Святое Евангелие (эрзянь)/В/Лукань/09

[ 168 ]

Глава 9.

¹Кемгавтотьнень тердезь, максь тенст вій да покш чи весе амазытнень лаҥгс да ормань пичкавтлемс-как. ²Кучинзе сынст Пазонь инязорокс чиденть ёвтлеме да сэредицятьнень шумбралгавтомо. ³Сон мерьсь тенст: ки лаҥгс мезе-як илядо сайть, а палка, а котума, а кше, а сія; кавонст одижаҥк-как иляст ульть. ⁴Кодамо кудос соватадо, тоск кадоводо, тосто уж кис-как лиседе. ⁵А косо а приматадызьдеряй, се ошостонть лисьместэ лангозост нефтимань кис пильгезэҥк педязь пульсть-как чукиҥк. ⁶Сынь, туезь, якасьть велева, эрьва косо паро кулянь ёвтлезь да сэредицянь пичкавтлезь.

[ 169 ] ⁷Сонзэ тевтнеде марясь нилетькс частень Инязоро Ирод-гак да эзь сода, мезьть арсемс-как: веенцт кортасть: Іоанн кулозьде вельмесь, ⁸омбонст — Илія сась, а ліят — кодамо-як кезэрень пророкнень эйстэ вельмесь. ⁹Ирод мерьсь: Іоаннань мон прязо керія; ки ино тевате, конатадо мон истят марян. Да бажась Сонзэ нейме. ¹⁰Апостолтнэ, мурдазь ёвтлесть Тензэ, мезе сынь тейсть. Сон, сынст саезь, тусь марост ве Вифсаида лемсэ ош маласо чаво таркас. ¹¹А народсь, теде содазь, мольтсь мельганзо; Сон, сынст примазь, кортась марост Пазонь Инязорокс чиденть, а кинень эрявсь ормадо віеммекс — віемтинзе.

¹²Кода чизэ кармась чокшнэ ёнов велявтомо, састь ваксозонзо кемгавтовотьне да мерьсть Тензэ: ведь минь тесэ чаво таркасотанок, нолды ломатьнень, молест перька велетненень удомо, да ярсамонь вачамо. ¹³А Сон мерьсь тенст: тынь максодо тенст ярсамс. А сынь мерьсть: минек вете кшеде, да кавто калдо башка мезенек-как арась; ара мольмекс тенек да весе не ломатьненень ярсамс рамамс? ¹⁴Ведь ломатнеде ульнесть вете тыстяшка. Сон мерьсь тонавтницянстэнь: озавтниҥк сынст рядс ветгеменень—ветгеменень. ¹⁵Сынь тейсть истя, весемень озавтнизь. ¹⁶Сон вете кшетнень да кавто калтнэнь саезь, вачтась менельсть лаҥгс, баславинзе сынст да, синтрезь, максынзе тонавтницянстэнь ломатьненень явшемс. ¹⁷Весе ярсасть да пешкедсьть да сындест мейле кадовозь сускомотьнеде пурнасть кемгавтово кептереть.

¹⁸Весть Сон ськамонзо таркасо ознось, [ 170 ]тонавтницянзо-як маронзольть. Сон кевстинзе сынст, мерезь: кикс ловсамизь Монь ломатьне? ¹⁹Сынь мерьсть каршонзо: Іоанн Крестителькс, а конат — Иліякс, конат мерить, — кодамо-як кезэрень пророкнэнь эйстэ вельмесь. ²⁰Сон мерьсь тенст: а тынь кикс Монь ловсамизь? Петр мерьсь каршонзо: Пазонь Христозокс. ²¹Сон кеместэ кардынзе сынст, штобу кинень-гак теде иляк ёвтлек, ²²мерезь: Ломанень Цёрастень ламо пиштевтемс сави, атятнень, архіерейтьнень да книжникнень пельде апримазь ульма Тензэ, маштозь ульма да колмоце чистэ мекев вельмима.

²³Мейле весеменень мерьсь: кинь мельзэ ули Монь мельган молемс, се эсь прянзо стувтоссо саессэ эсь крёстонзо да Монь мельга молезэ. ²⁴Ведь кинь мельзэ эсь оймензэ ванстомс, се ёмавцазо сонзэ. А ки ёмавцазо Монь кис оймензэ, се вансцазо сонзэ. ²⁵Кодамо лезэсь ломанстень, сайсазодеряй сон весе мастор лаҥгсоть эстензэ, а эсь прянзо ёмавцазо, или коласазо? ²⁶Ведь ки виздилгады Моньдень, да Монь валдон, седе Ломанень Цёрась-как виздилгады, кода Сон сы эсь покш чисэнзэ, Тетянзо да святойть Ангелтнэнь-гак покш чисэст. ²⁷Видьстэ кортан теҥк: улить конат-конат тесэ аштицятнень ютксо, конат а неить куломодо Пазонь инязорокс чиньть неймезэст.

