ratou mona kia whakamatea.

¹⁹ A ka mea ratou tetahi ki tetahi, Nana, ko Moemoea tenei te haere mai nei.

²⁰ Tena, tatou ka haere, ka patu i a ia, ka maka hoki i a ia ki tetahi poka, a ka mea, Na tetahi mohoao nanakia ia i kai: a ka kite tatou i te tukunga iho o ana moe.

²¹ A i rongo a Reupena, a ka whakaorangia ia e ia i roto i o ratou ringaringa; a ka mea ia, Kaua ia e patua e tatou.

²² A ka mea a Reupena ki a ratou, Kaua e whakahekea he toto, makā atu ia ki roto ki tenei poka i te koraha nei, kaua hoki tetahi ringaringa e pa atu ki a ia; (he mea hoki kia whakaora ai ia i a ia i roto i o ratou ringaringa, kia whakahoki ai ia i a ia ki tona papa.)

²³ A te taenga mai o Hohepa ki ona tuakana, na, ka huia e ratou te koti o Hohepa, te koti purepure e mau ana i a ia;

²⁴ A mauria atu ana ia, makā ana e ratou ki roto ki te poka: a e tuwhera kau ana te poka, kahore he wai o roto.

²⁵ Na, ka noho ratou ki te kai taro: a ka anga ake o ratou kanohi, a ka titiro atu ratou, na, ko tetahi tira Ihimeeri e haere mai ana i Kireara me a ratou kamera, he waha i nga mea kakara, i te pama, i te maira, e haere ana ki te kawe ki raro ki Ihipa.

²⁶ Na, ka mea a Hura ki ona tuakana ratou ko ona teina, He aha te pai o to tatou patunga i to tatou teina, o te hunanga hoki i ona toto?

²⁷ Tatou ka haere, ka hoko hoki i a ia ki nga Ihimeeri, a kaua o tatou ringa e pa ki a ia; ko to tatou teina nei hoki ia, me to tatou kikokiko. A i whakarongo mai ona tuakana ratou ko ona teina.

²⁸ A i te haerenga atu o nga Miriani, o taua hunga hokohoko; na, ka hutia ake a Hohepa e ratou i roto i te poka, a ka hokona atu a Hohepa e ratou ki nga Ihimeeri, ki nga hiriwa e rua tekau: ka kawea a Hohepa e ratou ki Ihipa.

²⁹ A te hokinga mai o Reupena ki te poka; na, kahore a Hohepa i roto i te poka; a ka haea e ia ona kakahu.

³⁰ Na, ka hoki atu ia ki ona teina, a ka mea atu, Kahore nei te tamaiti; a ko ahau, me haere ahau ki hea?

³¹ Na, ka tango ratou i te koti o Hohepa, a ka patua e ratou tetahi kuao koati, a ka tukua e ratou te koti ki te toto;

³² Na, ka hoatu e ratou te koti purepure kia kawea ki to ratou papa; a ka mea ratou, I kitea tenei e matou: tena, tirohia ko te koti ranei o to tamaiti, kahore ranei!

³³ A ka mohiotia e ia, a ka mea ia, Ko te koti tenei o taku tamaiti; kua kainga ia e te kirehe nanakia; kua tino haea rawatia a Hohepa!

³⁴ Na, ka haea e Hakopa ona kakahu, a ka kakahuria e ia tona hope ki te kakahu taratara, a he maha nga ra i uhungatia ai e ia tana tamaiti.

³⁵ A ka whakatika ana tamariki katoa, me ana tamahine katoa ki te whakamarie i a ia; a kihai ia i pai kia whakamarietia; a ka mea ia, Engari ka heke tangi atu ahau ki taku tamaiti ki te urupa. Na, ka uhungatia ia e tona papa.

³⁶ Na, ka hokona atu ia e nga Miriani ki Ihipa ki a Poti-whara, ki tetahi o nga tangata nui a Parao, ki te rangatira o nga kai tiaki.

UPOKO 38.

A i taua wa ano ka wehe atu a Hura i roto i ona tuakana, a haere ana ki raro, a peka atu ana ki tetahi Aturami, ko tona ingoa ko Hira.

² A ka kitea e Hura i reira te tamahine a tetahi Kanaani, ko Huaha tona ingoa; na, ka tango ia i a ia, a haere ana ki roto ki a ia.

³ Na, ka hapu ia, a ka whanau he tamaiti; a huaina iho e ia tona ingoa ko Ere:

⁴ Na, ka hapu ano ia, a ka whanau he tamaiti; a huaina iho e ia tona ingoa ko Onana.

⁵ A ka hapu ano hoki ia, a ka whanau he tamaiti; a huaina iho e ia tona ingoa ko Heraha: a i Ketipi te tane, i tona whanautanga.

⁶ Na, ka tangohia mai e Hura he wahine ma Ere ma tana matamua, tona ingoa ko Tamara.

⁷ A he tangata kino a Ere, te matamua a Hura, ki ta Ihowa titiro, a ka whakamatea ia e Ihowa.

⁸ Na, ka mea a Hura ki a Onana, Haere ki roto ki te wahine a to tuakana, hei whakakapi mo te whawharua, kia whai uri ai tou tuakana.

⁹ A i mohio a Onana e kore e waiho te uri mona; a, i tona haerenga atu ki te wahine a tona tuakana, na, ka tukua e ia kia heke atu ki te whenua, kei hoatu e ia he uri ki tona tuakana.

¹⁰ A he kino taua mahi ana ki ta Ihowa titiro: na, ka whakamatea hoki ia.

¹¹ Katahi ka mea a Hura ki a Tamara ki tana hunaonga, Me noho pouaru koe ki te whare o to papa, kia kaumatua ra ano a Heraha taku tamaiti: i mea hoki ia, Kei mate ano hoki tenei, kei pera me ona tuakana. Na, ka haere a Tamara, a noho ana i te whare o tona papa.

¹² A ka maha nga ra, na ka mate te tamahine a Huaha, te wahine a Hura; a ka marie a Hura, a ka haere ia, raua ko Hira ko tona hoa ko te Aturami, runga ki Timinata, ki ana kai kutikuti hipi.

¹³ A ka korerotia mai ki a Tamara, ka meatia mai, Ko tou hungawai tenei te haere mai nei ki runga ki Timinata, ki te kutikuti i ana hipi.

¹⁴ Na, ka whakarere atu ia i ona kakahu pouaru, a ka hipoki i a ia ki tetahi arai, roropi tonu mai ki a ia, a ka noho i te tomokanga ki Enaima i te huarahi ki Timinata; i kite hoki ia kua kaumatua a Heraha, a kahore ano ia i hoatu noa hei wahine mana.

¹⁵ Na, ka kite mai a Hura i a ia, a hua noa ia he wahine puremu; no te mea i hipokina tona mata.

¹⁶ Na, ka peka atu ia ki te ara ki a ia, a ka mea atu, Tukua atu ahau, ne? kia haere atu ki a koe; (kihai hoki ia i mohio ko tana hunaonga ia.) A ka mea mai ia, He aha tau e homai ai ki a au, ki te haere mai koe ki a au?

¹⁷ A ka mea atu ia, Ka tonoa mai e ahau tetahi kuao koati i roto i te kahui. A ka mea mai ia, Ka homai ranei e koe tetahi taunaha ki a au, kia tonoa mai ra ano taua mea e koe?

¹⁸ A ka mea atu ia, He aha te taunaha e hoatu e ahau ki a koe? A ka mea mai ia, Ko to hiri, me to tau, me to tokotoko i to ringa. Na, ka hoatu e ia ki a ia, a ka haere atu ia ki a ia, a ka hapu ia i a ia.

¹⁹ Na, ka whakatika, ia, a haere ana, a whakarerea ana e ia tona arai i hipokina ai ia, a kakahuria iho ona kakahu pouaru.

²⁰ Na, ka hoatu te kuao koati e Hura, kia kawea e tona hoa e te Aturami, ki te tiki i te taunaha i te ringaringa o te wahine; a kihai ia i kitea.

²¹ A ka ui mai ia ki nga tangata o taua wahi, ka mea, Kei hea te wahine puremu i noho nei i Enaima i te taha o te ara? A ka mea atu ratou, Kahore he wahine puremu o konei.

²² Na, ka hoki atu ia ki a Hura, a ka mea atu, Kahore ia i kitea e ahau; a e mea mai ana ano nga tangata o tera wahi, kahore he wahine puremu o reira.

²³ Na, ka mea mai a Hura, Tukua kia tangohia atu e ia, kei tawaia taua: titiro hoki, kua tonoa atu nei e ahau te kuao nei, a kihai ia i kitea e koe.

²⁴ A ka toru nga marama, na, ka korerotia mai ki a Hura, ka meatia mai, Kua puremu a Tamara to hunaonga; kua hapu ano hoki ia i ana puremutanga. A ka mea atu a Hura, Kawea mai ia ki waho, kia tahuna.

²⁵ A ka kawea mai ia ki waho, na, ka tono tangata atu ia ki tona hungawai, a ka mea atu, Na te tangata nana enei mea toku hapu: a i mea atu ano ia, Tena koa, tirohia, na wai enei, te hiri nei, me te tau, me te tokotoko.

²⁶ Na, ka mohiotia e Hura, a ka mea ia, Nui atu tona tika i toku; kihai hoki ia i hoatu e ahau ki a Heraha ki taku tamaiti. A kihai ia i mohio ki a ia i muri iho.

²⁷ A ka taka ki te wa e whanau ai ia, na, he mahanga kei roto i tona kopu.

²⁸ A i tona whanautanga, na, ka torona mai te ringa o tetahi: na, ka tikina atu e te kai whakawhanau, a herea ana tona ringa ki tetahi miro whero, a ka mea, Ko tenei i puta mai i mua.

²⁹ A i tana whakahokinga atu i tona ringa, na, ka puta mai tona tuakana; a ka mea ia, Ka tae to pakarutanga mai! nau te pakarutanga mai: na, ka huaina tona ingoa ko Parete.

³⁰ A, muri iho ka puta mai tona teina, i herea nei tona ringa ki te miro whero: a ka huaina tona ingoa ko Teraha.

UPOKO 39.

A i kawea a Hohepa ki raro ki Ihipa a ka hokona e Potiwhara e tetahi o nga tangata nui a Parao, he rangatira ia no nga kai tiaki, he Ihipiana, i roto i nga ringaringa o nga Ihimeeri o nga kai kawe i a ia ki reira.

² A i a Hohepa a Ihowa, a he tangata whai mana ia; a i noho ano ia i roto i te whare o tona ariki o te Ihipiana.

³ A i kite tona ariki kei a ia a Ihowa, a pono tonu i a Ihowa nga mahi katoa a tona ringa.

⁴ Na, ka manakohia mai a Hohepa e ia, a ka mahi ia ki a ia: a ka waiho ia hei kai tirotiro mo tona whare, a ka homai e ia ana mea katoa ki tona ringaringa.

⁵ A i a ia ka waiho nei hei kai tirotiro mo tona whare, mo ana mea katoa, na, ka manaakitia e Ihowa te whare o te Ihipiana he whakaaro hoki ki a Hohepa; a i runga i ana mea katoa te manaakitanga a Ihowa, i te whare, i te mara hoki.

