Author:რამაზ კუპრავა

რამაზ კუპრა — გჷშარჩქინელი ქორთუ პოეტი; დებადჷ ნოღა ზუგდიდს, სოდეთ გურაფლენდჷ დო ათუ III ოშქაშე წოფულა. თიმ წანას მიშართჷ ივანე ჯავახიშვილიშ ჯოხონობაშ ქართიშ სახენწჷფო უნივერსიტეტიშა, ნამუთ ათუ ჟურნალისტიშ დიპლომით. სტუდენტალაშ წანეფს რამაზ კუპრაქ დემაჸალჷ პოეტი შოთა ჩანტლაძეს. უნივერსიტეტწკჷმა ართო იგურუ უნივერსიტეტიშ ოზეს "შოთაშ აკადემია" - ს. მისჷთ "ისტმატ", "დიამატ", "პარტ. ისტორიაშ" გურაფაშა გურ ვემიალედესჷნი, ათაქ, "შოთაშ აკადემია" -ს უსხუნუდეს "გურაფა". თაქ, შხვა პოეტეფი დო ჭარუეფწკჷმა ართო, გეჩინებაფუ გჷმორჩქინელი ქორთჷ ჭარუ - გურამ დოჩანაშვილი... ჟურნალისტიშ დიპლომიშ ეჭოფუაშ უკული, სოხუმს, "საბჭოთა აფხაზეთი" - შ (აფხაზეთის ხმა), რედაქციას ქიდიჭყჷ ხანდა. 30 წანაშ უკული, აფხაზეთის, რუსეთ-საქორთუოშ ლჷმაშ პერიოდის გეგნიჸონეს აფხაზეთიშ ტელე-რადიო კომპანიაშ ქორთული პროგრამეფიშ რედაქტორო. რამაზ კუპრას ართიანს მინონწკარილი ტომეფით ვეგნუშულიდჷ მუში მაკითხირალეფი. გიშაშქუმალირი აფჷ - "ლექსები", "ლურჯი ბორანი", "მონოლოგი", "მიხაკები მთვარეზე", "ირიათონი" თიში ოთეატრე რეცენზიეფი დო შხვადოშხვა სტატიეფი უმუხარცქუო ენიწკიპატუდ პრესაშ ხიმფორეფს. რამაზ კუპრას მუში ჟურნალისტური ბიოგრაფიაშ ართ-ართ ოსარკალაია ხიმფორო მიოჩქუდ მარგალური (კოლხური) ნინაშა გაზეთ "მაფშალია"- შ გიშაშქუმალა. ქორთული ნინაშა ჭარილი დო გიშაშქუმალარო გახაზირებული აფჷდ "გიშნაგორა" დო პუბლიცისტური წიგნი "მეგრელთა სულიერი და ფიზიკური გენოციდის მცდელობა". 71 წანერი რამაზ კუპრაქ რინა გასურჷ 2010 წანაშ 17 ეკენიას. დასუფულებური რე ზუგდიდს, მანცხვარკარიშ სასაფულეს.

ლაზონა დო მარგალონა

აწნარაგადიშ მანგიორო

ქვერსემ ქიანაშ დო ირდიხას ჩინებულ კულტურაშ მინჯე, ორქო-ვარჩხილიშ გინმანდღულაფარ, ფარაშ მონეტეფიშ მუმაჭკირალ კოლხეფს ჭარილობა ვაუღუდესიან, ამდღარშო თე რაგადი, ქექას ქობთქუათუნი, უმართობა რე, ინა ვარ, წკონდა წყარიშ აბსურდი! „ისტორიაშ მუმათ“ ჩინებულ ჰეროდოტექ ჯვეშ წანეფიშ ეკოროცხუაშ III უკუნს ზოჯ: კოლხეფს ჭარილობა მითაჟამშე უღუდესია. თიწკუმა, მუჟამს ვარენო შუმერეფიშ, ფინიკიურეფიშ, კართაგენურეფიშ, ეტრუსკეფიშ ჯვეშშეჯვეშ ცივილიზაციეფი დიხაშ ოჭიშიშე გინოხინწელეფ რენანი, ჩქი კოლხეფქ ქუდოფსქიდით დო ღორონთიშ ჭყოლოფუათ შურ ქომდგუნა, დო მუთ ვარენო ჩქინო ირფელიშ უმოსო ოხიოლე რენი, ვაღურე კოლხური ნინა... მარგალეფს დო ლაზეფს ოკო უმარდუდას ოქიანე თის, ნამდა უნიკალური კოლხურ ნინა ამდღარ დღაშა ხოლო თეშ რწკინუნს, მუჭოთ უკუნეფიშ კინოხ რწკინუნდუნი... მარგალურ (კოლხურ) პოეზიას წოხოლე ქვერსემ პოეტური კულტურა ეწუჯღუნდუნი თეს, თუდოლე მოჸუნაფილ ფილოსოფიური, მოკო ფთქუე, კოსმოსური, გენიალურო ჩქინობურა ლაწკარეფი ხოლო აარგამენს:

„ბჟა დიდა რე ჩქიმი,
თუთა - მუმა ჩქიმი,
ხვიჩა-ხვიჩა მურიცხეფი
და დო ჯიმა ჩქიმი...“

პოეტეფს ბჟა, თუთა დო მურიცხეფწკუმა უღუდეს რაგადი. ბჟა, თუთა დო მურიცხეფიშ და დო ჯიმალეფს ღორონთიშ კართეშა აფუდეს დუდ მიკოდვალირი დო შური იროიანო მეჩამილი... ათეშენ გინატუ ღორონთქ ჩქინ ნინა, ჩქინ პოეზია, ათეშენ გინმოტეს ჩქი - კოლხეფი! ნარაგადი რე, სი სქან ვაიჸორსია-და, შხვაშ ვეგეჸოროფებუნია. მა რინაშა ხოლო მისხუნ აიეტი, მედეა, ქუჯი, გუბაზი, ჭყონდიდური იჩიებუდესინი თი ონწეშ ნინა. თე ნინაშა ამდღარდღაშა ჩქი - მარგალეფი დო ლაზეფი ბრაგადანთ, ბჭარუნთ... ჩქინ ქიანა, უნიკალურ ქიანა რე. მიღუნა სუმ ნინა: ქორთული, მარგალური (კოლხური) დო შონური... ათე უნიკალურობა ოკო ოპეკუდას ამდღა არძა წუწელ კოლხის დო იბერს. ბრელ ანტიკოლხურო მორხინილ კოჩქ, ნამუთ ირო სეპარატიზმიშ აგაგას ორწყენი, ოკონო, ვაკონო შარა ვარე მარგალურ (კოლხურ) ნინაშა ჭარილ ნოველეფს, ლერსეფს, რომანეფს ვემიარჩქვანანი... ღორონთქ ვამომლასან ჩქინ უჰამაშ, უქექაშ, უტომბაშ, უსქვამაშ დო უკოროცხუ ორქო-ბრილიანტით ეფშა მარგალურ ნინაშა ჭარუა დო კითხირი....

ლერსეფი

პოემეფი

პუბლიცისტიკა

მარგალურ(კოლხურ) ნინა მარგალური ნინა რე...