²⁸Не валтнэде мейле, кавксошка чинь ютазь, саинзе Сон Петрань, Іоаннань, Іаковонь да куйсь пандо пряс озномо. ²⁹Озномстонзо Сонзэ шачозо ліякс велявтсь, одижанзо теевсть ашокс, вандолдыцякс. ³⁰Маронзо кортлесть кавт ломать, конат ульнесть: [ 171 ]Моисей, да Илія. ³¹Сынь, покш чисэст неявозь, кортасть маронзо Сонзэ Іерусалимсэ куломодонзо. ³²Петрань да мартонзо улезьтнень сайнинзе удомо. Кода сынь сыргойсть, неизь Сонзэ покш чинзэ да мартонзо аштицят кавт ломатьнень. ³³Кода кармасть сынь вакстонзо туйме, Петр мерьсь Іисуснэнь: Тонавтыця! паро тесэ тенек аштемс. Тейдянок колмо шалагат: вейкень Тонеть, вейкень Моисейнень, вейкень Иліянень. Сонсь-как эзь содак сон месть кортась. ³⁴Сонзэ тень кортамсто коначинзе сынст пиземе пель. Сынь пельсть потс совазь, тандадсть. ³⁵Пельсть потсто марявсь вайгель, кона кортась: Те Монь вечкезь Цёрам; Сонзэ кулсонодо. ³⁶Те вайгельсть марявмо шкане, Іисус кадовсь ськамонзо. Теде сынь чатьменьсть, мезе нейсть сеть читнестэ, кинень-гак эзть ёвтлек.

³⁷Пандо прястонть валгомодо мейле омбоце чистэнть вастызь Сонзэ ламо ломать. ³⁸Друк ломатьнень ютксто вейке, сергедезь, мерьсь: Тонавтыця! инялдан Тенть, вачтак монь цёран лаҥгс, — сон монь вейкине. ³⁹Сонзэ кунцисазо дух, да сон друк пижакали, кургстонзо човт чудить. Аньсяк парьсте муцямодо мейле каднусазо сонзэ. ⁴⁰Мон инялдокшнынь тонавтницят туртов сонзэ паньмекс да эзь паневть тенст. ⁴¹Іисус каршонзо мерьсь: эх, акемиця да колезь плема! Знярс Мон карман ульме мароҥк да кирьдеме эстэдеҥк! Ветик цёрат тезэ. ⁴²Ветямстонзо амазысь тувтызе сонзэ да кармась рестеемензэ. Іисус кардызе аванькс духсть, да эйкакшонть віемтезь, максызе тетянстэнь.

[ 172 ] ⁴³Дивасть весе Пазонть покш чизэнзэ. Весемень Сонзэ лаҥгс дивамо шкастонть Сон мерьсь эсь тонавтницянстэнь: ⁴⁴путыҥк тынь не валтнэнь пилезэҥк: Ломанень Цёрась максозь ули ломатьнень кедьс. ⁴⁵А сынь эзизь чаркодть те валсть: сон сынст эйстэ вельтязь ульнесь, секс эзизь чяркодть, а Сонзэ кевстемс те валдонть пельсть. ⁴⁶Сась превезэст: ки юткстост весемеде покш. ⁴⁷Іисус, седейсэ арсимаст содазь, сайсь эйкакш, аравтызе икелензэ, ⁴⁸да мерьсь тенст: ки те эйкакшонть Монь лемень кис примасазо, се Монь примасамам; а ки Монь примасамам, се Монь кучицянть примасазо. Ки ютксоҥк весемеде вишкене — се ули покш.

⁴⁹Іоанн каршонзо мерьсь: Тонавтыця! Минь неинек Тонть лемсэ амазынь пансиця ломань да кардынек сонзэ, мейс сон минек марто а яки. ⁵⁰Іисус мерьс тензэ: илядо картле: ведь ки аволь каршонк, се тынк кис ашти. ⁵¹Кода кармасьть пачкодме Сонзэ те чистэ сайме чинзэ, Сон мелензэ сайсь Іерусалимев мольме. ⁵²Кучсь эсь икелензэ валонь пачтицят. Сынь тусть да Самарянонь велес совасть Сонензэ анокстамо. ⁵³Тосо содасть Сонзэ Іерусалимев мольмедензэ да эзизь примак. ⁵⁴Тень неезь, тонавтницянзо Іаков да Іоанн мерьсть: Тонавтыця! ули мелеть, минь мердянок менельстэ тол валгозо да сынст маштыньзе, кода тейсь Илія? ⁵⁵Сон, ёност велявтозь, кардынзе сынст да мерьсь: Тынь тынсь как асодатадо, кодамо превсэтядо. ⁵⁶Ведь Ломанень Цёрась сась аволь ломань ойметьнень ёмавтомо, а ванцтомо. Мейле тусть сынь лія велес.

[ 173 ] ⁵⁷Кіява мольместэст ве ломань мерьсь Тензэ: Господи! ков Тон иля мольть, мон мельгат молян. ⁵⁸Іисус мерьсь тензэ: ривезтьнень улить варяст^[1], менелень нармутьнень-гак улить пизэст, а Ломанень Цёраньть арась прянь путомс тарказо-як. ⁵⁹А омбоценень мерьсь: мольть Монь мельган. Се мерьсь: Господи! мерьть тень васня тетянь калмамо мольме. ⁶⁰А Іисус мерьсь тензэ: кадыть кулозтнень эсь кулозест калмамо, а тон мольть да Пазонь Инязорокс чиденть ёвтлек. ⁶¹Истяжо мерьсь омбоцесь-как: Господи! Тонть мельга молян, мерьть аньсяк тень васня монсинь кудосотнень марто простямо мольме. ⁶²Іисус мерьсь тензэ: Эрьва ки, конась путсынзе кедензэ сока лаҥгс да сонсь удалов ваны, се Пазонь Инязорокс чисэнть аволь кемма ломань.

---

1. нораст, пизэст.