⁶ A i waiho ano e ia i te ringaringa o Hohepa ana mea katoa; kihai ano hoki i mohiotia e ia tetahi o ana mea, heoi ano ko te taro i kai ai ia. A he ahua pai to Hohepa, he pai hoki ia ki te titiro atu.

⁷ A i muri iho i enei mea, na, ka anga mai nga kanohi o te wahine a tona ariki ki a Hohepa; a ka mea ia, Kia takoto taua.

⁸ A ka whakakahore ia, ka mea hoki ki te wahine a tona ariki, Na, e kore toku ariki e mohio ko te aha kei a au i roto i te whare, kua homai nei hoki e ia ana mea katoa ki toku ringaringa;

⁹ Kahore tetahi i roto i tenei whare e nui ana i a au; kahore ano hoki i kaiponuhia mai e ia tetahi mea ki a au, ko koe anake, no te mea ko tana wahine koe: na, me pehea e mahi ai ahau i tenei kino nui, e hara ai ki te Atua?

¹⁰ Heoi, korero noa ia ki a Hohepa i tenei ra i tenei ra, a kihai ia i rongo ki a ia, kia takoto tahi raua, kia noho tahi raua.

¹¹ Na, i taua wa ano ka haere mai a Hohepa ki te whare ki te mahi i tana mahi; a kahore te tahi o nga tangata o te whare i reira i roto i te whare.

¹² Na, ka hopukia ia e ia ka mau ki tona kakahu, a ka mea mai, Takoto taua: na, ka whakarerea atu e ia tona kakahu ki tona ringa, a rere ana, puta ana ki waho.

¹³ A, tona kitenga kua whakarerea e ia tona kakahu i roto i tona ringa, a kua rere ki waho,

¹⁴ Na, ka karanga atu ia ki nga tangata o tona whare, a ka korero ki a ratou, ka mea, Titiro, kua kawea mai e ia tetahi Hiperu hei maminga i a tatou; i haere mai ia ki a au kia takoto maua, a he rahi toku reo ki te hamama atu:

¹⁵ A ka rongo ia he rahi toku reo ki te hamama atu, na, ka whakarerea e ia tona kakahu ki a au, a rere ana, puta ana ki waho.

¹⁶ Na, ka waiho e ia tona kakahu ki tona taha, kia hoki mai ra ano tona ariki ki tona whare.

¹⁷ A ka korero atu ia ki a ia, ko aua kupu ra ano, ka mea, I haere mai ki a au taua pononga Hiperu, i kawea mai nei e koe ki a matou, ki te maminga i a au:

¹⁸ A ka rahi toku reo ki te hamama, na, ka whakarere ia i tona kakahu ki a au, a rere ana ki waho.

¹⁹ A ka rongo tona ariki i nga kupu a tana wahine, i korero ai ia ki a ia, i mea ai, Ko nga mea enei i mea ai to pononga ki a au; na, ka mura tana riri.

²⁰ Na, ka mau te ariki o Hohepa ki a ia, a makā ana ia ki te whare herehere, ki te wahi i herea ai nga herehere a te kingi: a noho ana ia i reira i te whare herehere.

²¹ A i a Hohepa a Ihowa, a ka whakaputaina mai e ia he aroha ki a ia, a i tuku mai ia ki a ia kia manakohia e te rangatira o te whare herehere.

²² A i tukua mai e te rangatira o te whare herehere ki te ringaringa o Hohepa nga herehere katoa i roto i te whare herehere: a ko ia ano te kai mahi o nga mea katoa i meatia e ratou i reira.

²³ Kihai te rangatira o te whare herehere i titiro ki tetahi o nga mea i tona ringa; no te mea i a ia a Ihowa, a i mea ano a Ihowa kia pono nga mea i mea ai ia.

UPOKO 40.

A muri iho i enei mea, ka hara te kai riringi waina o te kingi o Ihipa, raua ko tana kai hanga taro, ki to raua ariki ki te kingi o Ihipa.

² A ka riri mai a Parao ki ana kai tohutohu tokorua, ki te tino kai riringi waina, raua ko te tino kai hanga taro.

³ Na, ka homai raua e ia kia puritia ki te whare o te rangatira o nga kai tiaki, ki te whare herehere, ki te wahi i herea ai a Hohepa.

⁴ A ka meinga a Hohepa e te rangatira o nga kai tiaki hei kai titiro mo raua, a ka mahi ia ki a raua; a ka puritia raua i etahi ra.

⁵ Na, ka moe raua i a raua moe, kotahi ano te po i moemoea ai raua, tetahi, tetahi, me te tikanga ano o tana moe, te kai riringi waina raua ko te kai hanga taro a te kingi o Ihipa, i herea nei raua i roto i te whare herehere.

⁶ A te taenga mai o Hohepa ki a raua i te ata, na, ka titiro ia ki a raua, a e pouri ana raua.

⁷ Na, ka ui atu ia ki aua kai tohutohu a Parao i puritia tahitia nei me ia i roto i te whare o tona ariki, a ka mea, Na te aha i whakapoururu ai o korua kanohi inaianei?

⁸ A ka mea mai raua ki a ia, I moe maua i tetahi moe, a kahore he kai whakaatu i tona tikanga. Na, ka mea atu a Hohepa ki a raua, Ehara ianei te Atua i te kai whakaatu? tena koa, korerotia mai ki a au.

⁹ Na, ka korerotia mai tana moe e te tino kai riringi waina ki a Hohepa, a ka mea ki a ia, Moe iho ahau, na, ko tetahi waina i toku aroaro;

¹⁰ A e toru nga peka o te waina; a e ahua pihi ana, a ka kohera ona puawai; a e hua ana nga tautau, maoa tonu nga karepe:

¹¹ A i toku ringa ano te kapa a Parao: na, ka mau au ki nga karepe, a tauia ana aua mea e ahau ki roto ki te kapa a Parao, a hoatu ana e ahau te kapa ki te ringaringa o Parao.

¹² Na, ko te meatanga atu a Hohepa ki a ia, Ko tona tikanga tenei: aua peka e toru e toru nga ra:

¹³ Kia toru ake ra ka whakaara ake a Parao i tou mātenga, ka whakahoki ano i a koe ki tau mahi, a ka hoatu ano e koe te kapa a Parao ki tona ringaringa, ka pera hoki me mua, i te mea ko koe tana kai riringi waina.

¹⁴ Otiia kia mahara mai koe ki a au ina whiwhi koe ki te pai, kia puta mai ano hoki to aroha ki a au, korerotia atu ano hoki ahau ki a Parao, kia puta atu ai ahau i roto i tenei whare:

¹⁵ He tino tahae rawa hoki toku tahaetanga mai i te whenua o nga Hiperu: kahore ano hoki aku mahi i konei i makā ai ahau e ratou ki roto ki tenei whare herehere.

¹⁶ A, ka kite te tino kai hanga taro he pai te tikanga, na, ka mea mai ia ki a Hohepa, Moe iho ano hoki ahau, na, e toru nga kete taro ma i runga i toku upoko.

¹⁷ A i to runga kete ko nga kai katoa a Parao, nga mahi a te kai hanga taro; a i te kai nga manu i aua mea i roto i te kete i runga i toku upoko.

¹⁸ Na, ka whakahokia atu e Hohepa, a ka mea atu, Ko tona tikanga tenei: Ko aua kete e toru e toru nga ra:

¹⁹ Kia toru ake nga ra, ka tangohia ake e Parao tou upoko i runga i a koe, a ka whakairihia koe ki runga ki te rakau; a ka kainga e nga manu ou kikokiko e piri ana ki a koe.

²⁰ A i te toru o nga ra, i te ra whanautanga o Parao, na, ka tukua e ia he hakari ma ana tangata katoa: a whakaarahia ake ana e ia te mātenga o te tino kai riringi waina, me te mātenga o te tino kai hanga taro, i waenganui i ana pononga.

²¹ I whakahokia ano e ia te tino kai riringi waina ki tana mahi riringi waina; hei homai hoki i te kapa ki te ringaringa o Parao:

²² Ko te tino kai hanga taro ia i whakairihia ake e ia: i peratia me ta Hohepa i whakaatu mai ai ki a raua.

²³ Otiia kihai te tino kai riringi waina i mahara ki a Hohepa, i wareware hoki ki a ia.

UPOKO 41.

A ka tino taka nga tau e rua, na, ka moe a Parao: Na, i te tu ia i te taha o te awa.

² Na, ko te putanga ake o nga kau e whitu i roto i te awa, he ahua pai, e whai kiko ana; a ka kai ratou i roto i nga wiwi.

³ Na, ko te putanga ake ano o etahi kau e whitu i muri i a ratou i roto i te awa, he ahua kino, he kiko-kore; a tu ana ratou i te taha o era kau i te pareparenga o te awa.

⁴ Na, ka kainga e nga kau ahua kino, kiko-kore, nga kau ahua pai e whitu, nga mea momona. A ka ara ake a Parao.

⁵ A ka parangia ano ia, na, ko te rua o ana moe: na, ko te putanga ake o nga puku witi e whitu, kotahi ano hoki te kakau, he mea whai kiko, he pai.

⁶ Na, ko nga puku e whitu e tupu ake ana i muri i era atu, he mea kiko-kore, he mea ngingio i te marangai.

⁷ A horomia ake nga puku whai kiko e whitu, nga mea whai kai, e nga puku kiko-kore e whitu. A, te aranga ake o Parao, na, he moe!

⁸ A i te ata, na, ka pororaru tona wairua; a ka tono tangata ki te karanga i nga tohunga maori katoa o Ihipa, me nga mea mohio katoa o reira: korerotia atu ana tana moe e Parao ki a ratou; otiia kihai i taea e tetahi te whakaatu i te tikanga o aua moe ki a Parao.

⁹ Na, ka korero mai te tino kai riringi waina ki a Parao, a ka mea, Katahi ahau ka mahara ki oku he.

¹⁰ I riri mai a Parao ki ana pononga, a i tuku i a au kia puritia ki roto ki te whare o te rangatira o nga kai tiaki, ahau me te tino kai hanga taro.

¹¹ Na, ka moe maua i tetahi moe, kotahi hoki te po, ahau, a ia hoki; i moe maua, ahau, a ia, me te tikanga ano o a maua moe.

¹² A i reira ano i a maua te tahi tamaiti Hiperu, he pononga na te rangatira o nga kai tiaki; a ka korerotia atu e maua ki a ia, a whakaaturia mai ana e ia te tikanga o a maua moe ki a maua; rite tonu tana whakaaturanga ki ta tera moe, ki taku.

¹³ A tika tonu tana i whakaatu mai ai ki a maua; ko ahau i whakahokia e ia ki taku mahi, ko tera i taronatia.

¹⁴ Na, ka tono tangata mai a Parao, hei karanga i a Hohepa, a ka hohoro ratou te kawe mai i a ia i roto i te whare herehere: na, ka heu ia i a ia, a ka tango ke mai i etahi kakahu mona, a haere mai ana ki a Parao.

¹⁵ A ka mea mai a Parao ki a Hohepa, I moe ahau i tetahi moe, a kahore he tangata hei whakaatu i tona tikanga: a kua tae mai to rongo ki a au, e korerotia ana e mohio ana koe ki te moe, ki te whakaatu hoki i tona tikanga.

¹⁶ Na, ka whakahokia atu e Hohepa ki a Parao, a ka mea, Ehara i a au: ma te Atua e whakahoki atu te kupu pai ki a Parao.

¹⁷ Na, ka mea mai a Parao ki a Hohepa, I a au e moe ana, na, e tu ana ahau i te pareparenga o te awa:

¹⁸ Na, ko te putanga ake o nga kau e whitu i roto i te awa, he mea whai kiko, he ahua pai; a i te kai ratou i roto i nga wiwi:

¹⁹ Na, ko te putanga ake ano o etahi atu kau e whitu i muri i era, he hiroki, he ahua kino noa iho, he kiko-kore, kahore ahau i kite i to ratou rite te kino, i te whenua katoa o Ihipa;

²⁰ Na, ka kainga nga kau e whitu o mua, nga mea momona, e nga kau hiroki e nga mea kino;

²¹ A to ratou toremitanga ki roto i a ratou, e kore e mohiotia kua toremi ratou ki roto i a ratou; he kino tonu hoki to ratou ahua, he pera me to te timatanga. Na, ka ara ahau.

²² A i kite ano ahau i a au e moe ana, a ko nga puku witi e whitu e tupu ake ana i te kakau kotahi, he mea whai kai, he mea pai:

²³ Na, ko nga puku e whitu, nga mea taramore, nga mea kiko-kore, i ngingio nei i te marangai, e tupu ake ana i muri i aua puku;

²⁴ A horomia ake nga puku papai e whitu e nga puku kiko-kore: na, ka korerotia e ahau ki nga tohunga maori; a kahore tetahi tangata hei whakaatu mai i tona tikanga ki a au.

²⁵ Na, ko te meatanga mai a Hohepa ki a Parao, Te moe a Parao kotahi tonu: e whakaaturia mai ana e te Atua ki a Parao nga mea e meatia ana e ia.

²⁶ Ko aua kau pai e whitu, e whitu nga tau; a, aua puku pai e whitu, e whitu nga tau: kotahi ano te moe.

²⁷ A, aua kau hiroki e whitu, aua mea kino i puta ake ra i muri i a ratou, e whitu nga tau ena; ko aua puku witi e whitu hoki, aua mea i ngingio i te marangai, e whitu nga tau mate-kai ena.

²⁸ Ko te mea tenei i korerotia atu nei e ahau ki a Parao: Ko ta te Atua e mea ai e whakakitea mai ana e ia ki a Parao.

²⁹ Nana, e whitu nga tau e haere mai nei e nui ai te hua o te whenua katoa o Ihipa;

³⁰ A e whitu nga tau mate-kai e ara ake i muri iho i era; a ka wareware katoa te hua i te whenua o Ihipa; a ka ngaro te whenua i te mate-kai;

³¹ A e kore taua hua e mohiotia e te whenua, i taua mate-kai hoki o muri iho; no te mea he tino nanakia.

³² A i tuaruatia ai te moe a Parao; he mea pumau hoki na te Atua, a ka hohoro ano te meatia e te Atua.

³³ Na, kia tirohia iho e Parao tetahi tangata mohio, whai whakaaro, a kia tukua atu e ia nga tikanga o te whenua o Ihipa ki a ia.

³⁴ Kia meatia tenei e Parao, kia whakaritea ano hoki e ia etahi kai tirotiro mo te whenua, a kia tangohia ano e ia te rima o nga wahi o te whenua o Ihipa i nga tau hua e whitu.

³⁵ A kia kohia e ratou nga kai katoa o enei tau pai e haere ake nei, kia rongoatia hoki e ratou he witi ki raro i te ringa o Parao, kia tohungia ano hoki he kai e ratou i roto i nga pa.

³⁶ Na, ka rongoatia taua kai ma te whenua, mo nga tau mate-kai e whitu e puta mai ana ki te whenua o Ihipa; a e kore e ngaro te whenua i te mate-kai.

³⁷ A he pai taua mea ki te titiro iho a Parao, ki te titiro ano hoki a ona tangata katoa.

³⁸ Na, ka mea mai a Parao ki ana tangata, E kitea ranei e tatou tetahi tangata penei, tetahi tangata kei a ia nei te wairua o te Atua?

³⁹ A ka mea mai a Parao ki a Hohepa, Na, kua whakakitea nei e te Atua enei mea katoa ki a koe, a kahore he tangata hei rite mou, te mohio, te whai whakaaro:

⁴⁰ Ko koe hei rangatira mo toku whare, a ma to kupu taku iwi katoa e tohutohu; ko te torona anake te mea e nui ake ai ahau i a koe.

⁴¹ A ka mea mai a Parao ki a Hohepa, Titiro, kua waiho nei koe e ahau hei rangatira mo te whenua katoa o Ihipa.

⁴² Na, ka tangohia e Parao tona mowhiti i tona ringaringa, a kuhua ana e ia ki te ringaringa o Hohepa, i whakakakahuria hoki ia e ia ki nga kakahu rinena ma, a whakaheia atu ana he hei koura ki tona kaki;

⁴³ A i whakaekea ano ia e ia ki runga ki te rua o ana hariata; a ka karangatia ano e ratou i mua i a ia, Kia piko te turi: na, ka waiho ia e ia hei rangatira, mo te whenua katoa o Ihipa.

⁴⁴ A i mea mai ano a Parao ki a Hohepa, Ko Parao ahau, a ki te kahore koe, e kore e ara ake te ringaringa, te waewae ranei, o tetahi tangata i te whenua katoa o Ihipa.

⁴⁵ Na, ka huaina e Parao te ingoa o Hohepa Ko Tawhanata-paneaha; a i homai ano e ia hei wahine mana a Ahenata tamahine a Poti-whera tohunga o Ono. Na, ka haere atu a Hohepa, a puta noa i te whenua o Ihipa.

⁴⁶ A e toru tekau nga tau o Hohepa i tona turanga ai i te aroaro o Parao o te kingi o Ihipa. Na, ka puta mai a Hohepa i te aroaro o Parao, a ka haere, a puta noa i te whenua katoa o Ihipa.

⁴⁷ A i nga tau hua e whitu, me te mea he aohanga na te ringa te hua o te whenua.

⁴⁸ Na, ka kohia e ia nga kai katoa o nga tau e whitu i puta ake ki te whenua o Ihipa, a rongoatia atu ana te kai ki roto ki nga pa: ko te kai o te mara i tetahi taha i tetahi taha o te pa, i rongoatia atu e ia ki roto ki taua pa ano.

⁴⁹ Heoi amitia mai ana e Hohepa he witi, me te mea ko te onepu o te moana, he hira whakaharahara; a whakarerea noatia iho e ia te tatau; kahore hoki i taea te tatau.

⁵⁰ Na, ka whanau nga tamariki tokorua a Hohepa, i te mea kahore ano kia puta noa mai nga tau mate-kai, i whanau hoki i a raua ko Ahenata tamahine a Poti-whera tohunga o Ono.

⁵¹ A i huaina e Hohepa te ingoa o te matamua ko Manahe: No te mea kua meinga ahau e te Atua kia wareware ki taku mamahi katoa, ki te whare katoa ano hoki o toku papa.

⁵² A i huaina e ia te ingoa o te tuarua ko Eperaima: Moku hoki i meinga e te Atua kia hua ki te whenua o toku tangihanga.

⁵³ Na, ka taka nga tau hua e whitu i puta mai ra ki te whenua o Ihipa.

⁵⁴ A ka timata nga tau mate-kai e whitu te puta mai, ka pera hoki me to Hohepa i korero ai: a i nga whenua katoa te mate-kai; ko te whenua katoa ia o Ihipa i whai taro.

⁵⁵ A ka mate te whenua katoa o Ihipa i te kai, na, ka tangi atu te iwi ki a Parao ki te taro ma ratou: a ka mea mai a Parao ki nga Ihipiana katoa, Haere ki a Hohepa; me mea e koutou tana e mea ai ki a koutou.

⁵⁶ A i runga i te mata katoa o te whenua te mate-kai: a ka wahia e Hohepa nga toa katoa, a hokona ana e ia ki nga Ihipiana; a he nanakia te mate-kai i te whenua o Ihipa.

⁵⁷ A ka haere mai nga whenua katoa ki Ihipa ki a Hohepa ki te hoko witi; no te mea he nanakia rawa te mate-kai o nga whenua katoa.

UPOKO 42.

A ka kite a Hakopa he witi kei Ihipa, na, ka mea a Hakopa ki ana tamariki, Na te aha koutou i tirotiro kau ai ki a koutou ano?

² I mea mai ano ia, Nana, kua rongo ahau he witi kei Ihipa: haere atu ki raro ki reira, ki te hoko i tetahi ma tatou ki reira; kia ora ai tatou, kei mate.

³ Na, ka haere nga tuakana kotahi tekau o Hohepa ki raro ki Ihipa, ki te hoko witi.

⁴ Ko Peniamine ia, ko te teina o Hohepa, kihai i tonoa e Hakopa i roto i ona tuakana; i mea hoki ia, Kei pono mai tetahi aitua ki a ia.

⁵ A ka haere mai nga tamariki a Iharaira ki te hoko i roto i te hunga i haere mai: he mate-kai hoki to te whenua o Kanaana.

⁶ A ko Hohepa te kawana o te whenua ko ia te kai hoko ki nga tangata katoa o te whenua: na ka haere mai nga tuakana o Hohepa, a ka piko iho o ratou kanohi ki te whenua i tona aroaro.

⁷ A, te kitenga o Hohepa i ona tuakana, na, ka mohio ia ki a ratou, a ka whakatangata-ke ia ki a ratou, a ka korero whakatuma mai ki a ratou; ka mea hoki ki a ratou, I haere mai koutou i hea? A ka mea atu ratou, I te whenua o Kanaana, ki te hoko kai.

⁸ A i mohio a Hohepa ki ona tuakana, ko ratou ia kihai i mohio ki a ia.

⁹ Na, ka mahara a Hohepa ki nga moe i moe ai ia mo ratou, a ka mea mai ia ki a ratou, He tutei koutou; he whakataki i te wateatanga o te whenua i haere mai ai koutou.

¹⁰ A ka mea atu ratou ki a ia, Kahore, e toku ariki, engari i haere mai o pononga ki te hoko kai.

¹¹ He tamariki katoa matou na te tangata kotahi; he hunga pono matou, ehara o pononga i te tutei.

¹² A ka mea mai ia ki a ratou, Kahore, engari he whakataki i te wateatanga o te whenua i haere mai ai koutou.

¹³ A ka mea atu ratou, Kotahi tekau ma rua o pononga, he teina he tuakana matou, he tamariki na te tangata kotahi, no te whenua o Kanaana; a, tera ano te mea nohinohi kei to matou papa inaianei, ko tetahi kua kahore.

¹⁴ Na, ko te meatanga mai a Hohepa ki a ratou, Ko ia taku i korero ai ki a koutou, i mea ai, He tutei koutou:

¹⁵ Ma konei ka mohiotia ai koutou: E ora ana a Parao e kore koutou e haere atu i konei, ki te kahore to koutou teina nohinohi e haere mai ki konei.

¹⁶ Tukua atu tetahi o koutou ki te tiki i to koutou teina, ko koutou hoki, ka herea koutou, kia mohiotia ai a koutou korero, he pono ranei ta koutou: a ki te kahore, e ora ana a Parao, ina, he tutei koutou.

¹⁷ Na, ka huihuia atu ratou e ia kia tiakina, a e toru nga ra.

¹⁸ A i te toru o nga ra ka mea mai a Hohepa ki a ratou, Ko tenei ta koutou e mea ai, kia ora ai koutou; he tangata wehi hoki ahau i te Atua.

¹⁹ Ki te mea he hunga pono koutou, kia herea tetahi o o koutou tuakana i roto i te whare i tiakina ai koutou: me haere koutou, ki te kawe witi mo te mate-kai o o koutou whare:

²⁰ A me kawe mai to koutou teina nohinohi ki a au; kia whakatikaia ai a koutou kupu; a e kore koutou e mate. A pena ana ratou.

²¹ A ka mea ratou tetahi ki tetahi, He pono kua whai hara tatou i to tatou teina; i kite hoki tatou i te mamae o tona wairua, i tana inoinga ki a tatou, a kihai i whakarongo atu; no reira hoki i puta mai ai tenei he ki a tatou.

²² Na, ka whakahokia mai e Reupena ki a ratou, a ka mea, Kahore ianei ahau i ki atu ki a koutou, i mea, Kaua e hara ki te tamaiti; a kihai koutou i rongo mai? na, ko ona toto ano hoki tenei te whakatakina nei.

²³ A kihai ratou i mohio e rongo mai ana a Hohepa; no te mea he kai whakamaori tana hei korero ki a ratou.

²⁴ Na, ka tahuri ke atu ia i a ratou, a ka tangi; a ka hoki mai ano ia ki a ratou, ka korero ki a ratou, ka tango hoki i a Himeona i roto i a ratou, a herea ana e ia ki to ratou aroaro.

²⁵ Na, ka whakahau a Hohepa kia whakakiia a ratou pēke ki te witi, kia whakahokia ano hoki nga moni a tenei tangata a tenei tangata ki roto ki a ratou pēke, kia hoatu ano hoki ki a ratou he o ki te ara; a pera ana ia ki a ratou.

²⁶ Katahi ka utaina atu e ratou a ratou witi ki runga ki a ratou kaihe, a haere atu ana i reira.

²⁷ A i te whakatuwheratanga a tetahi o ratou i tana pēke kia hoatu he kai ma tana kaihe i te whare tira, na, ka kitea iho e ia tana moni; na, kei te waha ano o tana pēke.

²⁸ A ka mea ia ki ona tuakana, Kua whakahokia mai taku moni; a tenei ano kei roto i taku pēke: na, kore ake o ratou ngakau, a ka wehi ratou, ka mea tetahi ki tetahi, He mahi aha tenei a te Atua ki a tatou?

²⁹ Na, ka tae mai ratou ki a Hakopa ki to ratou papa, ki te whenua o Kanaana, a ka korerotia mai ki a ia nga mea katoa i pono mai ki a ratou; a ka mea,

³⁰ I korero whakatuma mai te rangatira o te whenua ki a matou, a i kiia ano matou e ia he tutei mo te whenua.

³¹ A ka mea atu matou ki a ia, He tangata pono matou; ehara matou i te tutee.

³² Kotahi tekau ma rua matou, he tuakana he teina, he tamariki na to matou papa; kotahi kua kore, a kei to matou papa te mea nohinohi inaianei, kei te whenua o Kanaana.

³³ Na, ko te meatanga mai a taua tangata, a te rangatira o te whenua, ki a matou, Ma tenei e mohio ai ahau he hunga pono koutou; me waiho e koutou tetahi o o koutou tuakana ki a au, a me mau atu e koutou he kai mo te mate-kai o o koutou whare, a ka haere:

³⁴ Ka kawe mai ai hoki i to koutou teina nohinohi ki a au, kia mohio ai ahau ehara koutou i te tutei, engari he hunga pono koutou: penei ka hoatu e ahau to koutou tuakana ki a koutou, a ka hokohoko koutou ki tenei whenua.

³⁵ A i a ratou e ringiringi ana i a ratou pēke, na, ko te moni a tenei a tenei e takai ana i roto i a ratou pēke: a ka kite ratou ko to ratou papa i nga moni e takai ana, na, ka wehi ratou.

³⁶ Na, ka mea mai a Hakopa to ratou papa ki a ratou, Ka whakapania ahau e koutou: Ko Hohepa, kua kahore, ko Himeona hoki, kua kahore, a ka tangohia nei e koutou a Peniamine: he pehi moku enei mea katoa.

³⁷ Na, ka korero atu a Reupena ki tona papa, ka mea atu, Whakamatea aku tamariki tokorua, ki te kahore ia e kawea mai e ahau ki a koe: homai ia ki toku ringa, a maku ia e whakahoki mai ki a koe.

³⁸ A ka mea mai ia, E kore taku tamaiti e haere tahi i a koutou ki raro; kua mate hoki tona tuakana, a ko ia anake ka mahue nei; a ki te pono he aitua ki a ia i te ara e haere nei koutou, katahi ka meinga taku koroheketanga e koutou kia heke tangi atu ki te urupa.

UPOKO 43.

A he nanakia te mate-kai o te whenua.

² A i te paunga rawatanga o te witi i maua mai e ratou i Ihipa, na, ka mea mai to ratou papa ki a ratou, Hoki atu ki te hoko i tetahi kai ma tatou.

³ A ka korero atu a Hura ki a ia, ka mea, I tino whakatupato taua tangata i a matou, i mea, E kore koutou e kite i toku mata ki te kahore to koutou teina i a koutou.

⁴ Ki te tukua e koe to matou teina hei hoa mo matou, ka haere matou ki raro ki te hoko kai mau:

⁵ A ki te kahore e tukua e koe, e kore matou e haere ki raro: no te mea i ki mai taua tangata ki a matou, E kore koutou e kite i toku mata ki te kahore to koutou teina i a koutou.

⁶ Na, ka mea mai a Iharaira, Na te aha koutou i ngarahu kino ai ki a au, i whakaatu ai ki taua tangata he teina ano to koutou?

⁷ A ka mea ratou, I tino ui taua tangata ki a matou aha noa, ki o matou whanaunga hoki, i mea mai, E ora ana ano ranei to koutou papa? tena ano ranei tetahi atu teina o koutou? a rite tonu ki enei kupu to matou i korero ai ki a ia: tera ranei matou e ata mohio ka ki mai ia, Kawea mai to koutou teina ki raro nei?

⁸ Na, ka mea atu a Hura ki tona papa ki a Iharaira, Tukua te tamaiti ki a au, a ka whakatika matou, ka haere; kia ora ai tatou, kei mate tahi hoki matou me koe, me a matou potiki.

⁹ Ko ahau hei utu mona; me rapu ia e koe i toku ringaringa: ki te kahore ahau e kawe mai i a ia ki a koe, e whakatu hoki i a ia ki tou aroaro, na, hei whakaheanga ahau mau i nga ra katoa:

¹⁰ Me i kahore hoki matou i roa nei, kua rua enei hokinga mai o matou inaianei.

¹¹ Katahi ka mea mai a Iharaira to ratou papa ki a ratou, Ki te mea ra he penei te hanga, ko tenei to koutou e mea ai; maua atu etahi o nga hua papai o te whenua i roto i a koutou oko, kawea atu hoki he hakari ki raro ki taua tangata, tetahi wahi pama, me tetahi wahi honi, etahi paihe, me tetahi maira, etahi naiti, me etahi aramona:

¹² Kia takirua hoki nga hiriwa e maua atu i roto i o koutou ringaringa; me te moni i whakahokia mai i te waha o a koutou pēke, me whakahoki atu ano tena i roto i o koutou ringaringa; he he noa ano pea tena mea:

¹³ Kawea atu ano hoki to koutou teina, a whakatika, hoki atu ano ki taua tangata:

¹⁴ A ma te Atua kaha rawa e tuku mai ki a koutou kia arohaina mai e taua tangata, kia tonoa mai ano hoki e ia tera tuakana o koutou, raua ko Peniamine. Ko au hoki, ki te whakapania ahau, ka whakapania ahau.

¹⁵ Na, ka mau aua tangata ki taua hakari, a e rua nga moni i maua atu e ratou i roto i o ratou ringaringa, me Peniamine hoki; a whakatika ana, haere ana ki raro ki Ihipa, a ka tu ki te aroaro o Hohepa.

¹⁶ A ka kitea a Peniamine e Hohepa i roto i a ratou, na, ka mea atu ia ki te kai tohutohu o tona whare, Kawea ena tangata ki te whare, patua he kai, takā hoki; ka kai tahi hoki matou ko ena tangata ina tu te ra.

¹⁷ Na, ka meatia e taua tangata ta Hohepa i ki ai; a ka kawea aua tangata e taua tangata ki te whare o Hohepa.

¹⁸ Na, ka wehi aua tangata, mo ratou i kawea ki te whare o Hohepa; a mea ratou, Mo te moni i whakahokia i roto i a tatou pēke i te haerenga tuatahi tatou i kawea mai ai; kia whai take mai ai ia ki a tatou, mo tana rere mai ki a tatou ki te tango i a tatou hei pononga, me a tatou kaihe hoki.

¹⁹ Na, ka whakatata mai ratou ki te kai tohutohu o te whare o Hohepa, a ka korero ki a ia i te kuwaha o te whare,

²⁰ Ka mea, E te ariki, i haere mai ano matou i mua ki te hoko kai;

²¹ A to matou taenga atu ki te whare tira, ta matou whakatuwheratanga hoki i a matou pēke, na, ko te moni a tenei tangata a tenei tangata i te waha o tana pēke, ta matou moni, rite tonu hoki te taimaha: a kua whakahokia mai nei taua mea e matou i roto i o matou ringaringa.

²² Kua kawea mai ano hoki e matou i roto i o matou ringaringa tetahi atu moni hei hoko kai: kahore matou e mohio na wai ranei i maka a matou moni ki roto ki a matou pēke.

²³ A ka mea atu ia, Kia tau te rangimarie ki a koutou, kaua e wehi: ai to koutou Atua, na te Atua hoki o to koutou papa i homai te taonga ki a koutou ki roto ki a koutou pēke: i tae mai ano ta koutou moni ki a au. A ka kawea mai e ia a Himeona ki a ratou.

²⁴ Na, ka kawe taua tangata i aua tangata ki te whare o Hohepa, a ka hoatu e ia he wai hei horoi mo o ratou waewae; a i hoatu ano e ia he kai ma a ratou kaihe.

²⁵ Na, ka takā e ratou te hakari mo te taenga mai o Hohepa i te awatea: i rongo hoki ratou me kai taro ratou ki reira.

²⁶ A i te taenga mai o Hohepa ki te whare, na, ka kawea mai e ratou ki a ia te hakari a o ratou ringaringa ki te whare, a ka piko iho ki a ia ki te whenua.

²⁷ Na, ka ui mai ia ki a ratou ki te pai, a ka mea, E pai ana ranei to koutou papa, te koroheke i korerotia mai ra e koutou? E ora ana ano ranei ia?

²⁸ A ka mea ratou ki a ia, E pai ana ano to pononga to matou papa, e ora ana ano ia. Na, ka tuohu ratou, ka piko iho.

²⁹ Na, ka maranga ake ona kanohi, ka kite ia i a Peniamine i tona teina i te tamaiti a tona whaea, a ka mea mai, Ko to koutou teina tenei, ko te mea nohinohi i korerotia mai ra e koutou ki a au? A i mea ano ia, Kia aroha te Atua ki a koe, e taku tamaiti.

³⁰ Na, ka hohoro a Hohepa; he tokonga ake hoki no tona puku aroha ki tona teina: a ka rapua e ia tetahi wahi hei tangihanga; a haere ana ia ki te ruma i roto, ki reira tangi ai.

³¹ Na, ka horoi ia i tona mata, a ka puta mai ki waho, a ka whakamanawanui, a ka mea, Whakatakotoria he taro.

³² Na, ka whakatakotoria e ratou mana ki a ia anake, a ma ratou ki a ratou anake, a ma nga Ihipiana, i kai tahi me ia, ki a ratou anake: no te mea hoki e kore e ahei i nga Ihipiana te kai taro tahi me nga Hiperu; he mea whakarihariha hoki tena ki nga Ihipiana.

³³ Na, ka noho ratou ki tona aroaro, to mua rite tonu ano ki tona muanga, to muri rite tonu ano ki tona muringa: a miharo ana aua tangata ki tetahi ki tetahi.

³⁴ Na, ka tuwhaina atu e ia etahi o nga wahi i tona aroaro ma ratou: a he nui rawa te wahi i a Peniamine; me i takirimatia te wahi a tetahi o ratou kua rite ki tana. Na, ka inu ratou, a ka koa tahi me ia.

UPOKO 44.

Na, ka whakahau ia ki te kai tohutohu o tona whare, ka mea, Whakakiia nga pēke a aua tangata ki nga kai e taea te whawhao ki roto, me maka ano hoki te moni a ia tangata a ia tangata ki roto ki te waha o tana pēke.

² A whaowhina atu taku kapa, te kapa hiriwa, ki roto ki te waha o te pēke a te mea nohinohi, me te moni ano hoki mo tana witi. Na, rite tonu tana i mea ai ki ta Hohepa kupu i ki ai.

³ A ka mārama te ata, na, ka tonoa atu aua tangata, a ratou, me a ratou kaihe.

⁴ A kihai i matara to ratou haerenga atu i waho o te pa, na, ka mea mai a Hohepa ki te kai tohutohu o tona whare, Whakatika, whaia aua tangata; a ka mau ratou i a koe, na, ka mea atu ki a ratou, Na te aha i homai ai e koutou te kino hei utu mo te pai?

⁵ Ehara ianei tenei a te mea e inu ai toku ariki, i tana hoki e kite tohu ai ia? ka kino ta koutou nei mahi.

⁶ Na, ka mau ratou i a ia, a korerotia atu ana e ia aua kupu ano ki a ratou.

⁷ A ka mea ratou ki a ia, Na te aha enei kupu i korerotia ai e toku ariki? Aue! kia meatia tenei mea e o pononga!

⁸ Whakaaro hoki, te moni i kitea e matou i te waha o a matou pēke, i whakahokia mai e matou ki a koe i te whenua o Kanaana: a kia tahae matou hei aha i te hiriwa, i te koura ranei, i roto i te whare o tou ariki?

⁹ Ki te mea ka kitea taua mea ki tetahi o o pononga, kia mate ia, a kia waiho matou hei pononga ma toku ariki.

¹⁰ A ka mea mai ia, Kia rite ano hoki aianei ki ta koutou i mea ai: e kitea taua mea ki tetahi, hei pononga ia maku; a kahore he whakahe mo koutou.

¹¹ Na, hohoro tonu ta ratou tuku iho i tana pēke i tana pēke ki te whenua, whakatuwheratia ana e ratou tana pēke tana pēke.

¹² Na, ka rapu ia, a ka timata i ta te kaumatua, ka whakamutu hoki i to te mea nohinohi: a ka kitea te kapa i roto i te pēke a Peniamine.

¹³ Na, ka haehae ratou i o ratou kakahu, a whakawahā ana e ratou tana kaihe tana kaihe, a hoki ana ki te pa.

¹⁴ Na, ka haere mai a Hura, ratou ko ona tuakana ko ona teina, ki te whare o Hohepa; i reira ano hoki ia: a tapapa iho ana ki te whenua i tona aroaro.

¹⁵ Na, ka mea a Hohepa ki a ratou, He aha tenei mea i meatia nei e koutou? kihai ranei koutou i mahara he tangata matakite te penei me au nei?

¹⁶ Na, ka mea mai a Hura, He aha ta matou e mea ai ki toku ariki? he aha ta matou e korero ai? me aha ranei hei whakatika i a matou? Kua kitea e te Atua te hara o o pononga; na, tenei matou hei pononga ma toku ariki, matou tahi hoki ko te tangata i kitea nei te kapa ki a ia.

¹⁷ Ano ra ko ia, Hi, kia meatia tenei e ahau! ko te tangata i kitea nei te kapa ki a ia, ko ia hei pononga maku; ko koutou ia, haere marie koutou ki runga ki to koutou papa.

¹⁸ Na, ka whakatata mai a Hura ki a ia, a ka mea, Tukua to pononga, e toku ariki, kia korero atu i tetahi kupu ki nga taringa o toku ariki, kei mura mai hoki to riri ki to pononga: ko korua hoki ko Parao, rite tahi.

¹⁹ I ui mai toku ariki ki ana pononga, i mea, He papa ranei to koutou, he teina ranei?

²⁰ A ka mea atu matou ki toku ariki, He papa ano to matou, he koroheke, me tetahi tamaiti o tona koroheketanga, he mea nohinohi; kua mate hoki tona tuakana, a ko ia anake i mahue o nga tamariki a tona whaea, a e aroha ana tona papa ki a ia.

²¹ Na, ka mea mai koe ki o pononga, Kawea mai ia ki raro ki a au, kia tau atu ai oku kanohi ki a ia.

²² Katahi ka mea atu matou ki toku ariki, E kore e ahei kia whakarerea tona papa e taua tamaiti: no te mea ka mate tona papa ki te whakarerea e ia.

²³ Na, ka mea mai koe ki o pononga, Ki te kahore to koutou teina, te mea nohinohi e haere tahi mai i a koutou ki raro, e kore koutou e kite i toku kanohi, a muri ake nei.

²⁴ A i to matou haerenga ki runga ki to pononga ki toku papa, na, ka korerotia e matou nga kupu a toku ariki ki a ia.

²⁵ A ka mea mai to matou papa, Hoki atu ki te hoko i tetahi wahi kai ma tatou.

²⁶ Na, ka mea atu matou, E kore e ahei i a matou te haere ki raro: ki te mea kei a matou to matou teina, te mea nohinohi, na, ka haere matou ki raro: no te mea hoki e kore e taea e matou te titiro atu ki te kanohi o taua tangata, ki te kahore to matou teina, te mea nohinohi, i a matou.

²⁷ Na, ka mea mai to pononga toku papa ki a matou, E mohio ana koutou tokorua nga tamariki a maua ko taku wahine:

²⁸ A i haere atu tetahi i toku taha, a i mea ahau, He pono kua haea putia ia; a kahore ahau i kite i a ia, a mohoa noa nei:

²⁹ A ki te tangohia ano hoki tenei e koutou i toku aroaro, a ka pono he aitua ki a ia, katahi ka meinga e koutou kia heke tangi atu toku koroheketanga ki te urupa.

³⁰ Na, akuanei, ki te haere atu ahau ki to pononga ki toku papa, a kahore taua tamaiti i a matou; (kei roto hoki i tona wairua tona wairua e paihere ana;)

³¹ Na, akuanei, kei tona kitenga kahore tenei tamaiti, na, ka mate ia: a ka meinga e matou e o pononga te koroheketanga o to pononga o to matou papa kia heke tangi atu ki te urupa.

³² I waiho hoki to pononga hei utu mo tenei tamaiti ki toku papa, i mea ahau, Ki te kahore ia e kawea mai e ahau ki a koe, na, hei whakaheanga ahau ma toku papa i nga ra katoa.

³³ Na, kia noho ra to pononga aianei hei utu mo tenei tamaiti, hei pononga ma toku ariki; a kia haere tahi te tamaiti i ona tuakana ki runga.

³⁴ Me pehea hoki ahau e haere ai ki runga, ki toku papa, ki te kahore te tamaiti i a au? kei kite ahau i te kino e pa ana ki toku papa.

UPOKO 45.

A kihai i taea e Hohepa te whakamanawanui i te aroaro o te hunga katoa e tu ana i tona taha; na, ka karanga ia, Kia haere katoa atu nga tangata i toku taha. A kihai i tu tetahi tangata i tona taha, i a Hohepa e whakaatu ana i a ia ki ona tuakana.

² A, he rahi tona reo ki te tangi: a ka rongo nga Ihipiana, ka rongo ano hoki te whare o Parao.

³ Na, ka mea mai a Hohepa ki ona tuakana, Ko Hohepa ahau; e ora ana ano ranei toku papa? A kihai ona tuakana i ahei te whakahoki kupu mai ki a ia; i pororaru hoki ratou i tona aroaro.

⁴ A ka mea mai a Hohepa ki ona tuakana, Whakatata mai ra ki a au. A ka whakatata atu ratou. A ka mea ia, Ko Hohepa ahau, ko to koutou teina, i hokona nei e koutou ki Ihipa.

⁵ Na, kaua ra e pouri, kaua hoki e mumura o koutou kanohi, mo koutou i hoko i a au ki konei: no te mea hoki he mea tono mai ahau e te Atua ki mua i a koutou hei whakaora tangata.

⁶ No te mea hoki ka rua enei tau o te mate-kai ki te whenua: a kei muri etahi atu tau e rima, e kore ai e parau, e kore ai e kokoti.

⁷ A kua tonoa mai nei ahau e te Atua ki mua i a koutou kia whai putanga ai koutou ki te ao, kia ora ai hoki koutou i runga i te whakaoranga nui.

⁸ Ina, ehara i a koutou nana ahau i tono mai, engari na te Atua; a kua waiho ano hoki ahau e ia hei matua ki a Parao, hei ariki ano hoki mo tona whare katoa, hei kawana hoki mo te whenua katoa o Ihipa.

⁹ Hohoro, haere atu ki runga, ki toku papa, a ka mea atu ki a ia, He penei te kupu a to tamaiti a Hohepa, Kua meinga ahau e te Atua hei ariki mo Ihipa katoa; haere mai ki a au, kaua e whakaroa:

¹⁰ A me noho koe ki te whenua o Kohena, a ka tata koe ki a au, koutou, ko o tamariki, ko nga tamariki hoki a o tamariki, me o kahui, me o kau, me o mea katoa:

¹¹ A ka atawhai ahau i a koe ki reira; no te mea hoki e rima enei tau mate-kai kei muri nei; kei rawa-koretia koutou, ko tou whare, me au mea katoa.

¹² Na, ka kite nei o koutou kanohi, me nga kanohi hoki o toku teina o Peniamine, ko toku waha tenei te korero atu nei ki a koutou.

¹³ A ma koutou e korero atu ki toku papa taku kororia katoa i Ihipa, me nga mea katoa i kite nei koutou; a kia hohoro koutou ki te kawe mai i toku papa ki konei.

¹⁴ Na, ka hinga ia ki runga ki te kaki o Peniamine o tona teina, a ka tangi, a ka tangi ano hoki a Peniamine i runga i tona kaki.

¹⁵ A ka kihi ano ia i ona tuakana katoa, ka tangi hoki ki a ratou: a, muri iho ka korero mai ona tuakana ki a ia.

¹⁶ Na, ka tae te rongo ki te whare o Parao, a ka korerotia, Kua tae mai nga tuakana o Hohepa: a he mea pai tena ki te whakaaro a Parao, ki te whakaaro hoki a ana tangata.

¹⁷ Na, ka mea mai a Parao ki a Hohepa, Korerotia atu ki o tuakana, Ko tenei ta koutou e mea ai; Whakawahā a koutou kararehe, a whakatika atu, haere ki te whenua o Kanaana;

¹⁸ Tikina atu hoki to koutou papa, me nga tangata o o koutou whare, a haere mai ki a au: a ka hoatu e ahau ki a koutou nga mea pai o te whenua o Ihipa, a ka kai koutou i te momonatanga o te whenua.

¹⁹ Na, kua whakahaua atu nei koe, meatia tenei e koutou; kawea atu etahi kaata ma koutou i te whenua o Ihipa mo a koutou tamariki, me a koutou wahine, a kawea mai to koutou papa, haere mai hoki.

²⁰ A kaua e whakaaro ki a koutou mea; no te mea hoki mo koutou nga mea pai o te whenua katoa o Ihipa.

²¹ Na, ka pera ano nga tamariki a Iharaira: o ka hoatu he kaata e Hohepa ki a ratou, ka pera me ta Parao i ki ai, a ka homai ano hoki e ia he o mo ratou ki te ara.

²² A ka homai e ia ki a ratou katoa he whakatakirua mo nga kakahu o tetahi o tetahi; ki a Peniamine ia i homai e ia e toru rau hiriwa, takirima tonu hoki nga kakahu.

²³ A ko nga mea tenei i hoatu e ia kia kawea ki tona papa; kotahi tekau nga kaihe e waha ana i nga mea pai o Ihipa, me nga kaihe uha kotahi tekau, ta ratou kawenga he witi, he taro, he kai ma tona papa ki te ara.

²⁴ Na, ka tonoa atu e ia ona tuakana, a haere ana ratou: a ka mea ia ki a ratou, Kei ngangau koutou ki te ara.

²⁵ Na, haere ana ratou ki runga i Ihipa, a ka tae ki te whenua o Kanaana, ki a Hakopa ki to ratou papa,

²⁶ A ka korero ki a ia, ka mea, E ora ana ano a Hohepa, a ko ia ano te kawana o te whenua katoa o Ihipa. Na, ka whakapau te manawa o Hakopa, kihai hoki ia i whakapono ki a ratou.

²⁷ Na, ka korerotia mai e ratou ki a ia nga kupu katoa a Hohepa, i korero ai ia ki a ratou: a ka kite ia i nga kaata i tukua mai e Hohepa hei tiki mai mona, na, ka ora ake te wairua o Hakopa o to ratou papa:

²⁸ Katahi a Iharaira ka mea, Heoi ano; e ora ana ano taku tamaiti a Hohepa: ka haere ahau kia kite i a ia keiwha mate ahau.

UPOKO 46.

Na, ka turia atu e Iharaira me ana mea katoa, a ka tae mai ki Peere-hepa, a ka patua e ia etahi patunga tapu ma te Atua o tona papa o Ihaka.

² Na, ka korero moemoea mai te Atua ki a Iharaira i te po, a ka mea, E Hakopa, e Hakopa. A ka mea ia, Tenei ahau.

³ A ka mea mai ia, Ko te Atua ahau, ko te Atua o to papa: kaua e wehi ki te haere ki raro ki Ihipa; ka meinga hoki koe e ahau hei iwi nui ki reira:

⁴ Ka haere tahi ahau i a koe ki raro ki Ihipa; a maku ano koe e whakahoki mai ki runga nei: a ma te ringa o Hohepa e pehi ou kanohi.

⁵ Na, ka whakatika atu a Hakopa i Peere-hepa, a ka kawea atu a Hakopa to ratou papa e nga tamariki a Iharaira, me a ratou tamariki, me a ratou wahine, i runga i nga kaata i tukua mai e Parao hei tiki mai i a ia.

⁶ A i kawea ano e ratou a ratou kararehe, me o ratou taonga, i whiwhi ai ratou ki te whenua o Kanaana, a haere ana ki Ihipa a Hakopa, ratou tahi ko ona uri katoa:

⁷ Ko ana tamariki, ko nga tamariki hoki a ana tamariki: ana tamahine, me nga tamahine a ana tamariki, me ona uri katoa i kawea e ia ki Ihipa.

⁸ A ko nga ingoa enei o nga tamariki a Iharaira, i haere nei ratou ko Hakopa ko ana tamariki ki Ihipa: Ko Reupena, ko te matamua a Hakopa.

⁹ A ko nga tamariki a Reupena; ko Hanoka, ko Paru, ko Heterono, ko Karami.

¹⁰ A ko nga tamariki a Himeona; ko Iemuere, ko Ohara, ko Iakini, ko Tohara, ratou ko Hauru, ko te tamaiti a tetahi wahine Kanaani.

¹¹ A ko nga tamariki a Riwai; ko Kerehona, ko Kohata, ko Merari.

¹² Ko nga tamariki hoki a Hura; ko Ere, ko Onana, ko Heraha, ko Parete, ko Taraha: ko Ere ia raua ko Onana i mate ki te whenua o Kanaana. A ko nga tamariki, a Parete, ko Heterono raua ko Hamuru.

¹³ A nga tamariki a Ihakara; ko Tora, ko Puwa, ko Hopa, ko Himirono.

¹⁴ A, nga tamariki a Hepuruna; ko Herete, ko Erono, ko Iahareere.

¹⁵ Ko nga tamariki enei a Rea, i whanau nei i a raua ko Hakopa ki Parana-arama, ratou ko tana tamahine ko Rina: e toru tekau ma toru nga wairua katoa o ana tamariki me ana tamahine.

¹⁶ A ko nga tamariki a Kara; Ko Hipiona, ko Haki, ko Huni, ko Etepono, ko Eri, ko Arori, ko Areri.

¹⁷ A nga tamariki a Ahera; ko Imina ko Ihua, ko Ihui, ko Peria, ratou ko Hera ko to ratou tuahine: a ko nga tamariki a Peria, ko Hepere raua ko Marakiere.

¹⁸ Ko nga tamariki enei a Tiripa, a te wahine i homai nei e Rapana ki a Rea ki tana tamahine, a ko enei a raua ko Hakopa i whanau ai, kotahi tekau ma ono nga wairua.

¹⁹ Nga tamariki a Rahera wahine a Hakopa; ko Hohepa raua ko Peniamine.

²⁰ A whanau ake a Hohepa i te whenua o Ihipa, ko Manahe raua ko Eperaima, he whanau enei na raua ko Ahenata tamahine a Poti-whera tohunga o Ono.

²¹ A nga tamariki a Peniamine; ko Peraha, ko Pekere, ko Ahapere, ko Kera, ko Naamana, ko Ehi, ko Roho, ko Mupimi, ko Hupimi, ko Arare.

²² Ko nga tamariki enei a Rahera, i whanau nei ma Hakopa: nga wairua katoa, kotahi tekau ma wha.

²³ A nga tamariki a Rana; ko Huhimi.

²⁴ A nga tamariki a Napatari; ko Iahateere, ko Kuni, ko Ietere, ko Hireme.

²⁵ Ko nga tamariki enei a Piriha a te wahine i homai nei e Rapana ki tana tamahine ki a Rahera, a whanau ake enei i a raua ko Hakopa: e whitu aua wairua katoa.

²⁶ Nga wairua katoa i haere tahi nei i a Hakopa ki Ihipa, i puta mai nei i roto i tona hope, e ono tekau ma ono nga wairua katoa; hāunga nga wahine a nga tamariki a Hakopa.

²⁷ A nga tamariki a Hohepa, i whanau nei mana ki Ihipa, e rua nga wairua: e whitu tekau nga wairua katoa o te whare o Hakopa i haere nei ki Ihipa.

²⁸ Na, ka tonoa mai e ia a Hura ki mua i a ia ki a Hohepa, hei arahi i a ia ki Kohena; a ka tae mai ratou ki te whenua o Kohena.

²⁹ Na, ka whakanohoia e Hohepa tana hariata, a haere ana ki te whakatau i tona papa i a Iharaira ki Kohena, a ka tae atu ki tona aroaro; na, ka hinga ia ki runga ki tona kaki, a he roa tana tangihanga i runga i tona kaki.

³⁰ Na, ka mea mai a Iharaira ki a Hohepa, He pai ki te mate ahau aianei, noku hoki ka kite i tou mata, no te mea e ora ana ano koe.

³¹ Na, ka mea atu a Hohepa ki ona tuakana, ki te whare ano hoki o tona papa, Ka haere ahau ki runga ki te korero ki a Parao, a ka mea atu ki a ia, Kua tae mai ki a au oku tuakana, me te whare o toku papa, i noho ra i te whenua o Kanaana;

³² A he hepara aua tangata, he hunga whangai kararehe hoki ratou; a kua kawea mai ano hoki e ratou a ratou kahui, me a ratou kau, me a ratou mea katoa.

³³ A ka karanga mai a Parao i a koutou, a ka mea, He aha ta koutou mahi?

³⁴ Na, me ki atu e koutou, He hunga whangai kararehe o pononga, o to matou taitamarikitanga ake, a mohoa noa nei, matou, me o matou mātua: kia noho ai koutou ki te whenua o Kohena; no te mea hoki he mea whakarihiariha ki nga Ihipiana nga hepara katoa.

UPOKO 47.

Na ka haere a Hohepa, a ka korero ki a Parao, ka mea, Kua tae mai toku papa me oku tuakana, me a ratou kahui, me a ratou kau, me a ratou mea katoa, i te whenua o Kanaana; a tenei ano ratou kei te whenua o Kohena.

² Na, ka tango ia i etahi o ona tuakana, tokorima, a whakaturia ana ratou e ia ki te aroaro o Parao.

³ A ka mea mai a Parao ki ona tuakana, He aha ta koutou mahi? A ka mea ratou ki a Parao, He hepara o pononga, matou, me o matou mātua.

⁴ A i mea ano ratou ki a Parao, He noho ki tenei whenua i haere mai ai matou; no te mea kahore he kai ma nga hipi a o pononga; i te nui hoki o te mate-kai o te whenua o Kanaana: na, kia noho ra o pononga ki te whenua o Kohena.

⁵ Na, ka korero mai a Parao ki a Hohepa, a ka mea, Kua tae mai nei tou papa me ou tuakana ki a koe:

⁶ Kei tou aroaro te whenua o Ihipa; whakanohoia e koe tou papa me ou tuakana ki te wahi pai o te whenua; kia noho ratou ki te whenua o Kohena: ki te mea e mohiotia ana e koe etahi tangata uaua i roto i a ratou, meinga ratou hei rangatira mo aku kararehe.

⁷ Na, ka kawea mai a Hakopa tona papa e Hohepa, a ka whakaturia ki te aroaro o Parao: a ka manaaki a Hakopa i a Parao.

⁸ A ka mea mai a Parao ki a Hakopa, Ka hia ou tau?

⁹ A ka mea a Hakopa ki a Parao, Kotahi rau e toru tekau tau nga ra o nga tau o toku nohoanga manenetanga: he torutoru, he kino nga ra o nga tau o toku oranga, kihai ano hoki i rite ki nga ra o nga tau o te oranga o oku mātua, nga ra i noho manene ai ratou.

¹⁰ Na, ka manaaki a Hakopa i a Parao, a puta mai ana i te aroaro o Parao.

¹¹ Na, ka whakanohoia e Hohepa tona papa me ona tuakana, a homai ana e ia ki a ratou he kāinga i te whenua o Ihipa, i te wahi pai o te whenua, i te whenua o Ramehehe, i pera ano me ta Parao i whakahau ai.

¹² Na, ka atawhai a Hohepa i tona papa, ratou ko ona tuakana, ko te whare katoa ano hoki o tona papa, ki te taro, he mea whakarite tonu ki o ratou hapu.

¹³ A kahore he taro o te whenua katoa; he nanakia rawa hoki te mate-kai; a hemo noa iho te whenua o Ihipa i te mate-kai, me te whenua hoki o Kanaana.

¹⁴ A kohia ana e Hohepa te moni katoa i kitea ki te whenua o Ihipa, ki te whenua hoki o Kanaana, mo te witi i hokona e ratou: a kawea ana e Hohepa te moni ki te whare o Parao.

¹⁵ A te potonga o te moni o te whenua o Ihipa, o te whenua hoki o Kanaana, na, ka haere mai nga Ihipiana katoa ki a Hohepa, a ka mea, Homai he taro ki a matou: kia mate hoki matou ki tou aroaro hei aha? kua poto nei hoki te moni.

¹⁶ Na, ka mea atu a Hohepa, Homai a koutou kararehe; a ka hoatu e ahau hei utu mo a koutou kararehe, ki te mea kua poto te moni.

¹⁷ Na, ka kawea mai e ratou a ratou kararehe ki a Hohepa: a hoatu ana e Hohepa he taro ki a ratou hei utu mo nga hoiho, mo nga kahui hipi, me nga kahui kau, me nga kaihe ano hoki: a whangaia ana ratou e ia, ki te taro i taua tau, hei utu mo a ratou kararehe katoa.

¹⁸ A te takanga o taua tau, na, ka haere mai ratou ki a ia i te rua o nga tau, a ka mea ki a ia, E kore e hunā e matou i toku ariki, kua poto te moni; kei toku ariki hoki a matou kahui kararehe; kahore he mea e toe ana hei tirohanga ma toku ariki, o matou tinana anake, me o matou oneone:

¹⁹ Kia mate matou ki tou aroaro hei aha? matou tahi hoki me to matou oneone? hokona matou me to matou oneone ki te taro, a ka riro mai matou me to matou oneone hei pononga ma Parao: homai ano hoki he purapura, a ka ora matou, a e kore e mate, e kore ano hoki e ururuatia te whenua.

²⁰ Na, ka hokona e Hohepa te oneone katoa o Ihipa mo Parao: i hokona hoki e nga Ihipiana tana mara tana mara; he pehi rawa hoki na te matekai i a ratou: a riro mai ana te whenua i a Parao.

²¹ A ka whakawhitiwhitia e ia nga tangata ki nga pa i tetahi pito o nga rohe o Mira, a puta noa ki tetahi pito o reira.

²² Ko te oneone anake ia o nga tohunga kihai i hokona e ia; i whakaritea hoki tetahi wahi e Parao ma nga tohunga, a i kai ratou i to ratou wahi i homai e Parao ma ratou: koia tē hokona ai e ratou o ratou oneone.

²³ A i mea ano a Hohepa ki te iwi, Nana, kua hokona nei koutou e ahau inaianei, me to koutou oneone, ma Parao: na, he purapura ma koutou, ruia te whenua.

²⁴ A ka whai hua a mua, na, me homai koutou te rima o nga wahi ki a Parao, a ma koutou nga wahi e wha, hei purapura mo te mara, hei kai hoki ma koutou, ma te hunga hoki i roto i o koutou whare, hei kai ano hoki ma a koutou tamariki.

²⁵ A ka mea mai ratou, Ka ora matou i a koe: kia manakohia mai matou e toku ariki, a hei pononga matou ma Parao.

²⁶ Na, ka whakatakotoria te tikanga e Hohepa mo te oneone o Ihipa, a, tae noa ki tenei ra, ma Parao te rima o nga wahi; hāunga ia te oneone o nga tohunga, kihai hoki tena i riro mai i a Parao.

²⁷ Na, ka noho a Iharaira ki te whenua o Ihipa, ki te whenua o Kohena; a ka whai kāinga ratou ki reira, a ka hua, ka nui whakaharahara.

²⁸ A kotahi tekau ma whitu nga tau i ora ai a Hakopa ki te whenua o Ihipa: a kotahi rau e wha tekau ma whitu nga tau o te oranga o Hakopa.

²⁹ Na, ka whakatata mai nga ra o Iharaira e mate ai ia: a ka karanga ia i tana tamaiti i a Hohepa, a ka mea ki a ia, Na, ki te mea ka manakohia mai ahau e koe, tena, whakapakia mai tou ringaringa ki raro i taku huha, a whakaputaina mai he aroha he pono ki a au; kaua ra ahau e tanumia ki Ihipa:

³⁰ Engari kia takoto ahau ki oku mātua, me kawe atu ahau e koe i Ihipa, me tanu hoki ki roto ki to ratou urupa. A ka mea mai ia, Ka rite i a au to kupu.

³¹ A ka mea atu ia ki a ia, Oati mai ki a au. A oati ana ia ki a ia. A ka piko iho a Iharaira ki runga ki te urunga o te moenga.

UPOKO 48.

A muri iho i enei mea, na ka korerotia mai ki a Hohepa, Nana, e mate ana to papa: na, ka tango ia i ana tamariki tokorua, i a Manahe raua ko Eperaima, hei hoa mona.

² A ka korerotia atu ki a Hakopa, ka meatia atu, Na, ko Hohepa ko to tamaiti tenei te haere mai nei ki a koe: na, whakakaha ake a Iharaira i a ia, a ka noho ki runga i te moenga.

³ Na, ka mea mai a Hakopa ki a Hohepa, I puta mai te Atua Kaha rawa ki a au i Rutu i te whenua o Kanaana, a i manaaki i a au,

⁴ I mea mai ano hoki ki a au, Na, ka meinga koe e ahau kia hua, a ka whakanui i a koe, ka meinga hoki koe e ahau hei huinga iwi; a ka hoatu e ahau tenei whenua ki ou uri i muri i a koe hei kāinga pumau.

⁵ Na, o tamariki tokorua, a Eperaima raua ko Manahe, i whanau nei mau ki te whenua o Ihipa i mua ake o taku taenga mai ki a koe ki Ihipa, maku ena; ka riro mai raua i a au, ka pera ano me Reupena raua ko Himeona.

⁶ A, to whanau e whanau mau i muri iho i a raua, mau ena; ka karangatia ki a ratou te ingoa o o ratou tuakana i to ratou kāinga pumau.

⁷ Ko au hoki, i taku haerenga mai i Parana, ka mate a Rahera ki toku taha, ki te whenua o Kanaana, ki te ara, i te mea he nohinohi te wahi e haere ai ki Eparata: a tanumia ana e ahau ki reira ki te ara ki Eparata, ara, ki Pete-rehema.

⁸ A ka kite a Iharaira i nga tamariki a Hohepa, na, ka mea atu, Ko wai enei?

⁹ A ka mea mai a Hohepa ki tona papa, Ko aku tamariki enei i homai e te Atua ki a au i konei. A ka mea atu ia, Nekehia mai nei ki a au, kia manaaki ai ahau i a raua.

¹⁰ A he atarua nga kanohi o Iharaira, na te koroheke hoki, kihai ia i ahei te kite atu. Na, ka whakatata mai ia i a raua ki a ia; a ka kihi ia i a raua, ka awhi hoki i a raua.

¹¹ Na, ka mea atu a Iharaira ki a Hohepa, Kihai ahau i mea ka kite ahau i tou mata: a kua whakakitea mai nei ano hoki e te Atua ou uri ki a au.

¹² Na, ka nekehia atu raua e Hohepa i roto i ona turi, a ka piko iho tona mata ki te whenua.

¹³ Na, ka puritia atu raua e Hohepa, a Eperaima e tona ringa matau ki te maui o Iharaira, me Manahe e tona maui ki te matau o Iharaira, a ka whakatata atu ia i a raua ki a ia.

¹⁴ Na, ka torona mai tona ringa matau e Iharaira, a whakatakotoria atu ana e ia ki runga ki te matenga o Eperaima, ko ia ano hoki te teina, me tona ringa maui hoki ki runga ki te mātenga o Manahe, he ata whakatakoto hoki nana i ona ringa; ko Manahe hoki te matamua.

¹⁵ Na, ka manaaki ia i a Hohepa, a ka mea, Ma te Atua, i haereere nei oku mātua a Aperahama raua ko Ihaka ki tona aroaro, ma te Atua, nana nei ahau i whangai i a au i ora nei, a, taea noatia tenei ra,

¹⁶ Ma te Anahera nana nei ahau i whakaora i roto i nga he katoa, e manaaki enei tamariki; a kia karangatia toku ingoa ki a raua, me te ingoa hoki o oku mātua, o Aperahama raua ko Ihaka; a kia tino nui haere raua i waenganui i te whenua.

¹⁷ A te kitenga o Hohepa kua whakatakotoria e tona papa tona matau runga ki te mātenga o Eperaima, na, ka kino ki tana titiro iho: a ka puritia ake e ia te ringaringa o tona papa, kia nekehia atu e ia i te mātenga o Eperaima ki runga ki te mātenga o Manahe.

¹⁸ A ka mea a Hohepa ki tona papa, Kaua e pena, e toku papa; ko te tuakana hoki tenei: whakatakotoria to matau ki runga ki tona mātenga.

¹⁹ Na, ka whakakahore tona papa, a ka mea, E mohio ana ahau, e taku tamaiti e mohio ana ahau: ka whakatupu iwi ano tenei, ka nui ano hoki ia: otiia ka nui atu tona teina i a ia, a ka waiho ona uri hei iwi maha.

²⁰ Na, ka manaaki ia i a raua i taua rangi, a ka mea, Ko koe ta Iharaira manaakitanga, a ka korerotia, Kia meinga koe e te Atua kia rite ki a Eperaima, kia rite hoki ki a Manahe: na, ka maka e ia a Eperaima ki mua i a Manahe.

²¹ Na, ka mea mai a Iharaira ki a Hohepa, Ka mate tenei ahau: a ka tata mai te Atua ki a koutou, ka whakahoki atu hoki i a koutou ki te whenua o o koutou mātua.

²² Na, kotahi te wahi ka hoatu nei e ahau mou, e hira ake ai tou i to ou tuakana, ko taku hoki i tango ai i nga Amori ki taku hoari ki taku kopere.

UPOKO 49.

Na, ka karanga atu a Hakopa ki ana tamariki, a ka mea atu, Huihui mai koutou, a ka korerotia atu e ahau ki a koutou nga mea e pono mai ki a koutou i nga ra o te whakamutunga.

² Huihui mai, whakarongo hoki, e nga tamariki a Hakopa; whakarongo hoki ki a Iharaira ki to koutou papa.

³ E Reupena, ko koe taku matamua, toku pakaritanga, me te timatanga hoki o toku kaha, te hiranga ake o te kororia, te hiranga ake hoki o te kaha:

⁴ He mea pokarekare, ano he wai, e kore koe e kake; mo to pikitanga i te moenga o tou papa; a pokea iho e koe i reira: i pikitia e ia ki toku takotoranga.

⁵ He tuakana he teina a Himeona raua ko Riwai; he mea nanakia a raua hoari.

⁶ Kaua e tomo, e taku wairua, ki roto ki to raua runanga; kaua e huihuia, e taku kororia, ki roto ki to raua whakaminenga: i patu tangata hoki raua i a raua e riri ana, a he whakaahuareka noa na raua i whakangongengonge ai raua i te kau.

⁷ Kia kangā ta raua riri, i kaha nei; me ta raua aritarita, no te mea he nanakia: ka wehea atu raua e ahau ki roto ki a Hakopa, ka whakamararatia atu hoki raua ki roto ki a Iharaira.

⁸ E Hura, ko koe e whakamoemititia e o tuakana e o teina: ka u to ringaringa ki te kaki o o hoa riri; ka piko iho ki a koe nga tamariki a to papa.

⁹ He kuao raiona a Hura: i kake atu koe, e taku tamaiti, i te haenga: i piko iho ia, i tapapa iho ia, i pera me te raiona, i pera hoki me te raiona katua; ma wai ia e whakaoho?

¹⁰ E kore e riro ke te hepeta a Hura, me te kai whakatakoto tikanga o roto o ona waewae, kia tae mai ra ano a Hiro; a ki a ia te huihuinga o nga iwi.

¹¹ Ka herea e ia tana kuao ki te waina, te tamaiti hoki a tana kaihe ki te waina pai; ka horoia e ia ona kakahu ki roto ki te waina, ona weruweru hoki ki te toto o te karepe:

¹² Mumura tonu ona kanohi i te waina, ka ma hoki ona niho i te waiu.

¹³ Ka noho a Hepuruna ki te wahapu o te moana; hei wahapu ano ia mo nga kaipuke; ka tutuki atu hoki tana rohe ki Hairona.

¹⁴ He kaihe kaha a Ihakara, e tapapa iho ana i waenganui i nga pikaunga e ma:

¹⁵ A tona kitenga i te okiokinga he mea pai, i te whenua hoki he ahuareka; na ka tukua iho tona pokohiwi ki te nikaunga, a meinga ana ia hei pononga homai takoha.

¹⁶ Ka whakariterite whakawa a Rana mo tona iwi, ka pera ano me tetahi o nga iwi o Iharaira.

¹⁷ Hei nakahi a Rana ki te ara, hei neke hoki ki te huarahi, hei ngau i te rekereke o te hoiho, a ka hinga ki muri tona kai eke.

¹⁸ E tatari atu ana ahau ki tau whakaoranga, e Ihowa.

¹⁹ Ko Kara, ka hinga ia i te ope: otiia ka riro mai i a ia te papa.

²⁰ Ko ta Ahera, ka momona tana taro, a he kai kingi ona hua.

²¹ He hata kua tukua kia haere a Napatari: e homai ana e ia nga kupu papai.

²² He peka hua a Hohepa, he peka hua i te taha o te puna; e totoro atu ana ona manga ki tua o te taiepa:

²³ I whakatupu-kino nga kai kopere i a ia, i pere mai hoki, i kino hoki ki a ia:

²⁴ Otiia i mau tana kopere i runga i te kaha, a i whakapakaritia nga tākakau o ona ringa e nga ringa o te Kaha o Hakopa; (no reira nei te hepara, te kamaka o Iharaira:)

²⁵ Ara, e te Atua o tou papa, mana ano koe e awhina; e te Kaha rawa hoki, mana ano hoki e tuku mai ki a koe nga manaakitanga o te rangi i runga, nga manaakitanga hoki o te rire e takoto ana i raro, nga manaakitanga o nga u, o te kopu hoki:

²⁶ Hira ake nga manaakitanga a tou papa i nga manaakitanga a oku tupuna, tae noa atu ki tera taha o nga pukepuke tu tonu: ka tau iho ena mea ki runga ki te mātenga o Hohepa, ki te tumuaki hoki ona i motuhia atu nei i ona tuakana.

²⁷ Ka haehae a Peniamine ano he wuruhi: ka kainga e ia te tupapaku i te ata, a i te ahiahi ka tuwha e ia nga taonga parakete.

²⁸ Ko enei katoa nga iwi kotahi tekau ma rua o Iharaira: ko te korero ano hoki tenei a to ratou papa ki a ratou, me tana manaakitanga hoki i a ratou; i manaakitia ratou e ia, tenei tangata tenei tangata, me tona manaakitanga ano.

²⁹ A i whakahau ano ia i a ratou, i mea ki a ratou, Ka kohia atu ahau ki toku iwi: tanumia ahau ki roto ki oku mātua ki te ana i te wahi oneone o Eperona o te Hiti,

³⁰ Ki te ana i te parae o Makapera, i te ritenga mai o Mamere, i te whenua o Kanaana, ki tera hoki i hokona tahitia me te parae e Aperahama i a Eperona Hiti, kia puritia hei tanumanga.

³¹ I tanumia e ratou a Aperahama raua ko Hara ko tana wahine ki reira; i tanumia a Ihaka raua ko Ripeka ko tana wahine ki reira; i tanumia hoki a Rea e ahau ki reira.

³² I hokona te parae me te ana i reira ki nga tamariki a Hete.

³³ A ka mutu te whakahau a Hakopa, ki ana tamariki, na, ka pepeke ake ona waewae ki roto ki te moenga, a ka hemo, a ka kohia atu ki tona iwi.

UPOKO 50.

Na, ka hinga iho a Hohepa ki runga ki te mata o tona papa, a ka tangi i runga i a ia, ka kihi hoki i a ia.

² Na, ka whakahau a Hohepa i ana tangata, i nga kai rongoa, kia whakapakokotia tona papa; na whakapakokotia ana a Iharaira e nga kai rongoa.

³ Na, ka tutuki ona ra e wha tekau; ko nga ra hoki ena e whakatutukitia ana mo te hunga e whakapakokotia ana: a e whitu tekau nga ra i uhungatia ai ia e nga Ihipiana.

⁴ A ka taka nga ra e uhungatia ai ia, na, ka korero a Hohepa ki te whare o Parao, ka mea, Na, ki te mea kua manakohia mai ahau e koutou, tena, korero atu ki nga taringa o Parao, mea atu,

⁵ I whakaoati toku papa i a au, i mea, Ka mate tenei ahau: hei roto i taku tanumanga i keria e ahau moku ki te whenua o Kanaana, hei reira ahau tanumia ai e koe. Na, kia tukua ahau e koe aianei kia haere ki runga ki te tanu i toku papa, ka hoki mai ai.

⁶ Na, ka mea mai a Parao, Haere ki runga ki te tanu i tou papa, kia rite ki tana i whakaoati ai i a koe.

⁷ Na, haere ana a Hohepa ki runga ki te tanu i tona papa, a i haere tahi ano i a ia nga pononga katoa a Parao, nga kaumatua o tona whare, me nga kaumatua katoa o te whenua o Ihipa,

⁸ Me te whare katoa ano hoki o Hohepa, ratou ko ona tuakana, me te whare ano hoki o tona papa; ko a ratou tamariki anake, me a ratou hipi, me a ratou kau i mahue atu i a ratou i te whenua o Kohena.

⁹ A i haere tahi ano hoki i a ia nga hariata me nga tangata hoiho: a he nui whakaharahara te tira.

¹⁰ Na, ka tae mai ratou ki te patunga witi a Atara, ki tera taha o Horano, a, he tino nui whakaharahara te tangihanga i tangi ai ratou ki reira: a e whitu nga ra i uhungatia ai e ia tona papa.

¹¹ A ka kite nga tangata whenua, nga Kanaani, i te uhunga i te patunga witi a Atara, na ka mea ratou, He uhunga nui tenei na nga Ihipiana: no reira i huaina ai te ingoa o reira ko Apere-Mitiraima, kei tera taha hoki o Horano.

¹² Na, rite tonu ki tana i whakahau ai ki a ratou ta ana tamariki i mea ai ki a ia:

¹³ I kawea hoki ia e ana tamariki ki te whenua o Kanaana, a tanumia ana ki roto ki te ana i te parae o Makapera, i hokona tahitia nei e Aperahama me te parae i a Eperona Hiti, kia puritia hei tanumanga, kei te ritenga atu o Mamere.

¹⁴ Na, hoki ana a Hohepa ki Ihipa, ratou tahi ko ona tuakana, ko nga tangata katoa ano hoki i haere tahi i a ia ki runga ki te tanu i tona papa, i te mutunga o tana tanumanga i tona papa.

¹⁵ A te kitenga o nga tuakana a Hohepa kua mate to ratou papa, na, ka mea ratou, Tera pea e kino mai a Hohepa ki a tatou, a ka utua mai e ia a tatou kino katoa i meatia e tatou ki a ia.

¹⁶ Na, ka tuku tangata atu ratou ki a Hohepa, a ka mea atu, I whakahau mai to papa i mua ake i tona matenga, i mea mai,

¹⁷ Kia penei ta koutou kupu ki a Hohepa, Tena, whakarerea noatia iho te he o ou tuakana, me to ratou hara; he kino hoki ta ratou mahi ki a koe: na, tena, whakarerea noatia iho te he o nga pononga a te Atua o tou papa. A ka tangi a Hohepa i ta ratou korerotanga atu ki a ia.

¹⁸ A i haere mai ano hoki ona tuakana, a ka hinga iho ki tona aroaro; ka mea, Tenei matou hei pononga mau.

¹⁹ A ka mea atu a Hohepa ki a ratou, Kaua e wehi: he kai whakakapi oti ahau mo to te Atua wahi?

²⁰ Ko koutou hoki, i he ta koutou whakaaro ki a au; he pai ia ta te Atua whakaaro, kia meatia ai tenei inaianei, kia whakaorangia ai hoki nga tangata tokomaha.

²¹ Na, kaua ra e wehi: maku koutou e atawhai, koutou ko a koutou tamariki. A ka whakamarie ia i a ratou, ka whakamama hoki i o ratou ngakau.

²² Na, ka noho a Hohepa ki Ihipa, ratou ko te whare o tona papa: a kotahi rau kotahi tekau nga tau i ora ai a Hohepa.

²³ A i kite a Hohepa i te tuatoru o nga whakatupuranga o nga tamariki a Eperaima: i whakatupuria ano hoki nga tamariki a Makiri a te tama a Manahe ki runga ki nga turi o Hohepa.

²⁴ Na, ka mea a Hohepa ki ona tuakana, Ka mate ahau, a ka tikina mai koutou, ka ata tirohia e te Atua, a ka kawea atu koutou e ia i tenei whenua, ki runga ki te whenua i oati ai ia ki a Aperahama, ki a Ihaka, ki a Hakopa.

²⁵ Na, ka whakaoatitia nga tamariki a Iharaira e Hohepa, a ka mea ia, Ka tikina mai koutou, ka ata tirohia e te Atua, a me kawe atu e koutou oku iwi i konei ki runga.

²⁶ Na, ka mate a Hohepa i te kotahi rau i te kotahi tekau o ona tau: a ka whakapakokotia ia e ratou, ka whakatakotoria hoki ki roto ki te kawhena i Ihipa.